1. Nkamboonzi nituyanda kuumbulizigwa?

TOONSE tulakuyanda kuumbulizigwa. Amwi buumi bwesu buzwide kukataazikana, kutazuzikizigwa kwazintu nzitulangilila amapenzi. Zilakonzeka kuti tuswaana buyumu-yumu akaambo kakuchembaala, kuchiswa akufwidwa. Bamwi balakazigwa. Kuyungizya waawo, kulwana kuli kuvula. Tulizi kuti “ziindi zikataazya” nzitulikupona zitondeezya kuti tulikupona “kumazuba aakumamanino.” Alubo tulizi kuti kwiinda kwabuzuba bumwi abumwi kutondeezya kuti nyika mpya iyabuswena. (2 Tim. 3:1) Nikuba boobo, kulakonzeka kuti twakalindila kwachiindi chilamfu kuti zisyomezyo zyaJehova zizuzikizigwe pesi mapenzi alikuvula. Nkuukuli nkutukonzya kujana luumbulizyo?

2, 3. (a) Ngaali makani ngituzi atala aHabbakkukku? (b) Nkamboonzi nituyanda kulanga-langa bbuku lyaHabbakkukku?

² Kuti tujane nsandulo, atulange-lange makani aali mubbuku lyaHabbakkukku. Nikuba kuti Bbayibbele talyaambi makani miingi atala abuumi bwaHabbakkukku amilimu njaakachita pesi bbuku lyiitwa aazina lyakwe lilaamakani aatusungwaazya. Kweelede zina lyakwe lyaamba kuti “Kutambula Chabusungu.” Eezi zilakonzya kwaamba nzila Jehova njatuumbulizyaayo  kwiinda mukutukumbata naakuti bakombi bakwe mbubasyoma kuli nguwe. Habbakkukku wakaambuula aLeza, kabuzya mibuzyo. Jehova wakamusandula Habbakkukku alubo wakamuzulwida kuti alembe kwaambuuzyania nkubakachita nkaambo Jehova wakalizi kuti kwakali kuyootugwasya.​—Hab. 2:2.

³ Makani aali mubbuku lyaHabbakkukku nkwaambuuzyania nkwaakachita musinsimi waLeza wakakataazikene aJehova. Bbuku lyakwe lilaakati kamakani “aakalembwa kalekale.” Alubo makani aaya akabambwa muJwi lyaLeza Bbayibbele “kuti kubukakatilo akubukombelezyo bwamalembe tujane bulangizi bwakutontozya moyo.” (Rom. 15:4) Umwi awumwi kujana wagwasigwa biyeni amakani aali mubbuku lyaHabbakkukku? Alakonzya kutugwasya kuziba kuti kusyoma Jehova chambaanzi. Alubo businsimi bwaHabbakkukku bututondeezya kuti kulakonzeka kuba aamoyo uukkalinkene nikuba katuswaana mapenzi abuyumu-yumu. Nkinkaako, atulange-lange makani aali mubbuku lyaHabbakkukku zizwide.

4. Nkamboonzi Habbakkukku naakakataazikene?

⁴ Bala Habakuku 1:2, 3. Habbakkukku wakapona chiindi zintu nizyakali ziyumu. Wakali kataazikene nkaambo bantu bamuchiindi chakwe bakali kuchita zintu zibi akuyandisya zyakulwana. Habbakkukku wakalibuzya kuti: ‘Bubi oobu buzoomana lili? Nkamboonzi Jehova natali kufwambaana kumaninsya bubi?’ Habbakkukku wakali kubona bubi akutalulama kwakali kuchitwa aabantu bamulimbabo. Eezi zyakamumana manguzu. Muchiindi eechi chakali chiyumu, wakakwiilila Jehova kuti anjilile. Kulakonzeka kuti Habbakkukku wakali kubonaanga Jehova taakali kuzibona pe zyakali kuchitika. Alubo wakali kuyeeya kuti Leza taakali kuyoofwambaana pe kubambulula zintu. Kuli nwaakali walimvwa mbuuli musinsimi ooyu na?

5. Nchiichili chiiyo chiyandikana nchitujana mubbuku lyaHabbakkukku? (Langa chifanikisyo chili kumatalikilo aachiiyo.)

⁵ Habbakkukku wakaleka na kusyoma Jehova? Wakali waleka na kusyoma muzisyomezyo zyaLeza? Taakayina leka pe! Habbakkukku wakali kubuzya Jehova kutali bantu kuti bamugwasye kukukataazina akumapenzi ngaakali aawo zitondeezya kuti taakayinaleka pe kusyoma Leza. Alubo wakali kataazikene nkaambo taakali kumvwisisisya atala ambachibona Leza chiindi achakapede Jehova kuti amuleke kali muchiimo chiyumu chili boobo. Kwiinda mukuzulwida Habbakkukku kuti alembe mbaakali kulimvwa, Jehova wakatuyiisya chiiyo chiyandikana chakuti: Tatweelede kuyoowa pe kumubuzya zintu zitukataazya. Nkinkaako, utusungwaazya kuti tumubuzye zyoonse zili mumyoyo yesu nitukomba. (Int. 50:15; 62:8) Muli Tusimpi 3:5, tusungwaazigwa ‘kusyoma Jehova amyoyo yesu’ akuti tatweelede ‘kulifunkizya naakuti kusyoma maanu eesu.’ Kulakonzeka kuti Habbakkukku wakalaazi majwi aaya alubo wakaabamba mumoyo.

6. Nkamboonzi kukomba nikuyandikana?

⁶ Habbakkukku wakachita chimwi chintu kuti aswene aafwiifwi aJehova Mweenzinyina uusyomeka kumwi kali Wisi. Habbakkukku taakayanda kubambulula chiimo chakwe kwiinda mukusyoma maanu aakwe luzutu. Pesi wakakomba kuli Jehova kamubuzya mbaakali kulimvwa alubo wakatusiila chikozyano chibotu. Alubo, Jehova Uuswiilila nkombyo, utubuzya kuti tutondeezye kuti tulamusyoma kwiinda mukumubuzya zitukataazya. (Int. 65:2) Kuchita oobu kupa kuti tubone Jehova mbasandula nkombyo zyesu, mbatukumbata munzila yaluyando kwiinda mumalayilile ngatupa. (Int. 73:23, 24) Uyootugwasya kuti tuzibe mizeezo yakwe nikuba nituli mumapenzi aasiyene-siyene.  Kukomba kazizwa aansi amoyo, ninzila iitondeezya kuti tusyoma Leza.

7. Jehova wakamvwa biyeni atala akukataazikana kwaHabbakkukku?

⁷ Bala Habakuku 1:5-7. Naakazwa aakubuzya Jehova zintu zyoonse zimukataazya, kulakonzeka kuti Habbakkukku wakali kuyeeyela kuti Jehova uyoochita chimwi chintu. Jehova taakamunyemena pe nkaambo nguTaateesu uuli aaluzyalo alubo uumvwisisisya. Leza wakalizi kuti chakali kupa kuti Habbakkukku akumbile lugwasyo, nkuvula kwamapenzi akukataazikana. Nkinkaako, Jehova wakabuzya Habbakkukku zyakali kuyoochitikila maJuda muchiindi chifwiifwi chakali kunembo. Kulakonzeka kuti Habbakkukku wakali muntu wakusaanguna Jehova ngwaakabuzya atala akunyonyoonwa kwabantu bachita zintu zibi.

8. Nkamboonzi nsandulo yaJehova niyakamugambya Habbakkukku?

⁸ Jehova wakatondeezya Habbakkukku kuti wakalilibambilide kuchita chimwi chintu. Zyalani eeli bbi lyakali kuyoosubulwa chakufwambaana. Kwiinda mukwaamba majwi aati “mumazuba aanu,” Jehova wakali kutondeezya kuti wakali kuyoobeteka bantu bachita zibi muchiindi chamusinsimi naakuti chabantu bakali kupona muchiindi chakwe. Mbaakasandula Jehova teembaakali kuyeeyela pe Habbakkukku. Niinsandulo njaakali kulangilila na? Nzyaakamubuzya zyakali kutondeezya kuti kupenzegwa kwamaJuda kwakali kuyooyinkilila kunembo. * BaKkasidi (bantu bakuBbabbuloni) bakali aalunya kwiinda maJuda nkaambo maJuda bakazi zyeelelo zyaJehova. Nkamboonzi Jehova naakali kuyoobelesya bantu bakatali kumukomba kuti ayete mapenzi kubakombi bakwe? Kaansinga nduwe wakamvwa mulumbe ooyu wakali kunoochita biyeni?

9. Kweelede kuti njiili mibuzyo Habbakkukku njaakabuzya?

⁹ Bala Habakuku 1:12-14, 17. Nikuba kuti Habbakkukku wakalizi kuti Jehova wakali kuyoobelesya bantu bakuBbabbiloni kuti abeteke akusubula basizibi pesi wakali kukataazikana. Habbakkukku wakabuzya Jehova kuti wakachili “mwaala” wakwe naakuti “Ndomba.” (Dt. 32:4; Is. 26:4) Habbakkukku wakiinkilila kunembo kali aamoyo mulamfu akusyoma kuti Leza ulaaluyando aluzyalo. Makanze aamusinsimi ooyu akapa kuti ayande kubuzya Jehova iimbi mibuzyo. Nkinkaako, wakabuzya kuti: Nkamboonzi Jehova naalekela kuti zintu zyiindilile kubija muchisi chaJuda? Nkamboonzi natabambululi zintu chakufwambaana? Nkamboonzi Singuzuzyoonse nalikuzumizya kuti bubi bwiinkilile kunembo? Nkamboonzi Jehova ‘nawumwide biyo’ bubi azintu zibi kazilikuvula? Kabi Jehova “Musalali” alubo uli “ameso aasalala aakutabona bubi.”

10. Nkamboonzi chimwi chiindi nitukonzya kulimvwa mbuuli Habbakkukku?

¹⁰ Chimwi chiindi, tulakonzya kulimvwa mbuuli Habbakkukku. Zilakonzeka kuti tulamuswiilila Jehova. Tulamusyoma, tulabala akuyeeyesesya Jwi lyakwe alubo kuchita oobo kupa kuti tube aabulangilizi. Kuyungizya waawo, twiiya atala azisyomezyo zyakwe kwiinda mumalayilile ngitujana mumbunga yakwe. Nikuba boobo, tulakonzya kulibuzya kuti, ‘Mapenzi ngituswaana azoomana lili?’ Nzyaakachita kuzwa waawo Habbakkuku zituyiisyaanzi?

11. Habbakkukku wakakanza kuchitaanzi naakazwa akuswiilila Jehova?

¹¹ Bala Habakuku 2:1. Kwaambuuzyania Habbakkukku nkwaakachita aJehova kwakapa kuti abatame. Eezi zyakapa kuti  alindile Jehova kuti wakali kuyoobambulula zintu. Kulindila ooku Habbakkukku taakakutondeezya mpawaawo luzutu pesi wakazookutondeezya naakaamba lubo kuti wakali ‘kuyoolindila buzuba bwamapenzi.’ (Hab. 3:16) Bamwi babelesi baLeza basyomeka bakasyoma Jehova, batusungwaazya kuti tuzumanane kulindila Jehova kuti uyoobambulula zintu.​—Mik. 7:7; Jak. 5:7, 8.

12. Nziizili zimwi zyiiyo nzitujana kuchikozyano chaHabbakkukku?

¹² Makanze aaHabbakkukku atuyiisyaanzi? Chakusaanguna, tatweelede kuleka pe kukomba kuli Jehova nikuba kuti twaba mubuyumu-yumu buli biyeni. Chabili, tweelede kuswiilila nzyatubuzya Jehova kabelesya Jwi lyakwe ambunga yakwe. Chatatu, tweelede kulindila Jehova akuba aamoyo mulamfu katuli aalusyomo lwakuti uyoowamaninsya mapenzi ngituswaana kuchiindi chakwe cheelede. Kwaambuula aJehova akumuswiilila chiindi choonse kumwi katulindide mbuuli mbaakachita Habbakkukku, kuyoopa kuti tube aamoyo uubateme, uuyootugwasya kuti tulisimye. Kuba aabulangilizi kuyoopa kuti tube amoyo mulamfu alubo buntu oobu buyoopa kuti tukkale katubotelwa nikuba katuswaana mapenzi. Alubo kuba abulangilizi kupa kuti tube aachoonzyo chakuti Taateesu uuli kujulu uyoobambulula zintu.​—Rom. 12:12.

13. Ngaali majwi aasimya ngitujana muli Habakuku 2:3?

¹³ Bala Habakuku 2:3. Jehova wakabotelwa akaambo kamoyo wakulindila Habbakkukku ngwaakatondeezya. Singuzuzyoonse wakali kuchimvwisisisya chiimo chaHabbakkukku. Nkinkaako, Leza wakamuumbulizya munzila yaluyando musinsimi wakwe kuti wakali kuyoozijana nsandulo zyamibuzyo yakwe. Kukataazikana koonse nkwaakali aako kwakali kuyoomana. Muli amwi majwi, Leza wakali kwaambila Habbakkukku kuti: “Baamoyo mulamfu, undisyome. Ndiyookusandula nikuba kakubonekaanga kwayinda chiindi chilamfu!” Jehova wakayeezya Habbakkukku kuti wakabikkide chiindi nchaakali kuyoozuzikizya zisyomezyo zyakwe. Wakalulamika Habbakkukku kuti alindile kuzuzikizigwa kwazisyomezyo zyakwe. Eezi zyakali kuyoopa kuti musinsimi ooyu atakataazikani mumoyo.

14. Tweelede kuchitaanzi muchiindi eechi chizwide mapenzi?

¹⁴ Kulindila Jehova akuswiilila nzyatubuzya kuyoopa kuti tube aabulangilizi akuba aamoyo uubateme nikuba katuli mumapenzi abuyumu-yumu. Jesu wakaamba kuti tweelede kusyoma Jehova Sikubamba Chiindi Mupati kutali kubikkila maanu ‘kukuziba ziindi, naakuti mazuba’ Leza ngatanayubununa. (Inc. 1:7) Nkinkaako, atuzumanane kulibombya, kuba aalusyomo amoyo mulamfu katuchibelesya kabotu chiindi chesu kwiinda mukubelekela Jehova amanguzu eesu oonse.​—Mk. 13:35-37; Gal. 6:9.

15, 16. (a) Nziizili zisyomezyo nzitujana mubbuku lyaHabbakkukku? (b) Zisyomezyo eezi zituyiisyaanzi?

¹⁵ Jehova usyomezya bantu baluleme bamusyoma kuti: “Mululami, lusyomo lwakwe ndoluyoomuponya” akuti “nyika iyoozula luzibo lwabulemu bwa-Jehova.” (Hab. 2:4, 14) Nisimpe, bantu basyoma Leza kabali aamoyo mulamfu bayoojana buumi.

¹⁶ Kumatalikilo, chisyomezyo chijanika muli Habakuku 2:4 chilakonzya kubonekaanga makani luzutu aatagwasyi. Nikuba boobo, mwaapostolo Pawulu wakabona kuti majwi aaJehova ngachoonzyo nkaambo wakaabelesya kwaziindi zitatu! (Rom. 1:17; Gal. 3:11; Heb. 10:38) Kufumbwa mapenzi muntu uululeme ngakonzya kuswaana, akaambo kalusyomo unookkede kalindila kuzuzikizigwa kwamakanze aaLeza. Jehova uyanda kuti tulangilile kuzintu zilikunembo.

17. Nchisyomezyoonzi nchitujana mubbuku lyaHabbakkukku?

 ¹⁷ Bbuku lyaHabbakkukku lilaazyiiyo ziyandikana loko kulindiswe nituli kupona kumazubaano aakumamanino. Jehova usyomezya kuyoobapa buumi butamani bantu boonse bamusyoma. Nkinkaako atuzumanane kusimya lusyomo lwesu muli Leza katutalangi kuti mapenzi ngituswaana mapati biyeni. Nzyaakaamba Jehova kwiinda muli Habbakkukku zitondeezya kuti uyootugwasya akutuvuna. Utwaambila kuti tumusyome akuti tube aamoyo mulamfu wakalindila chiindi nchabikkide, aawo Bwaami bwaLeza nibuyooyendelezya nyika yoonse iinooli abakombi bakwe babotelwa bali aamyoyo iibombede.​—Mt. 5:5, NW; Heb. 10:36-39.

18. Majwi aaJehova akapa kuti Habbakkukku alimvwe biyeni?

¹⁸ Bala Habakuku 3:16-19. Majwi aaJehova akamusungwaazya loko Habbakkukku. Wakayeeyesesya atala azintu zigambya Jehova nzyaakachitila bakombi bakwe bachiindi. Kuchita oobo kwakamupa kuti abe aalusyomo lusimide. Wakaba aachoonzyo chakuti Jehova wakali kuyoobambulula zintu chakufwambaana! Eezi zyakamuumbulizya musinsimi ooyu nikuba kuti wakalizi kuti mapenzi aakwe taakali kunoomana pe mpawaawo. Kuzumbuuzya nkwaakali aako Habbakkukku kwakachincha mpawo wakasyoma kuti Jehova wakali kuyoomuvuna. Majwi ngakaamba alakonzeka kuti ngiimajwi mapati aatalubiki aatondeezya lusyomo lumaninide ngitubala muBbayibbele. Bamwi basikulanga-langa makani aamuBbayibbele bayeeya kuti majwi aali muvesi 18 aamba kuti: “Ndiyoosekelela muMwaami; ndiyoosotooka chakukondwa muli Leza.” Eechi nchiiyo chiyandikana loko kulindiswe toonse! Jehova tanatupa pe zisyomezyo nzitulangilila pesi wakatusyomezya kuti lino ulikubeleka kuti azoozizuzikizye.

19. Kujana twakujana biyeni kuumbulizigwa kukozyenie akwaHabbakkukku?

¹⁹ Zilaantanganana kuti mulumbe waHabbakkukku ngwakuti tusyome Jehova. (Hab. 2:4) Tulakonzya kukkala katusyomeka kuti twasimya bweenzuma mbutuli aabo aJehova kwiinda (1) mukukomba chamoyo woonse katumubuzya mapenzi amakataazyo ngitulaawo; (2) mukuswiilila malayilile woonse ngatubuzya Jehova kabelesya Jwi lyakwe ambunga yakwe (3) amukusyomeka katuli aamoyo mulamfu wakulindila Jehova. Eezi nzizyo nzyaakachita Habbakkukku. Nikuba kuti wakatalisya kulemba bbuku lyakwe kakataazikene pesi kumamanino, wakasungwaazigwa alubo wakabotelwa. Atutobelezye chikozyano chakwe chibotu kuchitila kuti andiswe tumvwe kukumbata kwaJehova kwaluyando! Nduumbulizyoonzi ndutujana munyika eeyi iizwide bubi?