1. Mazuba ngitupona asiyene biyeni amazuba aachiindi?

MAZUBA ngitupona alisiyene amazuba aachiindi. Businsimi buli muBbayibbele butondeezya kuti Jehova ulikubungania “inkamu impati yabantu . . . bazwa kuzisi zyoonse akumisyobo yoonse akumikowa yoonse akumyaambo yoonse.” Nkamu eeyi ipanga “mukowa mupati” ulaabantu babotelwa biinda ku8 miliyoni, ‘babelekela Leza sikati amansiku.’ (Ciy. 7:9, 15; Is. 60:22) Mazubaano, bantu bakomba Jehova baliikuvula kwiinda chiindi alubo bali aluyando aakati kabo.

2. Nziizili zintu nzibayandisya bantu bakumazuba aakumamanino? (Langa chifanikisyo chili kumatalikilo achiiyo.)

² Nikuba boobo, businsimi buli muBbayibbele bwakaamba kuti bantu bapona kumazuba aakumamanino bakali kuyooyandisya zintu zisiyene-siyene. Mwaapostolo Pawulu wakalemba kuti: ‘Kumazuba aakumamanino, . . . bantu bayooba basikuliyanda, basimuyanda mali, . . . bayandisya zyakulikondelezya kwiinda Leza.’ (2 Tim. 3:1-4) Zintu nzibayandisya bantu bakumazuba aakumamanino zilisiyene azintu nzibayandisya maKristu bakasimpe. Kuliyanda, kuyandisya mali azyakulikondelezya  takupi kuti bantu babotelwe pesi kupa kuti buumi ‘bukataazye.’

3. Tuyoolanga-langaanzi muchiiyo eechi alubo nkamboonzi?

³ Pawulu wakabona kuti muuya wakuyandisya zintu zilimunyika ulakonzya kunyongania maKristu. Nkinkaako, wakapa nchenjezyo yakuti ‘tubafutatile’ bantu bayandisya zintu zilimunyika. (2 Tim. 3:5) Nikuba boobo, tatukonzyi kubatantamuka chakumaninina bantu bali boobo. Nkinkaako, kujana twawutantamuka biyeni muuya wakuyandisya zintu zilimunyika akwiinkilila kunembo katuchita zintu zibotezya Jehova? Atulange-lange mbukusiyene kuyanda Leza akuyanda zintu zyaambidwe muli 2 Timoteo 3:2-4. Kuchita oobo kuyootugwasya kuti tulilange-lange akuti tuyande zintu zipa kuti tukkutisikane akuti tubotelwe.

4. Nkamboonzi nikutali kubi kuliyanda munzila iilikabotu?

⁴ Pawulu wakalemba kuti “bantu bayooba basikuliyanda.” Nkubi na kuliyanda? Teekubi pe pesi tweelede kuliyanda munzila iilikabotu. Mbaakatulenga Jehova. Jesu wakati: “Koyandisya mweenzinyoko mbubonya mboliyanda omwini.” (Marko 12:31) Kuti katutaliyandi tatukonzyi kuyanda basimayakilane. Alubo Bbayibbele lyaamba kuti: ‘Baalumi beelede kuyanda banakazi babo mbuuli mibili yabo beni. Uuyanda mukakwe waliyanda mwini. Nkaambo taakwe muntu uusula mubili wakwe mwini, pe, ulawusanina akuubamba kuti ubote.’ (Ef. 5:28, 29) Nkinkaako, tweelede kuliyanda munzila iilikabotu.

5. Kujana wabapandulula biyeni bantu baliyanda zyiindilide?

⁵ Kuliyanda kwaambidwe muli 2 Timoteo 3:2, takuli kabotu pe. Nkuliyanda zyiindilide. Bantu baliyanda munzila eeyi, balalisumpula. (Bala BaRoma 12:3.) Bayeeya zintu zigwasya mbabo luzutu. Tabababikkili maanu bamwi. Kuti babisya tabazumini pe pesi batamikizya bamwi. Bantu baliyanda tababotelwi chachoonzyo pe.

6. Kuyanda Leza kupa kuti tulimvwe biyeni?

⁶ Basikulanga-langa makani aamuBbayibbele bakaamba kuti mulugwalo lwa2 Timoteo 3:2-4, Pawulu wakasaanguna kwaamba atala akuliyanda nkaambo nkuko kupa kuti bantu bachite zimwi nzyakazoowamba. Mukusiyana azeezi, bantu bayanda Leza teembubachita pe. Bbayibbele lyaamba kuti bantu bayanda Leza balabotelwa, bali aluumuno, bali amoyo mulamfu, bali aluzyalo, batondeezya bubotu, bali alusyomo, balalibombya akulinyona. (Gal. 5:22, 23) Sintembawuzyo wakati: “[Balikkomene, NW] bantu bajisi Jehova kuba Leza wabo!” (Int. 144:15) Jehova nguLeza uubotelwa alubo bakombi bakwe balabotelwa. Kusiyana abantu baliyanda batayandi kugwasya bamwi, bantu bakomba Jehova balabotelwa chiindi nibagwasya bamwi.​—Inc. 20:35, NW.

7. Njiili mibuzyo iikonzya kutugwasya kuti tulilange-lange?

⁷ Niinzi chikonzya kutugwasya kubona kuti twaabuliyanda zyiindilide kwiinda Leza? Tulakonzya kuyeeyesesya lulayo luli muli BaFilipi 2:3, 4 luti: “Mutaciti cintu niciba comwe cabbivwe nanka cakulisumpula, pele umwi aumwi akati kanu alibombye mumoyo, akuyeeya kuti mweenzuma mubotu kwiinda ndime. Tamweelede kuyeeya kuligwasya  nubeni luzutu, pe, umwi aumwi uleelede . . . kugwasya mweenzinyina.” Tulakonzya kulibuzya kuti: ‘Ndilaabelesya na malayilile aaya? Ndichita kuyanda kwaLeza amoyo woonse na? Ndilabagwasya na bamwi mumbungano akukambawukila bamwi?’ Kulipeda teekuuba pe. Kuyanda kubeleka changuzu akuleka kuchita zimwi zintu. Pesi taakwe chimwi chintu chibotu chiinda kuziba kuti tulatambulika kuMulengi wanyika yoonse.

8. Kuyanda Leza kwakapa kuti bamwi bachiteenzi?

⁸ Kuyanda Jehova kwakapa kuti bamwi basiye milimu yaajulu kuti bachite zyiingi mukubelekela Jehova. Umwi mwanakazi uutegwa Ericka uukkala kuAmerica ngudokotela. Pesi wakasala kupayona amulumaakwe kwiinda kuti achite zyiingi mumulimu wakwe alubo bakakambawukila mumasena aasiyene-siyene. Wakaamba kuti: “Kugwasilizya kumasena kwaambuulwa imwi milaka abeenzuma mbitwakajana zyakapa kuti tubotelwe. Ndichili dokotela pesi kubelesya chiindi chiingi amanguzu kuti ndisilike bantu muzintu zyabukombi akuchita zyiingi mumbungano kundipa kubotelwa kwachoonzyo akukkutisikana.”

9. Nkamboonzi kuyandisya mali nikutapi kuti muntu abotelwe?

⁹ Pawulu wakaamba kuti bantu bayooba “basimuyanda mali.” Umwi mukwesu wakali kupayona kuIreland wakakambawukila umwi mwaalumi atala aLeza. Mwaalumi ooyo wakagwisya mali munkomo mpawo wakamubuzya kuti: “Ooyu nguuleza wangu!” Mazubaano, bantu biingi biiyandisya loko mali nikuba kuti tabaambi pe. Bbayibbele lituchenjezya kuti: “Muntu uuyandisya mali takonzyi kukuta mali, ayooyo uuyandisya imbono takonzyi kukuta impindu.” (Muk. 5:10) Bantu bali boobu tabakkutisikani pe amali njibalaayo, nkinkaako eezi zibeetela ‘machise miingi.’​—1 Tim. 6:9, 10.

10. Bbayibbele lyaambanzi atala akunota akufwaba?

¹⁰ Mali ilayandikana, nkaambo ilatukwabilila. (Muk. 7:12) Kujana muntu wabotelwa na kuti kali aamali iikkwana zintu ziyandikana luzutu mubuumi? Iiyi ulakonzya kubotelwa. (Bala Mukambausi 5:12.) Aguri mwana waJake wakalemba kuti: “Utandipi bucete nanka buvubi, undisanine zilyo zyeelede.” Alubo wakapandulula kaambo kakali kupa kuti atayandi kufwabisisya. Wakati kufwaba kwakali kuzoopa kuti abbe alubo eezi zyakali kuyoosampawula Leza. Pesi nkamboonzi naakakombela kuti atanoti? Wakati: “Kuti ntakutisyi akukukaka cakwaamba kuti, Ma! Ngwani Jehova?” (Tus. 30:8, 9) Eezi zilakonzya kupa kuti uyeeye bantu bayandisya mali kwiinda Leza.

11. Nduululi lulayo Jesu ndwaakapa atala akuyandisya bunoti?

¹¹ Bantu bayandisya mali tabakonzyi kubotezya Jehova. Jesu wakati: “Taakwe muntu uukonzya kumanina bami bobile milimo, nkaambo ulasula umwi, ulayanda umwi, na ulakakatila umwi, ulasampaula umwi. Tamukonzyi kubelekela Leza antoomwe alubono.” Katanaamba majwi aali aajulu, Jesu wakati: “Mutaliyobwedi lubono ansi ano, mpaabisya mapempya ankalaya, ababbi mpobatulula kuti babbe. Amuliyobwede lubono kujulu, nkwaatabisyi mapempya ankalaya, ababbi nkubatatululi kuti babbe.”​—Mt. 6:19, 20, 24.

12. Kupona buumi buuba kujana kwatugwasya biyeni kuti tubelekele Leza? Pa chikozyano.

 ¹² Bamwi bakabona kuti kupona buumi buuba takweeti kubotelwa luzutu pesi kupa kuti babelekele Jehova. Jack uukkala kuUnited States wakawuzya ng’anda abbizinesi njakalaayo kuti akonzye kupayona amukayintu wakwe. Wakati: “Teekwakali kuuba pe kuti tuuzye ng’anda yesu azintu nzitwakalaazyo. Kwaminyaka myiingi ndakali kukataazikana akaambo kazintu zyakali kuchitika kumulimu. Mukayintu wangu wakali payona wachiindi choonse alubo wakali kubotelwa. Wakali kundibuzya kuti: ‘Ndibelekela simalelo mubotu loko!’ Lino toonse tulikubelekela Muntu uumwi, Jehova nkaambo andime ndilikupayona.”

13. Niinzi chikonzya kutugwasya kuti tuzibe maboneno ngituli aawo atala amali?

¹³ Kuti tuzibe maboneno ngituli aawo atala amali, tweelede kulibuzya mibuzyo iitobela: ‘Maboneno ngindili aawo atala amali aleendelana na azyaambwa aBbayibbele? Ndibikka mali na mubusena bwakusaanguna mubuumi bwangu? Ndiyandisya zintu zyakumubili na kwiinda bweenzuma mbundili aabo aJehova abamwi? Ndilasyoma na kuti Jehova ulakonzya kundipa nzindiyanda mubuumi?’ Tweelede kuba achoonzyo chakuti Jehova tabalekelezyi pe bantu bamusyoma.​—Mt. 6:33.

14. Tweelede kukubona biyeni kulikondelezya?

¹⁴ Bbayibbele lyakaambilizya kuti kumazuba aakumamanino bantu ‘bayooyandisya zyakulikondelezya.’ Mbukunga kuliyanda munzila iilikabotu akuba amaboneno aalikabotu atala amali kulikabotu, akulako kulikondelezya munzila yeelede kulikabotu. Jehova tatukasyi kubotelwa alubo uyanda kuti tulikondelezye azintu zilikabotu. Bbayibbele lisungwaazya bakombi baLeza basyomeka kuti: “Kolya cilyo cako cakukondwa akunywa waini amoyo mubotu.”​—Muk. 9:7.

15. Nkulikondelezya kuli biyeni kwaambidwe mulugwalo lwa2 Timoteo 3:4?

¹⁵ Lugwalo lwa2 Timoteo 3:4, lwaambuula atala abantu batayandi Leza akaambokakulikondelezya.Umwi  sikulanga-langa makani aamuBbayibbele wakati: “Lugwalo oolu talwaambi kuti bantu aaba bayanda Leza azyakulikondelezya. Pesi lutondeezya kuti tabamuyandi biya pe Leza.” Eezi zitondeezya kuti bantu bayandisya zyakulikondelezya beelede kulilanga-langa. Majwi aakuti ‘bayandisya zyakulikondelezya’ aamba ‘bantu banyonganisigwa . . . azyakulikondelezya.’​—Lk. 8:14.

16, 17. Jesu wakali amaboneno aali biyeni atala azyakulikondelezya?

¹⁶ Jesu wakali amaboneno aalikabotu atala azyakulikondelezya. Chimwi chiindi wakiinka ‘kupobwe lyakukwatana’ ‘akupobwe pati.’ (Joh. 2:1-10; Lk. 5:29) Niyakamana wayini kupobwe lyakukwatana, Jesu wakachita chigambyo chakuchincha maanzi kuti abe wayini. Chimwi chiindi, bantu nibakasola Jesu kumakani akulya aakunywa, wakatondeezya kuti bantu aaba bakali amaboneno aatali kabotu.—Lk. 7:33-36.

17 Nikuba boobo, Jesu taakali kuponena zyakulikondelezya luzutu. Wakali kubikka ziyandwa aJehova mubusena bwakusaanguna alubo wakali kubeleka changuzu kuti agwasye bamwi. Wakafwida bantu kuti bakajane buumi butamani. Jesu wakabuzya batobeli bakwe kuti: “[Mulikkomene, NW] nibazoomutukila akumupenzya akumutamikizya zintu zibi zyoonse zyakubeja nkaambo kandime. Amukondwe akusekelela, nkaambo bulumbu bwanu bwakujulu mbupati, nkaambo mbubonya obo mbubakapenzya basinsimi ibakali kunembo lyanu.”​—Mt. 5:11, 12.

18. Njiili mibuzyo iikonzya kutugwasya kuti tuzibe maboneno ngituli aawo atala azyakulikondelezya?

¹⁸ Niinzi chikonzya kutugwasya kuti tuzibe maboneno ngituli aawo atala azyakulikondelezya? Tulakonzya kulibuzya mibuzyo iitobela: ‘Ndiyandisya zyakulikondelezya na, kwiinda kukambawuka akunjila miswaangano? Ndililipedelede na kusiya zimwi zintu kuti ndibelekele Leza? Zyakulikondezya nzindisala zipa kuti Jehova alimvwe biyeni?’ Kuyanda Leza kuyoopa kuti tutantamuke zintu nzyatayandi azintu nzituyeeyela kuti taziyandi.​—Bala Matayo 22:37, 38.

19. Mbantu bali biyeni batabotelwi chachoonzyo?

¹⁹ Kwayinda minyaka iili 6 000 bantu kabachita nzibayanda munyika yeendelezegwa aaSaatani pesi yaba afwiifwi kunyonyoonwa. Bantu biingi munyika balaliyanda, bayandisya mali azyakulikondelezya. Bantu aaba, babikka nzibayanda mubusena bwakusaanguna alubo baziyandisya loko. Bantu aaba tababotelwi pe. Nikuba boobo, sintembawuzyo wakalemba kuti: “[Ulikkomene, NW] uuli a-Leza wa-Jakobo kuba mugwasyi wakwe, uusyoma Jehova Leza wakwe.”​—Int. 146:5.

20. Kuyanda Leza kukugwasya biyeni kuti ubotelwe?

²⁰ Bakombi baLeza balikuzumanana kuyanda Leza alubo munyaka amunyaka balikuvula. Eezi zitondeezya kuti Bwaami bwaLeza buli kweendelezya akuti bwaba afwiifwi kweeta zilongezyo zyiingi aanyika. Kuchita kuyanda kwaLeza akuziba kuti nzituchita zilamubotezya kweeta kubotelwa kwachoonzyo. Bantu bayanda Jehova bayoobotelwa kukabe kutamani! Muchiiyo chitobela tuyoolanga-langa bube bwabantu bakumazuba aakumamanino mbubusiyene abube butondeezegwa abakombi baJehova.