1-2. (a) Niinzi chitugwasya kuti tukonzye kulisimya kumapenzi? Pandulula. (b) Tulalanga-langaanzi muchiiyo eechi?

“KUTI ndayeeya atala abuyumu-yumu mbundakazunda, nga ndabona kuti teendakali kunookonzya pe kubuzunda andikke.” Kuli nwaakali waamba oobu na? Bantu biingi mbubaamba. Amwi wakali waamba majwi aaya nwaakali kuyeeya atala ambwakalisimya chiindi nwaakali kuchiswa naakuti nwaakafwidwa abbululu wako. Nuyeeya atala azeezi, nga wabona kuti wakalisimya akaambo kakuti Jehova wakakupa “nguzu zigambya iziinda zyabantu” kabelesya muuya uusalala.​—2 Kor. 4:7-9.

² Alubo tuyanda muuya uusalala kuti utugwasye kuti tutatobelezyi zintu zichitwa abantu bali munyika. (1 Joh. 5:19) Kuyungizya waawo, tuyanda manguzu kuti tukonzye kulwana “amyuuya mibi.” (Ef. 6:12) Muchiiyo eechi tulalanga-langa nzila zibili muuya uusalala mbukonzya kutugwasya anzitweelede kuchita kuti ukonzye kutugwasya.

3. Jehova utugwasya biyeni kabelesya muuya wakwe uusalala?

³ Muuya uusalala waJehova utupa manguzu aakuti tukonzye kuchita milimu njitweelede kuchita nikuba kakuli kuyumu kuchita oobo. Mwaapostolo Pawulu wakabona kuti “nguzu zya Kristo” zyakamugwasya kuti azumanane kubelekela Jehova nikuba kuti wakali kuswaanana amapenzi. (2 Kor. 12:9) Mulweendo lwakwe lwachibili lwabumishinali, Pawulu wakeelede kubeleka kuti ajane mali yazintu ziyandikana. Nikuba boobo, wakali musungu mumulimu wakukambawuka. Naakali kuKkorinto wakakkala aAkula aPurisila bakali kuchita mulimu wakupanga matente. Mulaamwi mazuba, Pawulu wakali kubelekaamwi  ambabo nkaambo wakaluuzi mulimu ooyu. (Mil. 18:1-4) Muuya uusalala wakamugwasya Pawulu kuti akonzye kuchita milimu eeyi iibili, wakukambawuka awakupanga matente.

4. Kweendelana amajwi aali muli 2 Bakorinto 12:7b-9, mbuyumu-yumuunzi Pawulu mbwaakaswaananaabo?

⁴ Bala 2 Bakorinto 12:7b-9. Muvesi eeyi, Pawulu wakali kwaambaanzi naakati wakali ‘amumvwa mumubili’? Kuti wayaswa mumvwa mpawo watyokela ulamvwa kuchisa. Nkinkaako Pawulu wakali kwaamba kuti wakali aachintu chakali kukkala kachimuchisa. Naakali kwaamba chintu eecho wakati ‘mungelo wa Saatani’ wakali ‘kumuuma.’ Kulakonzeka kuti Saatani amadimoni aakwe teembabo pe bakayasa Pawulu mumvwa ooyu mumubili. Pesi nibakabona “mumvwa” ooyu kulakonzeka kuti bakawusiminina kuti ubbile zyakapa kuti Pawulu amvwe kuchisa zyiindilide. Pawulu wakachitaanzi?

5. Jehova wakayisandula biyeni nkombyo yaPawulu?

⁵ Kumasaangunino Pawulu wakali kuyanda kugwisya “mumvwa” wakali mumubili wakwe. Wakati: “Ziindi zyotatwe ndakakombelezya Mwami [Jehova] . . . kuti cindileke.” Jehova takwe naakawugwisya pe mumvwa ooyo. Eezi zyaamba kuti, taakazisandula na nkombyo zyakwe? Peepe, wakazisandula kwiinda mukupa Pawulu manguzu aakuti akonzye kulisimya. Jehova wakaamba kuti: “Nguzu zyangu zilalondolwa mukubula nguzu kwako.” (2 Kor. 12:8, 9) Alubo kwiinda mukugwasigwa aaLeza, Pawulu wakazumanana kubotelwa akuba aluumuno mumoyo.​—Flp. 4:4-7.

6. (a) Jehova nga ulazisandula biyeni nkombyo zyako? (b) Nzisyomezyoonzi zijanika muMagwalo abikkidwe mufuka eeli zikusimya?

⁶ Kuli nwaakali wakumbila kuti Jehova akuvune mumapenzi na mbuuli mbaakachita Pawulu? Amwi wakazumanana kukumbila kuti penzi limane pesi lyakayungizya, wakakataazikana na kuti Jehova tachikwe ndaba pe anduwe? Kuti eezi zyakuchitikila, weelede kuyeeya chikozyano chaPawulu. Baachoonzyo chakuti Jehova uzoozisandula nkombyo zyako mbuuli mbaakasandula nkombyo zyaPawulu. Jehova ulakonzya kutaligwisya pe penzi lyako. Pesi ulakonzya kukupa manguzu aakuti ulisimye kabelesya muuya uusalala. (Int. 61:3, 4) Ulakonzya ‘kuumputwa ansi’ pesi Jehova takakusiyi pe.​—2 Kor. 4:8, 9; Flp. 4:13.

7-8. (a) Muunzilaanzi muuya uusalala mbuukozyanisigwa aluwo? (b) Mwaapostolo Petro wakapandulula biyeni mbubeleka muuya uusalala?

⁷ Njiili imwi nzila muuya uusalala mbuutugwasya? Mbuuli luwo mbulupa kuti bwaato bukonzye kweenda nikuba kakuli mayuwe, andiswe muuya uusalala upa kuti tuzumanane kubelekela Leza nikuba katuswaanana amapenzi kusikila tukanjile munyika mpya.

⁸ Mwaapostolo Petro wakali kuteya baswi alubo wakalijayide kubelesya bwaato. Akaambo kazeezi, wakabelesya mabala apandulula mbubweenda bwaato chiindi naakali kupandulula mbubeleka muuya uusalala. Wakalemba kuti: “Kunyina ciindi ibusinsimi nobwakaba akaambo kakuyanda kwamuntu, pele bantu bakaambaula zyakazwa kuli Leza kwiinda mukusololelwa amuuya uusalala.” Bbala lyachiGrikki lyakasandululwa kuti “mukusololelwa” lilakonzya kwaamba kuti “mukutontwa.”​—2 Pet. 1:21.

9. Majwi aamwaapostolo Petro aakuti “kwiinda mukusololelwa” aambaanzi?

⁹ Majwi aamwaapostolo Petro aakuti “kwiinda mukusololelwa” aambaanzi? Lukka mulembi wabbuku lyaMilimu wakabelesya mabala ayendelana aakabelesegwa amwaapostolo Petro naakali kwaambuula atala abwaato ‘bwakatontwa’ aluwo. (Mil. 27:15) Umwi  sikulanga-langa makani aamuBbayibbele wakati chiindi Petro naakabelesya mabala aakuti “kwiinda mukusololelwa,” wakali kubelesya “majwi abelesegwa aabantu babeleka mumaanzi.” Petro wakali kwaamba kuti mbuuli luwo mbulutonta bwaato kuti busike nkubuya, muuya uusalala wakazulwida bapolofita bakalemba Bbayibbele nibakali kuchita mulimu ooyu. Sikulanga-langa makani aamuBbayibbele waambwa ajulu wakayungizya kuti, “kwakali mbuuli kuti bapolofita bakajula maseyili aabo.” Jehova wakachita mulimu wakwe kwiinda mukubapa “luwo” chaamba muuya uusalala. Basikulemba Bbayibbele bakazumina kuzulwidwa anguwo mpawo bakalemba zyeendelana ambuwakali kubazulwida.

10-11. Niinzi nzitweelede kuchita kuti muuya uusalala utugwasye? Amba chikozyano.

¹⁰ Nisimpe kuti Bbayibbele lyakamana chiindi kulembwa. Pesi muuya uusalala uchibagwasya bakombi baLeza. Jehova ulikuchita mulimu wakwe. Tweelede kuchitaanzi kuti muuya uusalala utugwasye? Kuli zintu nzitweelede kuzumanana kuchita? Zintu eezyo niinzi?

¹¹ Atulange-lange zintu zibili zyeelede kuchitwa amuntu weenzya bwaato. Chakusaanguna, weelede kubulanzya kuya moya. Alubo bwaato tabukonzyi pe kweenda kuti kabukkede achito kule akuli moya. Chachibili, weelede kujula maseyili aabwaato. Kuti maseyili atalika kuumwa luwo bwaato bulasaanguna kweenda. Munzila iikozyenie, andiswe tuyanda muuya uusalala kuti utugwasye kuzumanana kubelekela Jehova. Pesi kuli zintu zibili nzitweelede kuchita kuti tugwasigwe amuuya uusalala. Chakusaanguna tweelede kuchita milimu iichitwa abakombi baJehova kabagwasigwa amuuya uusalala. Chachibili, tweelede kujula maseyili eesu kwiinda mukubeleka changuzu mumilimu eeyo. (Int. 119:32) Kuti twachita zintu eezi zibili, muuya uusalala uyootugwasya kuti tukonzye kulisimya nituswaanana  amasunko akuti tuzumanane kubelekela Jehova kusikila tukanjile munyika mpya.

12. Tuyanda kulanga-langaanzi lino?

¹² Twabona nzila zibili muuya uusalala mbuutugwasya. Twabona kuti utugwasya kuti tulisimye kubuyumu-yumu mbutuswaananaabo. Alubo utugwasya kuti tuzumanane kubelekela Jehova kusikila tukanjile munyika mpya. Lino atubone zintu zine nzitweelede kuchita kuti muuya uusalala ukonzye kutugwasya.

13. Kweendelana alugwalo lwa 2 Timoteyo 3:16, 17, kubala Bbayibbele nga kulatugwasya biyeni alubo niinzi nzitweelede kuchita?

¹³ Chakusaanguna, weelede kubala Jwi lyaLeza. (Bala 2 Timoteyo 3:16, 17.) Bbala lyachiGrikki lyakasandululwa kuti “akasololelwa a Leza,” lyaamba kuti “akafulidilwa aLeza.” Leza wakabelesya muuya wakwe uusalala kuti “afulidile” mizeezo yakwe mubongo bwabantu bakalemba Bbayibbele. Chiindi nitubala Bbayibbele akuyeeyesesya atala anzitubala nga tulikuzumizya malayilile aaLeza kuti anjile mumizeezo amumyoyo yesu. Kuti twazibelesya zintu nzitubala tulakonzya kuchincha buumi bwesu akupona kweendelana ambayanda Leza. (Heb. 4:12) Kuti muuya uusalala utugwasye, tweelede kubala Bbayibbele buzuba abuzuba akuyeeyesesya atala anzitubala. Kuti twachita oobo, tuyoochita zintu zilikabotu alubo tuyoowambuula majwi aalikabotu.

14. (a) Nkamboonzi nitukonzya kwaamba kuti kumiswaangano kujanika muuya uusalala? (b) Nga tulachita biyeni kuti muuya uusalala utugwasye chiindi nituli kumiswaangano?

¹⁴ Chachibili, weelede kunjila miswaangano. (Int. 22:22) Tulakonzya kwaamba kuti “luwo” naakuti muuya uusalala ulajanika kumiswaangano yachiKristu. (Ciy. 2:29) Nkamboonzi nitwaamba oobu? Nkaambo chiindi nituli kumiswaangano abakombima, tulakomba kuli Leza kuti atupe muuya uusalala, tulayimba nyimbo zyaBwaami zizwa muMagwalo, alubo nga twaswiilizya nkani zyamuBbayibbele zipegwa abakwesu bakasalwa kwiinda mukugwasigwa amuuya uusalala. Alubo muuya uusalala ugwasya bachizi kulibambila akupa nkani zyabo. Pesi kuti muuya uusalala utugwasye, tweelede kulibambila akusandula kumiswaangano. Kuchita oobo kupa kuti muuya uusalala utugwasye alubo kulikozyenie “akujula maseyili.”

15. Nga tulawuzumizya biyeni muuya uusalala kuti utugwasye mumulimu wakukambawuka, alubo tweelede kuchitaanzi?

¹⁵ Chachitatu, weelede kuzwa mumulimu wakukambawuka. Tulakonzya kuzumizya muuya uusalala kuti utugwasye kwiinda mukubelesya Bbayibbele chiindi nituli kukambawuka akuyiisya bantu. (Rom. 15:18, 19) Pesi kuti muuya uusalala utugwasye, tweelede kukkala katuzwa mumulimu wakukambawuka akubelesya Bbayibbele. Alubo chimwi chintu chikonzya kutugwasya kuti tuzwidilile mumulimu wakukambawuka, nkubelesya nzila zyakwaambuuzyania zijanika muKabbuku kaMuswaangano waBuumi Bwesu bwachiKristu Amulimu Wesu.

16. Tuukumbila biyeni muuya uusalala kuli Leza?

¹⁶ Chachine, weelede kukomba kuli Jehova. (Mt. 7:7-11; Lk. 11:13) Tulakonzya kukumbila muuya uusalala kuli Jehova kwiinda mukukomba. Taakwe chintu chikonzya kukachizya Jehova kuti amvwe nkombyo zyesu akutupa muuya uusalala, nikuba kubikkwa mujele nikuba Saatani lwakwe takonzyi. (Jak. 1:17) Pesi nga tulakomba biyeni kuli Jehova kuti atupe muuya uusalala? Kuti tujane nsandulo yamubuzyo ooyu atulange-lange nzilyaamba bbuku lyaLuka atala ankombyo. *

17. Chikozyano chaJesu chili muli Luka 11:5-9, 13 chituyiisyaanzi atala akukomba?

¹⁷ Bala Luka 11:5-9, 13. Muchikozyano eechi Jesu wakatondeezya mbutukonzya kukomba chiindi nitukumbila muuya uusalala. Mwaalumi waambwa muchikozyano eechi wakapegwa nzyaakali kukumbila nkaambo ‘wakazumanana kukombelezya.’ Wakayinka kuyookumbila lugwasyo kumweenzinyina nikuba kuti kwakali mansiku. (Langa makani aakwiiya aalugwalo lwa Lk. 11:8 ajanika mumwb18 07) Jesu wakachibelesya biyeni chikozyano eechi munkani yakukomba? Wakati: “Amuzumanane kulomba, eelyo muyoopegwa nzyomulomba; amuzumanane kuyandaula, eelyo muyoojana; amuzumanane kukonkomona, eelyo muyoojalwidwa.” Twiiyaanzi munkani eeyi? Tweelede kuzumanana kukomba kuli Jehova kuti atupe muuya uusalala.

18. Chikozyano chaJesu chitugwasya biyeni kuti tube aachoonzyo chakuti Jehova ulatupa muuya uusalala?

¹⁸ Muchikozyano eechi Jesu wakatondeezya kamwi kaambo kapa kuti Jehova atupe muuya uusalala. Mwaalumi uuli muchikozyano chaJesu wakali kuyanda kumutondeezya luyando mweenzu wakwe alubo wakali kuyanda kumupa chakulya nikuba kuti kwakali mansiku. Jesu wakati mweenzinyina wakazoomupa nkaambo mwaalumi wakali kukumbila wakali kuzumanana kukombelezya. Twiiyaanzi munkani eeyi? Kuti muntu uulaachibi kalipedelede kugwasya mweenzinyina, zilaantanganana kuti Taateesu uulikujulu ulabapa muuya uusalala aabo bamukumbila. Nkinkaako tweelede kukumbila kuli Jehova katulaachoonzyo chakuti ulatupa muuya uusalala kufumbwa chiindi.​—Int. 10:17; 66:19.

19. Niinzi chipa kuti tube aachoonzyo chakuti tuyoomuzunda Saatani?

¹⁹ Nikuba kuti Saatani ulikweezya anzila zyoonse kutulwana, tulaachoonzyo chakuti tulakonzya kumuzunda. Nkamboonzi? Nkaambo muuya uusalala ulatugwasya munzila zibili. Yakusaanguna, utupa manguzu aakuti tulisimye chiindi nituli mumapenzi. Yachibili, muuya uusalala utugwasya kuti tuzumanane kubelekela Jehova kusikila tukanjile munyika mpya. Atubeleke changuzu kuti muuya uusalala utugwasye.