1-2. Kweendelana alugwalo lwa 1 Timoteyo 6:20, Timotewo wakeelede kuchitaanzi?

CHIINDI chiingi nga twapa bamwi zintu ziyandikana kuti batubambile. Muchikozyano, tulakonzya kubikka mali yesu mubbenki. Kuti twachita oobo, nga tulizi kuti mali yesu inoobambidwe kabotu akuti tikoosweeka pe naakuti kubbigwa. Nkinkaako tulamvwisisisya kuti kwaambaanzi kupa umwi muntu chintu chiyandikana kuti atubambile.

² Bala 1 Timoteyo 6:20. Mwaapostolo Pawulu wakayeezya Timotewo kuti wakali achilongezyo chiyandikana chakuziba kasimpe kali atala amakanze aaLeza kubantu. Alubo Timotewo wakapegwa chilongezyo ‘chakukambawuka jwi’ achakuchita “mulimo wamukambausi.” (2 Tim. 4:2, 5) Pawulu wakasungwaazya Timotewo kuti azibambe kabotu zilongezyo nzyaakapegwa. Mbuli Timotewo, andiswe twakapegwa zintu ziyandikana. Niinzi zintu eezyo? Alubo nkamboonzi nitweelede kuzibamba kabotu zintu ziyandikana Jehova nzyaakatupa?

3-4. Nkamboonzi kasimpe kamuBbayibbele nikayandikana?

³ Akaambo kaluzyalo lwakwe, Jehova wakatupa luzibo lwakasimpe luyandikana lujanika muJwi lyakwe Bbayibbele. Kasimpe aaka kalayandikana nkaambo katuyiisya nzitweelede kuchita kuti tube abweenzuma bulikabotu aJehova akuti nga tulakujana biyeni kubotelwa kwachoonzyo. Kuti twatambula kasimpe aako akupona kweendelana ankako, zilapa kuti tutabi bazike banjiisyo zyakubeja akuti tulijate kabotu.​—1 Kor. 6:9-11.

⁴ Chimwi chintu chipa kuti kasimpe kali muJwi lyaLeza  kayandikane nchakuti Jehova ukapa bantu balibombya luzutu, bali “amyoyo mibotu.” (Mil. 13:48) Bantu balibombya balayitambula nzila Jehova njabelesya kuti atuyiisye kasimpe aako mazubaano. (Mt. 11:25; 24:45) Kumvwisisisya kasimpe kali muBbayibbele nchicho chintu chiyandikana loko pesi tatukonzyi pe kukamvwisisisya kuti kakutakwe utugwasya.​—Tus. 3:13, 15.

5. Nchilongezyoonzi chimwi Jehova nchatupede?

⁵ Chimwi chilongezyo Jehova nchatupede nchakuyiisya bantu kasimpe kali atala anguwe amakanze aakwe. (Mt. 24:14) Mulumbe ngutukambawuka ulayandikana nkaambo ugwasya bantu kuti babe mumpuli yaJehova alubo ubagwasya kuti bakajane buumi butamani. (1 Tim. 4:16) Kazitakwe ndaba kuti tuchita zyiingi naakuti ziche mumulimu wakukambawuka, toonse tuli kuswaanizigwa mukuchita mulimu ooyu uuyandikana loko. (1 Tim. 2:3, 4) Nchilongezyo chipati loko kubelekaamwi aLeza!​—1 Kor. 3:9.

6. Niinzi chakachitika kubantu bakakachilwa kujatisisya chilongezyo nchibakapegwa?

⁶ Bamwi maKristu bamuchiindi chaTimotewo bakakachilwa kujatisisya chilongezyo chakubelekaamwi aLeza. Muchikozyano, Dema wakaleka kubelekaamwi aPawulu nkaambo wakali kuyandisya zintu zili munyika. (2 Tim. 4:10) Fugelo aHermogene bakasiya mulimu wabo wakukambawuka. Kulakonzeka kuti bakali kuyoowa kuti bayoopenzegwa mbuli Pawulu. (2 Tim. 1:15) Humenayo, Alekizanda aFileto bakazumina zyakali kwaambwa abasiluleyo mpawo bakasiya kasimpe. (1 Tim. 1:19, 20; 2 Tim. 2:16-18) Boonse aaba bakalisimide mubukombi pesi bakakachilwa kujatisisya chilongezyo nchibakapegwa.

7. Saatani ubelesya nzila zili kayanda kuti tusiye kasimpe?

⁷ Saatani utunyongania biyeni kuti tutajatisisyi chilongezyo nchitwakapegwa aaJehova? Atubone zimwi nzila nzyabelesya. Saatani ubelesya zyakulikondelezya, ziswaanizya mamuvi ngitweebela, mabbuku ngitubala anzitubona aaIntaneti. Zintu eezi zilakonzya kupa kuti tuyeeye akuchita zintu zitape kuti tuleke kuswiilila Jehova mbichaani-mbichaani. Ulatuyoosezya kuti tuleke kukambawuka kwiinda mukupa kuti bamwi batuseke naakuti kutupenzya. Alubo ulatweena kuti tuswiilile majwi aabasiluleyo aambwa “cakubeja kuti ‘nduzyibo,’” kayanda kuti tusiye kasimpe.​—1 Tim. 6:20, 21.

8. Twiiyaanzi kuli zyakachitikila mukwesu uutegwa Daniel?

⁸ Kuti teetwachenjelela tulakonzya kusiya kasimpe mbichaani-mbichaani. Atulange-lange chikozyano chaDaniel, * wakali kuyandisya  kusaana mavidiyo gemu. Wakati: “Ndakasaanguna kusaana magemu aaya nindakali aminyaka iisika ku10. Kumatalikilo ndakali kusaana magemu aalikabotu. Pesi mbichaani-mbichaani ndakatalika kusaana magemu aazyakulwana azyachidimoni.” Wakazoosika mpaakali wabusaana magemu kwama-awa aali 15 buzuba abuzuba. Daniel wakati: “Mumoyo wangu ndakalizi kuti magemu ngindakali kusaana achiindi nchindakali kubelesya zyakali kupa kuti ndimutantamuke Jehova. Pesi ndakalibuzya kuti malayilile aazwa muBbayibbele tabeleki pe kulindime.” Kuti teetwanjelela zyakulikondelezya zilakonzya kupa kuti tusiye kasimpe mbichaani-mbichaani. Kuti twayandisya zyakulikondelezya tulakonzya kusweekelwa azintu ziyandikana Jehova nzyaakatupa.

9. Kweendelana alugwalo lwa 1 Timoteyo 1:18, 19, Pawulu wakamukozyanisya aanzi Timotewo?

⁹ Bala 1 Timoteyo 1:18, 19. Pawulu wakakozyanisya Timotewo amusoja alubo wakamusungwaazya kuti ‘azumanane kulwana nkondo mbotu.’ Pawulu wakali kwaamba nkondo yabukombi kutali yamasoja pe. MaKristu bafanana biyeni amasoja ali munkondo? Niinzi nzitweelede kuchita mbuli masoja aaKristu? Atubone zintu zili 5 nzitwiiya kuzwa kuchikozyano chakaambwa aPawulu. Zintu eezyo zilatugwasya kuti tukajatisisye kasimpe.

10. Kulipeda kubelekela Leza chaambaanzi, alubo nkamboonzi nikuyandikana?

¹⁰ Lipede kubelekela Leza. Musoja uulikabotu ulasyomeka. Ulamulwanina muntu ngwayanda naakuti chintu nchabona kachiyandikana. Pawulu wakasungwaazya Timotewo kuti alipede kubelekela Leza. Kulipeda kubelekela Leza chaamba kusyomeka chakumaninina kuli nguwe. (1 Tim. 4:7) Kuyanda Leza amoyo woonse akulipeda kumubelekela kuyoopa kuti tujatisisye kasimpe.​—1 Tim. 4:8-10; 6:6.

11. Nkamboonzi nitweelede kuliyiisya kuchita zintu zilikabotu?

¹¹ Liyiisye kuchita zintu zilikabotu. Musoja weelede kuliyiisya kuchitila kuti akkale kalibambilide mulimu wakwe. Timotewo wakakkala kasimide mubukombi nkaambo wakaswiilila malayilile ngaakapegwa aaPawulu, wakabeleka changuzu kuti akake michito mibi akuti abe abuntu bulikabotu, alubo wakali kujana chiindi chakuliswaanizya abakombinyina. (2 Tim. 2:22) Wakakonzya kuchita oobo akaambo kakuti wakaliyiisya kuchita zintu zilikabotu. Andiswe tweelede kuliyiisya kuchita zintu zilikabotu kuchitila kuti tukonzye kulwana amuzeezo wakuchita zintu ziyandwa amibili yesu. (Rom. 7:21-25) Kuyungizya waawo, tweelede kubeleka changuzu kuti tuliyiisye kugwisya buntu bwachiindi akuzwaata buntu bupya. (Ef. 4:22, 24) Chimwi chiindi kuyandikana kuti tulimanikizye kuya miswaangano chiindi nitukatede akaambo kamilimu njitwali kuchita.​—Heb. 10:24, 25.

12. Niinzi chikonzya kutugwasya kuti tulibelesye kabotu Bbayibbele?

¹² Musoja weelede kuliyiisya kubelesya zilwanisyo zyakwe. Pesi kuti akonzye kuzibelesya kabotu weelede kukkala kaliyiisya. Andiswe tweelede kulibelesya kabotu Jwi lyaLeza. (2 Tim. 2:15) Kumiswaangano tulayiisigwa mbutukonzya kulibelesya kabotu Bbayibbele. Pesi kuti tukonzye kugwasya bamwi kuti babone kuti kasimpe kali muBbayibbele kalayandikana tweelede kukkala katulibala. Tweelede kubala Bbayibbele kuti tusimye lusyomo lwesu. Tatweelede kujinkila aakubala luzutu pesi tweelede kuyeeyesesya atala anzitubala akuyanduulisisya mumabbuku eesu kuchitila kuti twaamvwisisisye akwaapandulula kabotu Magwalo. (1 Tim. 4:13-15) Kuti twachita  oobo, tuyookonzya kulibelesya kabotu chiindi nituyiisya bamwi. Alubo kuyiisya bamwi takwaambi kubabalila mavesi luzutu. Pesi tuyanda kugwasya bantu kuti bamvwisisisye magwalo akuziba kuti abeleka biyeni mubuumi bwabo. Kuti twakkala katubala Bbayibbele tulakonzya kuba bayiisi balikabotu baJwi lyaLeza.​—2 Tim. 3:16, 17.

13. Kweendelana alugwalo lwa Bahebrayo 5:14, nkamboonzi nitweelede kuba abusongo?

¹³ Ba abusongo. Musoja weelede kubona zintu zikonzya kumunjizya mumapenzi mpawo azichije. Andiswe tweelede kubona zintu zikonzya kutunjizya mumapenzi mpawo tuzitantamuke. (Tus. 22:3; bala Bahebrayo 5:14.) Muchikozyano, tweelede kusala kabotu zyakulikondelezya. Mafilimu amamuvi miingi azwide michito yakutalijata. Leza tayiyandi pe michito eeyi alubo ilakonzya kutunjizya mumapenzi. Nkinkaako tweelede kutantamuka zyakulikondelezya zikonzya kupa kuti bweenzuma bwesu aJehova bumane mbichaani-mbichaani.​—Ef. 5:5, 6.

14. Kuba abusongo kwakamugwasya biyeni Daniel?

¹⁴ Daniel waambwa musule wakazoobona kuti kusaana magemu aazyakulwana azyachidimoni teekwakali kabotu pe. Wakayanduulisisya makani akali kukonzya kumugwasya kulwana apenzi lyakwe kabelesya Watchtower Library. Eezi zyakamugwasya biyeni? Wakaleka kusaana magemu atali kabotu. Alubo wakaleka kuliswaanizya abantu mbaakali kusaana aabo magemu aayo. Daniel wakaamba kuti: “Muchiindi chakusaana mavidiyo gemu ndakatalisya kuchita zintu zisiyene-siyene akuliswaanizya abeenzuma bamumbungano.” Lino Daniel wakaba mwaalu alubo ulapayona.

15. Nkamboonzi makani aabasiluleyo naatali kabotu?

¹⁵ Mbuli Timotewo, tweelede kuchenjelela makani aakubeja aambwa abasiluleyo. (1 Tim. 4: 1, 7; 2 Tim. 2:16) Muchikozyano, basiluleyo balakonzya kwaamba makani aakubeja atala abakwesu abachizi naakuti kwaamba zintu zikonzya kupa kuti tutayisyomi pe mbunga yaJehova. Makani aaya aakubeja alakonzya kupa kuti lusyomo lwesu lucheye. Tatweelede kwaasyoma pe makani aaya aakubeja. Nkamboonzi? Nkaambo makani aaya aazwa “akati kabantu bali amizeezo iisofweede alimwi ibatacikwe kasimpe.” Makanze aabo ngakubusya “nkazi akukazyanya.” (1 Tim. 6:4, 5)  Bayanda kuti tusyome makani aabo aakubeja akuti tutabasyomi pe bakwesu.

16. Niinzi nzitweelede kutantamuka?

¹⁶ Tantamuka zintu zikonzya kukulebya. Mbuli “sikalumamba mubotu wa Kristo Jesu,” Timotewo wakeelede kubikkila maanu kumulimu wakukambawuka kutali kuzintu zyabunoti zyakali kukonzya kumulebya. (2 Tim. 2:3, 4) Mbuli Timotewo, tweelede kutantamuka muuya wakuyandisya bunoti. ‘Koongelezya kwalubono’ kulakonzya kupa kuti luyando lwesu kuli Jehova lumane, tutaliboni kaliyandikana Jwi lyaLeza akuti tutabuzyi bamwi atala andilyo. (Mt. 13:22) Tweelede kupona buumi buuba akubelesya chiindi chesu amanguzu kuti tuzumanane “kusaanguna kuyandaula Bwami.”​—Mt. 6:22-25, 33.

17-18. Niinzi nzitweelede kuchita kuti tutantamuke zintu zikonzya kutupambanisya mubukombi?

¹⁷ Kkala kulibambilide kufwambaana kubweza ntaamu. Musoja weelede kukkala kalibambilide kuti ulalikwabilila biyeni kuti kwabuka penzi. Kuti tukonzye kujatisisya zintu nzyaakatupa Jehova, tweelede kufwambaana kubweza ntaamu kuti twabona penzi. Niinzi chikonzya kutugwasya kuti tufwambaane kubweza ntaamu? Tweelede kulibambila kakuchili chiindi kuti tuyoochita biyeni kuti kwaba penzi.

¹⁸ Muchikozyano, kuti wanjila ng’anda mpati njutazi pe weelede kuziba aakuzwida. Kuchitilaanzi? Kuchitila kuti ukonzye kufwambaana kuzwa kuti kwaba penzi. Munzila iikozyenie, tweelede kulibambila kakuchili chiindi kuti tuyoochitaanzi kuti kwazwa chifanikisyo chitondeezya kutalijata kabotu, zyakulwana naakuti majwi abasiluleyo chiindi nituli kubelesya Intaneti naakuti nituli kweebela muvi naakuti mapulogilamu aamuTV. Kuti twakkala katulibambilide zilapa kuti tufwambaane kutantamuka zintu zikonzya kutupambanisya mubukombi akuti tukkale katusalala mumeso aaJehova.​—Int. 101:3; 1 Tim. 4:12.

19. Niinzi nzituyoojana kuti twazibamba kabotu zintu ziyandikana Jehova nzyaakatupa?

¹⁹ Tweelede kuzibamba kabotu zintu ziyandikana Jehova nzyaakatupa. Zintu eezi ziswaanizya kasimpe kazwa muBbayibbele achilongezyo chakukayiisya bamwi. Kuti twachita oobo myoyo yesu tinootupi mulandu pe, tuyoopona buumi bulaampindu alubo tuyoobotelwa akaambo kakuti twakagwasya bamwi kuti bazibe Jehova. Kwiinda mukugwasigwa aJehova tulakonzya kuzibamba kabotu zintu ziyandikana nzyaakatupa.​—1 Tim. 6:12, 19.