1. Njiili nkani iiyandikana Jesu njaakabuzya basikwiiya bakwe mubusiku katanafwa?

MUBUSIKU bwamamanino Jesu kali abasikwiiya bakwe, wakaambuula atala aluyando kwaziindi zisika ku30. Wakaamba kuti basikwiiya bakwe beelede ‘kuyandana.’ (Joh. 15:12, 17) Luyando ndubakalaalo lwakali kuyoolibonia kubantu alubo lwakali kuyootondeezya kuti mbaasikwiiya bakwe bakasimpe. (Joh. 13:34, 35) Luyando ndubalaalo teelwakuupa-wupa ameso pe. Luyando Jesu ndwaakali kwaamba lwakali lwakulipeda amoyo woonse. Wakati: “Taakwe uuli aluyando ulwiinda olu, kuti muntu atulile beenzinyina buumi bwakwe. Munooli beenzuma mwanoozicita nzemwaambila.”​—Joh. 15:13, 14.

2. (a) Balibonia biyeni bakombi baJehova mazubaano? (b) Njiili mibuzyo njitutasandule muchiiyo eechi?

² Bakombi baJehova mazubaano balalibonia kwiinda muluyando ndubalaalo akujatana nkubalaako. (1 Joh. 3:10, 11) Tulabotelwa kuba akati kabakombi baJehova bali aluyando luli mbuuli lwaJesu nikuba kuti bazwa muzisi, misyobo, milaka amaponeno asiyene! Tulakonzya kulibuzya kuti: ‘Nkamboonzi luyando niluyandikana loko mazubaano? Jehova aJesu batuyaka  biyeni muluyando? Kujana umwi awumwi wachita biyeni kuti atondeezye luyando luli mbuuli lwaKristu luyaka?’​—1 Kor. 8:1.

3. “Ziindi zikataazya” nzituli kupona zipa kuti bantu bachiteenzi?

³ Buumi buzwide “makatazyo buyo amapenzi” alubo tupona ‘kuziindi zikataazya,’ nkinkaako eezi zipa kuti tukataazikane munzila zisiyene-siyene. (Int. 90:10; 2 Tim. 3:1-5) Bantu biingi mazubaano balikulijaya. Kuyeeyelwa kuti munyaka amunyaka bantu biinda ku800 000 balafwa akaambo kakulijaya chaamba kuti mumasekkondi aali 40 kuli muntu uufwa. Chuusisya nchakuti nikuba maKristu balikuzundwa amuuya ooyu.

4. Mbaani bantu baambidwe muBbayibbele bakazunda muuya wakulombozya kufwa?

⁴ Bamwi bakombi baJehova basyomeka bachiindi, bakakataazikana azimwi zyiimo mubuumi zyakapa kuti balombozye kufwa. Muchikozyano, Jobu naakachisidwe wakati: ‘Buumi bulandilemena; nsichiyandi kupona.’ (Job. 7:16; 14:13) Jona wakakataazikana zintu nizyakeenda munzila njaakatali kulangilila nkwaakatumidwe. Wakati: “Lino, O Jehova, gwisya buumi bwangu, nkaambo kufwa kulandibotela kwiinda kuti nkimpona.” (Jon. 4:3) Aali chimwi chiindi, musinsimi uusyomeka Eliya wakakataazikana zyakuti wakakumbila kuti afwe. Wakati: “Cazulila. Kondinyanzya buumi bwangu, O Jehova.” (1 Bam. 19:4) Pesi Jehova wakali kubayanda bakombi bakwe basyomeka alubo wakali kuyanda kuti bazumanane kupona. Wakabagwasya kuti bazunde maboneno ngibakali aawo kutali kubapa mulandu alubo wakagwasya kuti bazumanane kumukomba chakusyomeka.

5. Nkamboonzi nitweelede kusungwaazya bakombima mazubaano?

⁵ Nikuba kuti bakombima tabasiki achiimo chakuti balijaye pesi baswaana zyiimo zikataazya ziyanda kuti bayakwe muluyando. Bamwi balapenzegwa akusampawulwa. Bamwi balakazigwa akuvwiigwa kumilimu. Bamwi babeleka chiindi chilamfu kumilimu alubo milimu yabo ilabamizya. Alubo bamwi baswaana buyumu-yumu kung’anda chimwi chiindi basampawulwa angubakwetenaawe uutakombi. Buyumu-yumu oobu bupa kuti bakombima mumbungano bakataazikane mumubili amumizeezo. Ngwani weelede kusungwaazya bantu bali muzyiimo zili boobu?

6. Jehova ubayaka biyeni bakombi bakwe muluyando?

⁶ Jehova uyaka bakombi bakwe kwiinda mukubasyomezya kuti uli aluyando lutamani. MaIsrayeli basyomeka bakasungwaazigwa nibakamvwa majwi aaJehova aakuti: ‘Wakayandika mumeso aangu, alimwi wakali abulemu, ndakuyandisya. . . . Utayoowi, nkaambo ndili ayebo.’ (Is. 43:4, 5) Baachoonzyo chakuti Jehova ulakuyanda nkaambo uli mukombi wakwe. * Jwi lyaLeza lisyomezya boonse basumpula bukombi bwakasimpe kuti: “Ngusilumamba uumuzundya. Ulamusekelela cakukondwa.”​—Zef. 3:16, 17.

7. Luyando lwaJehova lukozyenie biyeni aluyando lwamukayintu mutumbu? (Langa chifanikisyo chili kumatalikilo achiiyo.)

⁷ Jehova usyomezya kugwasya bakombi bakwe akubawumbulizya, mumasunko ngibaswaana. Utusyomezya kuti: “Elyo  muyoonyonka, muyoobbalwa asolo akusumpaulwa amazwi. Mbubonya mbuli muntu banyina ngubaumbulizya, ambebo njoomuumbulizya.” (Is. 66:12, 13) Chikozyano eechi chamutumbu kali kuzyanisya mwanaakwe chilawumbulizya! Muchikozyano eechi, Jehova utondeezya mbululi lupati luyando ndwalaalo kubakombi bakwe basyomeka. Baachoonzyo chakuti webo kukupalama uyandikana loko kuli Jehova.​—Jer. 31:3.

8, 9. Luyando lwaJesu lutugwasya biyeni?

⁸ Kuli kamwi kaambo kapa kuti maKristu bakasimpe bakkale muluyando lwaLeza. Bbayibbele liti: “Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” (Joh. 3:16) Jesu wakatondeezya luyando lupati loko naakapa buumi bwakwe akaambo kandiswe! Alubo luyando oolu lulatusungwaazya. Jwi lyaLeza litusyomezya kuti “mapenzi naaba mapakasyo” tazikonzyi ‘kutwaandaanya kuluyando lwaKristu.’​—Rom. 8:35, 38, 39.

⁹ Nituli mubuyumu-yumu butumana manguzu mumubili, mumizeezo amubukombi, luyando lwaKristu lupa kuti tulisimye. (Bala 2 BaKorinto 5:14, 15.) Luyando lwaJesu lutupa manguzu aakuti tulisimye akuti tutalengwaani nikuba nituli mumasunko aswaanizya mapenzi aalichitikila, kupenzegwa, kukataazikana mumizeezo aamwi.

10, 11. Mbaani bali amukuli wakuyaka bakataazikene? Pandulula.

¹⁰ Imwi nzila Jehova njatuyakaayo muluyando, nkwiinda mumbungano yachiKristu. Umwi awumwi wesu ulakonzya kutondeezya kuti ulalulumba luyando oolu kwiinda mukuyaka akubatondeezya luyando bakombima mubukombi anibakataazikene. (1 Joh. 4:19-21) Mwaapostolo Pawulu wakasungwaazya maKristu kuti: “Nkaambo kaako kamuciya bugwasyanya akuyakana, umwi aumwi kumweenzinyina, mbubonya mbomucita.” (1 Tes. 5:11) Nkinkaako, toonse mumbungano kutali baalu luzutu tulakonzya kutobelezya chikozyano chaJehova aJesu kwiinda mukuumbulizya bakombima akubayaka.​—Bala BaRoma 15:1, 2.

¹¹ Bamwi bali mumbungano bakataazikane  mumizeezo beelede kuyanduula lugwasyo kuli basyaabusongo akuyanduula busilisi. (Lk. 5:31) Baalu abamwi mumbungano beelede kuziba kuti tabakonzyi kusilika bantu bakataazikene mumizeezo. Pesi balakonzya ‘kuumbulizya bakataazikene mumyoyo, kugwasya aabo batakwe manguzu akuba amoyo mulamfu kubantu boonse.’ (1 Tes. 5:14) MaKristu boonse beelede kuba amoyo mulamfu, lweetelelo akwaambuula majwi aawumbulizya kuti bakonzye kuyaka bakataazikene. Ulabawumbulizya na bamwi akubasungwaazya? Kuti ukonzye kuchita oobo, kuli zimwi nzweelede kuchita.

12. Amba chikozyano chamuntu wakayakwa aluyando lwambungano.

¹² Luyando ndutuli aalo lubayaka biyeni bakataazikene? Umwi muchizi uukkala kuEurope wakati: “Chimwi chiindi ngandayanda kulijaya. Pesi bantu biingi balandigwasya. Bamumbungano balandigwasya kuti nditalijayi. Bakwesu abachizi balandiyanda akundisungwaazya chiindi choonse. Nikuba kuti mbache bazi kuti ndilakataazikana mumizeezo pesi bamumbungano balandigwasya chiindi choonse. Umwi mukwesu amukayintu wakwe mbazyali bangu mubukombi. Balandilangania alubo balandigwasya chiindi choonse.” Eezi tazyaambi kuti toonse tulakonzya kugwasya bamwi munzila iili boobo. Pesi kugwasya bantu bakataazikene mumizeezo kulakonzya kubawumbulizya. *

13. Tweelede kuchitaanzi kuti katuyanda kuyaka bakombima?

¹³ Swiilila chamoyo woonse. (Jak. 1:19) Kuswiilila chamoyo woonse kutondeezya kuti tulabayanda bakombima. Kuti tukonzye kumvwisisisya mbalimvwa muntu uukataazikene, tulakonzya kumubuzya mibuzyo chabupampu alubo munzila yaluzyalo. Eezi zipa kuti umutondeezye luzyalo akumuyaka mukombinyokwe. Mbutuboneka kumeso zyeelede kutondeezya kuti tuli aluyando. Kuti mukombinyokwe kayanda kwaamba zyiingi, weelede kuba amoyo mulamfu akutamunjila munkanwa. Kuswiilila chamoyo woonse kuyoopa kuti umvwisisisye mbalikulimvwa. Kuchita oobo kuyoopa kuti mukombinyokwe akusyome akuti ayande kukuswiilila nulikumusungwaazya. Kumutondeezya kuti ulamuyanda kazizwa aansi amoyo, kuyoomuumbulizya.

14. Nkamboonzi nitweelede kutantamuka muuya wakukazyania?

¹⁴ Tantamuka muuya wakukazyania. Muntu uukataazikene ulakonzya kwiindilila kukataazikana kuti wayeeyela kuti nzitulikumubuzya tazimugwasyi pe alubo eezi zipa kuti kutuyumine kumugwasya. Bbayibbele lyaamba kuti: “Majwi aabantu bamwi alayasa mbuli ipanga, pele lulimi lwabasongo lulaponya.” (Tus. 12:18) Kwaambuula katutabikkili maanu kulakonzya kupa kuti twaambuule majwi ‘aayasa’ muntu uukataazikene nikuba kuti teembutwakanzide. Nikuba kuti twaamba majwi ‘aayasa’ katutayeeyelede alakonzya kumuchisa. Kuti tukonzye kubasungwaazya bamwi muluyando, tweelede kubeetelela akulibikka muchiimo chabo.​—Mt. 7:12.

15. Nchiichili chibelesyo chipati nchitukonzya kubelesya kuti tuyake bamwi muluyando?

¹⁵ Umbulizya bamwi kubelesya Bbayibbele.  (Bala BaRoma 15:4, 5.) Bbayibbele lili amalayilile aawumbulizya alubo aagwasya. Bbayibbele lizwa ‘kuli Leza uutusimya akutuumbulizya.’ Kuyungizya waawo, tuli azibelesyo zyiingi zitugwasya kumvwisisisya Bbayibbele. Tulakonzya kubelesya Watch Tower Publications Index naakuti Research Guide for Jehovah’s Witnesses. Zibelesyo eezi zilakonzya kutugwasya kuti tujane Magwalo aasungwaazya bamwi kuti bakonzye kuzunda mapenzi aasiyene-siyene. Alubo zitugwasya kuti tujane makani aakonzya kupa kuti tuumbulizye bamwi.

16. Mbuubuli bube mbutweelede kubaabo chiindi nitusungwaazya mukombima uukataazikene?

¹⁶ Ba aluzyalo akubajata kabotu bamwi. Bube oobu butondeezya kuti tulabayanda bamwi alubo tweelede kubutondeezya kuti tukonzye kubasungwaazya akubayaka. Jehova ‘nguTaata siluzyalo Leza siluumbulizyo loonse,’ alubo uli ‘amoyo waluzyalo’ kubakombi bakwe. (Bala 2 BaKorinto 1:3-6; Lk. 1:78; Rom. 15:13) Pawulu wakatusiila chikozyano chibotu munkani eeyi naakati: “Twakaba batete myoyo akati kanu, mbuli uunyonsya mbwabukata bana bakwe mwini. Lino mbuli mbotwakali kumusukamina, cintu ncitwakali kuyanda kumwaabila kaciteensi Makani aa-Leza luzutu pele amyoyo yesu tubeni, nkaambo mwakali bayandwi besu.” (1 Tes. 2:7, 8) Kuti twaba aluzyalo kumuntu uukataazikene zitondeezya kuti Leza ulikuzisandula nkombyo zyakwe.

17. Ngaali maboneno ngitweelede kubaawo atala abakombima kuti tukonzye kubayaka muluyando?

¹⁷ Utalangilili kuti bakombinyokwe bachite mbuuli kuti balimaninide. Baamaboneno aalikabotu atala abakombinyokwe. Kuti kulangilila kuti bakombinyokwe bachite mbuuli kuti balimaninide ziyoopa kuti ukkale kutabotelwi. (Muk. 7:21, 22) Weelede kuziba kuti Jehova ulaamaboneno aalikabotu kubakombi bakwe. Kutobelezya chikozyano chakwe, kuyootugwasya kuti tutakubikkili maanu kutamaninina kwabakombima. (Ef. 4:2, 32) Tweelede kubalumba kuzintu zibotu nzibachita kutali kulanga nzibatachiti kabotu. Kuchita oobo kuyoobasungwaazya. Kuumbulizya bamwi kulakonzya kubayaka muluyando akupa kuti ‘babotelwe’ mumilimu yabukombi njibachita. Tweelede kuchita oobo kutali kukozyanisya nzibachita azichitwa abamwi.​—Gal. 6:4.

18. Nkamboonzi nitweelede kuyaka bamwi muluyando?

¹⁸ Mbelele yaJehova imwi ayimwi iyandikana loko kuli nguwe akuli Jesu wakalipeda kuti abe chinunuzyo. (Gal. 2:20, NW) Tubayandisya loko bakwesu abachizi. Nkinkaako tweelede kubajata kabotu. Kuti tukonzye kugwasya aabo bakataazikene mumoyo, “atutobele zintu zileta luumuno azintu zyakuyakana.” (Rom. 14:19) Tuchilangilila ameso aasalala chiindi nituyookkala muParadayizi zintu zitupa kukataazikana niziyoomana! Takuchikabi kuchiswa, nkondo, lufu, kupenzegwa, kutamvwanana mumpuli akukataazikana. Yaakwiinda minyaka iili Chuulu, bantu boonse bayoomaninina. Bantu bayoofutuka kukusunkwa kwamamanino, bayooba bana baJehova Leza baanyika alubo bayooba ‘alwaangunuko lwabulemu bwabana baLeza.’ (Rom. 8:21) Toonse atuzumanane kutondeezyania luyando luyaka akugwasya bamwi kuti bakajane chilongezyo eechi.