Ba Ed alimwi abakaintu babo ba Jennie, bakasola bukambausi bwakubelesya fooni ciindi cakusaanguna mu 2010. a Ba Jennie bakaamba kuti: “Kunyina nondakabukkomanina, ‘ndakabaambila balumi bangu kuti tandikaciinduluki alimwi!’” Abalo ba Ed mbobakali kulimvwa mbubwenya oobo. Bakaamba kuti: “Tandiyandi kutuminwa mafooni abasimakwebo, aboobo tiindakali kuciyeeyela kuti inga kandikambauka kubelesya fooni.”

 Mpoonya bulwazi bwa COVID-19 bwakatalika, aboobo Bakamboni ba Jehova bakaleka kukambauka kuŋanda aŋanda. Pele akaambo kakutobela mulawo wa Jesu wakukambauka makani mabotu, bakazumanana amulimo wabukambausi, ikapati kwiinda mukulemba magwalo alimwi abukambausi bwaafooni. (Matayo 24:14; 28:19, 20) Aciindi nciconya, miswaangano ya Bunakristo, kubikkilizya amiswaangano yakulibambila mulimo wakukambauka, yakali kucitwa kwiinda mukubelesya videoconference. Nowakamana muswaangano uumwi, ba Ed bakasola alimwi kukambauka kubelesya fooni, nokuba kuti cakali kubakatazya kucita boobo. Ino bakalimvwa buti nobakali kuyanda kutuma fooni ciindi cakusaanguna lyabulwazi bwa COVID-19? Bakaamba kuti: “Ndakalilibilikide cakuti ndakalomba lugwasyo kwiinda mukupaila! Mpoonya ndakatuma. Alimwi eeci nceciindi nondakaswaangana aba Tyrone.” b

 Ba Tyrone alimwi abakaintu babo ba Edith, bakkala kumunzi ku Kentucky, U.S.A. Ba Tyrone balaamyaka iili 83 alimwi tababoni kabotu. Nokuba boobo, bakazumina kwiiya Bbaibbele aba Ed. Bakali kubelesya magilazi kubala bbuku lyakwiiya, mpoonya bakatalika kwiiya Bbaibbele cakusitikila aba Ed afooni.

 Nokwakainda mwezi omwe, ba Tyrone aba Edith bakatalika kujanika kumiswaangano yakali kucitwa ambungano yakali munsi-munsi ankobakali kukkala. Nokuba boobo, akaambo kakuti intaneti yakali kusyupa, bakali kujanika kumiswaangano kwiinda mukutuma fooni. Ncinzi cakabakulwaizya ba Edith kwiiya kasimpe?

 Ciindi nobakali kwiiya aba Tyrone, ba Ed alimwi aba Jennie bakali kubamvwa ba Edith kabavwiya-vwiya kwaambila ba Tyrone bwiinguzi alimwi akubagwasya kujana magwalo aamu Bbaibbele. Pele balo tiibakali kuyanda kwiiya. Ba Jennie bakaamba kuti: “Kweelana ambolyakali kumvwika jwi lyabo, tiibakakkomene, pele mebo alimwi aba Ed tiitwakazyi kaambo ncocakali boobo.”

 Buzuba bumwi, ba Jennie bakayeeya kuti bababuzye ba Edith. Aboobo aciindi ceelede, bakalomba ba Ed kuti abalo baambaule afooni. Ba Jennie bakati: “Ba Tyrone, ndimvwide jwi lyabakaintu banu ansi-ansi, ndalikulomba kuti babale lugwalo naa kwaamba kaambo kamwi.”

 Nobakaumuna kwakaindi kaniini, ba Edith bakatalika kwaambaula. Cabubombe bakati: “Ndali kuyanda kwaambaula andinywe.” Mpoonya bakati: “Ndili umwi wa Bakamboni ba Jehova. Kwainda myaka iili 40 kanditali musungu.”

 Ba Jennie bakagambwa. Bakati: “Uli mucizyi wangu!” alimwi boonse bobilo bakatalika kulila.

 Kuzwa waawo, ba Ed bakapa ba Edith broshuwa yakuti Amupilukile kuli Jehova. Munsondo zyakatobela, ba Ed alimwi aba Jennie bakabona kucinca muli ba Edith. Ba Ed bakati: “Kumatalikilo, bakali kulimvwisya kuusa. Pele lino balikkomene.” Ba Edith bakayaambele kumuuya alimwi lino mbakambausi bamakani mabotu bakkomene. Balumi babo bakabbapatizyigwa akuba umwi wa Bakamboni ba Jehova mu July 2022.

 Ciindi ba Ed nobayeeya kujatikizya mbobakali kububona bukambausi bwaafooni, inga bayeeya mubandi ngobakajisi aba Tyrone. Ba Ed nobakababalila lugwalo lwa Johane 6:44 ba Tyrone, bakapandulula kuti Jehova nguukwela bantu kuboola kukasimpe. Kumane ba Tyrone bakazuminizya akwaamba kuti: “Ndali kulindila kuti munditumine fooni.” Ba Jennie abalo balikkomene kuti balo abalumi babo bakaba abusicamba bwakukambauka kwiinda mukubelesya fooni. Aboobo bakati: “Jehova ulakulongezya kusolekesya kuli boobu.”