Sena Bakamboni ba Jehova Balabasinikizya Bantu Kucinca Cikombelo?

AMULIZYE

Peepe, tatuciti oobo pe. Twakaamba mumagazini yesu ya Ngazi Yamulindizi, kuti: “Kusinikizya bantu kuti bacince cikombelo nkulubizya.” a Tatubasinikizyi bantu akaambo katwaambo ootu tutobela:

Jesu kunyina naakabasinikizya bantu kuzumina nzyaakali kuyiisya. Wakalizyi kuti bamwi bakali kuyakuuzumina mulumbe wakwe. (Matayo 7:13, 14) Ciindi basikwiiya bakwe bamwi nobakafwumpuzyigwa anzyaakali kwaamba, wakabaleka kuti baunke muciindi cakubasinikizya kukkala.—Johane 6:60-62, 66-68.
Jesu wakayiisya basikumutobela kuti batanoosinikizyi bamwi kucinca nzyobasyoma. Muciindi cakusinikizya bantu kuzumina makani mabotu aa Bwami, basikwiiya bakwe bakeelede kuyandaula bantu balisungwide kuswiilila.—Matayo 10:7, 11-14.
Kusanduka kucitwa cakusinikizyigwa kunyina mpindu, mbwaanga Leza utambula buyo bukombi buzwa ansi aamoyo.—Deuteronomo 6:4, 5; Matayo 22:37, 38.

Sena mulimo wesu ngwakusandula bantu

Masimpe kuti tulamwaya mulumbe wamu Bbaibbele “kusikila kumasena aakulamfwu kapati aanyika,” katucita oobo “mubuleya alimwi akuŋanda aŋanda,” kweelana ambolyaamba Bbaibbele. (Milimo 1:8; 10:42; 20:20) Alimwi mbubwenya mbuli Banakristo bakusaanguna, zimwi ziindi tulatamikizyigwa kuti tusinikizya bantu kusanduka. (Milimo 18:12, 13) Nokuba boobo, kutamikizyigwa ooko nkwakubeja. Tatusinikizyi muntu uuli woonse kuzumina nzyotusyoma. Muciindi caboobo, tusyoma kuti bantu beelede kwiiya kasimpe kutegwa balisalile.

Tatusinikizyi bantu kucinca cikombelo, alimwi kunyina notucita cipeekani kukulwaizya bantu bapya kunjila cikombelo naa kubavwozya zintu. Eeci ciliimpene azeezyo nzyobacita aabo balyaamba kuti Mbanakristo kakuli balamukaka Jesu kwiinda mukucita zintu zili boobu. b

Sena muntu ulijisi nguzu zyakucinca cikombelo?

Musinsimi Abrahamu wakacileka cikombelo cabanamukwasyi

Inzya, Ibbaibbele lilaamba kuti bantu balaangulukide kucinca cikombelo. Lilaamba bantu ibakasala kutatobela banamukwasyi mumakani aabukombi, pele ibakasala kukomba Leza wakasimpe. Abrahamu, Rute, bantu bamwi baku Atene, alimwi amwaapostolo Paulo nzikozyanyo zisyoonto buyo. (Joshua 24:2; Rute 1:14-16; Milimo 17:22, 30-34; Bagalatiya 1:14, 23) Kuyungizya waawo, Ibbaibbele mane lilaamba alwaanguluko ndwajisi muntu lwakusala kutaluzi, ikuleka bukombi bwakasimpe.—1 Johane 2:19.

Lwaanguluko lwakucinca zikombelo lulizumizyidwe mu Universal Declaration of Human Rights, yalo ba United Nations njobaita kuti “the foundation of international human rights law.” Cibalo eeci caamba kuti muntu uuli woonse ulijisi “lwaanguluko lwakucinca cikombelo naa nzyasyoma” alimwi “akuyandaula, kutambula alimwi akwaamba makani naa mizeezo,” kubikilizya amizeezo iijatikizya bukombi. c Nokuba boobo, lwaanguluko oolo lulabikkilizya amulawo wakulemeka kusala kwabamwi mumakani aanzyobasyoma alimwi akukaka mizeezo njobatazumini.

Sena kucinca cikombelo nkutalemeka zilengwa zyamukwasyi?

Taceelede kuba boobo. Ibbaibbele likulwaizya kulemeka bantu boonse, tacikwe makani acikombelo cabo. (1 Petro 2:17) Kuyungizya waawo, Bakamboni ba Jehova balaulemeka mulawo wamu Bbaibbele wakulemeka bazyali babo, nokuba kuti baliindene nzyobasyoma.—Baefeso 6:2, 3.

Nokuba boobo, tabali boonse bazumina ncolyaamba Bbaibbele. Mukaintu umwi iwakakomenena mu Zambia waamba kuti: “Mucilawo mondikkala, kucinca cikombelo . . . kwakali kubonwa kuti nkutasyomeka, nkuzangila banamukwasyi naa bantu bamucilawo.” Mukaintu ooyu cakamucitikila eeci kali mukubusi ciindi naakatalika kwiiya Bbaibbele a Bakamboni ba Jehova alimwi tiilyakalampa, wakayeeya kucinca cikombelo. Waamba kuti: “Bazyali bangu ziindi zinji bakali kundaambila kuti tiibakakkomana ancondakacita alimwi akuti ndakali kubajazya nsoni. Eeci cakandiyumina kapati, nkaambo balandiyanda kapati bazyali bangu. . . . Kusala kusyomeka kuli Jehova muciindi cakusyoma zilengwa tacaambi kuti ndauzangila mukwasyi wangu.” d

a Amubone Ngazi Yamulindizi yamu January 1, 2002, peeji 12, muncali 15.

b Mucikozyanyo, cakuma 785 C.E., Charlemagne wakabikka mulawo wakuti kufwumbwa wamu Saxony uukaka kubbapatizyigwa kuba Munakristo wakeelede kujaigwa. Alimwi, cizuminano ciitwa kuti Peace of Augsburg, cakasainwa mu 1555 C.E. aba Holy Roman Empire, cakali kutondezya kuti muleli uuli woonse mucilawo weelede kuti kali wacikombelo ca Roman Catholic naa Lutheran alimwi akuti bantu boonse mbalela beelede kunjila cikombelo cakwe. Aabo ibakali kukaka kunjila cikombelo camuleli wabo bakeelede kutandwa.

c Lwaanguluko lukozyenye lulibikkilizyidwe mu African Charter on Human and Peoples’ Rights, mu American Declaration of the Rights and Duties of Man, mu 2004 Arab Charter on Human Rights, mu ASEAN (Association of Southeast Asian Nations) Human Rights Declaration, mu European Convention on Human Rights, alimwi amu International Covenant on Civil and Political Rights. Nokuba boobo, naaba masi aalitaminina kupa lwaanguluko luli boobo aliindene muzintu nzyaacita kutegwa ape lwaanguluko oolo.

d Jehova ndizina lya Leza wakasimpe mbubwenya mbolyaamba Bbaibbele.