CHIIYO 25
“Mebo Lwangu Ndiyooziyandaula Mbelele Zyangu”
“Mebo lwangu ndiyooziyandaula mbelele zyangu akuzilanganya.”—EZK. 34:11.
LWIIMBO 105 “Leza Nduyando”
ZITAYIIGWE *
1. Jehova ufanana biyeni amwanakazi uunyonsya?
MUCHIINDI chakapona mupolofita Isaya, Jehova wakabuzya mubuzyo wakuti, “Sena mutumbu inga waluba mwanaakwe uucinyonka?” Alubo Leza wakabuzya bakombi bakwe kuti: “Nokuba kuti bamatumbu aaba inga baluba, mebo tandikonzyi kukuluba yebo pe.” (Is. 49:15) Jehova tavuzyi kulikozyanisya amwanakazi. Pesi aawa wakachita oobo. Jehova wakabelesya kumvwanana nkwali aako mwanakazi amwanaakwe mutete katondeezya mbabayanda bakombi bakwe. Banakazi biingi balazuminana aJasmin wakati: “Chiindi nunyonsya mwanaako, muba abweenzinyokwe buli afwiifwi loko alubo bukkala kwachiindi chilamfu.”
2. Jehova ulimvwa biyeni kuti umwi wabakombi bakwe katachichiti kabotu mubukombi?
2 Jehova ulabona kuti uumwi wabakombi bakwe waleka kunjila miswaangano akuleka kukambawuka. Yeeya kuti zimuchisa biyeni kubona bakombi bakwe biingi kabatachichiti kabotu mubukombi * munyaka amunyaka.
3. Niinzi Jehova nzyayanda?
3 Biingi babakwesu abachizi aaba ngabazoochita kabotu lubo mubukombi alubo nga twabotelwa kubatambula. Jehova uyanda kuti baboole lubo andiswe mbutuyanda. (1 Pet. 2:25) Nga tulabagwasya biyeni kuti bachite kabotu lubo mubukombi? Katutanasandula mubuzyo ooyu, atusaangune kubona kuti niinzi chipa kuti baleke kunjila miswaangano akukambawuka.
NIINZI CHIPA KUTI BAMWI BALEKE KUBELEKELA JEHOVA?
4. Niinzi zyakachitikila bamwi akaambo kakuyandisya mulimu wakunyika?
4 Bamwi bakabikka mulimu wakunyika mubusena bwakusaanguna. Mukwesu utegwa Hung * ukkala kuAsia wakati, “Ndakali kumaninsya chiindi chiingi kandili kumulimu.” Alubo wakayungizya kuti, “Ndakali kulibuzya kuti ndeelede kuba amali nyingi kuti ndikonzye kukomba Jehova. Nkinkaako ndakali kubeleka kwama-awa miingi. Ndakatalika kutanjila miswaangano mbichaani-mbichaani mpawo ndakazoolekela limwi. Zintu zyanyika zipangidwe munzila iipa kuti bantu batantamuke Jehova mbichaani-mbichaani.”
5. Mapenzi ngaakaswaana umwi muchizi akapa kuti achiteenzi?
5 Bamwi bakwesu abachizi baswaanana amapenzi abamana manguzu. Umwi mwanakazi ulaabana bali musanu uukkala kuBritain uutegwa Anne wakati: “Umwi mwanaangu wakazyalwa kali chilema.” Alubo wakati: “Mukuya kwachiindi, umwi mwanaangu wakagwisigwa mumbungano alubo umwi wakachiswa bulwazi bwaboongo. Ndakakataazikana loko zyakuti ndakaleka kunjila miswaangano akukambawuka. Teendakachili kuchita kabotu mubukombi.” Zilatuchisa zyakachitikila Anne ampuli yakwe alubo tubafwida nsoni aabo baswaanana amapenzi ali boobo.
6. Niinzi chikonzya kuchitika kuti muntu waleka kubelesya lugwalo lwa Bakolose 3:13?
6 Bala Bakolose 3:13. Bamwi bakombi baJehova bakanyema akaambo kazintu zyakachitwa abakombinyina. Mwaapostolo Pawulu wakaamba kuti chimwi chiindi nga tulaatwaambo tutupa ‘kutongooka’ akaambo kazintu zichitwa abakwesu abachizi. Tulakonzya kutajatwa kabotu. Kuti teetwachenjelela, tulakonzya kutabalekelela. Kutalekelela bamwi kulakonzya kupa kuti tuleke kuliswaanizya abakombi baJehova. Atubone chikozyano chamukwesu uutegwa Pablo ukkala kuSouth America. Wakatamikizigwa kuti wachita chimwi chintu chitali kabotu alubo eezi zyakapa kuti atolelwe mukuli mumbungano. Wakachita biyeni? Pablo wakati: “Ndakanyema zyakuti mbichaani-mbichaani ndakasaanguna kutaliswaanizya ambungano.”
7. Niinzi chikonzya kuchitika kuti muntu kalipa mulandu akaambo kazintu nzyaakachita chiindi?
7 Muntu uulipa mulandu akaambo kazintu zibi nzyaakachita chiindi ulakonzya kuyeeya kuti Jehova tachimuyandi pe. Nikuba kuti wakachincha akulekelelwa, ulakonzya kubonaanga tacheeleli pe kuba aakati kabakombi baLeza. Mukwesu uutegwa Francisco mbaakali kulimvwa alakwe. Wakati: “Ndakasolwa akaambo kakuchita bwaamu.” Alubo wakati: “Kumasaangunino, ndakali kunjila miswaangano pesi mukuya kwachiindi ndakatalika kukataazikana akubonaanga tandeeleli pe kuba aakati kabakombi baJehova. Ndakalilya moyo zyakuti ndakalibuzya kuti Jehova taakandilekelela pe. Mukuya kwachiindi ndakazooleka kuya kumiswaangano.” Ulimvwa biyeni atala abakwesu abachizi bakaswaana zyiimo zyaambidwe ajulu? Ubafwida luzyalo na? Ubonaanga Jehova ulimvwa biyeni?
JEHOVA ULAZIYANDA MBELELE ZYAKWE
Mweembeli wamuchiindi chamaIsrayeli wakali kwiiyanda mbelele yakwe yasweeka (Langa fuka 8-9) *
8. Jehova ulabaluba na bantu bakamubelekela pesi batachiliswaanizyi abakombi bakwe? Pandulula.
8 Jehova tabalubi pe bantu bakali kumukomba pesi batachiliswaanizyi abakombi bakwe alubo tayilubi pe milimu njibakachita. (Heb. 6:10) Mupolofita Isaya wakalemba chikozyano chibotu loko chitondeezya Jehova mbabayanda bakombi bakwe. Wakalemba kuti “Mbubonya mbuli mweembezi, uyoolanganya butanga bwakwe. Ajanza lyakwe uyoobunganya twana twambelele antoomwe, alimwi uyootunyamuna acamba cakwe.” (Is. 40:11) Mweembeli mupati ulimvwa biyeni chiindi mbelele imwi niyapambuka kuzyeenzinyina? Jesu wakatondeezya kuti Jehova ulimvwa biyeni chiindi naakabuzya basikwiiya bakwe kuti: “Ino muyeeya buti? Ikuti muntu umwi kajisi mbelele zili 100 eelyo yomwe yasweeka, sena takoozisiya mumalundu eezyo zili 99 akuunka kuyooyandaula yeeyo yasweeka? Ncobeni ndimwaambila kuti, ikuti waijana ulakondwa kapati akaambo kanjiyo kwiinda zyeezyo zili 99 zyatasweekede.”—Mt. 18:12, 13.
9. Mweembeli ulikabotu wakali kuzijata biyeni mbelele zyakwe? (Langa chifanikisyo chili achivumbyo.)
9 Nkamboonzi nikweelela kukozyanisya Jehova amweembeli? Nkaambo chiindi mweembeli ulikabotu wakali kuziyanda loko mbelele zyakwe. Muchikozyano Davida wakalwana amulavu abbeya kuti akwabilile mbelele zyakwe. (1 Sam. 17:34, 35) Mweembeli ulikabotu wakali kubona kuti imwi mbelele yakwe yasweeka. (Joh. 10:3, 14) Mweembeli uuli boobu wakali kukonzya kujalila mbelele zili 99 naakuti kuzisiila umwi mweembeli mpawo aye kukuyanduula yasweeka. Jesu wakabelesya chikozyano eechi kuti atuyiisye kasimpe kayandikana kakuti: “Taata uuli kujulu tayandi kuti umwi wabasyoonto aaba alobe.”—Mt. 18:14.
Mweembeli wamuchiindi chamaIsrayeli ulikutondeezya kuti ulaandaba ambelele yakwe yakasweekede (Langa fuka 9)
JEHOVA ULAZIYANDUULA MBELELE ZYAKWE
10. Kweendelana alugwalo lwa Ezekieli 34:11-16, Jehova wakazisyomezya kuzichitilaanzi mbelele zyakwe zyakasweeka?
10 Jehova ulatuyanda toonse kuswaanizya ‘abaniini’ batachimubelekeli. Kabelesya mupolofita Ezekkiyele Leza wakasyomezya kuti uyooziyanduula mbelele zyakwe akuzigwasya kuti zisime lubo mubukombi. Alubo wakaamba zintu nzyaakali kuyoochita kuti azigwasye. Zintu eezyo zilifenene azyakali kuchitwa amweembeli wachiindi kuti mbelele yakwe yasweeka. (Bala Ezekieli 34:11-16.) Chakusaanguna mweembeli wakali kubelesya manguzu achiindi chakwe kuyanduula mbelele. Mpawo kuti wayibona wakali kwiitola kuzyeenzinyina. Alubo kuti mbelele eeyo yalichisa naakuti yabaanzala, wakali kwiigwasya kwiinda mukusilika zilonda zyayo, kwiitola kuzyeenzinyina akwiisanina. Baalu, beembela “butanga bwa Leza” beelede kuchita zintu eezi chiindi nibagwasya bantu batachiliswaanizyi ambungano. (1 Pet. 5:2, 3) Baalu balabalanguula, balabagwasya kuti baboole mumbungano alubo balabatondeezya luyando kwiinda mukubagwasya kuti basime lubo mubukombi. *
11. Niinzi nchaakali kumvwisisisya mweembeli ulikabotu?
11 Mweembeli ulikabotu wakali kumvwisisisya kuti mbelele ilakonzya kusweeka. Alubo taakali kwiijata bubi pe mbelele yapambukide kuzyeenzinyina, kuti wayibona. Atubone Jehova mbaakachita chiindi bamwi bakombi bakwe nibakaleka kuchita zyaakababuzizye kuti bachite.
12. Jehova wakamujata biyeni Jona?
12 Mupolofita Jona wakachija mulimu ngwaakali wapegwa. Nikuba boobo Jehova taakamukaka pe Jona. Mbuli mweembeli ulikabotu, Jehova wakamugwasya Jona kwiinda mukumupa manguzu akuzuzikizya mulimu wakwe. (Jon. 2:7; 3:1, 2) Jehova wakabelesya bbonobono kuti agwasye Jona kubona kuti buumi bwamuntu umwi awumwi bulayandikana. (Jon. 4:10, 11) Twiiyaanzi? Baalu tabeelede kubalekelezya bantu batachichiti kabotu mubukombi. Pesi beelede kumvwisisisya kuti niinzi chakapa kuti muntu ooyu aleke kuliswaanizya ambungano. Alubo kuti muntu ooyu watalisya lubo kubelekela Jehova baalu balazumanana kumutondeezya luyando.
13. Twiiyaanzi kunzila Jehova njakamubonaayo mulembi wa Intembauzyo 73?
13 Mulembi wa Intembauzyo 73 wakamana manguzu chiindi naakali kubona basizibi kabazwidilila. Wakayeeya kuti kubelekela Jehova takugwasyi pe. (Int. 73:12, 13, 16) Jehova wakachita biyeni? Taakamunyemena pe. Pesi Jehova wakapa kuti majwi aakwe alembwe muBbayibbele. Sintembawuzyo wakazoobona kuti chintu chiyandikana loko mubuumi nkuba abweenzinyina bulikabotu aJehova. (Int. 73:23, 24, 26, 28) Twiiyaanzi? Baalu tabeelede kufwambaana kubayeeyela zintu zitali kabotu bantu banga babonaanga kubelekela Jehova takugwasyi pe. Tabeelede kubasola pe pesi beelede kweezya kumvwisisisya kuti niinzi chipa kuti bachite akwaambuula munzila iili boobu. Eezi ziyoogwasya baalu kuti bakonzye kubona Magwalo akonzya kubagwasya.
14. Nkamboonzi Eliya naakali kuyanda kugwasigwa alubo Jehova wakamugwasya biyeni?
14 Mupolofita Eliya wakachija Jezebbeli. (1 Bam. 19:1-3) Wakayeeya kuti teekwakachilikwe uumbi mupolofita waJehova akuti mulimu ngwaakachita teewakagwasya pe. Eliya wakakataazikana zyakuti wakakumbila kuti afwe. (1 Bam. 19:4, 10) Jehova taakamusola pe Eliya pesi wakamubuzya kuti taakali alikke pe, wakeelede kusyoma nguzu zyaLeza akuti kwakachili umwi mulimu ngwakeelede kuchita. Jehova wakamuswiilila Eliya naakali kwaambuula alubo wakamupa umwi mulimu. (1 Bam. 19:11-16, 18) Twiiyaanzi? Toonse, kapati baalu tweelede kuzifwida luzyalo mbelele zyaJehova. Nikuba kuti muntu wanyema biyeni naakuti wabonaanga Jehova tachikonzyi pe kumulekelela, baalu beelede kumuswiilizya chiindi naamba zili mumoyo wakwe. Alubo beelede kumugwasya kubona kuti Jehova uchimuyanda.
TWEELEDE KUZIBONA BIYENI MBELELE ZYALEZA ZISWEEKEDE?
15. Lugwalo lwa Johane 6:39 lutondeezya kuti Jesu wakali kuzibona biyeni mbelele zyaWisi?
15 Jehova uyanda kuti tuzibone biyeni mbelele zyakwe zisweekede? Jesu wakatusiila chikozyano chibotu. Jesu wakalizi kuti mbelele zyaLeza zyoonse zilayandikana nkinkaako wakabeleka changuzu kuti agwasye ‘mbelele zisweekede zyamung’anda ya Israyeli’ kuti ziboole kuli Jehova. (Mt. 15:24; Lk. 19:9, 10) Mbuli zichitwa amweembeli ulikabotu, Jesu wakabeleka changuzu kuti agwasye mbelele zyaJehova kuti zitasweeki.—Bala Johane 6:39.
16-17. Baalu beelede kuubona biyeni mulimu wakugwasya bantu batachichiti kabotu bukombi? (Langa kabbokesi kati “ Mbiikonzya Kulimvwa Mbelele Yasweeka.”)
16 Mwaapostolo Pawulu wakasungwaazya baalu bakuEfeso kuti batobelezye chikozyano chaJesu. Wakati: “Mweelede kubagwasya aabo batajisi nguzu, alimwi lyoonse mweelede kuyeeya majwi aa Mwami Jesu, eelyo lwakwe mwini naakaamba kuti: ‘Kupa kulakkomanisya kapati kwiinda kupegwa.’” (Mil. 20:17, 35) Lugwalo oolu lutondeezya kuti baalu bali amulimu mupati wakulangania bakombi baJehova. Mwaalu uukkala kuSpain uutegwa Salvador wakati: “Kuti ndayeeya Jehova mbazibikkila maanu mbelele zyakwe zyakasweeka zindipa kuti andime ndibeleke changuzu kuti ndizigwasye. Alubo ndilizi kuti Jehova uyanda kuti ndizibikkile maanu.”
17 Bantu boonse baambwa muchiiyo eechi bakagwasigwa kuti baboole lubo kuli Jehova. Mazubaano, kuli bantu biingi batachichiti kabotu mubukombi bayanda kuboola kuli Jehova. Muchiiyo chitobela tuyoolanga-langa kuti nga tulabagwasya biyeni bantu bali boobo kuti baboole kuli Jehova.
LWIIMBO 139 Amweezyeezye Kuti Muli Munyika Mpya
^ par 5 Nkamboonzi bamwi bantu banga babelekela Jehova kwaminyaka nibanga bazooleka kuliswaanizya ambungano? Jehova ubabona biyeni? Mibuzyo eeyi ilasandulwa muchiiyo eechi. Alubo tulalanga-langa kuti twiiyaanzi kuzwa kunzila Jehova njaakabagwasyaayo bamwi bakombi bakwe bachiindi nibakaleka kuchita nzyaakababuzya kuti bachite.
^ par 2 BUPANDULUZI BWAMABALA: Muntu utachichiti kabotu mubukombi ngusikupupulula waba amyeezi iili 6 naakuti kwiinda katayinki kukukambawuka. Nikuba boobo bantu aaba bachili bakwesu abachizi alubo tulabayanda.
^ par 4 Amwi mazina akachinchwa.
^ par 10 Muchiiyo chitobela tuyoolanga-langa kuti baalu nga balazichita biyeni eezi.
^ par 60 BUPANDULUZI BWAZIFANIKISYO: Akaambo kakuti mweembeli wachiIsrayeli wakali kuziyanda mbelele zyakwe, kuti imwi yasweeka wakali kwiiyanduula akwiigwasya kuti iboole kuzyeenzinyina. Eezi nzizyo nzibachita baalu.
^ par 64 BUPANDULUZI BWAZIFANIKISYO: Muchizi uutachichiti kabotu mubukombi ulikulinda bbaasi kuti lyeende mpawo wabona Bakamboni babili kabali kuchita bukambawusi bwaantanganana.
