KUMAHEBBRAYO bakali kukkala muNyika Yachisyomezyo, munyaka wakali kusaanguna chiindi nibakali kupanda akubyala, mumweezi waSeptember naakuti October mazubaano.

Bantu bakali kubala bulamfu bwamweezi kwiinda mukulanga mazuba nwaakali kuboneka. Mweezi wakali kuboneka kwamazuba aali 29 naakuti 30. Alubo bakali kubala bulamfu bwamunyaka kababelesya zuba. Nikuba oobo, munyaka wakali kubalwa kakubelesegwa mweezi wakali aamazuba mache kwiinda munyaka wakali kubalwa kakubelesegwa zuba. Nkinkaako, bakeelede kuyanduula nzila yakuti, kuti babala kababelesya mweezi naakuti kababelesya zuba bazwe aachintu chimwi. Kuti bakonzye kuchita oobo, bakali kuyungizya mazuba naakuti mweezi, amwi bakachita oobo kumasaangunino aamunyaka wakali kutobela. Eezi zyakali kupa kuti kkalenda yabo yeendelane aachiindi nibakali kuganka anibakali kutebula.

Nikuba oobo, muchiindi chakapona Mozesi, Leza wakabuzya bakombi bakwe kuti munyaka wabo wakali kuyoosaanguna mumweezi waAbbibbi, wakazooyitwa kuti Nisani, mazubaano mweezi waMarch naakuti April. (Kul. 12:2; 13:4) Pobwe lyakali kusekelelwa mumweezi ooyo lyakali kuswaanizya butebuzi bwabbali.—Kul. 23:15, 16.

Umwi sikulanga-langa makani aamuBbayibbele uutegwa Emil Schürer mubbuku lyakwe litegwa The History of the Jewish People in the Age of Jesus Christ, (175 B.C.–A.D. 135) wakalemba kuti: “Kwakali kuuba loko kuziba aayelede kuyungizigwa mazuba naakuti mweezi wachi 13 mukkalenda. Pobwe lyaPasika lyakali kusekelelwa chiindi mweezi nwaakali kubuchesya mumweezi waNisani, (Nisani 14). Chiindi chiingi, pobwe eeli lyakali kuchitwa chiindi buzuba abusiku nibwakali kuba aabulamfu bweelene. Nkinkaako, kumamanino aamunyaka chiindi nibakali kubona kuti Pasika lyakali kuyoochitwa buzuba abusiku buli aabulamfu bweelene kabutanasika, bakali kuyungizya mweezi uumbi [wachi13] musule aamweezi waNisani.”

Bakamboni baJehova babelesya nzila eeyi yakubala chiindi nibayanda kuziba buzuba bweelede bwakuchita Chilalilo chaMwaami chaGoko, bweelede kweendelana aaNisani 14 mukkalenda yamaHebbrayo. Mbungano zili munyika yoonse nga zyazibisigwa atala abuzuba oobu kakuchili chiindi. *

MaHebbrayo bakali kuziba biyeni kuti mweezi wamana akuti wasaanguna? Mazubaano nkuuba loko nkaambo ulakonzya kulanga aakkalenda naakuti aaIntaneti. Nikuba oobo, muchiindi chakalembwa Bbayibbele teekwakali kuuba pe.

Muchiindi chaZambangulwe, myeezi yakali aamazuba aali 30. (Matl. 7:11, 24; 8:3, 4) Mukkalenda yamaHebbrayo, bakali kusaanguna kubala mweezi chiindi mweezi nwaakkala. Mweezi wakali kuboneka kwamazuba aali 29 naakuti aali 30.

Aali chimwi chiindi, Davida aJonatani nibakali kwaambuula atala amweezi mupya, bakati: “Juunza ulakkala mweezi.” (1 Sam. 20:5, 18) Kuyeeyelwa kuti muchiindi nchibakapona, myeezi yakali kubalwa kakuchili chiindi. MaIsrayeli bakali kuziba biyeni kuti mweezi mupya wasaanguna? Bbuku litegwa Mishnah lyamilawu atunsiya-nsiya twamaJuda lilaamwi makani. Litondeezya kuti maJuda nibakazwa kubuzike kuBbabbiloni, Nkuta Mpati yamaJuda kuli nziyakali kuchita. Mumweezi wachi7 nikwakali kusekelelwa mapobwe, bamunkuta mpati bakali kuchita muswaangano mubuzuba bwachi 30 bwamweezi. Baalumi aabo, mbabo bakali kuziba kuti mweezi mupya usaanguna lili. Bakali kuziba biyeni?

Balindi bakali muJerusalemu yoonse, mbabo bakali kusaanguna kubona mweezi mupya nwaakali kukkala. Kuzwa waawo, bakali kufwambaana kubuzya baNkuta Mpati. Baalumi bamuNkuta Mpati, bakali kuchita muswaangano chiindi nibakali kubona kuti bukamboni mbubakalaabo bulizwide. Kuzwa waawo, bakali kwaambilizya kuti mweezi mupya wasaanguna. Niinzi zyakali kuchitika kuti balindi bakachilwa kubona mweezi mupya nwaakkala akaambo kakuti kuli mayoba naakuti buuma? Mweezi wakali kutobela wakali kwaambwa kuti ulaamazuba aali 30  mpawo kwakali kwaambilizigwa kuti mweezi mupya wasaanguna.

Bbuku lyaMishnah nilyakali kupandulula atala azyakali kusalwa aaNkuta Mpati, lyakatondeezya kuti, bakali kuzibisya bantu kwiinda mukuyasya mulilo aaChilundu chama-Olifa chakali aafwiifwi aJerusalemu. Mulaamwi masena aakali aajulu muIsrayeli yoonse, kwakali kubelesegwa mililo kuti bazibisye bantu atala amakani aaya. Mukuya kwachiindi, kwakazoobelesegwa bantu bakali kutumwa kuti bazibisye bantu. Nkinkaako, maJuda aakali muJerusalemu, mulsrayeli yoonse amumyuunzi, bakali kufwambaana kuziba kuti mweezi mupya wakkala. Eezi zyakali kugwasya kuti boonse basekelele mapobwe aachiindi chimwi.

Chaati iibikkidwe ilakonzya kukugwasya kuti umvwisisisye kuti myeezi yamaHebbrayo, mapobwe aziindi zyakali kunjililana biyeni.