1922—Minyaka Iili 100 Yayinda
‘LEZA . . . nguupa kuti tuzunde kwiinda muli Jesu Kkristu.’ (1 Kor. 15:57) Majwi aaya aakasalwa kuti abe lugwalo lwamunyaka lwamu1922, akapa Basikwiiya Bbayibbili chibindi chakuti kusyomeka kwabo kwakali kuzoolongezegwa. Mumunyaka wa1922, Jehova wakalongezya bakambawusi aabo bakali basungu. Leza wakabalongezya chiindi nibakasaanguna kupulinta mabbuku aabo akupupulula kasimpe kaBwaami aali sikapepele. Kumamanino aa1922, zyakaba aantanganana kuti Jehova wakali kubalongezya bantu bakwe. Basikwiiya Bbayibbili bakachita muswaangano uutalubiki kuCedar Point, Ohio, U.S.A. Muswaangano ooyo, wakachincha mbunga yaJehova akupa kuti ibe mbuli mbiibede mazubaano.
“MUZEEZO UULI KABOTU”
Mbukunga mulimu wakukambawuka wakali wasaanguna kukomena, kwakali kwayandikana mabbuku miingi. Bakwesu bakuBbeteli yakuBrooklyn, bakali kukonzya kupanga mamagazini luzutu, pesi mabbuku aalamakkava aasimide bakali kwaapulintilwa aayimwi kkampani. Akaambo kakubulika kwamabbuku kwamyeezi myiingi, mulimu wakukambawuka wakasaanguna kuyuma. Nkinkaako, Mukwesu Rutherford wakaambuula aamukwesu Robert Martin, ooyo wakali mupati wafekitali, kuti amvwe kuti zyakali kuchita na kuti basaangune kulipangila mabbuku.
Ndawu yakupangila mabbuku kufekitali yakuConcord Street kuBrooklyn, New York
Mukwesu Martin wakaamba kuti: “Ooyu muzeezo uulikabotu, nkaambo tunooli twaba aaminchina yesu iikkwene, yakuti tulipulintile akulipangila mabbuku.” Nkinkaako, bakwesu bakayanduula ndawu kuConcord Street iili muBrooklyn aminchina yakali kuyandikana.
Teeboonse pe bakabotelwa aamuzeezo ooyu. Mupati wakkampani yakali kutupulintila mabbuku wakaswaya ndawu mpya njitwakali twaabubelesya kupanga mabbuku. Naakasika, wakaamba kuti: “Lino mwaba aaminchina mipya pesi taakwe uukonzya kwiibelesya akati kanu. Mumyeezi iili 6 biyo, zyoonse eezi zinooli zyafwa.”
Mukwesu Martin wakaamba kuti: “Nzyaawamba mupati wakkampani ooyu nzyachoonzyo pesi penzi ndyakuti wasiya Mwaami, walikutugwasya kuzwa chiindi.” Mukwesu Martin wakali kwaambisya. Muchiindi chifwiifwi biyo, twakali twaabupanga mabbuku aali 2 000 abuzuba.
Chifanikisyo chitondeezya mbuchakabede chibumbili aajulu kakuli chibbaakani
KUKAMBAWUKILA BANTU BIINGI AREDIYO
Kuyungizya aamulimu wakusaanguna kulipangila mabbuku, bantu baJehova bakasaanguna kubelesya rediyo kuti bapupulule makani mabotu. MuFebruary 26, 1922, muNsondo sikati, Mukwesu Rutherford wakapa nkani yakwe yakusaanguna aarediyo, yakali aamutwe uuti: “Mamiliyoni aabantu balikupona lino tabazoofwi pe,” aarediyo station yaKOG kuLos Angeles, California, U.S.A.
Kuyeeyelwa kuti bantu basika ku25 000 bakaswiilila pulogilamu eeyi. Bamwi babo bakalemba magwalo aakulumba. Umwi wakalemba lugwalo nguWillard Ashford uukkala kuSanta Ana, California. Mwaalumi ooyu wakalumba Mukwesu Rutherford akaambo kankani eeyi yakali kunoneezya. Alubo wakayungizya kwaamba kuti: “Twakakonzya kuswiilila nkani eeyi nkaambo yakapegwa aaluwayile. Kaansinga yakapegwa aayimwi nzila naakuti aalisimayakilane, teetwakali kunookonzya pe kwiiswiilila, nkaambo twakali aabantu batatu bakali kuchiswa.”
Bakwesu bakayinkilila kunembo kupupulula makani mabotu aarediyo. Kumamanino aamunyaka wa1922, Ngaziyakulinda yakaamba kuti, kulangililwa kuti, “bantu basika ku300 000 bakali batambula mulumbe aarediyo.”
Makani aaya aasungwaazya akapa kuti Basikwiiya Bbayibbili bayake rediyo station yabo aakasuwa kaStaten aafwiifwi aBbeteli yakuBrooklyn. Muminyaka yakatobela, Basikwiiya Bbayibbili bakabelesya station eeyo yaWBBR, kuti bapupulule mulumbe waBwaami kubantu biingi akundawu zili kule.
“ADV”
Ngaziyakulinda yamuJune 15, 1922, yakaambilizya kuti kwakali kuzooba muswaangano mupati wakali kuzoochitilwa kuCedar Point, Ohio, kuzwa mu5 kusika mu13, September 1922. Basikwiiya Bbayibbili bakabotelwa loko nibakasika kubbuwa lyamuswaangano kuCedar Point.
Mumajwi aakwe akutambula basimuswaangano, Mukwesu Rutherford wakaamba kuti: “Ndilizi alubo ndili aachoonzyo chakuti Mwaami . . . ulalongezya muswaangano ooyu, akupa kuti kuzoopegwe bukamboni bupati butanapegwa pe aanyika.” Basikupa nkani aamuswaangano ooyo bakali kusungwaazya Basikwiiya kuti basungwaale mumulimu wakukambawuka.
Nkamu yabantu bali kumuswaangano mu1922 kuCedar Point, Ohio
Muli Bwasanu 8 September , bantu basika ku8000 bakazula mubbuwa lyakali kuchitilwa muswaangano kuti bamvwe nkani yaMukwesu Rutherford. Bantu aaba bakali kulangilila kumvwa bupanduluzi bwamabala aakuti “ADV,” aakali aamapepa aabo aakutamba. Bantu biingi nibakakkala, bakabona mulembo wakapetedwe kunembo lyabo. Arthur Claus, ooyo wakazwa kuTulsa, Oklahoma, U.S.A kuti azonjile muswaangano, wakasika wakkala kunembo ooko nkwaakali kukonzya kuumvwa kabotu muswaangano, nkaambo kuchiindi eecho teekwakali minchina iikomezya majwi.
“Twakateyede matwi kumajwi woonse ngaakali kwaamba”
Kutegwa kutabi zintu zikonzya kunyongania bamwi achiindi chamuswaangano, sichuuno wakaambilizya kuti muntu wakali kunonoka taakali kuzumizigwa kunjila mwakali kuchitilwa miswaangano chiindi Mukwesu Rutherford naakali kupa nkani. Ahafu pasiti 9 kuseeni, Mukwesu Rutherford wakasaanguna nkani yakwe kwiinda mukuzubulula majwi aajanika muli Mateyo 4:17, aawamba kuti: “Bwaami bwakujulu bwaswena aafwiifwi.” Chiindi naakali kupandulula mbubakali kuyoowumvwa bantu mulumbe waBwaami, Mukwesu Rutherford wakaamba kuti: “Jesu lwakwe wakaamba kuti kuchiindi chakubaawo kwakwe, wakali kuzootebula bantu bakwe akulibunganizizya bakombi bakasimpe alubo basyomeka.”
Mukwesu Claus, ooyo wakakkede kunembo wakaamba kuti: “Twakateyede matwi kumajwi woonse ngaakali kwaamba.” Pesi kalyiibide, wakasaanguna kuchiswa, mpawo wakeelede kuzwa kunembo nkwaakakkede. Nkinkaako, mukwesu Claus wakazwa amoyo uuchisa nkaambo wakalizi kuti taakali kuzoozumizigwa pe kubweeda lubo aandawu yakwe.
Pesi muchiindi chifwiifwi biyo, wakasaanguna kumvwa kabotu. Mpawo naakali kubweeda kwakali bantu, wakamvwa musindo mupati wabantu bakali kukambilila. Eezi zyakapa kuti abotelwe loko. Nkinkaako wakalibuzya kuti, kuti kazyaamba kuti ndeelede kutanta aajulu kuti ndikonzye kumvwa nkani ndilatanta kupela. Mukwesu ooyu wachiniini wakali aaminyaka iili 23, wakayanduula nzila yakuti atante kukaluli. Naakatanta akusika aafwiifwi amawindo aakali kukaluli wakamvwa kuti nkani yakali kumvwika kabotu.
Pesi mukwesu Claus taakali aalikke pe aakaluli, wakali aabeenzinyina. Umwi wabo uutegwa Frank Johnson, wakayinka kulinguwe mpawo wakabuzya kuti: “Uli aakafulo na?”
Mukwesu Claus wakasandula kuti: “Iiyi ndaako.”
Mpawo Frank wakaamba kuti, “Nkombyo yesu yasandulwa. Mucheka ooyo mupati uupetedwe, ngulangide, nchibbaakani chaangilidwe kuzipikili. Ndikumbila kuti uteye matwi kuMubetesi. * Kuti waamba kuti, ‘amwaambilizye, amwaambilizye’ unenge ntambo eezi zili 4.”
Nkinkaako, Mukwesu Claus wakalinda abamwi kajisi kafulo kuti amvwe chaambilizyo. Muchiindi chifwiifwi, Mukwesu Rutherford wakasika kumamanino aankani yakwe. Akaambo kakubotelwa nkwaakalaako, wakajinsya nkani yakwe munzila iisungwaazya kwiinda mukoompolola kati: “Amusyomeke nibakamboni baMwaami bakasimpe. Amuzumanane munkondo eeyi, kusikila alobe Bbabbiloni. Amwaambilizye mulumbe kumasena aali kule. Nyika yeelede kuziba kuti Jehova, nguLeza akuti Jesu Kkristu, Mwaami wabaami aSimalelo wabasimalelo. Oobuno mbuzuba buyandikana loko. Amubone, Mwaami ulikweendelezya! Inywe muli bayiminini bakwe. Nkinkaako, amwaambilizye, amwaambilizye, Mwaami aBwaami bwakwe.”
Mukwesu Claus wakaamba kuti we abakombinyina bakanenga ntambo mpawo mucheka mupati wakapetedwe wakalambunuka. Basimuswaangano bakaziba nzyaakali kwaamba mabala aakuti “ADV,” nibakabona chibbaakani eecho kachilembedwe kuti: “Amwaambilizye Mwaami aBwaami bwakwe.”
MULIMU UUYANDIKANA
Muswaangano ooyu wakachitilwa kuCedar Point wakagwasya bakwesu kuti babikkile maanu kumulimu uuyandikana wakukambawuka atala aBwaami, alubo aabo bakalipedelede bakatola lubazu mumulimu ooyu. Umwi mu-colporteur (mazubaano wiitwa kuti payona) wakali kuzwa ku-Oklahoma, U.S.A., wakalemba kuti, “Twakali kubelekela mubboma lisyigwa malasha, alubo bantu bankuko balafwaba.” Mukwesu ooyu wakayungizya kwaamba kuti: “Chiindi bantu nibakali kumvwa mulumbe uujanika mumagazini iitegwa Golden Age lino yiitwa kuti Amubuke!, misozi yakali kubeenda.” Mubufwiifwi wakati, “Twakajana chilongezyo chipati chakuti tubawumbulizye.”
Basikwiiya Bbayibbili bakabona mbaakali kuyandikana majwi ngaakaamba Jesu muli Lukka 10:2 aakuti: “Mulimu wakutebula mupati pesi babelesi mbache.” Kumamanino aamunyaka ooyo, Basikwiiya Bbayibbili bakali balipeda kuti baambilizye mulumbe waBwaami kubantu biingi akundawu zili kule.
^ Chimwi chiindi Mukwesu Rutherford wakali kwiitwa kuti “Mubetesi” nkaambo chimwi chiindi wakali kubeleka kali mubetesi uutembedwe kuMissouri, U.S.A.
