Tuli baJehova
“Cilikkomene cisi cijisi Jehova kuba Leza wancico, ibantu mbaasala kuba lukono lwakwe.”—INT. 33:12, NW.
NYIMBO: 40, 50
1. Nkamboonzi nitukonzya kwaamba kuti zintu zyoonse nzizya Jehova? (Langa chifanikisyo chili kumatalikilo achiiyo.)
ZINTU zyoonse nzizya Jehova, “ijulu ajulu loko, nyika azintu zyoonse zili mulinjiyo” nzizyakwe. (Dt. 10:14; Ciy. 4:11) Toonse tuli baJehova nkaambo nguwe wakatulenga. (Int. 100:3) Kuzwa bantu nibakatalika kupona, Leza wakasala imwi nkamu yabantu kuti babe lukono lwakwe.
2. Mbaani bantu bakasalwa aJehova balembedwe muBbayibbele?
2 Muchikozyano, muli Intembauzyo 135 maIsrayeli bakali kusyomeka kuli Jehova baambwa kuti ‘ndukono lwakwe luyandikana.’ (Int. 135:4) Hosiya wakasinsima kuti bantu bakatali maIsrayeli bakali kuyooba bantu baJehova. (Hos. 2:23) Businsimi oobu bwakazuzikizigwa chiindi Jehova naakasala bantu bakatali maJuda kuti babe achilongezyo chakuyooyendelezya aKristu kujulu. (Inc. 10:45; Rom. 9: 23-26) ‘Chisi eechi chisalala’ ‘nkabunga kalibedelede’ munzila iigambya alubo bantu bali mukabunga aaka bakananikwa amuuya uusalala nkinkaako bayoopona kujulu. (1 Pet. 2:9, 10) Pesi kutegwani amaKristu basyomeka bali abulangilizi bwakuyoopona aanyika? Jehova ubaamba kuti ‘mbantu’ bakwe akuti ‘mbantu mbasalide.’—Is. 65:22.
3. (a) Mbaani beenzinyina baJehova? (b) Tuyoolanga-langaanzi muchiiyo eechi?
3 Jehova ubayandisya loko bakombi bakwe boonse baswaanizya ‘katanga kaniini,’ chaamba aabo bali abulangilizi bwakuyoopona kujulu ‘abambelele zimwi,’ chaamba aabo bayookkala anyika. Alubo matanga aaya ategwa ‘nditanga lyomwe.’ (Lk. 12:32; Joh. 10:16) Tweelede kumulumba Jehova nkaambo tulibeenzinyina. Chiiyo eechi chiyootugwasya kubona mbutukonzya kulumba Jehova akaambo kakututondeezya luyando luli boobo.
KULIPEDA KULI JEHOVA
4. Kujana twatondeezya biyeni kuti tulamulumba Jehova akaambo kakuba beenzinyina alubo Jesu wakazichita biyeni?
4 Tutondeezya kuti tulamuyanda Jehova kwiinda mukulipeda kulinguwe. Kubbabbatizigwa, kutondeezya antanganana kuti tuli baJehova akuti tuyanda kumuswiilila. (Heb. 12:9) Nzizyo nzyaakachita Jesu naakabbabbatizigwa, wakati kuli Jehova: “Ndakondwa kucita luyando lwako, O Leza wangu.” (Int. 40:7, 8) Jesu wakalitondeezya kuti uyanda kuchita kuyanda kwaJehova nikuba kuti wakali kuzwa mumusyobo wakasalidwe aLeza.
5, 6. (a) Jehova wakamvwa biyeni Jesu naakabbabbatizigwa? (b) Amba chikozyano chitondeezya Jehova mbabotelwa nitulipeda kulinguwe nikuba kuti zintu zyoonse nzizyakwe.
5 Jehova wakamvwa biyeni Jesu naakabbabbatizigwa? Bbayibbele lyaamba kuti: “Lino Jesu naakamana kubapatizigwa, mpawo wakazwa mumaanzi. Nkabela kujulu kwakajaluka, elyo wakabona Muuya wa-Leza, ulaseluka mbuli inziba, uleza kulinguwe. Lino kwakazwa ijwi kujulu, lyakati, Ngooyu mwanaangu uuyandika ngunkondelwa.” (Mt. 3:16, 17) Nikuba kuti Jesu wakali kukkala kujulu aWisi, Jehova wakabotelwa naakabona Mwanaakwe kalipeda kuchita kuyanda kwakwe. Jehova ulabotelwa nitulipeda kulinguwe alubo eezi zipa kuti atulongezye.—Int. 149:4.
6 Muchikozyano, atuteedi mwaalumi ulimide zipoka mumuunda wakwe. Mpawo mwanaakwe watema chipoka akuchipa wisi kachili chipo. Chipoka eechi teechawisi na? Kujana mwana ooyu wamupa biyeni wisi kakuli nguwisi wakachilima? Tazikonzeki pe kuti wisi ulaaluyando ayeeye oobo. Ulachitambula nkaambo unooli wabona kuti mwanaakwe ulamuyanda. Wisi ulakonzya kuchiyanda loko chipoka nchaapegwa amwanaakwe nikuba kuti kuli zimbi mumuunda. Munzila iikozyenie, alakwe Jehova ulabotelwa nitulipeda kulinguwe chamoyo woonse.—Kul. 34:14.
7. Bbuku lyaMalakki litondeezya kuti Jehova ulimvwa biyeni atala abantu bamukomba amoyo woonse?
7 Bala Malaki 3:16. Kuti kutanalipeda akubbabbatizigwa, yeeyesesya mbukuyandikana kuchita oobo. Kuzwa kuchili mwida, wakaba waJehova kuswaanizya abantu boonse. Alubo yeeya Jehova mbabotelwa kuti walipeda kulinguwe akusala kuchita kuyanda kwakwe nkaambo wasala Jehova kuti abe mweendelezi wako. (Tus. 23:15) Jehova ulibazi bantu basala kumukomba alubo mazina aabo alilembedwe ‘mubbuku lyakwe lyakwiibalusya.’
8, 9. Jehova uyanda kuti bantu balembedwe mazina ‘mubbuku lyakwiibalusya’ bachiteenzi?
8 Kulembwa zina ‘mubbuku lyakwiibalusya’ lyaJehova katuli bantu bakwe kuswaanizya kuchita zimwi zintu. Malakki wakati tweelede “kuyoowa Jehova akuyeeya zina lyakwe.” Kukomba umwi muntu naakuti chimwi chintu kupa kuti mazina eesu agwisigwe mubbuku lyaJehova lyabuumi lyachikozyano.—Kul. 32:33; Int. 69:28.
9 Kulipeda kuli Jehova kuswaanizya zyiingi nkaambo takwaambi kumusyomezya kuchita kuyanda kwakwe akubbabbatizigwa mumaanzi luzutu. Kulipeda akubbabbatizigwa kuchitwa kamwi pesi kukomba Jehova nkwabuumi boonse. Tweelede kutondeezya kuti tulikubbazu lyaJehova akuti tuli bantu bakwe kwiinda mukumuswiilila chiindi choonse.—1 Pet. 4:1, 2.
ATUTANTAMUKE ZINTU ZIYANDWA ANYIKA
10. Nguuli musiyano weelede kuba akati kabantu bakomba Jehova abatamukombi?
10 Muchiiyo chakayinda, twakayiya atala azikozyano zyamuBbayibbele ziswaanizya Kkayini, Solomoni amaIsrayeli. Boonse bakali kuyeeya kuti bakomba Jehova pesi teebakali kumukomba amoyo woonse. Zikozyano eezi zitondeezya antanganana kuti bantu baJehova beelede kuchita zintu ziluleme akutantamuka zibi. (Rom. 12:9) Malakki naakazwa akwaamba atala ‘abbuku lyakwiibalusya,’ Jehova wakaamba atala ‘akwaandaanya mululami asizibi, muntu uuyoowa Leza amuntu uutamuyoowi.’—Malk. 3:18.
11. Nkamboonzi nikweelede kuba antanganana kubantu boonse kuti tukomba Jehova alikke?
11 Atubone imwi nzila njitukonzya kulumba Jehova akaambo kakutusala kuti tube bantu bakwe. ‘Bantu boonse beelede kubona’ mbutuyabukomena mubukombi. (1 Tim. 4:15; Mt. 5:16) Libuzye kuti: ‘Bamwi balandibona na kuti ndilasyomeka kuli Jehova amoyo woonse? Ndili abweeme na kubuzya bantu kuti ndili Kamboni waJehova?’ Jehova tabotelwi pe kuti twakachilwa kubuzya bamwi kuti tuli bantu bakwe kakuli wakatusala.—Int. 119:46; bala Marko 8:38.
Maponeno aako alatondeezya na kuti nduwe Kamboni waJehova? (Langa fuka 12 a13)
12, 13. Niinzi nzibachita bamwi zipa kuti bataboneki kuti Mbaakamboni baJehova?
12 Zilawusisya kuti bamwi bakombima tabachikonzyi kusiyanisya kukomba Leza akutamukomba akaambo kakutobelezya “muuya waansi ano.” (1 Kor. 2:12) Muuya ooyu upa kuti bantu bachite ‘ziyandwa anyama yabo.’ (Ef. 2:3) Muchikozyano, bamwi bazwaata munzila iitapi bulemu nikuba kuti tupegwa malayilile miingi atala ankani eeyi. Bazwaata zigogo zijata naakuti zibalangala nikuba kumiswaangano yachiKristu. Alubo nzila njibalungisyaayo masusu ambubagela tayitondeezyi bulemu. (1 Tim. 2:9, 10) Eezi zipa kuti kutabi musiyano akati kabakombi baJehova ‘abazolwani banyika.’—Jak. 4:4.
13 Muli zimwi zintu, bamwi Bakamboni tabazitantamuki chakumaninina zintu ziyandwa anyika. Mbubazyana anzibachita kumapaati tazyeeleli pe kumaKristu. Batumizya zifanikisyo amajwi aatali kabotu kababelesya nzila zyakwaambuuzyania zyamazubaano. Kulakonzeka kuti taakwe chibi chipati nchibakachita chipa kuti bapegwe lulayo pesi michito yabo ilakonzya kunyongania bakombinyina balikubelekela kuti bachite zilikabotu.—Bala 1 Petro 2:11, 12.
Utazumini kunyonganisigwa abantu batayandi kuba kubbazu lyaJehova
14. Tweelede kuchitaanzi kuti tukwabilile bweenzuma mbutulaabo aJehova?
14 Muuya wanyika usumpula “zisusi zyanyama niziba zisusi zyameso nikuba kulisumpula kwabuumi.” (1 Joh. 2:16) Akaambo kakuti tuli baJehova, tusungwaazigwa “kukazya kasampusampu azisusi zibi zyaansi ano, tuleelede kukala cakulibatamika acakululama acakulemeka Leza muciindi ecino casunu.” (Tit. 2:12) Zintu zyoonse nzituchita mubuumi ziswaanizya mbutwaambuula, nzitulya akunywa, nzwaatilo yesu ambutulibamba anzituchita kumulimu zyeelede kutondeezya antanganana kubantu kuti tukomba Jehova alikke.—Bala 1 BaKorinto 10:31, 32.
‘TULAYANDANA’
15. Nkamboonzi nitweelede kuba aluzyalo aluyando kubakombima?
15 Tutondeezya kuti tulamulumba Jehova akaambo kakuti tuli beenzinyina kwiinda mukubajata kabotu bakombima. Ambabo mbibaJehova. Kuyeeyesesya kaambo aaka kupa kuti tube aluzyalo aluyando kubakombima. (1 Tes. 5:15) Jesu wakabuzya basikwiiya bakwe kuti: “Kuliceeci bantu boonse bayoomuziba, kuti muli basikwiiya bangu, mwanooyandana umwi amweenzinyina.”—Joh. 13:35.
16. Mulawu waMusa wakali kutondeezya biyeni Jehova mbalimvwa atala abantu bakwe?
16 Atubone chikozyano chitugwasya kubona mbutweelede kubajata bakombima mumbungano. Zibelesyo zyakali mutempele lyaJehova zyakali kuyandikana alubo zyakali kubelesegwa mubukombi busalala. Mumulawu waMusa, kwakali malayilile aakali kutondeezya mbuzyakeelede kubambwa zibelesyo eezi alubo bantu bakatali kutobelezya malayilile aaya, bakali kujayigwa. (My. 1:50, 51) Kuti Jehova wakali kukwabilila zibelesyo biyo zyakali kubelesegwa mubukombi bwakwe, chaamba kuti ulabakwabilila bakombi bakwe basyomeka mbaakasala kuti babe bantu bakwe! Kaamba atala abakombi bakwe, Jehova wakati: ‘Woonse uumuguma uguma mboni yaliso lyangu.’—Zek. 2:8.
17. Niinzi Jehova ‘nchaswiilila akumvwa’?
17 Zilabotezya kuti Malakki wakaamba kuti Jehova “wakaswiilila akumvwa” chiindi bantu bakwe nibakali kwaambuula umwi awumwi kumweenzinyina. (Malk. 3:16) Nisimpe Jehova “ulibezi bakwe.” (2 Tim. 2:19) Ulazibona zyoonse nzituchita anzitwaambuula. (Heb. 4:13) Chiindi nitutabafwidi luzyalo bakombima, Jehova ‘ulaswiilila akumvwa.’ Alubo Jehova ulazibona chiindi nitutamba bamwi, nitubapa zimwi, nitubalekelela anitubafwida luzyalo.—Heb. 13:16; 1 Pet. 4:8, 9.
‘JEHOVA TAKABASOWI PE BANTU BAKWE’
18. Kujana twamulumba biyeni Jehova akaambo kachilongezyo chakuba bantu bakwe?
18 Nisimpe kuti tweelede kutondeezya kuti tulamulumba Jehova nkaambo wakatusala kuti tube bantu bakwe. Tulizi kuti twakasala chabusongo nitwakalipeda kulinguwe. Nikuba kuti tupona “akati kazyalani lyabantu bampelenge alimwi bapilingene,” tuyanda kuti bantu babone kuti ‘tatukwe kampenda amilandu, . . tulamweka mbuuli mimuni munyika eeyi.’ (Flp. 2:15, NW) Tatuyandi abuniini kuchita zintu Jehova nzyatayandi. (Jak. 4:7) Alubo tulabayanda akubalemeka bakombima nkaambo ambabo mbibaJehova.—Rom. 12:10.
19. Jehova ubalongezya biyeni bantu bakwe?
19 Bbayibbele lisyomezya kuti: “Jehova takooyoosowa bantu bakwe.” (Int. 94:14) Chisyomezyo eechi chipa kuti tuzibe kuti Jehova unooli andiswe muzyiimo zyoonse. Nikuba kuti twafwa, Jehova takatulubi pe. (Rom. 8:38, 39) Bbayibbele lyaamba kuti: “Nkaambo ikuti naa tulapona, tuponena Jehova, alimwi ikuti naa twafwa, tufwida Jehova. Aboobo kufwumbwa naa tulapona naa twafwa, tuli bantu ba Jehova.” (Rom. 14:8, NW) Nisimpe, tulangilila chiindi Jehova nayoobusya beenzinyina basyomeka bakafwa. (Mt. 22:32) Nikuba lino, Jehova ulikutulongezya munzila zyiingi. Bbayibbele lyaamba kuti: “Cilikkomene cisi cijisi Jehova kuba Leza wancico, ibantu mbaasala kuba lukono lwakwe.”—Int. 33:12, NW.
