1. Kweendelana alugwalo lwa Matayo 28:18-20, nguuli mulawu Jesu ngwaakapa basikwiiya bakwe?

JESU naakabusigwa wakalibonia kuli basikwiiya bakwe bakabungene kuGalilaya. Kuli mulawu uuyandikana loko ngwaakali kuyanda kubapa. Mulawu wakutyeni? Mulawu ooyu ujanika muli Matayo 28:18-20.—Bala.

2. Njiili mibuzyo njitutalange-lange?

² Mulawu waJesu wakuchita bantu kuti babe basikwiiya uchibeleka akubakombi baLeza mazubaano. Kwalino atulange-lange mibuzyo iitatu ilaatala amulimu ooyu ngwaakatupa Jesu. Wakusaanguna, kuyungizya aakuyiisya bantu ziyandwa aLeza niinzi zimwi nzitweelede kuchita? Wachibili, basikupupulula boonse bali mumbungano nga balamugwasya biyeni muntu ulikwiiya Bbayibbele kuti ayinkilile kunembo? Wachitatu, kujana twabagwasya biyeni bakombima batachichiti mulimu kuti bakambawuke lubo?

3. Ngaali malayilile aali antanganana aaswaanizidwe mumulawu waJesu?

³ Malayilile aaJesu aali antanganana. Tweelede kuyiisya bantu zintu nzyaakatulayilila. Pesi kuli kaambo kayandikana nkitweelede kubikkila maanu. Jesu taakati: ‘Mukabayiisye zintu zyoonse nzindakamulayilila.’ Pesi wakati: Mukabayiisye “kutobela zintu zyoonse nzyondakamulailila.” Kuti tukonzye kutobelezya malayilile aaya, tatweelede kuyiisya muntu luzutu pesi tweelede kumutondeezya mbakonzya kuzibelesya zintu nzyalikwiiya.  (Mil. 8:31) Nkamboonzi nitweelede kuchita oobo?

4. Chaambaanzi kutobela mulawu? Kozyanisya.

⁴ “Kutobela” mulawu chaamba kuuswiilila. Kuti tumvwisisisye mbutukonzya kuyiisya muntu kutobela naakuti kuswiilila zintu Jesu nzyaakatulayilila, atuyeeye chikozyano chamuntu uyiisya muntu kudilayiva. Kujana wamuyiisya biyeni kutobela milawu yamumugwagwa? Muyiisi weelede kumuyiisya milawu kabatananjila pe mumugwagwa. Pesi kuti amuyiisye kutobela milawu eeyo kuli nzyayelede kuchita. Ulamubuzya kuti adilayive kabalaamwi akumutondeezya mbakonzya kuchita nzyaakamuyiisya. Twiiyaanzi kuzwa kuchikozyano eechi?

5. (a) Kweendelana alugwalo lwa Johane 14:15 alwa 1 Johane 2:3, tweelede kumuyiisya kuchitaanzi muntu ngutwiiyaawe? (b) Kujana twamuyiisya biyeni kubelesya nzyalikwiiya?

⁵ Chiindi nitulikwiiya amuntu Bbayibbele nga tulikumuyiisya zintu Leza nzyayanda kuti tuchite. Pesi tatweelede kujinkila aawo. Tweelede kugwasya muntu ngutwiiyaawe kuti abelesye zintu nzyayiya mubuumi bwakwe. (Bala Johane 14:15; 1 Johane 2:3.) Kwiinda muzintu nzituchita tulakonzya kumutondeezya mbakonzya kubelesya malayilile aali muMagwalo kuchikolo, kumulimu amuzintu zyakulikondelezya. Tulakonzya kumubuzya zyakatuchitikila zyakapa kuti tubone kuti kutobela malayilile amuBbayibbele kulakwabilila alubo kulagwasya kuti tusale kabotu. Tulakonzya kukomba katulaamwi anguwe katukumbila Jehova kuti amupe muuya uusalala kuti umugwasye.—Joh. 16:13.

6. Kuyiisya bantu kuti batobele nzyaakatulayilila Jesu kuswaanizyaanzi?

⁶ Kuyiisya bantu kuti batobele nzyaakatulayilila Jesu kuswaanizyaanzi? Tweelede kubagwasya kuti babe aachiyandisyo chakuchita bamwi kuti babe basikwiiya. Bamwi bantu mbitwiiyaabo balakonzya kuyoowa kukambawukila bamwi. Tweelede kuba amoyo mulamfu chiindi nitubagwasya kuti bakamvwisisisye kasimpe kuchitila kuti babe alusyomo lusimide. Eezi ziyoobasika aamoyo akupa kuti bayande kukambawukila bamwi. Nga tulamugwasya biyeni muntu ngutwiiyaawe kuti abe aachiyandisyo chakukambawuka?

7. Nga tulamugwasya biyeni muntu ngutwiiyaawe kuti abe aachiyandisyo chakukambawuka?

⁷ Tulakonzya kubuzya muntu ngutwiiyaawe Bbayibbele mibuzyo iili mbuli yeeyi: “Kubelesya nzwaakayiya muBbayibbele kwakakugwasya biyeni mubuumi bwako? Ubonaanga bamwi beelede kwaamvwa na makani aaya? Kujana wabagwasya biyeni kuti baamvwe?” (Tus. 3:27; Mt. 9:37, 38) Mutondeezye tupepa twakubala tuli muZibelesyo Nzitubelesya Kukuyiisya Bantu mpawo umukumbile kuti asale ntwabona kuti tulakonzya kunoneezya babbululu bakwe, mbabelekaabo abeenzinyina. Mupe tupepa twiingi kuli ntwasala. Muyiisye nzyakonzya kuchita kuti ape bantu tupepa ootu munzila iizwidilila. Kuti waba sikupupulula uutanabbabbatizigwa, weelede kuzwa aawe mumulimu wakukambawuka kuchitila kuti umugwasye.—Muk. 4:9, 10; Lk. 6:40.

8. Nkamboonzi muntu wiiya Bbayibbele nayelede kuyanda Leza abasimayakilane? (Langa bbokesi liti “ Mbukonzya Kugwasya Bantu Mbwiiyaabo Kuti Bayungizye Kuyanda Leza.”)

⁸ Tutalubi kuti Jesu wakatulayilila kuti tuyiisye bantu “kutobela zintu zyoonse” nzyaakatulayilila. Nzyaakatulayilila ziswaanizya milawu iibili mipati, wakuyanda Leza awakuyanda basimayakilane. Milawu eeyi iliswaanizidwe mumulimu wakukambawuka awakuchita bantu kuti babe basikwiiya. (Mt. 22: 37-39) Iswaanizidwe biyeni? Nkaambo chintu chipati chipa kuti tukambawuke nkuyanda Leza abamwi. Pesi bamwi bantu mbitwiiyaabo Bbayibbele balakonzya kuyoowa kukambawuka. Tweelede kubasungwaazya kwiinda mukubabuzya kuti Jehova uyoobagwasya kuti bazunde penzi lyakuyoowa. (Int. 18:1-3; Tus. 29:25) Bbokesi lili muchiiyo eechi litondeezya zintu nzitweelede kuchita kuti tugwasye bantu mbitwiiyaabo kuti bayungizye kuyanda Leza. Bamumbungano kujana bamugwasya biyeni muntu wiiya Bbayibbele kuti ayungizye kuyanda Leza?

9. Muntu ulikwiiya kudilayiva wiiya biyeni zimwi zyiiyo ziyandikana?

⁹ Atuyeeye lubo chikozyano chamuntu ulikuyiisigwa kudilayiva. Nayabudilayiva kalaamwi amuntu umuyiisya, nziili zimwi nzila nzyakonzya kwiiya aazyo? Kwiinda mukuswiilila muyiisi wakwe akulanga bamwi madilayiva badilayiva kabotu. Muchikozyano, ulakonzya kumutondeezya umwi dilayiva wayinzizya umwi kuti ayinde. Naakuti ulakonzya kumutondeezya dilayiva uchita malayiti aakwe kuti atamuniki loko kuchitila kuti atatowi bamwi. Zikozyano eezi zilakonzya kuyiisya muntu ulikwiiya zintu nzyakonzya kutobelezya chiindi nalikudilayiva.

10. Niinzi chikonzya kugwasya muntu wiiya Bbayibbele kuti ayinkilile kunembo?

¹⁰ Munzila iikozyenie muntu wiiya Bbayibbele wanjila munzila yabuumi tayiyi kumuntu ngwayiyaawe luzutu pesi ulakonzya kujana zyiiyo kuzwa kuzikozyano zyabamwi bakombi baJehova. Niinzi chintu chiyandikana chikonzya kumugwasya kuti ayinkilile kunembo? Nkunjila miswaangano yesu yachiKristu. Nkamboonzi? Malayilile aazwa muMagwalo ngituyiya kumiswaangano ayoomugwasya kuti ayungizye luzibo lwakwe, abe alusyomo lusimide akuti ayungizye kuyanda Leza. (Mil. 15:30-32) Kuyungizya waawo, muyiisi wakwe ulakonzya kumutondeezya bamwi bamumbungano balaazyiimo zikozyenie azyakwe kumiswaangano. Alubo kumiswaangano ulakonzya kubona bakwesu abachizi mbubatondeezya kuti balamuyanda Leza. Atubone zikozyano zitobela.

11. Muntu wiiya Bbayibbele ulakonzya kubona zikozyano zili biyeni kumiswaangano alubo nga zilamugwasya biyeni?

¹¹ Muchikozyano, mwanakazi wiiya Bbayibbele uukomezya bana kali alikke ulakonzya kubona umwi muchizi kumiswaangano ulaachiimo chifenene aachakwe. Zilakonzya kumusika aamoyo kubona muchizi ooyo kalikubeleka changuzu kuti aze kumiswaangano abana bakwe baniini. Alubo mwaalumi wiiya Bbayibbele uulikuyuminwa kuti aleke kufwepa ulakonzya kubona umwi mukwesu wakazunda penzi eeli. Mukwesu ooyo ulakonzya kubuzya mwaalumi ooyo kuti kuyanda Jehova kwakamugwasya biyeni kuti azunde penzi eelyo. (2 Kor. 7:1; Flp. 4:13) Naamvwa zyakachitikila mukwesu ooyo anamubuzya kuti “Anduwe ulakonzya kuleka,” mwaalumi ooyo ulaba achibindi chakuti uyoolizunda penzi eeli. Musimbi uuchikula wiiya Bbayibbele ulakonzya kubona umwi muchizi uuchikula ulikubotelwa kubelekela Leza. Kumubona kabotelwa kulakonzya kupa kuti musimbi wiiya Bbayibbele ayande kuziba kuti nkamboonzi muchizi ooyu uuchikula naakkala kabotelwa.

12. Nkamboonzi nitwaamba kuti muntu woonse uli mumbungano ulakonzya kupa kuti muntu wiiya Bbayibbele ayinkilile kunembo?

¹² Kuti muntu wiiya Bbayibbele waziba bakwesu abachizi basiyene-siyene basyomeka, ulajana zikozyano zitamugwasye. Eezi zilamugwasya kubona kuti chaambaanzi kutobela mulawu waKristu wakuyanda Jehova abasimayakilane. (Joh. 13:35; 1 Tim. 4:12) Kuyungizya waawo mbuli mbutwabona, muntu  wiiya Bbayibbele ulakonzya kugwasigwa abasikupupulula bali abuyumu-yumu bukozyenie abwakwe. Alubo zikozyano zyabantu bali boobu zilamugwasya kubona kuti ulakonzya kuzunda buyumu-yumu bukonzya kupa kuti kumuyumine kuba sikwiiya waJesu. (Dt. 30:11) Muntu woonse uli mumbungano ulakonzya kupa kuti muntu wiiya Bbayibbele ayinkilile kunembo. (Mt. 5:16) Niinzi nzuchita kuti usungwaazye bantu bayiya Bbayibbele basika kumiswaangano?

13-14. Jesu wakabajata biyeni baapostolo bakwe nibakamana manguzu?

¹³ Tuyanda kugwasya bakombima batachichiti mulimu kuti basaangune lubo kuchita mulimu ngutwakatumwa aJesu wakuchita bantu kuti babe basikwiiya. Nzila Jesu njakabajataayo basikwiiya bakwe nibakamana manguzu itondeezya mbutweelede kuchita andiswe mazubaano.

¹⁴ Kumamanino amulimu waJesu waanyika alubo kali waba aafwiifwi kujayigwa, baapostolo bakwe “boonse bakamusiya akutija.” (Mk. 14:50; Joh. 16:32) Jesu wakabajata biyeni baapostolo bakwe nibakamana manguzu kwachiindi chifwiifwi? Nikwakayinda chiindi chifwiifwi kali wabusigwa, Jesu wakabuzya bamwi batobeli bakwe kuti: “Mutayoowi! Kamuya, mukabaambile bakwesu kuti [ndakabusigwa].” (Mt. 28:10a) Jesu taakabatakata pe baapostolo bakwe. Nikuba kuti bakali bamuchija, wakabayita kuti “bakwesu.” Jesu wakali aluzyalo alubo wakali kulekelela mbuli Jehova.—2 Bam. 13:23.

15. Tulimvwa biyeni atala abakombima batachichiti mulimu?

¹⁵ Andiswe tulaandaba abakombima batachichiti mulimu. Bachili bakwesu abachizi alubo tulabayanda. Tatuyilubi pe milimu njibakabelekela Leza chiindi alubo bamwi bakamubelekela kwaminyaka myiingi loko. (Heb. 6:10) Tulabayeeya. (Lk. 15:4-7) Kujana twatondeezya biyeni kuti tulaandaba ambabo mbuli Jesu?

16. Nga tulatondeezya biyeni kuti tulaandaba abakombima batachichiti mulimu?

¹⁶ Batambe kumiswaangano. Imwi nzila Jesu njaakabasungwaazya aayo baapostolo bakwe bakali bamana manguzu nkubatamba kumuswaangano. (Mt. 28:10b; 1 Kor. 15:6) Andiswe mazubaano tulakonzya kusungwaazya bakombima batachichiti mulimu kuti banjile miswaangano. Kuti teebasika tweelede kuzumanana kubatamba. Zilaantanganana kuti Jesu wakabotelwa chiindi baapostolo bakwe nibakazumina kutambwa.—Kozyanisya a Matayo 28:16 a Luka 15:6.

17. Tweelede kuchita biyeni kuti muntu uutachichiti mulimu wasika kumiswaangano?

¹⁷ Batambule amoyo woonse. Jesu wakapa kuti basikwiiya bakwe baangunuke naakaswaanana aabo alubo nguwe wakasaanguna kwaambuula aabo. (Mt. 28:18) Tweelede kuchita biyeni kuti muntu utachichiti mulimu wasika kumiswaangano? Tweelede kuchita chimwi chintu kuti tutondeezye kuti tulamutambula. Kumasaangunino tulakonzya kukataazikana kuti tulatyeni. Tatweelede kwaamba zintu zitape kuti abe abweeme pesi tweelede kumubuzya kuti tulabotelwa kumubona.

18. Kujana twabasungwaazya biyeni bakombima batachichiti mulimu?

¹⁸ Basungwaazye. Kweelede kuti basikwiiya baJesu bakali kukataazikana akaambo kamulimu wakukambawuka munyika yoonse ngubakali bapegwa. Jesu wakabasungwaazya kwiinda mukubabuzya kuti: “Ndilaandinywe mazuba oonse.” (Mt. 28:20) Nzyakaamba zyakabagwasya na? Iiyi. Kakutanayinda chiindi, bakali basaanguna kubeleka changuzu “kuyiisya  akwaambilizya makani mabotu.” (Mil. 5:42) Bakombima batachichiti mulimu bayanda kusungwaazigwa. Balakonzya kuyoowa kusaanguna kukambawuka lubo. Tweelede kubabuzya kuti tabanookambawuki kabali abalikke pe. Kuti bayeeya kuya kukukambawuka tulakonzya kuzwa aabo. Balalumba loko kuti twabagwasya chiindi nibasaanguna lubo kukambawuka. Kuti twabona bakombima batachichiti mulimu mbuli bakwesu abachizi zipa kuti kube kubotelwa mumbungano.

19. Tuli aachiyandisyo chakuchitaanzi alubo nkamboonzi?

¹⁹ Tunoochita mulimu ooyu wakukambawuka kusikila lili? Kusikila kumamanino abweende bwazintu oobu. (Mt. 28:20; langa Bupanduluzi Bwamabala Aamu Bbaibbele, “Mamanino aabweende bwazintu.”) Tuyookonzya na kuchita mulimu ooyu ngwaakatupa Jesu kusikila kumamanino? Tulilipedelede kuchita oobo. Tulalipeda kubelesya chiindi chesu, manguzu azintu zyesu kuti tuyanduule bantu ‘bali amyoyo mibotu, balibambilide kutambula buumi butamani.’ (Mil. 13:48) Kuti twachita oobo, nga tulikutobelezya chikozyano chaJesu. Wakati: “Cakulya cangu nkucita kuyanda kwayooyo wakandituma alimwi akumanizya mulimo wakwe.” (Joh. 4:34; 17:4) Andiswe tuli aachiyandisyo chakuchita oobo. Tuyanda kuchita mulimu ngutwakapegwa kusikila kumamanino. (Joh. 20:21) Alubo tuyanda kuti bamwi kuswaanizya abatachichiti mulimu bachite mulimu ooyu kusikila kumamanino.—Mt. 24:13.

20. Kweendelana alugwalo lwa Bafilipi 4:13, nkamboonzi nitukonzya kuchita mulimu Jesu ngwaakatupa?

²⁰ Kwaamba choonzyo, kuchita mulimu Jesu ngwaakatusiila teekuuba pe. Pesi tatuli kuuchita atulikke pe nkaambo Jesu wakatusyomezya kuti unooli andiswe. Alubo “tuli basimilimonyina a Leza” “ibakamantene a Kristo” mumulimu wakukambawuka. (1 Kor. 3:9; 2 Kor. 2:17) Nkinkaako tulawukonzya. Nchilongezyo chipati loko kuchita mulimu ooyu akugwasya bamwi kuti ambabo bawuchite.—Bala Bafilipi 4:13.