1, 2. (a) Nguuli mulimu Jesu ngwaakabikka mubusena bwakusaanguna alubo nkamboonzi? (b) Mbutuli ‘basimilimonyina aLeza’ tweelede kuchitaanzi kuti tuzwidilile?

JESU KRISTU wakali mubezi alubo kali mubelesi. (Mk. 6:3; Rom. 15:8) Milimu eeyi yoonse wakali kwiibeleka kabotu. Naakali mubezi, wakayiya mbuzibelesegwa zibelesyo zyamulimu ooyu alubo wakali kubeza zintu zibotu. Naakali muyiisi wamakani mabotu, wakayiisya bantu bakali kulangilwaansi kuti abagwasye kumvwisisisya kasimpe kali muJwi lyaLeza. (Mt. 7:28; Lk. 24:32, 45) Naakaba aminyaka iili 30, Jesu wakasiya mulimu wakubeza nkaambo wakalizi kuti mulimu wakukambawuka wakali kuyandikana loko. Wakaamba kuti kamwi kaambo kakapede kuti Leza amutume aanyika nkuti azookambawuke Makani Mabotu aaBwaami. (Mt. 20:28; Lk. 3:23; 4:43) Mulimu wakukambawuka Jesu wakawubikka mubusena bwakusaanguna alubo wakali kuyanda kuti bamwi bachite mbuuli nguwe.​—Mt. 9:35-38.

² Zilakonzeka kuti tatuchiti mulimu wakubeza pe pesi tuli bakambawusi bamakani mabotu. Mulimu ooyu uyandikana loko nkaambo uswaanizya Leza alubo nzizyo zipa kuti tube ‘basimilimonyina aLeza.’ (1 Kor. 3:9; 2 Kor. 6:4) Tulaazumina majwi akaambwa asintembawuzyo aakuti ‘mitwe yamajwi [aaJehova] ngakasimpe.’ (Int. 119:159, 160) Nzizyo zipa kuti tuyande kuba bantu ‘bapandulula makani aakasimpe mbukweelede.’ (Bala 2 Timoteo 2:15.) Kuchita oobu  kupa kuti tukonzye kulibelesya kabotu Bbayibbele nkaambo nditubelesya kukuyiisya bantu kasimpe atala aJehova, Jesu aBwaami. Kuti tuzwidilile mumulimu ooyu, mbunga yaJehova yakatubambila zimwi zibelesyo nzitweelede kuziba mbuzibelesegwa. Zibelesyo eezi zijanika Muzibelesyo Nzitubelesya Kukuyiisya Bantu.

3. Niinzi nchitweelede kubikkila maanu kuchiindi nchitwasyaalilwaacho, alubo malayilile ajanika muli Incito 13:48 atugwasya biyeni?

³ Ulakonzya kugamba kuti nkamboonzi nituzyaamba kuti Nzibelesyo Nzitubelesya Kukuyiisya Bantu kutali Zibelesyo Nzitubelesya Kukukambawukila Bantu. “Kukambawuka” chaamba kwaambilizya mulumbe pesi “kuyiisya” chaamba kupandulula mulumbe munzila iimusika amoyo muntu kuchitila kuti abelesye nzyayiya. Chiindi eechi nchitwasyaalilwaacho katukambawuka, nchakuti tutalisye zyiiyo zyaBbayibbele akuyiisya bantu kasimpe. Eezi zyaamba kuti tweelede kuyanduula ‘aabo basalidwe kubuumi butamani’ akubagwasya kuti babe basyomi.​—Bala Incito 13:44-48.

4. Kujana twabajana biyeni bantu ‘basalidwe kubuumi butamani’ alubo kujana twachita biyeni kuti tubajane?

⁴ Kujana twabajana biyeni bantu ‘basalidwe kubuumi butamani’? Mbuuli kwakali kuchita maKristu bamumwaanda wamunyaka wakusaanguna, nzila njitukonzya kubajanaayo nkwiinda mukukambawuka. Tweelede kutobelezya malayilile Jesu ngakaamba aakuti: “Nkabela nimunjila mumuunzi umwi aumwi, nimuba mukanzi kamwi akamwi, amuyandaule muntu umwi wamumo uuelede.” (Mt. 10:11) Tatulangilili kuti bantu balisumpula abatakwe chiyandisyo muzintu zyabukombi batambule makani mabotu. Tuyanduula bantu bayanda kwiiya, balibombya abalaanzala yakasimpe. Kuyanduula ooku tulakonzya kukukozyanisya akuyanduula musamu weelela nkwaakali kuchita Jesu kachili mubezi kuti abeze zyuuno, makoma, majokwe azimwi. Naawujana musamu weelela, wakali kubweza zibelesyo zyakwe, akubelesya luzibo ndwaakali aalo kuti asaangune kubeza chintu nchayanda. Andiswe mbutweelede kuchita kuti tugwasye bantu bali amyoyo iibombede kuti babe basikwiiya.​—Mt. 28:19, 20.

5. Niinzi nzitweelede kuziba atala aZibelesyo Zijanika Muzibelesyo Nzitubelesya Kukuyiisya Bantu? Amba chikozyano. (Langa zifanikisyo zili kumatalikilo achiiyo.)

⁵ Chibelesyo chimwi achimwi chili amulimu wacho. Muchikozyano, atulange-lange zibelesyo Jesu nzyaakali kubelesya kachili mubezi. * Wakeelede kuba azibelesyo zyakupimya mapulanga, zyakudyunkuzya, zyakudonkozya, zyakubezya, zyakufazya azyakwaaswaanizya. Chibelesyo chimwi achimwi chijanika Muzibelesyo Nzitubelesya Kukuyiisya Bantu chili amulimu wacho. Atuzilange-lange zibelesyo eezi kuchitila kuti tubone mbutukonzya kuzibelesya.

6, 7. (a) Mwakatubelesya biyeni tukkaadi twaJW.ORG? (b) Nziizili nzila zibili nzikabeleka kapepa kakutamba bantu kumiswaangano yambungano?

⁶ Tukkaadi twaJW.ORG. Chibelesyo eechi nchiniini pesi tulakonzya kuchibelesya kuti bantu batuzibe akuti banjile awebbusayiti yesu mpubakonzya kwiiya zyiingi atala andiswe alubo balakonzya kukumbila zyiiyo zyaBbayibbele. Bantu biinda ku400 000 bakakumbila zyiiyo zyaBbayibbele aaIntaneti alubo kuli bantu biingi bakumbila kwiiya Bbayibbele buzuba abuzuba! Ulakonzya kweenda aatukkaadi ootu kufumbwa nkubede kuti ukambawukile bantu mbuswaana.

⁷ Tupepa twakutamba bantu. Kapepa nkitubelesya kukutamba bantu kabeleka munzila zibili. Kali amajwi aati: “Mulatambwa kuti mwiiye Bbayibbele aBakamboni baJehova.” Alubo kali anzila zibili muntu nzyakonzya kubelesya kuti achite oobo “kumiswaangano yabantu boonse” “naakuti kuba amuntu uukuyiisya.” Chibelesyo eechi tachipi kuti bantu batuzibe luzutu  pesi chisungwaazya bantu “bayandika kusololelwa aLeza” kuti bayiye Bbayibbele andiswe. (Mt. 5:3, NW) Nikuba boobo, bantu boonse balatambwa kuti banjile miswaangano yesu yambungano kufumbwa kuti balikwiiya Bbayibbele naakuti pe. Nibasika kumiswaangano balalibonena akulimvwida kasimpe nkitwiiya muBbayibbele.

8. Nkamboonzi bantu nibeelede kunjila miswaangano yesu nikuba uumwi luzutu? Amba chikozyano.

⁸ Kulayandikana kuti tuzumanane kutamba bantu kuti basike kumiswaangano yesu yambungano nikuba kamwi luzutu. Nkamboonzi nikuyandikana? Nkaambo balakonzya kubona kuti kumiswaangano yesu yambungano kuli chakulya chiingi chamubukombi pesi bali muli Bbabbiloni Mupati bali anzala mubukombi. (Is. 65:13) Ray amukayintu wakwe Linda bakuUnited States bakazibona eezi muminyaka yayinda. Bakasala kuti babe achikombelo nchibanjila. Bakali kusyoma kuti Leza mpali alubo bakali kuyanda kwiiya zyiingi atala anguwe, nkinkaako bakasala kuswaya zikombelo zyoonse zyakali mudolopo mubakali kukkala. Kwakali zikombelo zyiingi zipati atubunga tuniini. Nkinkaako bakasala kuswaya zikombelo zyoonse zyakali mudolopo mubakali kukkala kabayanduula zintu zibili. Chakusaanguna, bakali kuyanda kuti babe azintu nzibayiya miswaangano niyamana alubo chabili bakali kulangilila kuti bantu bachikombelo eecho bazwaate munzila iitondeezya kuti bakomba Leza choonzyo. Kwaminyaka miingi bakiinka kuzikombelo zyiingi pesi teebakazijana pe nzibakali kuyanduula. Taakwe chintu nchibakayiya alubo bantu bazikombelo nzibakali kunjila teebakali kuzwaata munzila yabulemu. Nibakamana kuswaya chikombelo chakumamanino muzikombelo nzibakalembede, Linda wakaya kumulimu mpawo Ray wakaya kung’anda. Naakali kuya kung’anda, Ray wakabona Ng’anda yaBwaami mpawo wakayeeya kuti, ‘Ndiyanda kunjila oomu ndibone kuti kuchitwaanzi?’ Wakabotelwa loko naakanjila! Bantu boonse muNg’anda yaBwaami bakali kusangalizya alubo bakazweete kabotu. Ray wakakkala kunembo alubo zyakamunoneezya nzyakali kwiiya! Zyakaba mbuuli majwi mwaapostolo Pawulu ngaakaamba atala amuntu uunjila miswaangano yesu yachiKristu kakusaanguna waamba kuti: “Ncobeni Leza mpali akati kanu.” (1 Kor. 14:23-25) Kuzwa waawo, Ray wakasaanguna kunjila miswaangano Nsondo aNsondo mpawo wakazoosaanguna kunjila amiswaangano yaakati kamviki. Linda alakwe wakasaanguna kunjila miswaangano alubo nibakali aminyaka iili kuma 70 bakazumina kwiiya Bbayibbele mpawo bakazoobbabbatizigwa.

9, 10. (a) Nkamboonzi tupepa nitutakataazyi kubelesya? (b) Pandulula mbutukonzya kubelesya kapepa kati Bwami bwaLeza Niinzi?

⁹ Tupepa. Tuli aatupepa tuli 8, tutakataazyi kubelesya, ntutubelesya kuti tusaangune kwaambuuzyania abantu. Tupepa ootu twakapupululwa mu2013 alubo lino kwakadindwa twiinda ku5 bbiliyoni! Bubotu bwatupepa ootu mbwakuti, kuti waziba kubelesya kamwi, ulakonzya kutubelesya toonse nkaambo tubeleka munzila iimwi. Kujana twakabelesya biyeni kapepa kuti tusaangune kwaambuuzyania abantu?

¹⁰ Muchikozyano, ulakonzya kubelesya kapepa kati, Bwami bwaLeza Niinzi? Ulakonzya kutondeezya muntu mubuzyo uli kumatalikilo akumubuzya kuti: “Mubonaanga Bwaami bwaLeza niinzi? Mubonaanga  . . . ?” Mpawo umukumbile kuti aambe nsandulo iimwi munsandulo zitatu zilembedwe. Kutanamubuzya kuti mbasandula mbubo na, naakuti pe, yinka alembedwe kuti “Nzilyaamba Bbaibbele” mpawo ubale muli Daniele 2:44 amuli Isaya 9:6. Ulakonzya kuzuwa  zyiingi kuti kazikonzeka. Chakumamanino, mutondeezye mubuzyo ngumuzoowambuuzyania uuli aansi aakatwe kati “Nzyonga Ulayeeya” uuti: “Buyooba biyeni buumi mubweendelezi bwaBwami bwaLeza?” Kuchita oobo kupa kuti ujane aakusaangunina amuntu ooyo, muchiindi chitobela. Kuti mwazoobonana lubo, ulakonzya kumutondeezya chiiyo 7 mukabbuku kati Makani Mabotu Aazwa Kuli Leza! Alubo kabbuku aaka tulakabelesya kwiiya abantu Bbayibbele.

11. Mamagazini eesu akabambilwaanzi alubo niinzi nzitweelede kuziba atala angawo?

¹¹ Mamagazini. Magazini iitegwa Ngaziyakulinda aAmubuke! ngimamagazini aapupululwa akusandululwa mumilaka myiingi munyika yoonse! Bantu basiyene-siyene balaabala mamagazini aaya, nkinkaako mitwe iili aachivumbyo ibambidwe munzila ipa kuti bantu babe achiyandisyo chakubala. Tweelede kwaabelesya kuti bantu bazibe zintu ziyandikana mubuumi. Kuziba bantu balembeledwe magazini imwi ayimwi kuyootugwasya kuti tuzibe mbutukonzya kwiibelesya.

12. (a) Magazini yaAmubuke! yakabambilwa bani alubo ngaali makanze aayo? (b) Nziizili zibotu nzwaakajana nwaakabelesya magazini eeyi?

¹² Magazini iitegwa Amubuke!, yakabambilwa bantu bali aluzibo luche naakuti batakwe luzibo atala aBbayibbele. Kulakonzeka kuti taakwe nzibazi atala anjiisyo zyachiKristu, naakuti tabasyomi pe atala azyabukombi alubo kulakonzeka kuti mbantu batazi kuti malayilile aamuBbayibbele alagwasya. Makanze mapati aamagazini eeyi, ngakugwasya bantu kuti bazibe kuti Leza mpali. (Rom. 1:20; Heb. 11:6) Alubo igwasya basikubala kuti basyome kuti makani aamuBbayibbele ‘nganchobeni akuti makani aaLeza.’ (1 Tes. 2:13) Mitwe yamakani ilaachivumbyo chamamagazini aatatu aAmubuke! aamu2018 iiti “The Way of Happiness,” “Nsiswa Zili 12 Zipa Kuti Mpuli Zizwidilile” awuti “Zikonzya Kugwasya Bantu Bali Mubuumba.”

13. (a) Ngaziyakulinda yabantu boonse yakabambilwa bantu bali biyeni? (b) Nziizili zibotu nzwaakajana nwaakabelesya magazini eeyi?

¹³ Makanze aamagazini yaNgaziyakulinda yabantu boonse, ngakupandulula njiisyo zyamuBbayibbele kubantu balemeka Leza aBbayibbele. Nikuba boobo, kulakonzeka kuti balizizi zimwi zyaambwa aBbayibbele pesi ngatabazimvwisisisyi kabotu nziliyiisya. (Rom. 10:2; 1 Tim. 2:3, 4) Mitwe iitatu iili aachivumbyo chamamagazini aamu2018 isandula mibuzyo yakuti: “Is the Bible Still Relevant Today?,” “Mazuba Aalikunembo Anooli Biyeni?” awuti “Leza Ulaandaba Na Anduwe?”

14. (a) Tubambilidweenzi tuvidiyo tuli 4 tujanika Muzibelesyo Nzitubelesya Kukuyiisya Bantu? (b) Nziizili zibotu nzwaakajana nwaakabelesya tuvidiyo ootu?

¹⁴ Mavidiyo. Muchiindi chaJesu, mubezi wakali kubelesya zibelesyo zyamaboko luzutu. Mazubaano, babezi babelesya minchina yakudyunkuzya, yakudonkozya, yakugankamizya zipikili azimwi. Kuyungizya kumabbuku aapulintwa, tuli aatuvidiyo tubotu ntututondeezya bantu alubo tuli 4 tujanika muzibelesyo nzitubelesya kukuyiisya bantu tuswaanizya kati: Nkamboonzi Nitweelede Kwiiya Bbayibbele?, Niinzi Cicitika Kuciiyo caBbayibbele?, Niinzi Cicitika KuN’anda yaBwami? akati Jehovah’s Witnesses—Who Are We? Tuvidiyo tuli aamaminiti aatayindi aabili tulakonzya kutubelesya mukubonana kwakusaanguna. Pesi tulamfu tulakonzya kutubelesya kukubweeda akubantu bali achiindi chiingi. Zibelesyo eezi, zilakonzya kusungwaazya bantu kuti bayande kwiiya Bbayibbele akuti banjile miswaangano yesu.

15. Amba zikozyano zitondeezya mbubagwasigwa bantu akaambo kakweebela mavidiyo mumulaka wabo.

¹⁵ Muchikozyano, umwi muchizi naakaswaana mukayintu wakalonga kazwa kuMicronesia alubo waambuula chiYapese, muchizi ooyu wakatondeezya mukayintu ooyo kavidiyo kati Nkamboonzi Nitweelede Kwiiya Bbayibbele? mumulaka wakwe. Naakasaanguna kweebela kavidiyo,  mukayintu ooyo wakati: “Ooyu mulaka wangu. Zilagambya! Muntu uulikwaambuula, wambuula mbuuli bantu bakulindiswe. Waambuula mulaka wangu!” Kuzwa waawo, mukayintu ooyu wakati, uyanda kuyoobala mabbuku akweebela mavidiyo oonse aajanika ajw.org aali mumulaka wakwe. (Kozyanisya amajwi aali muli Incito 2:8, 11.) Atulange-lange chikozyano chimbi. Umwi muchizi wakuUnited States wakatumizya mwana wamunyaandumi wakwe linki yakavidiyo aaka mumulaka wamwana ooyo. Mwana wamunyaandumi wakwe wakakeebela mpawo wakalembela muchizi ooyu kuti: “Chipanzi chakavidiyo aaka chitondeezya kuti muntu mubi nguwe weendelezya nyika, chakandisika amoyo. Ndakakumbila kwiiya Bbayibbele.” Mwana ooyo ukkala kunyika ooko mulimu wesu nkuukasigwa!

16. Pandulula makanze aatubbuku tutobela: (a) Swiilila Leza Ikuti Ukajane Buumi Butamani. (b) Makani Mabotu Aazwa Kuli Leza! (c) Mbaani Baliikuchita Kuyanda KwaJehova Mazuba Aano?

¹⁶ Tubbuku. Kujana wamuyiisya biyeni kasimpe muntu uutakonzyi kubala kabotu naakuti mabbuku aali mumulaka wakwe kaali mache?Chibelesyo chakabambilwa kutugwasya kuchita oobo nkabbuku kategwa Swiilila Leza Ikuti Ukajane Buumi Butamani. * Chimwi chibelesyo chitugwasya kuti twiiye abantu Bbayibbele, nkabbuku kategwa Makani Mabotu Aazwa Kuli Leza! Ulakonzya kutondeezya muntu mitwe yamakani iili 14 iijanika kusule akabbuku aaka akumukumbila kuti asale ngwayanda. Mpawo ulakonzya kwiiya amuntu kubelesya chiiyo nchaasala. Kuli nwaakabelesya nzila eeyi na nwaakali kubweeda? Kabbuku kachitatu nkitubelesya kwiiya abantu kategwa Mbaani Baliikuchita Kuyanda KwaJehova Mazuba Aano? Kakabambilwa kugwasya bantu mbitwiiyaabo kuti bazibe mbunga yesu. Kuti uzibe mbukonzya kuchibelesya chibelesyo eechi kubantu mbuyiyaabo Bbayibbele, langa Kabbuku Kamuswaangano waBuumi Bwesu BwachiKristu Amulimu Wesu kamuMarch 2017.

17. (a) Bbuku limwi alimwi lyakuyiisya bantu libambilidweenzi? (b) Bantu balikubbabbatizigwa beelede kuchitaanzi alubo nkamboonzi?

¹⁷ Mabbuku. Kuti mwasaanguna kwiiya kamubelesya kabbuku, kufumbwa chiindi mulakonzya kuchincha akubelesya bbuku litegwa IBbayibbele Nga Lilatuyiisyaanzi? Chibelesyo eechi chigwasya bantu kuti bazibe njiisyo ziyandikana zyamuBbayibbele. Kuti mwalimaninsya bbuku eeli alubo kuti sikwiiya kalikuchita kabotu mubukombi, mulakonzya kwiinkilila kunembo abbuku litegwa Mbutukonzya Kukkala Katuli Muluyando lwaLeza. Chibelesyo eechi chigwasya muntu ulikwiiya Bbayibbele mbakonzya kubelesya njiisyo zyamuBbayibbele mubuumi. Nikuba kuti muntu wabbabbatizigwa, weelede kwiinkilila kunembo akwiiya kusikila waamaninsya mabbuku aaya. Kuchita oobo kugwasya bantu mbitwiiyaabo kuti basime mubukombi.​—Bala BaKolose 2:6, 7.

18. (a) Majwi aali muli 1 Timoteo 4:16 atusungwaazya biyeni mbuuli bayiisi bakasimpe alubo eezi zyeeta mpinduunzi? (b) Ngaali makanze ngitweelede kubaawo nitubelesya Zibelesyo Nzitubelesya Kukuyiisya Bantu?

¹⁸ Mbutuli Bakamboni baJehova, tupedwe mulimu wakwaambilizya “lusinizyo lwa-Makani Mabotu” aapa kuti bantu bakajane buumi butamani. (Kol. 1:5; bala 1 Timoteo 4:16.) Nkinkaako, twakapegwa Zibelesyo Nzitubelesya Kukuyiisya Bantu kuti tukonzye kubayiisya. (Langa “ Zibelesyo Nzitubelesya Kukuyiisya Bantu.”) Atuzibelesye kabotu zibelesyo eezi. Sikupupulula umwi awumwi ulakonzya kusala bbuku ndyakonzya kubelesya kumuntu uuli achiyandisyo. Makanze eesu taakupa bantu mabbuku luzutu alubo tatweelede kupa bantu batakwe chiyandisyo. Pesi ngakugwasya bantu kuti babe basikwiiya, bayanda kwiiya, balibombya, balaanzala muzintu zyabukombi alubo ‘basalidwe kubuumi butamani.’​—Inc. 13:48; Mt. 28:19, 20.