1-2. (a)Niinzi zyakachitwa aazimwi mfulumende kubakombi baJehova, alubo niinzi nzibakasala kuchita bakwesu? (b) Nkamboonzi kupenzegwa nikukonzya kupa kuti tubotelwe? (Sandula kubelesya chifanikisyo chili aachivumbyo.)

 KWAAMBUULA oobuno, mulimu wesu ulikasidwe munyika zyiinda ku30. Bamwi balupati-pati bakasunga bakwesu abachizi kakutakwe nchibakachita pe mumaboneno aaJehova. Nzibakaangilwa nkubala Bbayibbili akuyanduulisisya, kubuzya bamwi nzibasyoma akunjila miswaangano abakombinyina. Alubo bamwi bakasungwa nkaambo bakakaka kutola lubazu mulizyapolitikisi. Nikuba kuti babelesi baLeza aaba balikukazigwa loko, balikwiinkilila kunembo kutondeezya kuti balasyomeka * kuli Jehova naakuti balilipedelede kuli Jehova amoyo woonse alubo balikubotelwa kuchita oobo.

² Kweelede anduwe nga waabona mapikicha aabamwi bakwesu aaba bali aachibindi kabali kumwemwetela. Balabotelwa nkaambo balizi kuti Jehova ulabotelwa ambabo akaambo kakwiinkilla kunembo kusyomeka kulinguwe. (1 Mak. 29:17a) Jesu wakaamba kuti: “Balabotelwa aabo bakapenzegwa akaambo kabululami . . . Amubotelwe alubo amukondwe loko mbukunga bulumbu bwanu mbupati.”—Mt. 5:10-12.

3. Mbuli mbukulembedwe muli Milimu 4:19, 20, baapostoli bamumwaanda wamunyaka wakusaanguna, bakachitaanzi nibakali kupenzegwa alubo nkamboonzi?

³ Bakwesu abachizi balikupenzegwa mbuli mbubakapenzegwa  baapostoli mumwaanda wamunyaka wakusaanguna akaambo kakukambawuka atala aJesu. Chakwiindulula, babetesi bamunkuta mpati yamaJuda, bakababuzya “kuti baleke kwaambuula atala azina lyaJesu.” (Mil. 4:18; 5:27, 28, 40) Baapostolo bakachita biyeni? (Bala Milimu 4:19, 20.) Bakalizi kuti muntu mupati kwiinda boonse, nguwe wakali ‘wabalayilila kuti bakambawuke kubantu akuti bape bukamboni buzwide’ atala aKkristu. (Mil. 10:42) Nkinkaako, Petro aJohane, aabo bakali kwiiminina baapostolo, bakatondeezya chibindi kwiinda mukwaamba kuti bakali kuyanda kuswiilila Leza kutali babetesi aabo alubo bakaamba kuti teebakali kuzooleka pe kwaambuula atala aJesu. Mubuzyo ngubakabuzya babetesi, kwakali mbuli kuti bakali kubabuzya kuti, ‘Mubonaanga milawu yanu iyandikana loko na kwiinda yaLeza?’

4. Mbuli mbukulembedwe muli Milimu 5:27-29, nchiichili chikozyano baapostoli nchibakabasiila maKkristu boonse bakasimpe alubo kujana twabatobelezya biyeni?

⁴ Baapostolo bakasiya chikozyano chilikabotu, chilikutobelwa aamaKkristu woonse aakasimpe, chakuswiilila “Leza mbuli mweendelezi kutali bantu.” (Bala Milimu 5:27-29.) Nibakazwa aakuumwa akaambo kakuswiilila mulawu waLeza, baapostolo bakazwa munkuta mpati yamaJuda “kabali kubotelwa nkaambo bakali babonwa kuti baleelela kutalemekwa akaambo kazina” lyaJesu.—Mil. 5:40-42.

5. Njiili mibuzyo njitutasandule?

⁵ Zintu nzibakachita baapostoli zipa kuti tube aayimwi mibuzyo. Muchikozyano, kusala kuswiilila Leza kutali bantu nkubakachita, kweendelana biyeni amulawu wamuMagwalo wakuti: “Muntu woonse alibombye kubeendelezi”? (Rom. 13:1) Mbuli mbakaamba Pawulu, kujana twazichita biyeni kuti ooku tulookuswiilila “mfulumende abeendelezi” mpawo kumwi katuli kusyomeka kuli Leza Mweendelezi mupati?—Tit. 3:1.

6. (a) ‘Beendelezi’ baambidwe muli Baroma 13:1 mbaani alubo niinzi nzitweelede kuchita kulimbabo? (b) Ngaali makani aachoonzyo atala amanguzu ngibalaawo bantu beendelezya?

⁶ Bala Baroma 13:1. Mulugwalo oolu, bbala lyakuti ‘beendelezi’ lyaamba bantu bali  aamanguzu kwiinda bamwi naakuti bali aamanguzu aakweendelezya bamwi. MaKkristu balayililwa kuti balibombye kubeendelezi aaba. Beendelezi bapa kuti zintu zyeende kabotu, bapa kuti bantu baswiilile milawu alubo ali chimwi chiindi bakwabilila bantu baJehova. (Chi. 12:16) Nkinkaako, tulayililwa kuti tubape mali yamutelo, tubabbadale, akuti tubayoowe. (Rom. 13:7) Nikuba oobo, beendelezi aaba bali aamanguzu ngibalaawo akaambo kakuti Jehova wakabazumizya kuti babe aamanguzu aayo. Jesu wakakabikka aantanganana kaambo aaka naakali kubuzigwa-buzigwa aaMweendelezi Pilato. Pilato naakabuzya Jesu kuti ulaamanguzu aakumwaangununa naakuti aakupa kuti ajayigwe, Jesu wakamusandula kuti: “Kaansinga manguzu ngulaawo teewakaapegwa kuzwa kujulu, teewalikunooba aamanguzu pe aalindime.” (Joh. 19:11) Nkani eeyi yaPilato, itondeezya kuti manguzu ngibalaawo bantu beendelezya kuli mpaagolela.

7. Nziizili zyiimo mututeelede kuswiilila beendelezi banyika, alubo niinzi nzibeelede kuziba beendelezi?

⁷ MaKkristu beelede kuswiilila milawu yabeendelezi kuti milawu eeyo kayitakazyanyi aamilawu yaLeza. Tazichiti pe kuti tuswiilile bantu, kuti baamba kuti tuchite nzibayanda ziteendelani aaziyandwa aaLeza naakuti tuleke kuchita ziyandwa aaLeza. Muchikozyano, balakonzya kwaamba kuti balombe bachikula bakalwanine nyika yabo. * Alubo balakonzya kukasya Bbayibbili lyesu, mabbuku aapandulula Bbayibbili, kukambawuka naakuti kubunganaamwi kuti tukombe. Kuti beendelezi teebaabelesya kabotu manguzu aabo, kwiinda mukupenzya basikwiiya baKkristu, beelede kuziba kuti bazoolyaambilila kunembo lyaLeza. Jehova ulizibwene zyoonse zilikuchitika.—Muk. 5:8.

8. Jehova usiyene biyeni abamwi beendelezi boonse?

⁸ Beendelezi balakonzya kuba aamanguzu aakuchita zintu zibotu aakweendelezya bamwi. Pesi eezi tazyaambi kuti balimaninide pe naakuti balaamanguzu kwiinda bamwi boonse. Kuli muntu uumwi biyo uumaninide alubo uulaamanguzu kwiinda bantu boonse. Muntu ooyo nguJehova Leza. Kwaziindi zili 4 muBbayibbili, Jehova waambidwe kuti ngunguwe “Mupati Kwiinda.”—Dan. 7:18, 22, 25, 27.

9. Mupolofita Daniyele wakabonaanzi muzilengaano?

⁹ Mupolofita Daniyele wakabona zilengaano zyakali kutondeezya mbubusumpukide bweendelezi bwaJehova kwiinda bweendelezi boonse bwabantu. Kumasaangunino, Daniyele wakabona banyama bapati bali 4 bayiminina bweendelezi bwanyika, oobo bwakaliwo chiindi, nkokuti bweendelezi bwaBbabbiloni, Medo-Persia, Grisi, aRoma abuliwo mazubaano bwaAnglo-America. (Dan. 7:1-3, 17) Daniyele wakazoobona Jehova Leza kakkede aachuuno chakwe chabwaami munkuta yakujulu. (Dan. 7:9, 10) Zintu nzyaakazoobona mupolofita ooyu uusyomeka, zyeelede kuchenjezya beendelezi bamazubaano.

10. Kweendelana alugwalo lwa Daniele 7:13, 14, 27, mbaani batazoopegwe bwaami bwanyika aJehova, alubo eezi zitondeezyaanzi atala aLeza?

¹⁰ Bala Daniele 7:13, 14, 27. Leza uzoogwisya bweendelezi boonse kubantu akubupa kulibamwi beelela bali aamanguzu. Mbaani bantu aabo? NguJesu Kkristu, ooyo “uuli mbuli mwanaamuntu” ‘abasalali ba Mupati Kwiinda,’ nkukwaamba bali 144 000 batazooyendelezye “mane kukabe kutamani.” (Dan. 7:18) Zili aantanganana kuti Jehova ngunguwe  “Mupati Kwiinda,” nkaambo nguwe aalikke ulaamanguzu akubweza ntaamu eeyi.

11. Nziizili zimwi zintu nzyaakabona Daniyele zitondeezya kuti bweendelezi bwaJehova bulisumpukide kwiinda bwabantu?

¹¹ Zintu nzyaakabona Daniyele muchilengaano, zileendelana anzyaakaambide kumatalikilo. Daniyele wakaamba kuti: “Leza wakujulu . . . ulagusya bami akubikka bami azyuuno.” Alubo wakalemba kuti: “Mupatikampatila ngo Mweendelezi weendelezya mubwami bwabantu . . . , ulabupa kufwumbwa ngwayanda.” (Dan. 2:19-21; 4:17) Jehova kuli naakagwisya bamwi baami na mpawo wabikka bambi? Iiyi!

12. Amba zikozyano zitondeezya kuti chiindi Jehova wakagwisya maami akubikka aambi. (Langa chifanikisyo.)

¹² Jehova wakatondeezya aantanganana kuti bweendelezi bwakwe mbupati kwiinda ‘bwabeendelezi.’ Amuyeeye zikozyano eezi zitatu. Faro waku-Ijipita wakapa kuti bantu baLeza babe bazike alubo kwaziindi zyiingi taakali kuyanda pe kubaangununa. Pesi Leza wakabaangununa akupa kuti Faro anikile muLwizi Lusalala. (Kul. 14:26-28; Int. 136:15) Mwaami Bbelisazara wakuBbabbiloni wakali aapobwe alubo ‘wakalisumpula ku Mwami wakujulu’ alubo ‘wakatembawula baleza bansiliva angolida’ kwiinda kuti atembawule Jehova. (Dan. 5:22, 23) Jehova wakamubombya mwaalumi ooyo wakali kulisumpula. “Imasiku ngoonya aayo,” Bbelisazara wakajayigwa alubo bwaami bwakwe bwakapegwa maMede amaPesiya. (Dan. 5:28, 30, 31) Mwaami Herodi Agripa 1 wakuPalestayini wakalayilila kuti Jakkobo ajayigwe akuti mwaapostolo Petro asungwe kali aamakanze aakuti amujaye. Pesi Jehova wakanyongania makanze aaHerodi. “Ngilozi yaJehova yakamuuma” mpawo wakafwa.—Mil. 12:1-5, 21-23.

13. Amba zikozyano zitondeezya kuti Jehova wakagwasya ma-Israyeli kuti bazunde nkamu zyamaami aajisini.

¹³ Jehova wakatondeezya mbubuli bupati bweendelezi bwakwe kwiinda bweendelezi bwankamu zyabaami bajisini. Jehova wakalwanina ma-Israyeli akupa kuti banyonyoone nkamu yabaami bajisini bali 31 bakuKkenani, akuti babweze Nyika Yachisyomezyo. (Jos. 11:4-6, 20; 12:1, 7, 24) Alubo Jehova wakagwasya ma-Israyeli kuti bazunde Mwaami Bbeni-hadadi abaami bali 32 bakuSiriya, aabo bakali kubalwana.—1 Bam. 20:1, 26-29.

14-15. (a) Mwaami Nebbukkadineza aMwaami Dariyasi bakatyeni atala abweendelezi bwaJehova? (b) Sintembawuzyo wakatyeni atala aJehova achisi chakwe?

 ¹⁴ Chiindi choonse, Jehova wakali kutondeezya kuti ngunguwe Mupati Kwiinda. Chiindi Mwaami Nebbukkadineza wakuBbabbiloni naakali kulisumpula akaambo ‘kamanguzu aakwe miingi abulemu bwabweendelezi bwakwe,’ kwiinda kuti alibombye kuli Jehova weelela kutembawulwa, Leza wakapa kuti apenge. Nebbukkadineza naakaleka kupenga, ‘wakatembawula Mupatikampatila’ alubo wakazumina kuti, “bweendelezi [bwaJehova] mbweendelezi butamani.” Alubo wakaamba kuti: “Kunyina naba omwe uukonzya kumukasya.” (Dan. 4:30, 33-35) Jehova naakavuna Daniyele kuzwa mudindi lyabalavu akaambo kakuti wakali kusyomeka kulinguwe, Mwaami Dariyasi wakabikka mulawu wakali kwaamba kuti: “Bantu beelede kukankama akuyoowa Leza wa Daniele. Nkaambo walo ngu Leza muumi, ooyo uuliko lyoonse mane kukabe kutamani. Bwami bwakwe tabukanyonyoonwi pe, abwalo bweendelezi bwakwe tabukamani.”—Dan. 6:7-10, 19-22, 26, 27, makani aamunsi.

¹⁵ Sintembawuzyo wakalemba kuti: “Jehova wajaya makanze mabi aamasi; wanyonganya makanze aabantu.” Alubo wakati: “Cilikkomene cisi cijisi Jehova kuba Leza wancico, ibantu mbaasala kuba lukono lwakwe.” (Int. 33:10, 12) Ootu ntwaambo tubotu loko tutupa kuti tuzumanane kusyomeka kuli Jehova.

16. Niinzi nzyatazoochite Jehova muchiindi ‘chamapenzi mapati’ alubo nkamboonzi? (Langa chifanikisyo.)

¹⁶ Twabona zintu nzyaakachita Jehova chiindi. Ani kuchiindi chili aafwiifwi kunembo uzoochitaanzi? Jehova uzookwabilila babelesi bakwe basyomeka muchiindi ‘chamapenzi mapati’ aazabuza. (Mt. 24:21; Dan. 12:1) Jehova uzoobweza ntaamu eeyi, chiindi zisi zijisini, zizibidwe kuti nguGogo wakuchisi chaMagogo, zyaakulwana bakombi baJehova basyomeka. Naaba manyika aali  193 aapanga United Nations, taazookonzyi pe kwiimikila kunembo lyaMupati Kwiinda ankamu yakwe yamasoja aakujulu. Jehova wakasyomezya kuti: “Ncobeni ndiyoopa kuti bulemu bwangu bubonwe alimwi mebo ndiyoolisalazya akupa kuti ndizyibwe mumeso aazisi zinji; eelyo bayoozyiba kuti ndime Jehova.”—Ezk. 38:14-16, 23; Int. 46:10.

17. Kweendelana anzilyaamba Bbayibbili, niinzi chitazoochitikile baami banyika abaabo bazumanana kusyomeka kuli Jehova?

¹⁷ Kulwana bakombi baLeza nkwatazoochite Gogo, kuzoovutusya nkondo iitazomane nkondo zyoonse, aawo Jehova natazoonyonyoone ‘baami banyika yoonse.’ (Chi. 16:14, 16; 19:19-21) Pesi “baluleme balikke mbabayookkala munyika, alimwi aabo bazumanana kusyomeka mbabayoosyaala mulinjiyo.”—Tus. 2:21, makani aamunsi.

18. MaKkristu biingi bakasimpe balikusala kuchitaanzi alubo nkamboonzi? (Daniele 3:28)

¹⁸ Kwaminyaka myiingi, maKkristu biingi bakasimpe balikusala kusweekelwa aalwaangunuko lwabo alubo balikulipeda kubikka buumi bwabo mumapenzi, nkaambo bakasala kuti Jehova abe Mweendelezi wabo. Bakwesu abachizi aabo basala kuchita zyakachitwa aamaHebberu batatu, aabo bakazoofutukila mubbibi lyamulilo akaambo kakuti bakali basala kusyomeka kuli Jehova Mupati Kwiinda.—Bala Daniele 3:28.

19. Jehova uzoobeteka bantu bakwe kweendelanaanzi alubo njiili ntaamu njitweelede kubweza lino?

¹⁹ Sintembawuzyo Davida naakali kutondeezya mbukuyandikana kukkala katusyomeka kuli Leza, wakaamba kuti: “Jehova uyoobabeteka bantu. Kondibeteka O Jehova kweelana abululami bwangu alimwi akweelana akubula kampenda kwangu.” (Int. 7:8) Alubo Davida wakaamba kuti: “Bululami akubula kampenda azindikwabilile.” (Int. 25:21) Kuti tupone buumi bulikabotu, tweelede kuzumanana kusyomeka kuli Jehova. Kufumbwa zyiimo nzituswaana, kusyomeka kwesu takweelede kuzungaana pe. Kuti twachita oobo, tuyoolimvwa mbuli mbaakalimvwa sintembawuzyo. Wakaamba kuti: “Balikkomene aabo basyomeka . . . , ibeenda mumulawo wa Jehova.”—Int. 119:1, makani aamunsi.