1, 2. Mbutuyabusima mubukombi, tweelede kwiiya kuchitaanzi? Amba chikozyano.

ATUTEEDI mwana muniini wapegwa chipo. Bazyali bakwe balamubuzya kuti aambe kuti, “Ndalumba.” Mwana ooyu ulachita oobo nkaambo mbubamubuzya bazyali bakwe. Nayabukomena, ulasaanguna kumvwisisisya kuti nkamboonzi bazyali bakwe nibakubona kakuyandikana kulumba muntu wakuchitila chintu chibotu. Kuzwa waawo, unoowamba kuti ndalumba kazizwa aansi amoyo. Nkamboonzi? Nkaambo kulumba kwakaba mulinguwe.

² Munzila iikozyenie, nitwakayiya kasimpe, twakaziba mbukuyandikana kuswiilila malayilile aaJehova. Pesi mbutuyabusima mubukombi, tuyabwiiya zyiingi atala amizeezo yaJehova, zintu nzyayanda, nzyatayandi ambazibona zintu. Nituyeeya mbuuli nguwe akuzumizya kuti mizeezo yakwe itweendelezye mubuumi, muzintu nzituchita anzitusala, ngatulikupa kuti mizeezo yaJehova ibe yesu.

3. Nkamboonzi nikukonzya kutuyumina kuchita kuti mizeezo yaJehova ibe yesu?

³ Nikuba kuti kwiiya kuba aamizeezo yaJehova kulanoneezya pesi kulakonzya kutuyumina. Chimwi chiindi kutamaninina  kulakonzya kupa kuti kutuyumine kuzibona munzila iilikabotu zintu. Muchikozyano, kulakonzya kutuyumina kumvwisisisya maboneno aaJehova atala akulijata kabotu, bunoti, mulimu wakukambawuka, makani aabulowa azimwi. Kujana twachita biyeni? Niinzi chikonzya kutugwasya kuti tuzumanane kuchita kuti mizeezo yaLeza ibe yesu? Alubo kuchita oobo kutugwasya biyeni muzintu nzitusala lino anzituyoosala kunembo?

4. Niinzi chiswaanizidwe mumalayilile aaPawulu aakuti: ‘Muchinche mizeezo yenu’?

⁴ Bala BaRoma 12:2, NW. Mwaapostolo Pawulu wakapandulula ziswaanizidwe mukwiiya kuyeeya mbuuli Jehova. Chiiyo chakiinda chakatugwasya kubona kuti, kuti ‘tuleke kutobela ziyanza zyabweende bwazintu obuno,’ tweelede kutantamuka kuba amaboneno amichito yanyika. Pesi Pawulu wakazoopandulula kaambo kapa kuti ‘tuchinche mizeezo yesu.’ Kuchita oobo kuswaanizya kwiiya Jwi lyaLeza katuli amakanze aakumvwisisisya mizeezo yakwe, kwiiyeeyesesya akubeleka changuzu kuti mizeezo yesu yeendelane aamizeezo yaLeza.

5. Pandulula musiyano uuliwo aakati kakubala akwiiya.

⁵ Kwiiya kulisiyene akubala nkaambo kuswaanizya zyiingi kutali kubala makani aalembedwe luzutu naakuti kweenga nsandulo zyamibuzyo. Chiindi nitwiiya, tweelede kuyeeya kuti makani aayo atuyiisyaanzi atala aJehova, kuti nkamboonzi nachita zintu munzila iili boobo akuti mizeezo yakwe ili biyeni. Tuleezya kumvwisisisya kuti nkamboonzi Leza natubuzya zintu nzitweelede kuchita anzitweelede kutantamuka. Alubo kupa kuti tulange-lange zintu nzitweelede kuchincha mubuumi amumizeezo. Nisimpe kuti tatukonzyi kuzichita zyoonse eezi nitulikwiiya pesi tweelede kulipa chiindi chakuyeeyesesya makani ngitwali kwiiya, kuti kazichita tulakonzya kutola hafu yachiindi nchitwatola kubala.​—Int. 119:97; 1 Tim. 4:15.

6. Niinzi chichitika kuti twayeeyesesya atala amizeezo yaJehova?

⁶ Chiindi choonse nituyeeyesesya atala aJwi lyaLeza, kuli chintu chigambya chichitika. ‘Ngatwaziba’ akuba aachoonzyo chakuti mizeezo yaJehova ilimaninide. Kuchita oobu kupa kuti zintu tuzibone mbuuli mbazibona Leza alubo tulazuminana ambazibona zintu. ‘Tulachincha mizeezo yesu’ akutalisya kuba aamaboneno mapya. Mbichaani-mbichaani, tunooyabuchita kuti mizeezo yaJehova ibe yesu.

7, 8. (a) Jehova ububona biyeni bunoti? (Langa zifanikisyo zili kumatalikilo aachiiyo.) (b) Kuti twaba aamaboneno aali mbuuli aakwe, niinzi nchituyoobikka mubusena bwakusaanguna?

⁷ Nzituyeeya taziswaanizyi mbutulimvwa luzutu pesi zilaswaanizya anzituchita. (Mk. 7:21-23; Jak. 2:17) Makani aaya tulakonzya kwaamvwisisisya kabotu kuti twalanga-langa zikozyano ziche. Muchikozyano, Mabbuku Aamakani Mabotu atugwasya kubona mizeezo yaJehova atala abunoti. Leza wakasala bazyali bakali kuzookomezya Mwanaakwe, mpuli yakali kufwaba. (Lev. 12:8; Lk. 2:24) Mariya naakatumbuka Jesu ‘wakamulazika muchilido chabanyama, nkaambo teekwakali busena mung’anda yabeenzu.’ (Lk. 2:7) Kaansinga Jehova wakali kuyanda, wakali kunoobelesya nzila zisiyene-siyene kuti abambile Mwanaakwe busena bubotu nkwaakali kuzoozyalilwa. Pesi Leza wakali kuyanda kuti Jesu akazyalwe akukomenena mumpuli iisimide mubukombi.

 ⁸ Kuzwa muchikozyano chakuzyalwa kwaJesu, tubona maboneno Jehova ngalaawo atala abunoti. Bamwi bazyali bayanda kuti bana babo banote nikuba kuti kuchita oobo chimwi chiindi kupa kuti batasimi mubukombi. Pesi zintu zyabukombi Jehova uzibona kaziyandikana loko. Ulaamaboneno aali mbuuli aaJehova na? Zintu nzuchita zitondeezyaanzi?​—Bala BaHebrayo 13:5.

9, 10. Kujana twatondeezya biyeni kuti tuli aamaboneno aaJehova munkani yakulebya bamwi?

⁹ Chimwi chikozyano, maboneno Leza ngalaawo atala akulebya bamwi. Jesu wakati: “Kufwumbwa uulebya umwi wabasyoonto aaba ibasyoma, inga cainda kubota ikuti munsingo waangililwa ziyo lizingulusyigwa ambongolo akuwaalwa mulwizi.” (Mk. 9:42, NW) Majwi aaya atondeezya kuti aaya teemakani aakusaana pe! Mbukunga Jesu wakali abuntu bukozyenie abwaWisi, tulakonzya kuba aachoonzyo chakuti Jehova tabotelwi pe chiindi umwi muntu nachita zintu zilebya batobeli baJesu.—Joh. 14:9.

¹⁰ Tuli aamaboneno aaJehova aJesu na? Twakaachita kuti abe eesu na? Zintu nzituchita zitondeezyaanzi? Muchikozyano, tulakonzya kuyanda imwi fashoni njituzi kuti tiibajati kabotu bamwi mumbungano naakuti ipa kuti bamwi bayeeye zintu zitali kabotu. Kuyanda bakombima kuyoopa kuti tutantamuke fashoni iili boobo na?​—1 Tim. 2:9, 10.

11, 12. Kuba aamaboneno aali mbuuli aaLeza atala abubi akulinyona kutugwasya biyeni kuti tutantamuke bubi?

¹¹ Chikozyano chatatu nchakuti: Jehova ulabuzonda bubi. (Is. 61:8) Nikuba kuti ulizi kuti chimwi chiindi ngatwaba aamizeezo iitali kabotu akaambo kachibi nchitwakakona, Jehova utusungwaazya kuti andiswe tuzonde bubi. (Bala Intembauzyo 97:10.) Kuyeeyesesya kuti nkamboonzi Jehova nazonda bubi kutugwasya kuti tube aamaboneno aakwe alubo kutugwasya kuti tujane manguzu aakuti tutachiti zibi nzyazonda.

¹² Kuba aamaboneno aali mbuuli aJehova atala abubi, kutugwasya kuti tutachiti zintu zibi zitakwe milawu iilaantanganana muJwi lyaLeza. Muchikozyano, kuzyana kwakutalilemeka kutegwa lap dancing, kwavula loko mazubaano. Bamwi balakonzya kwaamba kuti kuzyana kwamusyobo ooyu teekuchita bwaamu pe. * Pesi michito iili boobu itondeezya mizeezo yaLeza na, uutayandi michito yoonse yabubi? Atutantamuke michito yoonse mibi kwiinda mukuba bantu balinyona alubo batachiti zintu Jehova nzyazonda.​—Rom. 12:9.

13. Nkamboonzi kuyeeya mbazibona zintu Jehova nikutugwasya kuti tusale chabusongo zintu nzituyoochita kunembo?

¹³ Nitulikwiiya, tweelede kuyeeya mbazibona zintu Jehova nkaambo kuchita oobo kuyootugwasya kuti tukasale chabusongo zintu nzituyoochita kunembo. Kuchita oobo kutugwasya kuti tukkale katulibambilide kakuchili chiindi nikuba nitwazooba muchiimo chiyanda kuti tusale chakufwambaana. (Tus. 22:3) Atulange-lange zikozyano zyamuBbayibbele.

14. Twiyaanzi kunzila Josefa njakakakaayo kweenwa amukayintu waPotifara?

¹⁴ Naakakaka kweenwa amukayintu waPotifara, Josefa wakatondeezya kuti wakali waayeeyesesya kakuchili chiindi maboneno  aaJehova aali atala akusyomeka mulukwatano. (Bala Matalikilo 39:8, 9.) Kuyungizya waawo, Josefa wakasandula mukayintu Potifara kuti: “Nkacite buti bubi bupati boobu akubisizya Leza?” Majwi aaya atondeezya kuti maboneno aaLeza wakali waachita kuba aakwe. Kutegwani andiswe? Muchikozyano, kujana wachita biyeni kuti muntu ngubelekaawe kachitaanga ulakuyanda? Kujana wachita biyeni kuti umwi muntu wakutumizya meseji naakuti chifanikisyo cheetela muzeezo wakoonana mufooni yako? * Nkuuba kuziba zyakuchita kuti kakuli twakaayeeyesesya kakuchili chiindi maboneno aaJehova alubo kakuli twakakanza kale nzituyanda kuchita.

15. Kujana twachita biyeni kuti tuzunde zyiimo zisunka kusyomeka kwesu kuli Jehova mbuuli mbubakachita maHebbrayo batatu?

¹⁵ Atulange-lange chikozyano chamaHebbrayo batatu bakali kutegwa Shadirekki, Mishekki aAbbedinego. Kukaka kukomba chikozyano changolida chaMwaami Nebbukkadinezari ambubakamusandula mwaami, kwakatondeezya kuti bakayeeyesesya kakuchili chiindi nzikwaamba kukkala kabasyomekede kuli Jehova. (Kul. 20:4, 5; Dan. 3:4-6, 12, 16-18) Kujana wachita biyeni kuti bbosi wako wakubuzya kuti usange mali yakuti muzoochite pobwe liswaanizya bukombi bwakubeja? Muchiindi chakuti ulindile kuti chiimo eecho chizoochitike, yeeyesesya atala aJehova mbazibona zyiimo zili boobo kakuchili lino. Mpawo kuti kwaba zyiimo zili boobo, kuyookuubila kuchita zintu zilikabotu mbuuli kwakachita maHebbrayo batatu.

16. Kuyeeyesesya mizeezo yaJehova kutugwasya biyeni kuti tulibambile nitwachiswa katulyiibide?

¹⁶ Kuyeeyesesya kakuchili chiindi mbukuyandikana kukkala katusyomekede kuli Jehova kulatugwasya kuti twachiswa katulyiibide. Nisimpe kuti tatuzumini kubikkwa bulowa boonse naakuti zipanzi zyabulowa zine pesi zimwi nzila zyakusilikwa kakubelesegwa tupanzi twabulowa ziyanda kuti muntu alisalile kabelesya njiisyo zyamuBbayibbele zitondeezya mizeezo yaJehova. (Inc. 15:28, 29) Nkinkaako, kulanga-langa makani aaya takweelede kuchitwa muntu nali muchibbadela,  naachiswa anikwayandikana kuti asale chakufwambaana. Lino nchiichiindi chakuti uchite kuyanduulisisya, uzuzikizye foomu lyaDPA litondeezya nzuyanda alubo waambuule aadokotela. *

17-19. Nkamboonzi nikuyandikana kwiiya mizeezo yaJehova lino? Amba chiimo nikuyandikana kuti tulibambile.

¹⁷ Chamamanino, atulange-lange nsandulo yaJesu, Petro naakati: “Kolyeengelela Mwami.” Jesu wakali wakuyeeyesesya kakuchili chiindi mbukuyandikana kuchita kuyanda kwaLeza aMagwalo aakali kupandulula buumi bwakwe bwaanyika akufwa kwakwe. Kuziba makani aaya kwakamugwasya kuti akkale kasyomekede, katabweedi musule.​—Bala Matayo 16:21-23, NW.

¹⁸ Mazubaano, Leza uyanda kuti bakombi bakwe babe aabweenzinyina busimide anguwe akuti bawubeleke changuzu mumulimu ngwabapede. (Mt. 6:33; 28:19, 20; Jak. 4:8) Mbuuli Petro mbaakachita kuli Jesu, chimwi chiindi, bantu bali aamakanze mabotu balakonzya kupa kuti tuleke kusyomeka. Muchikozyano, kujana wachita biyeni kuti bbosi wako wakubuzya kuti uyookupa mulimu uuli aajulu akuti uyookuyungizizya mali pesi kuchita oobo kakupa kuti uleke kuchita zimwi zintu zyabukombi? Atuteedi ulayiya mpawo wajana mweenya wakuti ukayungizye lwiiyo lwako kwiinda mukuyooyiila kuchikolo chili kule akung’anda. Achiindi eechi mpimpawo na mpuyelede kukomba, kuyeeyesesya kubuzya bamumpuli naakuti baalu mpawo nutasale zyakuchita? Weelede kuyeeyesesya mbazibona zintu yaJehova lino akuchita kuti mizeezo yakwe ibe yako. Nkinkaako waakuswaana sunko lili boobo, tazikakukataazyi pe kuziba zyakuchita. Unoozizi zyakuchita nkaambo unooli wakalibikkila kale zipekeezyo zyamubukombi, wakakanza kale mumoyo wako alubo ulakonzya kusala chabusongo.

¹⁹ Ulakonzya kuyeeya zimwi zyiimo zikonzya kubuka kulyiibide alubo kutayeeyeli pe. Nisimpe kuti tatukonzyi kulibambila kuzyiimo zyoonse zikonzya kuba. Pesi kuyeeyesesya atala ambazibona zintu Jehova nitulikuchita chiiyo chesu atulikke, kutugwasya kuti tuyeeye akubelesya nzitwakayiya nitwaba muchiimo chitusunka lusyomo. Chiindi nulikwiiya, yanduulisisya, kuti uzibe mbazibona zintu Jehova, zichite kuti zibe zyako alubo uyeeyesesye kuti kujana zyakugwasya biyeni kuti usale chabusongo lino amuchiindi chilikunembo.

20, 21. (a) Nkamboonzi nituyoobotelwa alwaangunuko ndutuyoobaalo munyika mpya? (b) Kujana twabotelwa biyeni lino mubuumi?

²⁰ Toonse twiilangilila ameso aasalala nyika mpya! Bwiingi besu tulangilila kuyoopona kukabe kutamani muparadayizi aanyika. Mubweendelezi bwaBwaami bwaLeza, tuyoowangunuka kumapenzi ngitulikuswaana munyika eeyi. Nikuba muchiindi eecho, bantu banoochili aalwaangunuko lwakulisalila. Muntu umwi awumwi unoolisalila nzyayanda azimubotela.

²¹ Nikuba boobo, lwaangunuko oolu lunooli aampulugolela. Bantu bali aamyoyo iibombede banoozulwidwa aamilawu yaJehova ambazibona zintu mumakani akusala chibotu achibi. Eezi ziyoopa kuti bantu bakabotelwe muluumuno lwiingi. (Int. 37:11) Nikuba lino, tulakonzya kubotelwa mbukunga tulikuchita kuti mizeezo yaJehova ibe yesu.