1-2. Bakombi baJehova baswaana zyiimo zilibiyeni alubo zilakonzya kupa kuti bachiteenzi?

ATULANGE-LANGE zyiimo zitatu zisiyene zitobela: Mukwesu uuchili muniini wabuzigwa adokotela kuti ulaabulwazi butasilikiki. Mukwesu ulaaminyaka iili kuma 50 uubeleka changuzu wamaninwa mulimu, weezya kulanguula umwi pesi wawubula. Muchizi uusyomeka wachembaala zyakuti tachikonzyi kubelekela Jehova mbuuli mbaakali kuchita chiindi.

² Kuti kuli kuswaana abuyumu-yumu buli mbuuli bwaambwa atala aawa, kulakonzeka kuti ulimvwa kutachigwasyi pe. Zyiimo zili boobu zilakonzya kupa kuti utabotelwi, ulibone munzila iitali kabotu akuti utamvwanani aabamwi bantu.

3. Saatani abaabo mbayendelezya bababona biyeni bantu?

³ Bantu bali munyika eeyi bali amaboneno aaSaatani atala abuumi. Kuzwa chiindi, Saatani ujata bantu munzila iipa kuti balimvwe kabatagwasyi pe. Wakatondeezya kuti ulaalunya kwiinda mukweena Eva kuti ataswiilili Leza nikuba kuti wakalizi kuti kwakali kuyoopa kuti Eva afwe. Saatani ulikweendelezya bazyamabbizinesi, bazyapolitikisi abazyabukombi bwakubeja. Nkinkaako tazitugambyi kubona bazyamabbizinesi, bazyapolitikisi abeendelezi bazikombelo kabali kujata bantu munzila iitali kabotu akutabaandaba atala ambubalimvwa.

4. Tulalanga-langaanzi muchiiyo eechi?

⁴ Kuli lumwi lubazu, Jehova uyanda kuti tulibone munzila  iili kabotu alubo ulatugwasya kuti tukonzye kuzichita eezi chiindi nituswaana zyiimo zikonzya kupa kuti tulimvwe katutagwasyi pe. (Int. 136:23; Rom. 12:3) Muchiiyo eechi, tulalanga-langa kuti Jehova utugwasya biyeni muzyiimo zitobela: (1) Kuti twachiswa, (2) nitwaswaana penzi lyakubula mali (3) achiindi nitumvwaanga tatuchikonzyi pe kubelekela Jehova akaambo kakuchembaala. Chakusaanguna, atulange-lange kuti nkamboonzi nitukonzya kubaachoonzyo chakuti toonse tulayandikana kuli Jehova.

5. Niinzi chitondeezya kuti bantu balayandikana kuli Jehova?

⁵ Nikuba kuti twakabumbwa kuzwa kubulongo pesi tulayandikana kwiinda bulongo buli mujaanza lyamuntu. (Matl. 2:7) Atulange-lange tumwi twaambo tutondeezya kuti tulayandikana kuli Jehova. Wakatulenga katukonzya kutondeezya buntu bwakwe. (Matl. 1:27) Alubo wakatusumpula kwiinda zilenge zyoonse zili aanyika kwiinda mukutupa manguzu aakuti tuzyeendelezye.​—Int. 8:4-8.

6. Niinzi chimwi chitondeezya kuti Jehova ulatuyanda nikuba kuti tulaachibi?

⁶ Nikuba chiindi Adamu naakabisya, Jehova wakazumanana kutondeezya kuti ulabayanda bantu kwiinda mukutuma Mwanaakwe ngwayandisya kuti azoofwide zibi zyesu. (1 Joh. 4:9, 10) Kwiinda muchinunuzyo, Jehova uyoobusya bantu “baluleme abataluleme” bakafwa akaambo kachibi chaAdamu. (Mil. 24:15) Jwi lyakwe litondeezya kuti Jehova ulatuyanda kazitakwe ndaba kuti tulachiswa, tulafwaba naakuti twachembaala.​—Mil. 10:34, 35.

7. Amba tumwi twaambo tupa kuti tusyome kuti Jehova ulatuyanda.

⁷ Kuli tumwi twaambo tupa kuti tusyome kuti Jehova ulatuyanda. Wakatukwelela kuli nguwe alubo wakabotelwa kuti twakakatambula kabotu kasimpe. (Joh. 6:44) Chiindi nitwakasaanguna kuswena kuli nguwe, Jehova wakaswena kuli ndiswe. (Jak. 4:8) Alubo Jehova utondeezya kuti ulatuyanda kwiinda mukubelesya chiindi amanguzu aakwe kuti atuyiisye. Ulizi mbabede umwi awumwi wesu lino alubo ulizi kuti tulakonzya kuba bantu balikabotu kuti twabeleka changuzu. Alubo ulatulaya akaambo kakuti ulatuyanda. (Tus. 3:11, 12) Zilaantanganana kuti Jehova ulatuyanda!

8. Intembauzyo 18:27-29 itugwasya biyeni kuti tutakataazikani loko atala amapenzi?

⁸ Bamwi bantu bakali kubona Mwaami Davida mbuuli muntu uutayandikani pe pesi Davida wakalizi kuti Jehova ulamuyanda akuti wakali kumugwasya. Kuziba eezi kwakamugwasya kuti atakataazikani loko atala azyiimo nzyaakali kuswaana. (2 Sam. 16:5-7) Chiindi nitulimvwa katutagwasyi anituswaanana amapenzi, Jehova ulakonzya kutugwasya kuti tutakataazikani loko akuti tukonzye kuzunda penzi eelyo. (Bala Intembauzyo 18:27-29.) Kuti katugwasigwa aaJehova, taakwe chikonzya kutukachizya kumubelekela katubotelwa. (Rom. 8:31) Lino atulange-lange zyiimo zitatu mputweelede kuyeeya kuti Jehova ulaandaba andiswe akuti ulatuyanda.

9. Kuchiswa kulakonzya kupa kuti tulibone biyeni?

⁹ Kuchiswa kulakonzya kupa kuti tulibone katutachigwasyi pe. Alubo tulakonzya kuba abweeme chiindi bantu nibaziba kuti kuli zintu nzitutachikonzyi pe kuchita akuti tuyanda kugwasigwa abamwi. Nikuba kuti bamwi kabatazi kuti tulachiswa, tulakonzya kuba abweeme akaambo kakuti tatuchinookonzyi pe kuchita zimwi zintu. Kuti twaswaana penzi  eeli, Jehova ulakonzya kutusimya. Utusimya biyeni?

10. Kweendelana amajwi ali muli Tusimpi 12:25, niinzi chikonzya kutugwasya kuti twachiswa?

¹⁰ Kuti twachiswa, “jwi libotu” lilakonzya kutusimya. (Bala Tusimpi 12:25.) MuBbayibbele, Jehova wakatubambila majwi alikabotu atondeezya kuti ulatuyanda nikuba kuti twachiswa. (Int. 31:19; 41:3) Jehova ulakonzya kutugwasya kuti tuzunde kukataazikana kweetwa akuchiswa kuti twabala akwiindulula majwi aakwe akazulwidwa amuuya uusalala.

11. Jehova wakamugwasya biyeni umwi mukwesu?

¹¹ Atulange-lange chikozyano chaJorge. Kachikula, Jorge wakajatwa bulwazi bwakali kukomena chakufwambaana alubo bwakapa kuti alibone katachigwasyi pe. Wakati: “Bulwazi bwangu bwakali kundifwisya bweeme nkaambo bwakali kupa kuti bantu kabagamba nibandibona.” Alubo wakati: “Chiindi bulwazi bwangu nibwakali kuyabukomena ndakayeeya buumi bwangu mbubwakali kuzoochincha. Ndakakataazikana alubo ndakakumbila Jehova kuti andigwasye.” Jehova wakamugwasya biyeni? Jorge wakati: “Akaambo kakuti kwakali kundiyumina kumvwisisisya nindilikubala, ndakasungwaazigwa kuti ndibale mavesi mache ajanika muli Intembauzyo, atondeezya kuti Jehova ulabayanda bakombi bakwe. Ndakali kwiindulula kwaabala mavesi aaya buzuba abuzuba alubo akanduumbulizya akundisimya. Mukuya kwachiindi bantu bakazoobona kuti ndakali ndatalisya kubotelwa lubo. Bakatalika kwaamba kuti kulabasungwaazya kundibona kandilikubotelwa. Ndakabona kuti Jehova wakazisandula nkombyo zyangu! Wakandigwasya kuti ndilibone munzila ilikabotu. Ndakatalika kubikkila maanu kuzintu zyaambwa  aJwi lyakwe atala ambandibona nikuba kandichisidwe.”

12. Nga ulazibona biyeni kuti Jehova ulaandaba anduwe chiindi nuchiswa?

¹² Nikuba kuti ulachiswa, baachoonzyo chakuti Jehova ulikububona buyumu-yumu mbulikuswaana. Mukombelezye kuti akugwasye kuti utakataazikani loko pe. Bala Bbayibbele kuti ujane majwi mabotu Jehova ngatubambilide. Yeeyesesya atala mavesi atondeezya kuti Jehova ulabayanda bakombi bakwe. Chiindi nuchita oobo, uyoobona kuti Jehova ulabayanda bantu bamubelekela chakusyomeka.​—Int. 84:11.

13. Kumaninwa mulimu kulakonzya kupa kuti mwaalumi alimvwe biyeni?

¹³ Mwaalumi umwi awumwi uyanda kujanina mpuli yakwe ziyandikana mubuumi. Pesi atuteedi mwaalumi waandwa kumulimu nikuba kuti takwe nchaabisya pe. Nikuba kuti weezya kuyanduula uumwi, taali kuujana pe. Kuti wabikkila maanu kuchiimo chakwe, ulakonzya kulimvwa katagwasyi pe. Pesi kubikkila maanu kuzisyomezyo zyaJehova nga kulamugwasya biyeni?

14. Nkamboonzi Jehova nazuzikizya zisyomezyo zyakwe?

¹⁴ Ziyume zitete, Jehova ulazizuzikizya zisyomezyo zyakwe. (Jos. 21:45; 23:14) Kuli twaambo tupa kuti azizuzikizye. Kakusaanguna, uchitila kuti zina lyakwe litasampawulwi pe. Jehova wakasyomezya kuti unoobabikkila maanu bakombi bakwe basyomeka nkinkaako ulilibambilide kuzuzikizya chisyomezyo chakwe. (Int. 31:1-3) Kuyungizya waawo, Jehova ulizi kuti tatukoobotelwa pe kuti waleka kutusanina nkaambo tuli mpuli yakwe. Usyomezya kuti unootupa zintu zyabukombi  azyakunyama alubo taakwe chikonzya kumukachizya kuzuzikizya chisyomezyo chakwe!​—Mt. 6:30-33; 24:45.

15. (a) MaKristu akusaanguna akaswaanana abuyumu-yumu buli biyeni? (b) Lugwalo lwa Intembauzyo 37:18, 19 lutusimya biyeni?

¹⁵ Kuti twaziba twaambo tupa kuti Jehova azuzikizye zisyomezyo zyakwe, tulakonzya kulisimya kuti twaswaana penzi lyakubula mali. Atulange-lange chikozyano chamaKristu akusaanguna. Chiindi mbungano zyamuJerusalemu nizyakali kupenzegwa, “basikwiiya boonse bakamwaikila mumasena oonse . . . , kwakasyaala buyo baapostolo.” (Mil. 8:1) Niinzi zyakachitika akaambo kakumwayika ooku? Kwakaba penzi lyakubula mali! Kulakonzeka kuti maKristu aaya akasweekelwa myuunzi, milimu amabbizinesi aabo. Nikuba boobo, Jehova taakabalekelezya pe alubo teebakaleka pe kumubelekela kababotelwa. (Mil. 8:4; Heb. 13:5, 6; Jak. 1:2, 3) Jehova wakabagwasya maKristu aaba, andiswe uyootugwasya.​—Bala Intembauzyo 37:18, 19.

16. Nchiimoonzi chikonzya kupa kuti tubonaanga tatuchiyandikani pe kuli Jehova?

¹⁶ Kuti twachembaala tulakonzya kubonaanga nzituchita mumulimu waJehova tazigwasyi pe. Amwi Mwaami Davida wakali kulimvwa mbuboobu chiindi naakali wachembaala. (Int. 71:9) Jehova nga ulatugwasya biyeni?

17. Chikozyano chamuchizi Jheri chituyiisyaanzi?

¹⁷ Atulange-lange chikozyano chamuchizi uutegwa Jheri. Wakatambwa kumuswaangano wakuyiisigwa kubambulula maanda abelesegwa mumilimu yabukombi pesi taakali kuyanda pe. Wakati: “Ndachembaala, ndili mukamufu alubo tandikwe luzibo ndundikonzya kubelesya mukubelekela Jehova alubo tandigwasyi  pe.” Mubusiku oobo, wakabuzya Jehova zyakali aansi amoyo wakwe munkombyo. Chiindi naakasika kuNg’anda yaBwaami, wakali kulimvwa kateeleli pe kubawo. Nibakali kuyiisigwa, umwi sikwaambuula wakaamba kuti chintu chiyandikana loko nkuzumina kuyiisigwa aJehova. Jheri wakati: “Ndakabona kuti ndilakonzya kuzichita eezi, ndakalila nkaambo ndakabona kuti Jehova wayisandula nkombyo yangu. Wakali kunditondeezya kuti kuli chimwi nchindikonzya kumuchitila akuti ulayanda kundiyiisya!” Kalanga zyakachitika Jheri wakati: “Kumasaangunino ndakali kulimvwa kanditagwasyi alubo kandiyoowa pesi kumamanino ndakalimvwa kandilaachibindi, kandili ndasungwaazigwa alubo kandili muntu uuyandikana.”

18. Bbayibbele litugwasya biyeni kubona kuti Jehova ulabayanda bakombi bakwe bachembaala?

¹⁸ Tweelede kuba aachoonzyo chakuti Jehova ulakonzya kutubelesya nikuba kuti twachembaala. (Int. 92:12-15) Jesu wakatuyiisya kuti Jehova ulaandaba anzitumuchitila kazitakawe ndaba kuti tatuchikonzyi pe kuchita zyiingi. (Lk. 21:2-4) Nkinkaako bikkila maanu kuzintu nzukonzya kuchita. Muchikozyano, ulakonzya kubuzya bamwi atala aJehova, kukombela bamwi akusungwaazya bamwi kuti bakkale kabasyomeka. Jehova ukubona mbuuli simulimonyina kutali akaambo kazintu nzukonzya kuchita pe pesi akaambo kakumuswiilila nkuchita.​—1 Kor. 3:5-9.

19. Kweendelana alugwalo lwa Baroma 8:38, 39 tulaachoonzyo chanzi?

¹⁹ Tulabotelwa kaka kukomba Jehova Leza uubona bantu bamubelekela kabayandikana kulinguwe! Wakatulenga kuti tuchite kuyanda kwakwe alubo kuba mubukombi bwakasimpe kupa kuti tubotelwe. (Ciy. 4:11) Nikuba kuti bantu bali munyika batubona mbuuli bantu batagwasyi pe, Jehova utuyanda loko. (Heb. 11:16, 38) Chiindi nituswaana penzi lyakuchiswa, kubula mali akuchembaala atuyeeye kuti taakwe chintu chikonzya kukachizya Taateesu wakujulu kuti atuyande.​—Bala Baroma 8:38, 39.