Chiyubulusyo Chipa Kuti Tujatane
‘Nchobeni nchintu chibotu chibotezya, . . . kukkala antoomwe katujisini.’—INT. 133:1.
NYIMBO: 18, 14
1, 2. Nguuli muswaangano uyoopa kuti bakombi baLeza bajatane mumunyaka wa2018 alubo nkamboonzi? (Langa chifanikisyo chili kumatalikilo achiiyo.)
BAKOMBI baLeza abamwi bali achiyandisyo, bazoobunganaamwi mu31 March 2018 kuti bazoochite Chilalilo chaMwaami Chagoko chichitwa munyaka amunyaka. Muswaangano ooyu uyoochitwa lyakusekka lubaba zuba. Munyaka amunyaka, muswaangano ooyu utugwasya kuti tujatane munyika yoonse.
2 Zili antanganana kuti Jehova aJesu balabotelwa nibabona bantu biingi kababunganaamwi kuti bachite muswaangano ooyu uuyandikana. Bbayibbele lyakasinsima kuti “inkamu impati yabantu batabaliki kumuntu naba omwe, bazwa kuzisi zyoonse akumisyobo yoonse akumikowa yoonse akumyaambo yoonse” bayoowompolola kabati: “Lufutuko lulazwa kuli-Leza wesu uukede acuuno cabwami aku-Mwanambelele.” (Ciy. 7:9, 10) Zilabotezya kuziba kuti kubunganaamwi munyaka amunyaka katuyeeya Lufu lwaJesu kupa kuti Jehova aJesu balemekwe.
3. Njiili mibuzyo iyoosandulwa muchiiyo eechi?
3 Muchiiyo eechi tuyoosandula mibuzyo iitobela: (1) Kujana ndalibambila biyeni kuti ndizoonjile Chiyubulusyo akuti ndizoogwasigwe anchicho? (2) Chiyubulusyo chitondeezya biyeni kuti bakombi baJehova balijisini? (3) Kujana ndachita biyeni kuti ndikkale kandijisini abakombima? (4) Kuli nikuyooba Chiyubulusyo chakumamanino na? Kuti kakuli boobo, ndiilili?
KULIBAMBILA KUNJILA CHIYUBULUSYO AKUGWASIGWA ANCHICHO
4. Nkamboonzi nitweelede kweezya amanguzu eesu woonse kuti tunjile Chiyubulusyo?
4 Yeeyesesya atala ambukonzya kugwasigwa kuti wanjila Chiyubulusyo. Kukomba Leza kuswaanizya kunjila miswaangano yambungano. Nkinkaako Jehova aJesu balabotelwa nibabona bantu kabeezya amanguzu aabo woonse kuti banjile muswaangano uuyandikana uuchitwa kamwi amunyaka. Tuyanda kujanika kuChiyubulusyo kunze kwakuti twachiswa naakuti twachitikilwa zintu zyiinda manguzu eesu. Kuti twabeleka changuzu kuti tunjile miswaangano, kuyoopa kuti Jehova atazimi mazina eesu ‘mubbuku lyakwiibalusya’ naakuti ‘mubbuku lyabuumi.’ Mazina aali mubbuku eeli, ngabantu bayoojana buumi butamani.—Malk. 3:16; Ciy. 20:15.
5. Nichaba afwiifwi Chiyubulusyo, kujana ‘twalilanga-langa biyeni kuti tuchiimvwi na mulusyomo’?
5 Nichaba afwiifwi Chiyubulusyo, tweelede kukomba katukumbila Jehova kuti atugwasye kusimya bweenzuma mbutuli aabo anguwe. (Bala 2 BaKorinto 13:5.) Kujana twazichita biyeni eezi? Kwiinda ‘mukulilanga-langa kuti tuchiimvwi na mulusyomo.’ Tulakonzya kuchita oobo kwiinda mukulibuzya kuti: ‘Ndilasyoma na kuti ndilimumbunga yaJehova njabelesya kuti izuzikizye makanze aakwe? Ndilikubeleka changuzu na mumulimu wakukambawuka akuyiisya makani mabotu aaBwaami? Zintu nzindichita zyangu zilatondeezya na kuti tupona kumazuba aakumamanino akuti nyika yaSaatani yaba afwiifwi kunyonyoonwa? Lusyomo lwangu luchisimide na mbuuli mbulwakabede nindakalipeda kuli Jehova akubbabbatizigwa? (Mt. 24:14; 2 Tim. 3:1; Heb. 3:14) Kuyeeyesesya atala ansandulo zyamibuzyo eeyi, kuyootugwasya kubona kuti tuchiimvwi na mukasimpe.
6. (a) Niinzi chikonzya kutugwasya kuti tukajane buumi butamani? (b) Umwi mwaalu ulibambila biyeni Chiyubulusyo munyaka amunyaka alubo kujana wachitobelezya biyeni chikozyano chakwe?
6 Bala alimwi uyeeyesesye atala aMagwalo atondeezya mbuchiyandikana Chiyubulusyo. (Bala Johane 3:16; 17:3.) ‘Kuziba’ Jehova ‘akuba alusyomo’ mumwanaakwe Simuzyalwaalikke, Jesu, kupa kuti tukajane buumi butamani. Ulakonzya kulibambila Chiyubulusyo kwiinda mukubala zyiiyo zikonzya kukugwasya kuti uswene afwiifwi aJehova aJesu. Atulange-lange zichitwa awumwi mukwesu waba achiindi chilamfu kali mwaalu. Kuzwa chiindi, ubamba zyiiyo zisiyene-siyene zizwa mumamagazini aNgaziyakulinda, zitondeezya mbuchiyandikana Chiyubulusyo aluyando Jehova aJesu ndubakatutondeezya. Kakusyeede mviki ziche kuti kube Chiyubulusyo, ulazibala zyiiyo eezi akuyeeyesesya atala ambuchiyandikana Chiyubulusyo. Munyaka amunyaka ngawayungizya chiiyo chimwi naakuti zibili mumumpaka wakwe. Nayindulula kubala zyiiyo eezi akuyeeyesesya atala anzizyo, ujana zyiiyo zipya. Kuyungizya waawo, eezi zipa kuti ayungizye kuyanda Jehova aJesu. Kuti twachita oobo tuyooba abweenzuma busimide aJehova aJesu alubo tuyoobona mbuchiyandikana Chiyubulusyo.
CHIYUBULUSYO CHIPA KUTI TUJATANE
7. (a) Jesu wakakombela basikwiiya bakwe kuti bachiteenzi naakasaanguna Chilalilo chaMwaami Chagoko? (b) Niinzi chitondeezya kuti Jehova wakiisandula nkombyo yaJesu?
7 Mubusiku naakasaanguna Chilalilo chaMwaami Chagoko, Jesu wakakombela basikwiiya bakwe kuti bajatane mbuuli mbajisini aWisi. (Bala Johane 17:20, 21.) Jehova wakiisandula nkombyo yaMwanaakwe uuyandwa, nkaambo bantu biingi mazubaano basyoma kuti Jehova wakatuma Mwanaakwe. Kusiyana ayimwi miswaangano, Chiyubulusyo chitondeezya kuti Bakamboni baJehova balijisini nkaambo tuchichita mubuzuba bukozyenie toonse. Bantu bamisyobo isiyene-siyene babunganaamwi munyika yoonse. Mumasena amwi, bamwi bakulangilaansi kubungana nkubachita bakombi baJehova. Pesi kujatana nkutuchita munyika yoonse kubotezya Jehova aJesu.
8. Nguuli mulumbe Jehova ngwaakabuzya Ezekkiyele?
8 Mbutuli bakombi baJehova kujatana nkutulaako takutugambyi pe, nkaambo kuzuzikizya businsimi buli muBbayibbele. Atuyeeyesesye atala amulumbe Jehova ngwakaambila Ezekkiyele kuti awulembe, wakali atala akujatanisigwa kwatusamu tubili, kasamu ‘kaJuda’ ‘akaJosefa.’ (Bala Ezekiele 37:15-17.) “Chipanzi chaMibuzyo Yabasikubala” chili muNgaziyakulinda yaJuly 2016 chakati: “Jehova wakaambila Ezekkiyele kuti alembe atala abulangilizi bwakujatanisigwa kwamaIsrayeli chiindi nibakali kuyoobweedezegwa kuNyinka Yachisyomezyo. Alubo mulumbe ooyo wakatondeezya kuti bantu baLeza bakali kuyoojatana kumazuba aakumamanino.”
9. Businsimi bwaEzekkiyele buzuzikizigwa biyeni nikuchitwa Chiyubulusyo?
9 Kuzwa mu1919, Jehova wakasaanguna kubungania maKristu bananikidwe, bakozyanisigwa akasamu ‘kaJuda.’ Kuzwa waawo, maKristu bali abulangilizi bwakuyoopona aanyika, bakozyanisigwa akasamu ‘kaJosefa’ wakabajatanisya amaKristu bananikidwe akupa kuti tubunga ootu tubili tube “itanga lyomwe.” (Joh. 10:16; Zek. 8:23) Jehova wakasyomezya kuti uyoojatanisya tusamu ootu tubili kuti kabe kasamu kamwi. (Ezk. 37:19) Lino tubunga ootu tulijisini alubo tweendelezegwa aJesu Kristu, wakaambwa mubusinsimi kuti “mulanda wangu Davida.” (Ezk. 37:24, 25) Kujatana ooku kugambya kwakasinsimwa aEzekkiyele, kulaboneka munyaka amunyaka chiindi maKristu bananikidwe nibabunganaamwi ‘abambelele zimwi’ kuti bayeeye Lufu lwaJesu. Niinzi nchayelede kuchita umwi awumwi kuti tujatane?
NZITUKONZYA KUCHITA KUTI TUKKALE KATUJISINI
10. Kujana twachita biyeni kuti tukkale katujisini abakombima?
10 Kulibombya njiimwi nzila ipa kuti tukkale katujisini abakombima. Naakali aanyika, Jesu wakabuzya basikwiiya bakwe kuti kabalibombya. (Mt. 23:12) Kulibombya kuyootugwasya kuti tutalisumpuli mbuuli bantu bali munyika. Kulibombya kupa kuti tuswiilile batuzulwida alubo kuchita oobo kupa kuti tujatane mumbungano. Kuyungizya waawo, kulibombya kupa kuti Leza abotelwe nkaambo “ulabakazya basikulisumpula, pele batete-myoyo [naakuti balibombya] ulabapa luzyalo.”—1 Pet. 5:5.
11. Kumvwisisisya kuti chinkwa awayini zyiimininaanzi, kuyootugwasya biyeni kuti tukkale katujisini?
11 Nzila yabili njitukonzya kutondeezya kuti tulijisini nkumvwisisisya kuti chinkwa awayini zibelesegwa kuChiyubulusyo zyiimininaanzi. Tulakonzya kuyeeyesesya atala ankani eeyi buzuba bwaChiyubulusyo kabutanasika anibwasika. (1 Kor. 11:23-25) Chinkwa chiiminina mubili waJesu uutakwe chibi alubo wayini yiiminina bulowa bwaJesu. Pesi tweelede kumvwisisisya zyiingi kwiinda kuziba nchizyiiminina. Chinunuzyo chaJesu chitondeezya kuti Jehova ulatuyanda nkaambo wakatupa mwanaakwe alakwe Jesu wakatondeezya kuti ulatuyanda nkaambo wakazumina kuti atufwide. Andiswe tweelede kubayanda. Alubo kuyanda Jehova kuli mbuuli ntambo itujatanisya abakombima.
Kulekelela bamwi kupa kuti tujatane (Langa fuka 12 a13)
12. Chikozyano chili muli Matayo 18:23-34 chitondeezya biyeni kuti Jehova uyanda kuti tulekelele bamwi?
12 Nzila yatatu njitukonzya kutondeezya kuti tulijisini njakulekelela bamwi. Kulekelela batubisizya kutondeezya kuti tulachilumba chinunuzyo chaKristu nkaambo chipa kuti zibi zyesu zilekelelwe. Langa-langa chikozyano chaJesu chili muli Matayo 18:23-34. Kuzwa waawo, libuzye kuti: ‘Ndililibambilide na kubelesya nzyakayiisya Jesu? Ndilaamoyo mulamfu na kuti bakombima bandibisizya? Ndilabalekelela na bantu bandibisizya?’ Akaambo kakuti tatumaninide pe, chimwi chiindi kulakonzya kutuyumina kulekelela bamwi. Nikuba boobo, chikozyano eechi chituyiisya nzila Jehova njayanda kuti tubajataayo bamwi. (Bala Matayo 18:35.) Jesu wakatondeezya kuti Jehova takonzyi kutulekelela kuti teetwalekelela bamwi. Nkani eeyi teeyakusaana pe! Nitulekelela bamwi mbuuli mbwakatuyiisya Jesu, ngatulikutondeezya kuti tuyanda kukkala katujisini abakombima.
13. Kulekelela bamwi kutondeezya biyeni kuti tuyanda kukkala katujisini?
13 Chiindi nitulekelela bamwi tutondeezya kuti tuyanda kuba aaluumuno. Tweelede kuyeeya lulayo ndwaakapa mwaapostolo Pawulu lwakuti, “kamucisolesya kulondola lujatano luzwa ku-Muuya kucaanzyo caluumuno.” (Ef. 4:3) Kabutanasika naakuti nibwasika buzuba bwaChiyubulusyo, tweelede kunooyeeyesesya atala anzila njitubajataayo bamwi. Libuzye kuti: ‘Ndibaangila nkoto na bamwi kuti bandibisizya? Ndililibambilide na kubweza ntaamu yakubambulula kutamvwanana?’ Tweelede kuyeeyesesya atala amibuzyo eeyi chiindi chaChiyubulusyo.
14. Kujana twabatondeezya biyeni bakombima kuti ‘tubakkazikila moyo chaluyando’?
14 Nzila yachine njitukonzya kutondeezya kuti tulijisini nkuba aluyando mbuuli Jehova. (1 Joh. 4:8) Tatweelede kubatondeezya luyando lwakuupawupa ameso pe bakombima. Kuti twachita oobo tunooli tulikukazyania alulayo ndwaakapa Pawulu lwakuti tweelede ‘kukkazikilana moyo chakuyandana.’ (Ef. 4:2) Alubo mwaapostolo Pawulu taakaamba kuti tweelede ‘kukkazikilana moyo’ luzutu pesi wakayungizya kuti tweelede kuchita oobo “cakuyandana.” Jehova ukwela bantu basiyene-siyene mumbunga yakwe. (Joh. 6:44) Jehova wakabakwela nkaambo ulabayanda. Kuti kakuli boobo, iswe ndiswe bani kuti tuleke kuyanda bakombima? Tweelede kubayanda bakombima nkaambo Jehova utulayilila kuti tuchite oobo!—1 Joh. 4:20, 21.
NDIILILI NIKUYOOBA CHIYUBULUSYO CHAKUMAMANINO?
15. Tuzizi biyeni kuti kuzooba Chiyubulusyo chakumamanino?
15 Bumwi buzuba tuzoochita Chiyubulusyo chakumamanino. Tuzizi biyeni eezi? Mulugwalo lwakusaanguna Pawulu ndwaakalembela maKristu bananikidwe bakuKkorinto, wakati nibayeeya lufu lwaJesu munyaka amunyaka ‘baambilizya lufu lwaMwaami mane do akasike.’ (1 Kor. 11:26) ‘Kusika’ kwaMwaami kwaambwa mulugwalo oolu kulikozyenie ‘akuboola’ kwakaambwa aJesu naakali kupandulula mazuba aakumamanino. Jesu naakali kwaambuula atala amapenzi mapati wakati: “Kuyooboneka citondezyo ca-Mwana a-Muntu kujulu, mpawo misyobo yoonse yaansi iyoolila, nkabela bayoobona Mwana a-Muntu uuboola amayoba aakujulu anguzu abulemu bupati. Lino [Jesu] uyootuma baangelo bakwe amweembo, nkabela bayoobunganya basale bakwe kuzwa kumabazu one, kuzwa kumpela yomwe yakujulu kusikila kuliimwi.” (Mt. 24:29-31) ‘Kubungania basale’ chaamba chiindi boonse maKristu bananikidwe bachili aanyika nibatazoojane bulumbu bwabo kujulu. Ziyoochitika chiindi chamapenzi mapati Armagedoni kiitanatalika. Bali144 000 bayoobelekaamwi aJesu kuti bazunde beendelezi banyika. (Ciy. 17:12-14) Chiyubulusyo chitazoochitwe kali waba aafwiifwi ‘kusika’ Jesu kuti azoobunganie basale chiyooba chakumamanino.
16. Nkamboonzi nweelede kunjila Chiyubulusyo munyaka uuno?
16 Tweelede kulibambila kuti tuzoonjile Chiyubulusyo akuti tuzoogwasigwe anchicho mu31 March 2018. Atukumbile Jehova kuti atugwasye kuti tukkale katujisini abakombima. (Bala Intembauzyo 133:1.) Bumwi buzuba tuzoochita Chiyubulusyo chakumamanino. Nkinkaako, eezi zyeelede kupa kuti tubeleke changuzu kuti tuzoonjile Chiyubulusyo akuti tukkale katujisini abakombima.
