1. Bbala lyakuti “kasimpe” lyaambaanzi?

KULI nwaakali wabuzigwa mibuzyo iitobela na? “Wakakajana biyeni kasimpe?” “Waba achiindi chilamfu biyeni kuli mukasimpe?” “Wakakomenena mukasimpe na?” Amwi kuli bantu mbuwakali wabuzya mibuzyo eeyi. Bbala lyakuti “kasimpe” lyaambaanzi? Mubufwiifwi, lyaamba zintu nzitusyoma, nzituchita mubukombi anzila njituponaayo. Bantu bali ‘mukasimpe’ balizizi nziliyiisya Bbayibbele alubo bapona kweendelana amalayilile aalyo. Eezi zipa kuti batasyomi njiisyo zyakubeja ziyiisigwa muzikombelo akuti babotelwe nikuba kuti bapona munyika yeendelezegwa aSaatani.—Joh. 8:32.

2. Kweendelana alugwalo lwa Johane 13:34, 35, niinzi chikonzya kupa kuti muntu ayande kasimpe?

² Niinzi chakapa kuti uyande kasimpe? Amwi wakabona kulijata kabotu kwabakombi baJehova. (1 Pet. 2:12) Amwi wakabona luyando ndubalaalo. Bantu biingi tabalulubi pe luyando ndubakatondeezegwa nibakasaanguna kunjila miswaangano pesi chimwi chiindi ngabaluba zyakaambwa kumuswaangano ooyo. Eezi tazitugambyi pe nkaambo Jesu wakaamba kuti basikwiiya bakwe bakali kuyooboneka kwiinda mukutondeezyania luyando. (Bala Johane 13:34, 35.) Pesi kuli zimwi zintu nzitweelede kuchita kuti tube alusyomo lusimide.

3. Niinzi chikonzya kuchitika kuti lusyomo lwesu kaluyeeme aaluyando ndututondeezegwa abakombima?

³ Lusyomo lwesu talweelede kuyaama aaluyando ndutwakatondeezegwa abakombi baJehova luzutu. Nkamboonzi? Nkaambo kuti lusyomo lwesu lwayaama aaluyando oolo, lulakonzya kumana. Muchikozyano, tulakonzya kuleka kubelekela  Jehova kuti umwi mukwesu naakuti muchizi, mwaalu naakuti payona wachita chibi chipati. Alubo tulakonzya kuleka kukomba Jehova kuti umwi mukwesu naakuti muchizi watunyemya, naakuti waba siluleyo mpawo waamba kuti nzitusyoma teezyachoonzyo pe. Nkinkaako kuti katuyanda kuba alusyomo lusimide, tweelede kuba abweenzuma busimide aJehova. Nikuba kuti kulanga zichitwa abamwi kulagwasya, pesi kuti tube alusyomo lusimide tweelede kubala Bbayibbele, kuyeeyesesya akuyanduulisisya. Eezi ziyoopa kuti tubone kuti Bbayibbele liyiisya kasimpe atala aJehova.—Rom. 12:2.

4. Kweendelana alugwalo lwa Matayo 13:3-6, 20, 21, niinzi nzibachita bamwi kuti baswaanana aamasunko?

⁴ Jesu wakaamba kuti bamwi bakali ‘kuyoobotelwa’ kutambula kasimpe pesi lusyomo lwabo lwakali kuyoomana kuti baswaanana aamasunko. (Bala Matayo 13:3-6, 20, 21.) Amwi teebakazi pe kuti balaswaanana aamapenzi abuyumu-yumu kuti basala kuba batobeli baJesu. (Mt. 16:24) Kulakonzeka kuti bakali kuyeeya kuti, kuti waba muKristu unoojana zilongezyo luzutu alubo Jehova ulagwisya mapenzi aako woonse. Pesi simpe ndyakuti tunooswaanana aamapenzi munyika njitupona. Alubo zyiimo zilakonzya kuchincha akupa kuti tutabotelwi.—Int. 6:6; Muk. 9:11.

5. Bakombima biingi batondeezya biyeni kuti bali achoonzyo chakuti nzibasyoma nkasimpe?

⁵ Bakwesu abachizi biingi balatondeezya kuti bali achoonzyo chakuti nzibasyoma nkasimpe. Batondeezya biyeni? Lusyomo lwabo taluzungaani pe kuti umwi mukombima wabanyemya naakuti wachita chibi chipati. (Int. 119:165) Masunko ngibaswaananaawo apa kuti babe alusyomo lusimide. (Jak. 1:2-4) Nga ulachita biyeni kuti ube alusyomo lusimide oobu?

6. Lusyomo lwabasikwiiya bakusaanguna lwakayeeme aali?

⁶ Lusyomo lwabasikwiiya bamumwaanda wakusaanguna lwakayeeme muluzibo lwaMagwalo amunjiisyo zyaJesu Kristu, chaamba ‘kasimpe kamakani mabotu.’ (Gal. 2:5) Kasimpe kaswaanizya zyoonse nzitusyoma mbuli maKristu, ziswaanizya chinunuzyo chaJesu akubusigwa kwakwe. Mwaapostolo Pawulu wakali achoonzyo chakuti njiisyo eezi zyakali zyakasimpe. Nkamboonzi nitwaamba oobu? Nkaambo wakabelesya Magwalo “kapandulula akutondeezya kwiinda muzilembedwe kuti cakaleelede kuti Kristo apenge akubuka kubafwu.” (Mil. 17:2, 3) Basikwiiya bakusaanguna bakazitambula njiisyo eezi alubo bakasyoma muuya uusalala kuti ubagwasye kumvwisisisya Jwi lyaLeza. Bakayanduulisisya akuba achoonzyo chakuti njiisyo eezi zyakali kuzwa muMagwalo. (Mil. 17:11, 12; Heb. 5:14) Lusyomo lwabo teelwakayeeme kunzila njibakali kulimvwaayo, alubo teebakali kubelekela Jehova akaambo kakuti bakali kubotelwa kuba aakati kabakombinyina. Pesi lusyomo lwabo lwakayeeme ‘aluzyibo lwini-lwini lwa Leza.’—Kol. 1:9, 10.

7. Kuba achoonzyo chakuti nzilyaamba Bbayibbele nkasimpe kutugwasya biyeni?

⁷ Kasimpe kali muJwi lyaLeza takachinchi pe. (Int. 119:160) Muchikozyano, takachinchi pe kuti mukombima watunyemya naakuti wachita chibi chipati. Alubo takachinchi pe kuti twaswaanana abuyumu-yumu. Nkinkaako tweelede kuziziba kabotu njiisyo zyamuBbayibbele alubo tube achoonzyo chakuti nzyakasimpe. Kuti twaba achoonzyo chakuti nzilyaamba Bbayibbele nkasimpe, tuyoozumanana kusyomeka kuli Jehova nitwaswaanana abuyumu-yumu. Nga ulachita biyeni kuti ube  achoonzyo chakuti zintu nzusyoma nzyakasimpe?

8. Kweendelana alugwalo lwa 2 Timoteyo 3:14, 15, niinzi chakapa kuti Timotewo abe achoonzyo chakuti wakali wajana kasimpe?

⁸ Timotewo wakalizi kuti wakali wajana kasimpe. Wakaziziba biyeni? (Bala 2 Timoteyo 3:14, 15.) Banyina abanyinakulu bakali kumuyiisya njiisyo ‘zyamalembe aasalala.’ Pesi zilaantanganana kuti Timotewo wakali kujana chiindi chakubala akuyeeyesesya zyaambwa amalembe aayo. Eezi zyakapa kuti ‘asyome’ kuti malembe aayo aakali aakasimpe. Mukuya kwachiindi, Timotewo, banyina abanyinakulu bakazooyiya njiisyo zyachiKristu. Zilaantanganana kuti Timotewo wakabotelwa aluyando ndwaakatondeezegwa abatobeli baKristu alubo eezi zyakapa kuti aliswaanizye ambabo akuti ayande kubagwasya. (Flp. 2:19, 20) Nikuba boobo, lusyomo lwakwe teelwakayeeme aakuyanda bantu nkwaakali kuchita pesi lwakayeeme munjiisyo zyakasimpe zyakapa kuti ayande kuba mweenzinyina waLeza. Anduwe weelede kubala Bbayibbele akuyeeyesesya kuchitila kuti ube achoonzyo chakuti nziliyiisya atala aJehova nzyakasimpe.

9. Nziizili njiisyo zitatu ziyandikana nzweelede kuba achoonzyo atala anzizyo?

⁹ Weelede kuba achoonzyo atala anjiisyo zitatu ziyandikana loko. Yakusaanguna, weelede kuba achoonzyo chakuti Jehova Leza nguMulengi wazintu zyoonse. (Kul. 3:14, 15; Heb. 3:4; Ciy. 4:11) Yabili, weelede kuba achoonzyo chakuti Bbayibbele ndiJwi lyaLeza lyakazulwidwa amuuya uusalala. (2 Tim. 3:16, 17) Yachitatu, weelede kuba achoonzyo chakuti Jehova ulaambunga yabantu bamukomba iizulwidwa aJesu, alubo Bakamboni baJehova nimbunga eeyo. (Is. 43:10-12; Joh. 14:6; Mil. 15:14) Kuba achoonzyo atala anjiisyo eezi takwaambi kuti weelede kuziba Bbayibbele lyoonse pe. Pesi weelede kweezya ‘kubelesya maanu’ kuchitila kuti ube achoonzyo chakuti nzusyoma nkasimpe.—Rom. 12:1.

10. Niinzi zimwi nzitweelede kuchita kutali kuziba kasimpe luzutu?

¹⁰ Kuti wamvwisisisya njiisyo zitatu zili atala aLeza, Bbayibbele abakombi bakwe, weelede kugwasya bamwi kuti basyome njiisyo eezi kubelesya Magwalo. Nkamboonzi? Akaambo kakuti tuli maKristu, tupedwe mulimu wakuyiisya bamwi bantu kasimpe nkitwakayiya. * (1 Tim. 4:16) Chiindi nitugwasya bamwi kuti basyome kasimpe kali muBbayibbele, zipa kuti lusyomo lwesu lusime.

11. Mwaapostolo Pawulu wakali kubayiisya biyeni bantu alubo nga tulamutobelezya biyeni?

¹¹ Chiindi mwaapostolo Pawulu naakali kuyiisya bantu, wakali ‘kubakwelelezya amakani aajatikizya Jesu aali mu Mulawo wa Musa alimwi amu Basinsimi.’ (Mil. 28:23) Nga tulamutobelezya biyeni Pawulu chiindi nitwiiya aabamwi atala akasimpe kali muBbayibbele? Tatweelede kubabuzya zyaambwa aaBbayibbele luzutu pesi tweelede kubagwasya kuti bayeeyesesye nzibabala kuchitila kuti baswene afwiifwi aJehova. Tuyanda kuti batambule kasimpe akaambo kakuti bakalibonena kuti nzibakayiya atala aLeza ulaaluyando nzyachoonzyo, kutali kukatambula akaambo kakuti balatuyanda.

12-13. Bazyali nga balabagwasya biyeni bana babo kuti bakkale mukasimpe?

¹² Nibazyali, nisimpe kuti muyanda kuti bana banu bakkale mukasimpe. Mulakonzya kuyeeya kuti balakonzya kusima mubukombi kuti kabali abeenzinyina balikabotu mumbungano. Pesi kuti bana babe achoonzyo chakuti bali mukasimpe, kuli zyiingi nzibeelede kuchita kutali kuba abeenzinyina balikabotu luzutu. Beelede kuba abweenzinyina busimide aLeza akusyoma kasimpe kaambwa aBbayibbele.

¹³ Kuti bazyali bakonzye kuyiisya bana babo kasimpe kali atala aLeza, beelede kuba chikozyano chibotu kwiinda mukubala Bbayibbele. Beelede kujana chiindi chakuyeeyesesya atala azintu nzibabala. Eezi ziyoopa kuti bakonzye kuyiisya bana babo kuti bachite mbuli mbabo. Mbuli mbubachita kubantu mbibayiyaabo Bbayibbele, bazyali beelede kuyiisya bana babo kubelesya zibelesyo nzitubelesya kuyanduulisisya. Kuti bachita oobo, bayoogwasya bana babo kuti bayande Jehova ‘amuzike uusyomeka alubo uuchenjede,’ Jehova ngwabelesya kuti atupe chakulya chamubukombi. (Mt. 24:45-47) Nibazyali mutajinkili akuyiisya bana banu kasimpe kayandikana kali muBbayibbele luzutu. Amubagwasye kuti lusyomo lwabo lusime kwiinda mukubayiisya “zintu zisisidwe zya Leza” kweendelana aminyaka yabo anzibakonzya kujata.—1 Kor. 2:10.

14. Nkamboonzi nitweelede kwiiya bupolofita buli muBbayibbele? (Langa kabbokesi kati “ Nga Ulabupandulula Biyeni Bupolofita Oobu?”)

¹⁴ Bupolofita nchipanzi chiyandikana loko chili muJwi lyaLeza chitugwasya kuti tusyome Jehova amoyo woonse. Kuli bupolofita bwakasimya lusyomo lwako na? Ulakonzya kwaamba bupolofita bwaambuula atala amazuba “aamamanino.” (2 Tim. 3:1-5; Mt. 24:3, 7) Pesi kuli bumwi na bupolofita bwakazuzikizigwa kale bupa kuti ube achoonzyo chakuti nzusyoma nkasimpe? Muchikozyano, ulakonzya na kupandulula bupolofita bulembedwe muli Daniele chaandaano 2 achaandaano 11 kuti bwakazuzikizigwa akuti bulikuzuzikizigwa biyeni? * Kuti lusyomo lwako kaluyeeme muBbayibbele, talukonzyi pe kuzungaanisigwa. Atubone chikozyano chabakwesu bakapenzegwa muNkondo Yabili Yanyika Yoonse kuGermany. Nikuba kuti teeboonse pe bupolofita buli atala amazuba aakumamanino mbubakali kumvwisisisya, pesi bakali kuzisyoma zyaambwa aJwi lyaLeza.

15-17. Kubala Bbayibbele kwakabasimya biyeni bakwesu bakali kupenzegwa amaNazi?

¹⁵ Chiindi Germany niyakali kweendelezegwa amaNazi, zyuulu zyabakwesu abachizi zyakabikkwa mumajele. Hitler awumwi mupati-pati wamfulumende uutegwa Heinrich Himmler bakali kuzonda Bakamboni baJehova. Umwi muchizi wakaamba kuti Himmler wakabuzya kabunga kabachizi bakali mujele kuti: “Jehova wanu weendelezya kujulu, pesi aano anyika, ndiswe tweendelezya. Tuyanda kubona batakkale kwachiindi chilamfu, iswe naakuti inywe.” Niinzi chakagwasya bakombi baLeza kuti bakkale kabasyomekede?

¹⁶ Basikwiiya Bbayibbele aabo bakalizi kuti Bwaami bwaLeza bwakatalika kweendelezya mu1914. Teekwakabagambya pe kukazigwa nkubakali kuchitwa. Alubo bakalizi kuti takwe mfulumende iikonzya kukachizya Leza kuti azuzikizye makanze aakwe. Hitler takwe naakali kukonzya pe kumaninsya bukombi bwakasimpe akupanga mfulumende iisimide kwiinda  Bwaami bwaLeza. Bakwesu aabo bakalizi kuti bweendelezi bwaHitler bwakali kuyoomana.

¹⁷ Nzibakali kusyoma bakwesu abachizi aaba zyakali zyachoonzyo. Kakutanayinda chiindi chilamfu, bweendelezi bwamaNazi bwakamana, alubo Heinrich Himmler wakaambide kuti “aano anyika, ndiswe tweendelezya” wakali kuchija kujeegwa. Naakali kuchija, wakaswaanana aMukwesu Lübke ngwaakabwene chiindi naakali mujele. Kali abweeme, wakabuzya Mukwesu Lübke kuti: “Niinzi chili kuchitika kuli Basikwiiya Bbayibbele?” Mukwesu Lübke wakabuzya Himmler kuti kuzwa chiindi Bakamboni baJehova bakalizi kuti bweendelezi bwamaNazi bwakali kuzoomana akuti bakali kuzoowangununwa. Nikuba kuti Himmler wakali kukkala kaambuula zintu zyiingi zibi atala aBakamboni baJehova pesi aachiindi eecho wakalibula alyakwaamba. Mukuya kwachiindi wakazoolijeya. Twiiyaanzi? Kubala Bbayibbele akumvwisisisya bupolofita buli mumo kupa kuti lusyomo lwesu lusime akuti tuzumanane kusyomeka chiindi nituli mumapenzi.—2 Pet. 1:19-21.

18. Lugwalo lwa Johane 6:67, 68 lutondeezya kuti nkamboonzi nitweelede kuba “aluzyibo lwini-lwini alimwi akumvwisya koonse” kwakaambwa aPawulu?

¹⁸ Umwi awumwi weelede kutondeezya luyando kuchitila kuti tutondeezye kuti tuli maKristu akasimpe. Kuyungizya waawo, tweelede kuba “aluzyibo lwini-lwini alimwi akumvwisya koonse.” (Flp. 1:9) Kuti teetwachenjela, tulakonzya ‘kupepululwa amuwo uuli woonse wanjiisyo zyabantu ziindene-indene kwiinda mulweeno lwabo’ kuswaanizya abasiluleyo. (Ef. 4:14) Chiindi basikwiiya biingi bamumwaanda wakusaanguna nibakaleka kutobela Jesu, mwaapostolo Petro wakatondeezya kuti wakali achoonzyo chakuti Jesu wakali kuyiisya “majwi aapa buumi butamani.” (Bala Johane 6:67, 68.) Nikuba kuti teezyoonse pe nzyaakali kumvwisisisya Petro atala amakani aayo, wakazumanana kusyomeka nkaambo wakalizi kuti wakali wajana kasimpe atala aKristu. Anduwe ulakonzya kuba achoonzyo atala anziliyiisya Bbayibbele. Kuti wachita oobo, uyoozumanana kusyomeka kuti waswaanana amasunko alubo uyoogwasya bamwi kuti babe alusyomo lusimide.—2 Joh. 1, 2.