1. Tweelede kuchibona biyeni chipo chankombyo?

 TWAKAPEGWA chilongezyo chibotu loko chakwaambuula aaMulengi wajulu anyika kwiinda munkombyo. Amuyeeye biyo, tulakonzya kubuzya Jehova zintu zili aansi aamyoyo yesu kufumbwa mputwayandila, katubelesya kufumbwa mulaka ngutuyanda. Tulakonzya kukomba katulede muchibbadela naakuti katuli mujele, katuli aachoonzyo chakuti uyootumvwa Taateesu siluyando. Kwaamba choonzyo, tatweelede kuchilangilaansi chipo eechi chiyandikana.

2. Mwaami Davida wakatondeezya biyeni kuti uchibona kachiyandikana chipo chankombyo?

² Mwaami Davida wakali kuchibona kachiyandikana loko chipo chankombyo. Wakayimbila Jehova kati: “Mupailo wangu aube mbuli tununkilizyo tubambidwe kabotu kumbele lyako.” (Int. 141:1, 2) Muchiindi nchaakapona Davida, tununkilizyo twakali kubelesegwa aabapayizi mubukombi busalala, twakali kubambwa kabotu-kabotu. (Kul. 30:34, 35) Nzyaakaamba Davida naakakozyanisya tununkilizyo ankombyo, zitondeezya kuti wakali kubikkila maanu kuzintu nzyaakali kuyanda kubuzya Wisi wakujulu. Eezi nzizyo nzitweelede kuchita andiswe. Tuyanda kuti nkombyo zyesu zimubotezye Jehova.

3. Tweelede kuba aamaboneno aali biyeni chiindi nitukomba kuli Jehova alubo nkamboonzi?

³ Tweelede kutondeezya kuti tulamulemeka Jehova chiindi nitukomba kuli nguwe. Yeeya atala azilengaano zigambya zyakabonwa aaIsaya, Ezekkiyele aJohane. Zilengaano eezyo zilisiyene pesi zilaachimwi chintu cheendelana. Zyoonse zitondeezya kuti Jehova Mwaami mupati. Isaya wakabona “Jehova  kakkede acuuno cabwami cilamfwu kapati alimwi cisumpukide.” (Is. 6:1-3) Ezekkiyele wakabona Jehova kakkede aankalaki yakwe yakujulu kazyungulukidwe “mumuni uumweka mbuli kumweka kwafulicoongo.” (Ezk. 1:26-28) Daniyele wakabona “Sinsiku” kazweete zigogo zituba, kakuzwa mabanga-mabanga aamulilo kuchuuno chakwe. (Dan. 7:9, 10) Alubo Johane wakabona Jehova kakkede aachuuno chakwe kazyungulukidwe aachimwi chintu chibotu chili mbuli fulichoongo wa-emarodi. (Ciy. 4:2-4) Chiindi nituyeeyesesya atala abulemu bupati bwaJehova, tweelede kubona mbuchili chipati chilongezyo chankombyo akuti tweelede kumulemeka chiindi nitwaambuula aanguwe. Pesi tweelede kukombelaanzi?

4. Twiiyaanzi kuzwa kumajwi aakusaanguna Jesu ngaakaamba munkombyo yaMwaami iili muli Matayo 6:9, 10?

⁴ Bala Matayo 6:9, 10. MuNkambawuko Yakuchilundu, Jesu wakayiisya basikwiiya bakwe mbubeelede kukomba munzila iibotezya Leza. Naakazwa aakwaamba kuti “aboobo mboobu mbomweelede kupaila,” Jesu wakasaanguna kwaamba zintu ziyandikana zyeendelana amakanze aaJehova, ziswaanizya kusalazigwa kwazina lyaLeza; kuza kwaBwaami, oobo butazoonyonyoone basinkondonyina baLeza; azilongezyo Jehova nzyayanda kuzoopa bantu. Kuti twabikkilizya zintu zili boobu munkombyo zyesu, nga tulikutondeezya kuti, kuyanda kwaLeza nchintu chiyandikana mubuumi bwesu.

5. Zilikabotu na kuti tukombele zintu nzituyanda kutupalama? Pandulula.

⁵ Majwi aatobela ngaakaamba Jesu munkombyo yaMwaami, atondeezya kuti kulayandikana kuti tukombele zintu nzituyanda kutupalama. Tulakonzya kukumbila Jehova kuti atupe chakulya chesu chabuzuba, atulekelele zibi zyesu, atukwabilile kuti tutanjili mumasunko akuti atuvune kumubi. (Mt. 6:11-13) Chiindi nitukumbila Jehova kuti atugwasye azintu eezi, nga tulikutondeezya kuti nguwe ngutusyoma kuti atugwasye akuti tuyanda kuchita zintu zimubotezya.

6. Chiindi nitukomba, tweelede kubelesya majwi aali munkombyo yaMwaami na? Pandulula.

⁶ Jesu taakali kulangilila kuti batobeli bakwe batobelezye majwi ngaakabelesya munkombyo yaMwaami chiindi nibakomba.  Mulizimwi nkombyo Jesu nzyaakali kukomba, wakali kukombela zintu zyakali kuyandikana aachiindi eecho. (Mt. 26:39, 42; Joh. 17:1-26) Munzila iikozyenie, tulakonzya kukombela chimwi chintu nchituyanda kuti Jehova atugwasye aachiindi eecho. Chiindi nituyanda kusala kuchita chimwi chintu, tulakonzya kukomba kuli Jehova kuti atupe busongo amaanu. (Int. 119:33, 34) Chiindi nituyanda kuchita umwi mulimu muyumu, tulakonzya kukomba kuli Jehova kuti atugwasye kubona mbutweelede kuuchita mulimu ooyo. (Tus. 2:6) Bazyali balakonzya kukombela bana babo, bana balakonzya kukombela bazyali babo, alubo toonse tweelede kukombela bantu mbitwiiyaabo Bbayibbele abaabo mbitukambawukila. Nikuba oobo, nkombyo zyesu tazyeelede kuba zyakukumbila kupela.

7. Nkamboonzi nitweelede kutembawula Jehova munkombyo?

⁷ Tweelede kuyeeya kutembawula Jehova munkombyo zyesu. Taakwe umwi muntu pe ngutweelede kutembawula kwiinda Leza. Jehova “mubotu alimwi ulilibambilide kulekelela zibi.” NguLeza “siluse alimwi silweetelelo, [uutafwambaani] kukalala alimwi uzwide luyando lutamani akusyomeka.” (Int. 86:5, 15) Kwaamba choonzyo, buntu bubotu mbwalaabo Jehova azintu nzyachita, zipa kuti tumutembawule.

8. Nziizili zimwi zintu nzitweelede kulumba Jehova? (Intembauzyo 104:12-15, 24)

⁸ Kuyungizya aakutembawula Jehova munkombyo zyesu, tweelede kumulumba akaambo kazintu zibotu nzyatupa. Muchikozyano, tweelede kulumba Jehova akaambo kamibala yamaluba mibotu, michelo iisiyene-siyene abeenzuma batuyanda mbatupa. Taateesu siluyando utupa zintu zyoonse eezi kuchitila kuti tubotelwe. (Bala Intembauzyo 104:12-15, 24.) Kwiinda zyoonse, tweelede kulumba Jehova akaambo kachakulya chiingi chamubukombi nchatupa abulangilizi bwakuti buumi buzoobota kunembo.

9. Niinzi chikonzya kutugwasya kuti tutalubi kulumba Jehova? (1 Batesalonika 5:17, 18)

⁹ Nkuuba loko kuti tulube kulumba Jehova akaambo kazintu zyoonse nzyatuchitila. Niinzi chikonzya kutugwasya kuti tutalubi pe? Tulakonzya kulemba aansi zintu nzituyanda  kukumbila Jehova kuti atuchitile, mpawo chiindi achiindi tulange kuti nziizili Jehova nzyaasandula aazintu eezyo. Kuzwa waawo, atukombe kuli Jehova katumulumba akaambo kazintu eezyo nzyaasandula. (Bala 1 Batesalonika 5:17, 18.) Tulabotelwa alubo nga twalimvwa katuyandikana kuti bamwi batulumba akaambo kazintu nzitunga twabachitila. Munzila iikozyenie, anguwe Jehova ulabotelwa kuti twamulumba akaambo kakuti wasandula nkombyo zyesu. (Kol. 3:15) Nkaakali kamwi kaambo kayandikana kapa kuti tulumbe Leza?

10. Kweendelana alugwalo lwa 1 Petro 2:21, nkamboonzi nitweelede kulumba Jehova akaambo kakutuma Jesu aanyika?

¹⁰ Bala 1 Petro 2:21. Tweelede kulumba Jehova akaambo kakutuma Mwanaakwe ngwayandisya kuti azootuyiisye. Twiiya zyiingi atala aJehova ambutweelede kumubotezya kwiinda mukwiiya atala abuumi bwaJesu. Kuti twaba aalusyomo muchinunuzyo chaKristu, tulaba aabweenzuma busimide aJehova Leza alubo tulaba aaluumuno anguwe.—Rom. 5:1.

11. Nkamboonzi nitukomba muzina lyaJesu?

¹¹ Tulamulumba Jehova akaambo kakuti tulakonzya kukomba kulinguwe kwiinda muMwanaakwe. Jesu nguwe uubelesegwa aaJehova kuti atugwasye aazintu nzitunga twakumbila. Jehova ulaziswiilila alubo ulazisandula nkombyo zyesu nzitukomba kwiinda muzina lyaJesu. Jesu wakati: “Kufwumbwa ncomulomba muzina lyangu, ndiyoocicita cintu eeco, ikutegwa Taata akalemekwe kwiinda mu Mwana.”—Joh. 14:13, 14.

12. Nkaakali kamwi kaambo kapa kuti tulumbe Jehova akaambo kaMwanaakwe?

¹² Jehova ulekelela zibi zyesu kabelesya chinunuzyo chaJesu. Magwalo apandulula kuti Jesu ‘mupaizi wesu mupati . . . uukkede kujanza lyalulyo lyacuuno cabwami ica Mupati kujulu.’ (Heb. 8:1) Jesu “mugwasyi [wesu] kuli Taata.” (1 Joh. 2:1) Tulamulumba Jehova akaambo kakutupa Mupayizi Mupati, uumvwisisisya kuleezya kwesu alubo “uutukombelezyela.” (Rom. 8:34; Heb. 4:15) Tuli aachibi, nkinkaako, teetwakali kunookonzya pe kwaambuula aaJehova munkombyo kaansinga taakwe chinunuzyo chaJesu. Zili aantanganana kuti tatukwe majwi aakkwene akuti tumulumbe Jehova akaambo kachipo eechi chiyandikana nchaakatupa chaMwanaakwe ngwayandisya.

13. Mubusiku Jesu katanafwa, wakatondeezya biyeni kuti wakali kubayanda basikwiiya bakwe?

¹³ Mubusiku Jesu katanafwa, wakakombela basikwiiya bakwe kwachiindi chilamfu, kakumbila kuti Wisi abakwabilile “akaambo kamubi.” (Joh. 17:15) Eezi zitondeezya kuti wakali kubayanda basikwiiya bakwe. Nikuba kuti wakali wabaafwiifwi kuti aswaane sunko pati, wakatondeezya kuti wakali aandaba abasikwiiya bakwe.

14. Kujana twatondeezya biyeni kuti tulabayanda bakwesu abachizi?

¹⁴ Tulakonzya kutobelezya Jesu kwiinda mukutabikkila maanu kuzintu nzituyanda atulikke. Tweelede kukkala katukombela bakwesu abachizi. Kuti twachita oobo, nga tulikuswiilila mulawu waJesu wakuti tuyandane alubo nga tulikutondeezya Jehova mbutubayanda bakombima. (Joh. 13:34) Kukombela bakwesu abachizi teekusanisya chiindi pe. Jwi lyaLeza litubuzya kuti, “mupailo wakukombelezya wamuntu mululami ulabeleka canguzu kapati.”—Jak. 5:16.

15. Nkamboonzi nikuyandikana kukombela bakombima?

 ¹⁵ Kulayandikana kuti tukombele bakombima nkaambo baswaana masunko miingi. Tulakonzya kukumbila Jehova kuti abagwasye kuti balisimye chiindi nibalikuchiswa, nikwaba mapenzi aalichitikila, nikwaba nkondo nkubakkala, nibalikupenzegwa anibaswaanana aabumwi buyumu-yumu. Alubo tulakonzya kukombela bakwesu abachizi balipeda kugwasya bakombinyina bali mumapenzi. Kulakonzeka kuti ulibazi bamwi balikuswaana buyumu-yumu, ulakonzya kubaamba aamazina munkombyo zyako. Tutondeezya kuti tulabayanda bakombima kwiinda mukukumbila Jehova kuti abagwasye kuti balisimye.

16. Nkamboonzi nitweelede kubakombela batuzulwida?

¹⁶ Aabo bazulwida mumbungano, balalumba kuti bamvwa kuti bamwi balabakombela, alubo nkombyo eezyo zilabagwasya. Oobu mbubo mbaakalimvwa mwaapostolo Pawulu. Wakalemba kuti: “Amundipailile andime, kutegwa ndipegwe majwi ndajalula mulomo wangu, kuti ndicikonzye kwaambaula cakutayoowa nondizyibya bamwi maseseke aa Leza aamakani mabotu.” (Ef. 6:19) Mazubaano, andiswe tuli aabakwesu biingi babeleka changuzu batuzulwida. Tutondeezya kuti tulabayanda kwiinda mukukumbila Jehova kuti alongezye milimu yabo.

17-18. Nziizili zyiimo mutukonzya kukumbilwa kuti twiiminine bamwi munkombyo alubo niinzi nzitweelede kubikkila maanu?

¹⁷ Chimwi chiindi, nga twakumbilwa kuti twiiminine bamwi munkombyo. Muchikozyano, muchizi ulikuchitisya chiiyo chaBbayibbele ulakonzya kukumbila muchizi ngwaazwaawe mukukambawuka kuti akombe. Muchizi wakumbilwa kulakonzeka kuti tamuzi kabotu pe muntu wiiya Bbayibbele, nkinkaako ulakonzya kusala kuti akombe kumamanino aachiiyo nkaambo eezi zimugwasya kuti azibe zintu nzyayelede kukombela zikonzya kugwasya muntu uulikwiiya Bbayibbele.

¹⁸ Mukwesu ulakonzya kukumbilwa kuti akombe kumuswaangano wamulimu wakukambawuka naakuti kumuswaangano wambungano. Bakwesu bapegwa zilongezyo eezi, beelede kubikkila maanu kumakanze aamuswaangano. Nkombyo tayeelede kuba nzila yakupa lulayo kumbungano naakuti kupa zizibisyo.  Kumiswaangano myiingi yambungano, mamineti aali aali 5 nga lwiimbo ankombyo, nkinkaako, mukwesu uunga wakumbilwa kuti akombe tayelede kubelesya “majwi manji,” kapati kumasaangunino aamuswaangano.

19. Niinzi chikonzya kutugwasya kuti tukkale katulibambilide kusika buzuba bwaJehova bwalubeta?

¹⁹ Tweelede kwiibona kayiyandikana nkombyo mubuumi bwesu nkaambo zuba lyaJehova lyalubeta lyaba aafwiifwi. Akaambo kazeezi, Jesu wakaamba kuti: “Aboobo amupakamane lyoonse, kamupaila mipailo yakukombelezya ciindi coonse kutegwa mukakonzye kufwutuka muzintu zyoonse eezyo zyeelede kucitika.” (Lk. 21:36) Kukkala katukomba, kulakonzya kutugwasya kuti tukkale katusimide mubukombi kuchitila kuti buzuba bwaLeza butazoojani katutalibambilide pe.

20. Niinzi nzitweelede kuchita kuti nkombyo zyesu zibe mbuli tununkilizyo tununkilila?

²⁰ Twayiyaanzi? Twayiya kuti tweelede kuchibona kachiyandikana loko chipo chankombyo. Chintu chipati nchitweelede kukombela, cheelede kweendelana aamakanze aaJehova. Alubo, tweelede kulumba Leza akaambo kaMwanaakwe, Bwaami bwakwe akukombela bakombima. Jehova uyanda kuti tukombele zintu nzituyanda buzuba abuzuba azintu zyabukombi. Kuti twayeeyesesya atala azintu nzituyanda kukombela, nga tulikutondeezya kuti tuchibona kachiyandikana chipo eechi. Majwi eesu alaba mbuli tununkilizyo tununkilila kuli Jehova ‘tumubotela.’—Tus. 15:8.