1. Niinzi chiyootuumbulizya kuti twalimvwa katuli atulikke naakuti twamana manguzu chiindi nitwaswaanana amapenzi? (Intembauzyo 118:5-7)

KULI nwaakali waba muchiimo chakapa kuti ulimvwe kuli awulikke na zyakuti wakabonaanga takwe ukonzya kukugwasya? Bantu biingi nga balimvwa mbuboobo kuswaanizya abakombi baJehova basyomeka. (1 Bam. 19:14) Kuti eezi zyakuchitikila, weelede kuyeeya chisyomezyo chaJehova chakuti: “Ziyume zitete, tandikakusiyi pe alimwi tandikakulekelezyi pe.” Nkinkaako tulakonzya kwaamba katuli achibindi kuti: “Jehova ngomugwasyi wangu; tandikooyoowa pe.” (Heb. 13:5, 6) Majwi aaya mwaapostolo Pawulu wakaalembela maKristu aakuJudaya kuma61 C.E. Majwi aakwe atuyeezya zyakaambwa asintembawuzyo muli Intembauzyo 118:5-7.—Bala.

2. Tulalanga-langaanzi muchiiyo eechi alubo nkamboonzi?

² Mbuli sintembawuzyo, Pawulu wakabona kuti Jehova Mugwasyi wakwe kuzwa kuzintu zyakamuchitikila. Muchikozyano, kakucheede minyaka iibili kuti alembele maHebrayo, Pawulu wakeenda lweendo luyoosya mulwizi lwakali aguwo pati. (Mil. 27:4, 15, 20) Katananjila lweendo anaakali mulweendo oolu Pawulu, Jehova wakatondeezya kuti Mugwasyi wakwe munzila zisiyene-siyene. Muchiiyo eechi tulalanga-langa nzila zitatu Jehova mbaakamugwasya. Wakabelesya Jesu abangelo, bantu bali mubweendelezi abakombinyina. Kulanga-langa zintu zyakachitikila Pawulu kulapa kuti tube achoonzyo chakuti Jehova ulatusandula kuti twakumbila kuti atugwasye.

3. Kweelede kuti Pawulu wakali kulibuzyaanzi, alubo nkamboonzi?

³ Pawulu wakali kuyanda lugwasyo. Kuma56 C.E., bantu bakamukweelela aanze aatempele kuJerusalemu kabayanda kumujeya. Mubuzuba bwakatobela Pawulu naakayimikizigwa kunembo lyaSanhedrin, basinkondonyina bakasimujaye. (Mil. 21:30-32; 22:30; 23:6-10) Aachiindi eechi kweelede kuti Pawulu wakali kulibuzya kuti, ‘Ndilalisimya kusika lili?’

4. Jehova wakamugwasya biyeni Pawulu kabelesya Jesu?

⁴ Pawulu wakagwasigwa biyeni? Mubuzuba Pawulu mbwaakasungwa, mansiku aakkona “Mwami” Jesu wakayimikila ambali lyakwe akuti: “Koba acamba! Nkaambo mbubonya mbooli kupa bumboni cakulomya mu Jerusalemu, weelede kuyoopa bumboni mbubonya akwalo ku Roma.” (Mil. 23:11) Kusungwaazigwa ooku kwakasika aachiindi cheelede. Jesu wakalumbayizya Pawulu akaambo kakukambawuka nkwaakachita kuJerusalemu. Alubo wakamusyomezya kuti uyoosika kabotu kuRoma akuyookambawuka nkuko. Majwi aaya kweelede kuti akapa kuti Pawulu abe achibindi mbuli mwana mbalimvwa kuti kajinswi awisi.

5. Jehova wakamugwasya biyeni Pawulu kabelesya mungelo? (Langa chifanikisyo chili aachivumbyo.)

⁵ Mbuyumu-yumuunzi bumwi Pawulu mbwaakaswaana? Kakwiindide minyaka iibili kuzwa Pawulu naakasungidwe, wakeenda abwaato abamwi kabaya kuItaly. Mpawo kwakaba guwo pati mulwizi zyakuti teebakali kuyeeyela pe kuti nga balafutuka. Pesi Pawulu taakali kuyoowa pe. Nkamboonzi? Wakabuzya bantu bakali mubwaato kuti: “Sunu masiku mungelo wa Leza simalelaangu alimwi ngondibelekela mulimo uusetekene walisikide akwiima munsi-munsi andime, kaamba kuti, ‘Utayoowi pe, Paulo. Uleelede kuyakwiima kumbele lya Kaisara, alimwi swiilila, Leza wakupa boonse aabo mbomuli limwi mubwato.’” Jehova wakabelesya mungelo kuti abuzye Pawulu majwi ngaakamubuzizye kabelesya Jesu. Pawulu wakaakusika kabotu kuRoma.—Mil. 27:20-25; 28:16.

6. Jesu wakatusyomezyaanzi alubo nkamboonzi nizitusimya?

⁶ Jesu utugwasya biyeni? Jesu uyootugwasya mbuli mbaakagwasya Pawulu. Muchikozyano, Jesu wakasyomezya batobeli bakwe kuti: “Ndilaandinywe mazuba oonse mane kusikila kumamanino aabweende bwazintu.” (Mt. 28:20) Majwi aaJesu alatusimya. Nkamboonzi? Nkaambo chimwi chiindi tuswaanana abuyumu-yumu. Muchikozyano, kuti twafwidwa amuntu ngutuyanda,  zilakonzya kutuchisa kwaminyaka myiingi. Bamwi baswaanana abuyumu-yumu akaambo kakuchembaala. Alubo bamwi nga bamana manguzu akaambo kakukataazikana. Nikuba boobo, tulalisimya nkaambo tulizi kuti Jesu ulaandiswe “mazuba oonse,” nikuba mazuba mayumu loko.—Mt. 11:28-30.

7. Kweendelana alugwalo lwa Ciyubunuzyo 14:6, Jehova utugwasya biyeni mazubaano?

⁷ Jwi lyaLeza litusyomezya kuti Jehova uyootugwasya kabelesya bangelo. (Heb. 1:7, 14) Muchikozyano, bangelo balatugwasya akutuzulwida chiindi nitukambawuka “makani mabotu aa Bwami” ‘kumasi oonse, kumisyobo yoonse, akumilaka yoonse.’—Mt. 24:13, 14; bala Ciyubunuzyo 14:6.

8. Jehova wakamubelesya biyeni mupati wamasoja kuti akwabilile Pawulu?

⁸ Pawulu wakagwasigwa biyeni? Mu56 C.E., Jesu wakasyomezya Pawulu kuti wakali kuyoosika kabotu kuRoma pesi bamwi maJuda bakali kuyanda kuyubilila Pawulu kuti bamujeye. Chiindi mupati wamasoja aakuRoma Kilaudiyo Lusiya naakazimvwa, wakayeeya kuvuna Pawulu. Kilaudiyo wakatuma masoja kuti akwabilile Pawulu chiindi naakali kuya kuKkayisareya kwakali kulampa makkilomita aali 105 kuzwa kuJerusalemu. Naakasika kuKkayisareya, Mweendelezi Felikke wakalayilila kuti Pawulu “alindililwe muŋanda yabwami ya Heroda.” Eezi zyakapa kuti bantu bakali kuyanda kumujaya bakachilwe kumusikila.—Mil. 23:12-35.

9. Mweendelezi Fesito wakamukwabilila biyeni Pawulu?

⁹ Kwakayinda minyaka iibili Pawulu kali mujele kuKkayisareya. Achiindi eecho, Felikke wakagwisigwa aachuuno mbuli mweendelezi mpawo kwakkala Fesito. MaJuda akakombelezya Fesito kuti atole Pawulu kuJerusalemu kuti akabetekwe, pesi Fesito wakakaka. Kweelede kuti mweendelezi ooyu wakakaka akaambo kakuti wakali wamvwa kuti maJuda “bakapangene kuti bamuyubilile Paulo akumujaya munzila.”—Mil. 24:27–25:5.

10. Niinzi mweendelezi Fesito nzyaakachita chiindi Pawulu naakakumbila kuti akabetekwe aKkayisara?

¹⁰ Mukuya kwachiindi, Pawulu wakazoobetekwa muKkayisareya. “Kayanda kukkomaninwa aba Juda” Fesito wakabuzya Pawulu kuti: “Sena uyanda kuunka ku Jerusalemu kuyoobetekelwa nkuko kumbele lyangu?” Pawulu wakalizi kuti, kuti wasala kwiinka kuJerusalemu wakali kuyookonzya kujeegwa. Alubo wakalizi nzyakeelede kuchita kuti afutule buumi bwakwe, akasike kuRoma akuti azumanane kukambawuka. Pawulu wakati: “Mulandu ooyu ndilomba kuutola kuli Kaisara!” Naakazwa kwaambuula abasikupa lulayo bakwe, Fesito wakabuzya Pawulu kuti: “Mbwaanga walomba kutola mulandu wako kuli Kaisara; kuli Kaisara nkotuunke.” Kuzumina nkwaakachita Fesito kwakamuvuna Pawulu. Mukuya kwachiindi, Pawulu wakali kuzooya kuRoma, kule amaJuda bakali kuyanda kumujeya.—Mil. 25:6-12.

11. Kweelede kuti ngaali majwi Pawulu ngaakayeeya akalembwa amupolofita Isaya?

¹¹ Naakali kulindila kuti aye kuItaly, kulakonzeka kuti Pawulu wakayeeya majwi anchenjezyo akalembwa amupolofita Isaya atala abantu bakazyania aJehova aakuti: “Amukanze, pele makanze aanu alajaigwa! Amwaambe kufwumbwa ncomuyanda, pele tacikoozwidilila pe, nkaambo Leza ulaandiswe!” (Is. 8:10) Pawulu wakalizi kuti Leza uyoomugwasya. Kuziba eezi kweelede kuti kwakamupa manguzu aakuti akakonzye kulisimya chiindi naakali kuyooswaanana amapenzi.

12. Juliyasi wakamujata biyeni Pawulu alubo kweelede kuti eezi zyakapa kuti Pawulu aboneenzi?

 ¹² Mu58 C.E., Pawulu wakanjila lweendo lwakuya Italy. Akaambo kakuti wakalisungidwe, wakabikkwa mumaanza amupati wamasoja aakuRoma uutegwa Juliyasi. Aachiindi eechi, Juliyasi wakali aamanguzu akunjizya Pawulu mumapenzi naakuti kumukwabilila. Wakaabelesya biyeni manguzu aakwe? Mubuzuba bwakatobela nibakasika aachito chakuSidoni, “Juliyo wakafwida Paulo luzyalo, aboobo wakamuzumizya kuunka kuyoobona beenzinyina.” Mukuya kwachiindi, Juliyasi wakazoovuna Pawulu. Wakamuvuna biyeni? Chiindi masoja naakali kuyanda kujeya basungwa boonse bakali mubwaato, Juliyasi wakabakasya. Nkamboonzi? Nkaambo “wakali kuyanda kuti amufwutule Paulo.” Kweelede kuti Pawulu wakabona kuti Jehova nguwe wakamugwasya kabelesya mupati wamasoja ooyu wakali aaluzyalo.—Mil. 27:1-3, 42-44.

13. Kujana Jehova wababelesya biyeni bantu bali mubweendelezi?

¹³ Ani iswe tugwasigwa biyeni mazubaano? Kuti kazyeendelana akuyanda kwakwe, Jehova ulakonzya kubelesya muuya wakwe uusalala kuti upe kuti bantu bali mubweendelezi bachite kweendelana akuyanda kwakwe. Mwaami Solomoni wakati: “Moyo wamwami uli mbuli tulonga twamaanzi mujanza lya Jehova. Ulaunyona kufwumbwa nkwayanda kuti utozye.” (Tus. 21:1) Kasimpi aaka kaambaanzi? Bantu balakonzya kusya migelo kuchitila kuti maanzi ali mukalonga aye kufumbwa nkubayanda. Munzila iifenene, Jehova ulakonzya kubelesya muuya uusalala kuti uchinche mizeezo yabeendelezi bachite kweendelana akuyanda kwakwe. Kuti eezi zyachitika, bantu bali mubweendelezi balasala munzila iigwasya bakombi baJehova.—Kozyanisya a Ezara 7:21, 25, 26.

14. Kweendelana alugwalo lwa Milimo 12:5, mbaani mbitukonzya kukombela?

¹⁴ Niinzi nzitukonzya kuchita? Tulakonzya kukomba “kujatikizya bami abaabo boonse ibali muzyuuno zyabweendelezi” kuti basale kabotu chiindi nibayanda kusala zintu zijatikizya bukombi bwesu amulimu wesu wakukambawuka. (1 Tim. 2:1, 2; Neh. 1:11) Mbuli mbubakachita maKristu bamumwaanda wakusaanguna, andiswe tweelede kukombela bakwesu abachizi bali mumajele. (Bala Milimo 12:5; Heb. 13:3) Alubo tweelede kukombela balindi bamajele muli bakwesu abachizi. Tulakonzya kukumbila Jehova kuti ape kuti balindi bamajele babafwide luzyalo bakwesu abachizi mbuli mbaakachita Juliyasi.

15-16. Jehova wakamugwasya biyeni Pawulu kabelesya Aristakko aLukka?

¹⁵ Pawulu wakagwasigwa biyeni? Kali mulweendo lwakwe kuya kuRoma, Jehova wakagwasya Pawulu kabelesya bakombinyina. Atubone kuti wakamugwasya biyeni.

¹⁶ Beenzinyina baPawulu babili, Aristakko aLukka bakamusindikila naakali kuya kuRoma. * Aristakko aLukka bakabikka buumi bwabo mungozi kwiinda mukusindikila Pawulu. Takwe bumboni butondeezya kuti Jesu wakababuzya kuti bakali kuyoosika kabotu kuRoma. Bakaziba kuti bakali kuyoosika kabotu chiindi nikwakachitika guwo mulwizi. Chiindi Aristakko aLukka nibakatanta bwaato kuKkayisareya, kweelede kuti Pawulu wakakomba kuli Jehova amoyo woonse kamulumba akaambo kakumupa baalumi aaba babili balaachibindi kuti bamugwasye.—Mil. 27:1, 2, 20-25.

17. Jehova wakamugwasya biyeni Pawulu kabelesya bakombinyina?

¹⁷ Naakali mulweendo, Pawulu wakagwasigwa abakombinyina kwaziindi zyiingi. Muchikozyano, nibakasika kuchito chakuSidoni, Juliyasi wakazumizya Pawulu “kuunka kuyoobona beenzinyina kutegwa bakamulanganye.” Alubo nibakasika kuPutiyolo, Pawulu abeenzinyina bakajana ‘bakwesu alimwi bakabakombelezya kuti bakkale ambabo kwamazuba aali ciloba.’ Bakombinyina bamundawu eezi bakapa Pawulu abeenzinyina zintu ziyandikana. Alubo kweelede kuti aachiindi eecho Pawulu wakali kubasimya bakombinyina kwiinda mukubabuzya zintu zisungwaazya. (Kozyanisya a Milimo 15:2, 3) Nibakazwa kusungwaazyania abakombinyina, Pawulu abeenzinyina bakazumanana alweendo lwabo.—Mil. 27:3; 28:13, 14.

18. Niinzi chakapa kuti Pawulu alumbe Leza akuti abe aachibindi?

¹⁸ Naakasika afwiifwi akuRoma, kweelede kuti Pawulu wakayeeya nzyaakalembela mbungano yamudolopo eeli kakwiindide minyaka iitatu. Wakabalembela kuti: “Kwamyaka minji  ndalikuyandisisya kuboola kulindinywe.” (Rom. 15:23) Pesi taakali kuyeeyela pe kuti uyooyinka kasungidwe. Wakasungwaazigwa loko chiindi naakajana bakombinyina kabali kumulinda munzila kuti bamujuzye. “Mbwaakababonena buyo, Paulo wakalumba Leza akuyumizyigwa.” (Mil. 28:15) Nkamboonzi Pawulu naakalumba Leza chiindi naakajana bakombinyina? Nkaambo Pawulu wakabona kuti Jehova wakali kumugwasya kabelesya bakombinyina.

19. Kweendelana alugwalo lwa 1 Petro 4:10, Jehova utubelesya biyeni kuti tugwasye bamwi bali mubuyumu-yumu?

¹⁹ Niinzi nzitukonzya kuchita? Kuli bakwesu abachizi mbuzi na mumbungano yanu bali kukataazikana akaambo kakuchiswa, kufwidwa naakuti bumwi buyumu-yumu. Kuti twabona muntu ulikuswaanana abuyumu-yumu buli boobo, tweelede kukumbila Jehova kuti atugwasye tukonzye kwaamba naakuti kuchita zimwi zintu zitondeezya kuti tulamuyanda akumufwida luzyalo. Nzitwaambuula anzituchita zilakonzya kuba lugwasyo ndubayanda bakwesu abachizi aaba bali mubuyumu-yumu. (Bala 1 Petro 4:10.)  * Kuti twabagwasya, balabona kuti chisyomezyo chaJehova chakuti: “Ziyume zitete, tandikakusiyi pe alimwi tandikakulekelezyi pe,” chilabeleka kulimbabo. Eezi ziyoopa kuti ubotelwe loko.

20. Nkamboonzi nitukonzya kwaamba katuli aachibindi kuti “Jehova ngomugwasyi wangu”?

²⁰ Mbuli zyakachitika kumwaapostolo Pawulu abeenzinyina, andiswe tuswaanana abuyumu-yumu buli mbuli guwo pati mbukunga tuli munzila iiya kubuumi butamani. Pesi tuli aachibindi nkaambo tulizi kuti Jehova ulaandiswe. Ulatugwasya kabelesya Jesu abangelo. Alubo kuti kazyeendelana amakanze aakwe, Jehova ulakonzya kutugwasya kabelesya bantu bali mubweendelezi. Alubo biingi besu twakalibonena kuti Jehova ubelesya muuya uusalala kuti upe kuti bakombi bakwe bagwasye bamwi bakombinyina bali mumapenzi. Mbuli Pawulu, andiswe tulakonzya kwaamba katuli aachibindi kuti: “Jehova ngomugwasyi wangu; tandikooyoowa pe. Ino muntu inga wandityani?”—Heb. 13:6.