MABBUKU aayo akali kutegwa ngamibala yafulichoongo. Nindakali kubala mabbuku aaya, ndakali kubona zifanikisyo zyakachincha mizeezo yangu. Kuzwa kandichili muniini, ndakaba achiyandisyo chakwiiya Bbayibbele mbuuli mbaakali kusungwaazya mabbuku aayo.

Nkondo Yabili Yanyika Yoonse niyakatalika muIndia, buumi bwakayindilila kundiyumina. Bazyali bangu bakaanzana mpawo bakazoolekana. Teendakali kuzimvwisisisya pe kuti nkamboonzi bantu mbindakali kuyanda nibakaanzana. Eezi zyakali kundikataazya mumizeezo alubo ndakali kulimvwa kandili aabukata. Nikuba kuti ndakazyedwe andikke pesi teendakali kujatwa munzila njindakali kuyanda.

Ime abaama twakaakukkala kudolopo litegwa Karachi. Limwi zuba, dokotela wakachembeede uutegwa Fred Hardaker, wakali Kamboni waJehova wakatuswaya. Wakali kusyoma zintu zikozyenie amishinali wakapede bazyali bangu mabbuku. Mpawo wakatalika kuyiisya baama Bbayibbele. Baama bakazooleka kwiiya mpawo bakati ndilakonzya kutalika kwiiya. Mviki yakatobela ndakatalika kwiiya Bbayibbele aMukwesu Hardaker.

Nikwakiinda mviki ziche, ndakatalika kwiinka kumiswaangano  yachiKristu kung’anda Mukwesu Hardaker nkwaakali kusilikila bantu. Bakamboni bachembeede bakali kusika ku12, bakali kunjilila mung’anda eeyo. Bakanduumbulizya alubo bakali kundijata mbuuli mwanaabo. Ndichiyeeyede mbubakali kukkala andime ambubakali kuzuwa andime mbuuli kuti balikwaambuula amweenzinyina alubo oolu nduulugwasyo ndundakali kuyanda achiindi eecho.

Kuzwa waawo, Mukwesu Hardaker wakandikumbila kuti ndimusindikile mumulimu wakukambawuka. Wakandiyiisya mbukakali kubelesegwa kanchina kafonogilafu kuchitila kuti tukonzye kulizizya bantu nkani zizwa muBbayibbele zyakalekkoodwa. Zimwi nkani zyakali kubanyemya bamwi nkaambo teebakali kuuyanda pe mulumbe. Nikuba boobo, ndakakuyandisya kukambawukila bamwi. Kwiiya kasimpe kamuBbayibbele kwakapa kuti ndibe achiyandisyo chakwaambila bamwi nzindakayiya.

Basilumamba bakuJapan nibakali kuyanda kulwana chisi chaIndia, mfulumende yakuBritain yakatalika kupenzya Bakamboni baJehova. MuJuly 1943 andime bakatalika kundipenzya. Mupati wachikolo nkundakali kwiiya wakali mweendelezi wachikombelo chaAnglican, wakanditanda kuchikolo kaamba kuti nzindakali kuchita teezyakali kabotu pe. Wakaambila baama kuti kuliswaanizya aBakamboni baJehova kwakapa kuti ndibe chikozyano chibi kuli basichikolo bamwi. Baama bakayoowa mpawo bakandikasya kuti kandiliswaanizya aBakamboni. Mpawo bakanditola kwakali kukkala ndeende kudolopo litegwa Peshawar kulampa makkilomita aasika ku1 370 kuzwa nkutwakali kukkala. Kukkala kule abakombima kwakapa kuti nditasimi mubukombi.

Mu1947, ndakabweeda kuKarachi kuti ndikayanduule mulimu. Nindakasika kudolopo eeli, ndakayinka kung’anda Dr. Hardaker nkwaakali kusilikila bantu. Mukwesu ooyu wakanditambula kabotu.

Mpawo wakandibuzya kuti, “Niinzi chilikukukataazya?” Nkaambo wakali kuyeeyela kuti ndiyanda kusilikwa.

Ndakati, “Dokotela tandichisidwe pe. Pesi ndilikuchiswa mubukombi. Ndiyanda kwiiya Bbayibbele.”

Wakandibuzya kuti, “Uyanda kuti tuzootalike lili?”

Ndakati, “Nikuba lino kuti kazikonzeka.”

Twakakkala chiindi chilamfu katuli kwiiya Bbayibbele. Ndakalimvwa mbuuli kuti ndasima mubukombi. Baama teebakaleka pe kundikasya kuliswaanizya aBakamboni pesi achiindi eechi, ndakali ndakomena zyakuti ndakali kukonzya kukwabilila lusyomo lwangu. Mu31 August 1947, ndakatondeezya kulipeda kuli Jehova kwiinda mukubbabbatizigwa mumaanzi. Nindakaba aminyaka iili 17, ndakaba payona wachiindi choonse.

Ndakasaanguna kupayona kuQuetta, nkubakakkempede chiindi basilumamba bakuBritain. Mu1947, chisi eechi chakaanzanisigwa, chimwi chakaba India chimwi chakaba Pakistan. * Eezi zyakapa kuti bantu batamvwanani muli zyabukombi alubo biingi bakalongela kumasena aasiyene-siyene. Bantu basika ku14  miliyoni bakachijila kumasena aasiyene-siyene. MaMozilemu bakuIndia bakaya kuPakistan mpawo maHindu amaSikh bakuPakistan bakalongela kuIndia. Nizyakali kuchitika zintu eezi, ndakagada chitima chakazwide bantu kuKarachi alubo ndakali aanze kandijatilide ansimbi kuti ndikonzye kuyoosika kuQuetta.

KuQuetta ndakajana umwi payona uuyandikana uutegwa George Singh, wakali aminyaka iili kuma20. George wakandipa nchinga yachiindi njindakali kugada (naakuti kutonta) mutulundu. Chiindi chiingi ndakali kukambawuka andikke. Nikwakiinda myeezi iili 6, ndakaba azyiiyo zyaBbayibbele zisika ku17 alubo bamwi bakaza mukasimpe. Umwi wabo wakali mupati wabasilumamba uutegwa Sadiq Masih alubo wakatugwasya aGeorge kuti tusandulule mabbuku aapandulula Bbayibbele mumulaka wachiUrdu, waambuulwa abantu biingi kuPakistan. Sadiq wakazooba sikupupulula makani mabotu uusungweete.

Mukuya kwachiindi, ndakazoobweeda kuKarachi nkundakaakubeleka aHenry Finch aHarry Forrest, mamishinali bakali achiindi chifwiifwi kabazwide kuGiliyadi. Bakwesu aaba bakandiyiisya zintu zyiingi! Limwi zuba ndakasindikila Mukwesu Finch kuti tukakambawukile kuPakistan, nkwiili kunyika.  Kumyuunzi yakali munsi achilundu chilamfu, twakajana bantu bachiUrdu bakali anyota yakasimpe kamuBbayibbele. Nikwakiinda minyaka iibili, ndakatambwa kuchikolo chaGiliyadi mpawo ndakaboola kuPakistan alubo zimwi ziindi ndakali mulangizi wabbazu. Ndakali kukkala abamwi mamishinali batatu kuLahore.

Mu1954, kwakaba kutamvwanana akati kamamishinali bakuLahore zyakapa kuti mutabi ubachinche. Ndakapegwa lulayo lusimide nkaambo andime ndakatola lubazu mukutamvwanana kwabo. Zyakandichisa loko mumoyo zyakuti ndakalimvwa kuti mulimu ooyu tanduukonzyi pe. Ndakabweeda kuKarachi mpawo ndakaya kuLondon, dolopo lyakuEngland kuti ndikagwasigwe mubukombi.

Mumbungano njindakali kunjila kuLondon, kwakavulide bantu babelekela kuBbeteli. Mubelesi wamutabi uutegwa Pryce Hughes, wakandigwasya chaluyando. Limwi zuba, wakandilwiida atala alulayo lusimide ndwaakapedwe aJoseph F. Rutherford, wakali mulangizi wamulimu wakukambawuka munyika yoonse. Chiindi Mukwesu Hughes naakali kweezya kulipa zilitamizyo, Mukwesu Rutherford wakamukalalila. Ndakagamba kubona Mukwesu Hughes kalikumwemwetela naakali kundibuzya makani aaya. Wakaamba kuti kumatalikilo zyakali kumuchisa loko. Mukuya kwachiindi wakabona kuti wakeelede kupegwa lulayo lusimide alubo eeyi yakali nzila yakutondeezya kuti uchiyandwa aJehova. (Heb. 12:6) Nzyakaamba zyakandisika amoyo alubo zyakapa kuti ndikombe Jehova kandibotelwa.

Kuchiindi eecho, baama bakalongela kuLondon nkubakaakutalika kwiiya Bbayibbele kabagwasigwa amukwesu John E. Barr. Mukuya kwachiindi mukwesu Barr wakazooba wamuKabunga Keendelezya. Bakayinkilila kunembo akwiiya mpawo mu1957 bakabbabbatizigwa. Alubo mukuya kwachiindi ndakamvwa kuti ndeende katanafwa, wakali kwiiya Bbayibbele aBakamboni baJehova.

Mu1958, ndakakwata Lene muchizi wachiDutch wakali kukkala kuLondon. Mumunyaka wakatobela, twakaba amwana musimbi uutegwa Jane, ngumupati mubana besu bali 5. Alubo, ndakajana chilongezyo chakuba mwaalu mumbungano yakuFulham. Twakalongela kubusena kutatontoli loko nkaambo Lene wakali kuchiswa-chiswa. Nkinkaako mu1967, twakalongela kudolopo litegwa Adelaide kuAustralia.

Mumbungano yakuAdelaide njitwakali kunjila, kwakali maKristu bachembeede bali 12 bakananikidwe. MaKristu aaba bakali basungu mumulimu wakukambawuka. Eezi zyakatugwasya kuti tusime mubukombi.

 Mu1979, twakaba amwana wachi5 uutegwa Daniel. Mwaneesu wakali abulwazi butegwa Down syndrome * alubo twakabuzigwa kuti tazooponi kwachiindi chilamfu. Nikuba lino kulandiyumina kupandulula mbutwakali kukataazikana atala anguwe. Twakali kubeleka changuzu kumulangania, kuswaanizya abakulana bakwe. Chimwi chiindi Daniel wakali kuchincha akuba blue nkaambo wakali kumana muuya wa-oxygen alubo eezi zyakali kuba akaambo kakuti moyo wakwe wakali aampako zibili, nkinkaako twakali kumutola kuchibbadela. Nikuba kuti wakali kuchiswa pesi wakalipampukide alubo wakali aluyando. Wakali kumuyanda Jehova. Nitwakali kukombela chakulya, wakali kufumbata maboko, kalikuguna-guna mutwe mpawo nitwamaninsya, wakali kwaamba kuti “Ameni” amoyo woonse. Kuzwa waawo wakali kulya.

Daniel naakaba aminyaka iili 4, wakaba abumwi bulwazi butegwa leukemia. Ime amukayintu wangu twakakataazikana loko. Ndakali kubonaanga ndilafwa. Muchiindi eecho chiyumu, mulangizi wabbazu Mukwesu Neville Bromwich wakatuswaya. Mubusiku oobo, wakatukumbata kumwi kalikulila. Toonse twakatalika kulila. Luyando ndwaakatutondeezya amajwi ngakaamba zyakatuumbulizya loko. Wakazooyenda akati kabo. Muchiindi chifwiifwi biyo, Daniel wakatusiya. Kufwa kwamwaneesu kwakatuchisa loko. Pesi twakali kulila katuli abulangilizi bwakuti taakwe chintu chikonzya kumaninsya bweenzinyina Daniel mbwaakali aabo aJehova, niluba lufu. (Rom. 8:38, 39) Tulangilila kuyoomubona lubo aakubusigwa munyika mpya yaLeza!—Joh. 5:28, 29.

Lino ndili mwaalu nikuba kuti ndakawumwa ama-stroke aayoosya kwaziindi zibili. Zyakandichitikila mubuumi zindigwasya kuti ndibabikkile maanu bamwi, kapati aabo baswaana buyumu-yumu. Ndileezya kutabapa mulandu. Pesi ngandalibuzya kuti: ‘Zyakabachitikila mubuumi zipa kuti balimvwe biyeni akuti babe amizeezo iili biyeni? Kujana ndachita biyeni kuti nditondeezye kuti ndilabayanda? Kujana ndabasungwaazya biyeni kuti bazumanane kuchita kuyanda kwaJehova?’ Ndilakuyanda kuswaya bakwesu abachizi bamumbungano kuti ndibasungwaazye mubukombi. Chiindi ninduumbulizya bamwi mubukombi, ngandalimvwa kandilikuumbulizigwa andime.

Ndilimvwa mbuuli sintembawuzyo wakati: “Miyeeyo minji iikataazya na yaata mumoyo wangu, kuumbulizya kwako [Jehova] nkokundikondezya.” (Int. 94:19) Jehova wakandigwasya mubuyumu-yumu mbundakaswaana mumpuli, mubukombi, mumizeezo amuzintu zyakatazuzikizigwa. Nisimpe, ndakabona kuti Jehova nguNdeende wachoonzyo!