1. Jehova ubabona biyeni bantu balichesya? Pandulula.

JEHOVA uyanda bantu balichesya. Bantu balichesya mbabo luzutu bakonzya kuba abweenzinyina bulikabotu aJehova. Pesi “ooyo uulisumpula tamusweni afwaafwi, umuzyi buyo kulamfwu.” (Int. 138:6) Tweelede kulichesya nkaambo tuyanda kubotezya Jehova akuyandwa anguwe.

2. Tulalanga-langaanzi muchiiyo eechi?

² Muchiiyo eechi, tulasandula mibuzyo iitatu iitobela: (1) Kulichesya chaambaanzi? (2) Nkamboonzi nitweelede kuba abuntu oobu? (3) Ndiilili nikukonzya kutuyumina kulichesya? Mbuuli mbututabone, kuti katulichesya tubotezya Jehova alubo andiswe tulagwasigwa.​—Tus. 27:11; Is. 48:17.

3. Kulichesya chaambaanzi?

³ Kulichesya nkulibombya kutali kulisumpula pe. Bbayibbele lyaamba kuti muntu ulichesya ububona kabuyandikana bweenzinyina mbwali aabo aJehova Leza abamwi bantu. Alubo muntu ulichesya ulazumina kuti kuli zimwi zintu nzibamwiinda bamwi bantu.​—Flp. 2:3, 4.

4-5. Nkamboonzi bamwi bantu nibabonekaanga balalichesya pesi kabatalichesyi pe?

⁴ Bamwi bantu balakonzya kubonekaanga balalichesya akaambo kakuti balaabweeme naakuti baluumwide. Alubo balakonzya kuchitaanga balalichesya nkaambo mbubakayiisigwa abazyali babo pesi mumyoyo yabo kabalisumpula. Mukuya  kwachiindi, bantu bali boobo nga bazoolitondeezya mbubabede.​—Lk. 6:45.

⁵ Kuli limwi bbazu, bantu baamba maboneno aabo tazyaambi kuti balalisumpula pe. (Joh. 1:46, 47) Pesi bantu batakwe bweeme tabeelede kulisyoma pe. Nikuba kuti tulaabweeme naakuti tatukwe, toonse tweelede kubelekela kuba bantu balichesya.

6. Kweendelana amajwi aali muli 1 Bakorinto 15:10, twiiyaanzi kuzwa kuchikozyano chamwaapostolo Pawulu?

⁶ Atulange-lange chikozyano chamwaapostolo Pawulu. Pawulu wakabelesegwa loko aJehova kujula mbungano muzisi zisiyene-siyene. Alubo kulakonzeka kuti nguwe wakakambawuka kwiinda baapostolo baJesu Kristu boonse. Pesi Pawulu takwe naakalisumpula pe. Chakulibombya wakaamba kuti: “Ndendime muniini akati kabaapostolo boonse, alimwi tandeeleli kwiitwa kuti ndimwaapostolo, nkaambo ndakapenzya mbungano ya Leza.” (1 Kor. 15:9) Alubo Pawulu wakaamba kuti bweenzinyina mbwaakali aabo aJehova teebwakali kuzwa kumilimu njaakachita pesi kuluzyalo lwaLeza. (Bala 1 Bakorinto 15:10.) Pawulu wakatondeezya kuti ulalichesya mulugwalo ndwaakalembela bantu bakuKkorinto nikuba kuti bamwi mumbungano bakali kulibona kuti balisumpukide kwiinda nguwe.​—2 Kor. 10:10.

7. Bamwi bakwesu balaamilimu njibapedwe mumbungano bakatondeezya biyeni kuti balalichesya? Amba chikozyano.

⁷ Umwi mukwesu wakatondeezya kuti ulalichesya nguKarl F. Klein wakabeleka kali umwi wamuKabunga Keendelezya. Wakalemba makani asungwaazya loko. Mumakani azyakachitika mubuumi bwakwe wakaamba atala buyumu-yumu mbwaakaswaana. Muchikozyano, kuma 1920 kwakamuyumina kukambawuka kung’anda ang’anda zyakuti  wakakkala kwaminyaka iibili katakuchiti pe. Naakali kubelekela kuBbeteli, wakanyema kwachiindi chilamfu naakapegwa lulayo. Alubo wakali kukataazikana mumizeezo zyakuti wakatalika kuchiswa pesi mukuya kwachiindi wakazoopona. Nikuba boobo wakajana zilongezyo zyiingi mumbungano. Yeeya kuti ziyanda kulichesya kuli biyeni kuti muntu uulaamilimu njapedwe mumbungano aambe kubisya nkwaakachita! Bakwesu abachizi biingi bachimuyeeya mukwesu Klein amakani aabotezya aazyakachitika mubuumi bwakwe. *

8. Majwi ali muli 1 Petro 5:6 atugwasya biyeni kubona kuti kulichesya kulamubotezya Jehova?

⁸ Kaambo kapati kapa kuti katulichesya, nkakuti kubotezya Jehova. Mwaapostolo Petro wakazitondeezya aantanganana eezi. (Bala 1 Petro 5:6.) Kalili kwaambuula atala Petro, bbuku litegwa Come Be My Follower lyakati “kulisumpula nkuseya mpukkede. Mpindu ziboola tazibotezyi pe. Kulisumpula kupa kuti muntu aboneke katagwasyi pe kuli Leza. Kuli limwi bbazu, kulichesya kupa kuti bantu balangilwaansi bayandwe loko aJehova. . . . [Jehova] . . . uyookulongezya akaambo kakulichesya.” * Chintu chiyandikana nchitweelede kuchita, nkubotezya Jehova.​—Tus. 23:15.

9. Kulichesya kutugwasya biyeni?

⁹ Kulichesya kulatugwasya munzila zyiingi kutali kubotezya Jehova luzutu. Kulichesya kupa kuti tumvwanane abamwi. Kuti umvwisisisye, yeeya bantu mbuyanda kumvwananaabo. (Mt. 7:12) Toonse tatuyandi pe kumvwanana abamumvwa zyakwe. Pesi tulabotelwa kukkala abakwesu chiindi nibatondeezya kuti ‘balaalweetelelo, luyando lwabunyina, moyo mutete walubomba alimwi akulicesya.’ (1 Pet. 3:8) Kuti twamvwanana abantu bali boobo ambabo balamvwanana andiswe kuti katulichesya.

10. Kulichesya kubuubya biyeni buumi bwesu?

¹⁰ Kulichesya kupa kuti buumi bwesu bube buuba. Simpe ndyakuti, muntu uulichesya ubikkila maanu kuti zintu zyeende munzila ili kabotu. Mwaalumi musongo, Mwaami Solomoni wakaamba kuti: “Ndabona babelesi kabatantide mabbiza, pele basilutwe kabeenda amaulu mbubonya mbuli babelesi  buyo.” (Muk. 10:7) Bantu balisumpula tabazwidilili pe chiindi choonse. Alubo bantu balangilwaansi chimwi chiindi balalemekwa. Solomoni wakabona kuti tweelede kuba amaboneno alikabotu kutali kuyeeya zintu zibi zili kutuchitikila luzutu. (Muk. 6:9) Kuti katulichesya, tulabona buumi mbuuli mbububede kutali mbutuyanda kuti bube.

11. Tweelede kuchita biyeni kuti twapegwa lulayo?

¹¹ Buzuba abuzuba, tujana myeenya yakutondeezya kuti tulalichesya. Atulange-lange zikozyano ziche. Chiindi nitwapegwa lulayo. Tweelede kuyeeya kuti, kuti mukwesu watululamika tunooli twabisya nikuba kuti chimwi chiindi nga tatubwene pe kuti twabisya. Muzyiimo zili boobo, chintu chisaanguna kusika mumizeezo, nkukaka lulayo. Tulakonzya kunyemena muntu watupa lulayo. Pesi kuti katulichesya, tulalinyona akuba amaboneno alikabotu.

12. Kweendelana amajwi ali muli Tusimpi 27:5, 6, nkamboonzi nitweelede kubotelwa kuti umwi watupa lulayo? Amba chikozyano.

¹² Muntu uulichesya ulabotelwa kuti wapegwa lulayo. Muchikozyano, atuteedi muli kumiswaangano yambungano. Kamuli mwajuzyania abantu biingi loko, umwi mukwesu naakuti muchizi wamutola kumbali mpawo wamubuzya kuti mulaansima mumenyo. Simpe ndyakuti mulaba abweeme. Pesi tamuloobotelwa na kuti wapa kuti muzibe? Alubo mulakonzya kuyeeya kuti, umwi muntu waleleede kufwambaana kumubuzya. Munzila iikozyenie tweelede kubotelwa kuti umwi mukwesu watupa lulayo kuti twabisya. Mukwesu ooyu tweelede kumubona mbuuli mweenzuma kutali sinkondoma pe.​—Bala Tusimpi 27:5, 6; Gal. 4:16.

13. Nga tulatondeezya biyeni kuti tulalichesya chiindi bamwi nibajana zilongezyo mumbungano?

¹³ Chiindi bamwi nibajana zilongezyo mumbungano. Mukwesu utegwa Jason wakaamba kuti: “Kuti ndabona umwi mukwesu kali kujana chilongezyo mumbungano, nga ndayeeya kuti nkamboonzi nikwatapegwa ndime.” Nga walimvwa oobu na anduwe? Teechibi pe kuyanda kuchita zyiingi mumbungano. (1 Tim. 3:1) Pesi tweelede kukwabilila mizeezo yesu. Kuti teetwachenjela, muuya wakulisumpula ulakonzya kukomena mumyoyo yesu. Muchikozyano, mukwesu ulakonzya kutalika kuyeeya kuti nguwe weelela  kuchita umwi mulimu mumbungano. Alubo muchizi ulakonzya kuyeeya kuti, ‘Mulumaangu nguwe uukonzya kuchita umwi mulimu kwiinda bamwi!’ Pesi kuti katulichesya, tuyootantamuka muuya wakalisumpula.

14. Twiiyaanzi kuzwa kunzila Mozesi njaakalimvwaayo chiindi bamwi nibakajana zilongezyo?

¹⁴ Tulakonzya kwiiya kuzwa kuchikozyano chaMozesi mbaakalimvwa chiindi bamwi nibakajana zilongezyo. Mozesi wakali kuyanda mulimu wakwe wakuzulwida maIsrayeli. Pesi wakalimvwa biyeni chiindi Jehova naakapa kuti bamwi bantu babelekaamwi anguwe? Taakwe naakaba abbivwe pe. (My. 11:24-29) Mozesi wakalichesya kwiinda mukuzumizya bamwi kuti bamugwasye kubeteka bantu. (Kul. 18:13-24) Kuchita oobu kwakapa kuti kubawubile maIsrayeli mbaakali kuzulwida. Kwiinda mukuchita oobu, Mozesi wakatondeezya kuti wakali andaba azintu ziyandwa abamwi kutali nzyayanda. Eechi nchikozyano chibotu kulindiswe! Tweelede kuyeeya kuti kulichesya nkuko kupa kuti Jehova atuyande kutali zintu nzitukonzya. “Nokuba kuti Jehova ulisumpukide, ulamubona muntu uulicesya.”​—Int. 138:6.

15. Zyiimo zyabamwi bakwesu abachizi zyakachincha biyeni?

¹⁵ Chiindi zyiimo nizyachincha. Minyaka miche yayinda, bakwesu biingi bakabeleka imwi milimu kwachiindi chilamfu bakachinchwa. Muchikozyano, mu2014 balangizi bamabbooma abakayintu babo bakakumbilwa kuti babeleke imwi milimu yachiindi choonse. Kuzwa mumunyaka ooyo, balangizi bamabazu bakakumbilwa kuti kabanoosiya mulimu wabo kuti baba aaminyaka iili 70. Alubo bakwesu bali aminyaka iili 80 kaziya kunembo tabachizumizigwi pe kubeleka kabali balangizi bakabunga kabaalu. Kuyungizya waawo,  kuzwa chiindi bakwesu abachizi biingi babelekela kuBbeteli bakakumbilwa kuti basiye Bbeteli akuti bakapayone. Alubo bamwi bakasiya mulimu wachiindi choonse uuyandikana akaambo kakuchiswa-chiswa, kuyanda kugwasya bamwi mumpuli azimwi.

16. Bakwesu abachizi bakatondeezya biyeni kuti balalichesya chiindi zyiimo zyabo nizyakachincha?

¹⁶ Kuchincha ooku kwakabayumina bakwesu abachizi aaba. Balakonzya kuti bakali bayizibila akwiiyanda milimu njibakali kubeleka alubo bamwi babo bakayibeleka kwachiindi chilamfu. Bamwi “bakawusa” kapati akaambo kakusiya milimu njibakali kuyanda. Pesi bakabeleka changuzu kuti bakonzye kuzibila kumilimu yabo mipya alubo mukuya kwachiindi bakazoozibila. Nkamboonzi? Nkaambo balamuyanda Jehova. Balizi kuti bakalipeda kuli Jehova kutali kumulimu naakuti kuchilongezyo. (Kol. 3:23) Balabotelwa kubelekela Jehova kabalichesya kufumbwa mulimu ngubapegwa. ‘Bawaala makatazyo aabo oonse kulinguwe’ nkaambo balizi kuti ulababikkila maanu.​—1 Pet. 5:6, 7.

17. Nkamboonzi nitubotelwa kuti Jwi lyaLeza litusungwaazya kuti katulichesya?

¹⁷ Tatubotelwi na kuti Jwi lyaLeza litusungwaazya kuti katulichesya? Kuti twabelekela kuba abuntu oobu tuyoogwasigwa alubo ziyoogwasya bamwi. Tuyookonzya kulisimya mubuyumu-yumu mbutuswaana mubuumi. Kwiinda zyoonse, tuyooswena aafwiifwi aTaata wesu uuli kujulu. Tulabotelwa kuziba kuti, nikuba kuti “uusumpukide kapati” ulabayanda bakombi bakwe balichesya!​—Is. 57:15.