A B C D E F G H I J K L M N O P R S T U Z

A

• Abi.

  Nobakazwa mubuzike ku Babuloni, eeli ndizina lyamwezi wasanu mukkalenda njaakabapa Leza ba Juda alimwi mwezi wa 11 mukkalenda yakunyika. Wakali kutalikila akati kamwezi wa July kusikila akati kamwezi wa August. Tawaambidwe zina mu Bbaibbele; waambwa buyo kuti “mwezi wasanu.” (My 33:38; Ezr 7:9)—Amubone Makani Aayungizyidwe B15

• Abibi.

  Eeli ndizina lyamwezi wakusaanguna mukkalenda njaakabapa Leza ba Juda alimwi mwezi waciloba mukkalenda yakunyika. Lyaamba “Maila Matete” alimwi wakali kutalikila akati kamwezi wa March kusikila akati kamwezi wa April. Ciindi ba Juda nobakapiluka kucisi cabo kuzwa ku Babuloni, wakali kwiitwa kuti Nisani. (Dt 16:1)—Amubone Makani Aayungizyidwe B15

• Ada.

  Nobakazwa mubuzike ku Babuloni, eeli ndizina lyamwezi wa 12 mukkalenda njaakabapa Leza ba Juda alimwi mwezi wacisambomwe mukkalenda yakunyika. Wakali kutalikila akati kamwezi wa February kusikila akati kamwezi wa March. (Es 3:7)—Amubone Makani Aayungizyidwe B15

• Akaya.

  Mu Magwalo aa Banakristo aa Chigiriki, eeli ndizina lyacooko ca Roma icili kumusanza kwacisi ca Girisi antoomwe amunzi wancico mupati wa Korinto. Akaya wakali kubikkilizya acooko coonse cakazingulukidwe maanzi cacisi ca Girisi nkocili kumusanza. (Mil 18:12)—Amubone Makani Aayungizyidwe B13.

• Alamoti.

  Eeli ndibbala lyamunyimbo ilyaamba “Banakalindu; Basimbi,” ambweni kwaamba majwi aabasimbi aasapulano. Kulangilwa kuti lyakali kubelesyegwa kutondezya kuti ciimbyo cakeelede kulilisya.—1Mk 15:20; In 46:Kat.

• Alefa a Omega.

  Aaya mabala aakusaanguna aamamanino mumulongo wamabala aa Chigiriki aayo aajanika ziindi zyotatwe mubbuku lya Ciyubunuzyo ikwaamba zina lyabulemu lya Leza. Muzibalo eezyi mabala aaya aamba buyo cintu comwe cakuti “imutaanzi amusyaalizi” alimwi a “imatalikilo amamanino.”—Ciy 1:8; 21:6; 22:13.

• Amagedoni.

  Ibbala eeli lizwa kubbala lya Chihebrayo lyakuti Har Meghid·dohnʹ, ilyaamba “Cilundu ca Megido.” Ibbala eeli lyaamba “nkondo yabuzuba bupati bwa Leza Singuzuzyoonse” ciindi “bami bamunyika yoonse” baakubungana kuti balwane Jehova. (Ciy 16:14, 16; 19:11-21)—Amubone MAPENZI MAPATI.

• Ameni.

  “Akube boobo,” naa “masimpe.” Ibbala eeli lizwa kubbala lya Chihebrayo lyakuti ʼa·manʹ, ilyaamba “kusyomeka, kusyomwa.” Ibbala lyakuti “Ameni” lyakali kwaambwa kutondezya kuzuminizya cikonke, mupailo, naa kaambo kamwi buyo. Mulugwalo lwa Ciyubunuzyo, libelesyedwe kwaamba zina lyabulemu lya Jesu.—Dt 27:26; 1Mk 16:36; Ciy 3:14.

• Aramu; Bana Aramu.

  Mbaluzubo lwa Aramu, imwana wa Semu ibakali kukkala muzyooko zili akati ka Malundu aa Lebano a Mesopotamiya alimwi akuzwa kunyika ku Malundu aa Taurus kusikila kumusanza kwiindilila ku Damasiko. Busena oobu, ibwiitwa kuti Aramu mu Chihebrayo, mukuya kwaciindi bwakazikwiitwa kuti Siriya, eelyo bantu bakkala mumo bakali kwiitwa kuti bana Siriya.—Mtl 25:20; Dt 26:5; Ho 12:12.

• Areopagi.

  Nkalundu kalamfwu kali mu Atene, ku Acropolis nkoili kunyika lwaambo. Alimwi lyakali zina lyankuta yakali kucitila nkuko miswaangano. Basyaabusongo ba Stoiki alimwi aba Epikureya bakatolede Paulo ku Areopagi kuti akapandulule nzyaakali kusyoma.—Mil 17:19.

• Aselgeia.​—

  Amubone BUKKALE BUSESEMYA.

• Asitoreti.

  Leza mukaintu wabana Kanana wankondo alimwi wabuzyazyi, mukaintu wa Baala.—1Sa 7:3.

• Asiya.

  Mu Magwalo aa Banakristo aa Chigiriki, eeli ndizina lyacooko ca Roma calo cakali kubikkilizya abusena mazuba aano bwiitwa kuti cisi ca Turkey nkocili kumbo, alimwi ansumbu zyakunkomwe mbuli Samo a Patimo. Munzi mupati wacisi eeci wakali Efeso. (Mil 20:16; Ciy 1:4)—Amubone Makani Aayungizyidwe B13.

• Azazeli.

  Eeli ndibbala lya Chihebrayo ambweni ilyaamba “Mpongo Iiyabaila.” Mu Buzuba Bwakumanya Milandu, impongo ya Azazeli yakali kutolwa munkanda, nkokuti munzila  yacikozyanyo yakali kutola zibi zyacisi izyamwaka wainda.—Le 16:8, 10.

B

• Ba Farisi.

  Nkabunga kakazanduka kuzwa kucikombelo caba Juda mumwaanda wamwaka wakusaanguna C.E. Tiibakali kuzwa kumukwasyi wabapaizi, pele bakali kuciindizya kuutobela Mulawo nomuba mutwaambo tusyoonto kapati, alimwi bakali kusumpula tunsiyansiya tutalembedwe kutegwa tweelane a Mulawo. (Mt 23:23) Bakali kukazya zilengwa zyaba Giriki, alimwi akaambo kakuti bakaluuzyi kapati Mulawo alimwi atunsiyansiya, bakalijisi nguzu kapati zyakweendelezya bantu. (Mt 23:2-6) Bamwi bakali bamu Nkuta Mpati Yaba Juda. Bakali kumukazya kapati Jesu kujatikizya makani aakubamba Sabata, tunsiyansiya alimwi akuyanzana abasizibi alimwi abasimutelo. Bamwi bakaba Banakristo, kubikkilizya a Saulo waku Tarso.—Mt 9:11; 12:14; Mk 7:5; Lk. 6:2; Mil 26:5.

• Balindizi ba Mwami Muna Roma.

  Ninkamu yabasikalumamba bana Roma iyakabikkwa kulinda mwami wacisi ca Roma. Nkamu eeyi yakazooba aanguzu kapati mutwaambo twacisi mukugwasyilizya naa kwaatula mwami.—Flp 1:13.

• Ba Saduki.

  Nkabunga kabavwubi alimwi abapaizi ikakazanduka kuzwa kucikombelo caba Juda ikakajisi mpuwo kapati alimwi anguzu zyakweendelezya milimo kutempele. Bakakaka kutobela tunsiyansiya twaba Farisi kubikkilizya azintu zimwi nzyobakali kusyoma ba Farisi. Tiibakali kusyoma kuti kuli bubuke naa kuti kuli bangelo. Bakali kumukazya Jesu.—Mt 16:1; Mil 23:8.

• Baala.

  Leza waba Kanana iwakali kubonwa kuti ngomukamwini julu alimwi nguupa mvwula abuzyazyi. Ibbala lyakuti “Baala” alimwi lyakali kubelesyegwa kwaamba tuleza twamucisi mweena. Ibbala lya Chihebrayo lyaamba “Mukamwini; Simalelo.”—1Ba 18:21; Ro 11:4.

• Babetesi.

  Mbaalumi bakabikkwa a Jehova kuti bafwutule bantu bakwe kacitanasika ciindi bana Israyeli nobakali kulelwa abami bantunsi.—Bab 2:16.

• Bakerubi.

  Mbangelo bajisi zyuuno zyaatala amilimo iilibedelede. Baliindene abaserafi.—Mtl 3:24; Ku 25:20; Is 37:16; Heb 9:5.

• Bamapulisa.

  Mumfwulumende ya Babuloni, aaba bakali bamapulisa bamuzyooko zya Babuloni ibakazyi mulawo alimwi bakajisi buyo nguzu zisyoonto zyakubeteka. Muzisi zyakali kweendelezyegwa aba Roma, bamapulisa bakali beendelezi bamfwulumende. Milimo yabo yakali kujatikizya kubona kuti zintu zyoonse zyeenda mumulawo, kulanganya mali, kubeteka basikutyola mulawo, alimwi akubapa mulandu mane akusubula.—Da 3:2; Mil 16:20.

• Bana ba Aroni.

  Ibaluzubo lwa Aroni imuzyukulu wa Levi, iwakasalwa kuba mupaizi mupati wakusaanguna mu Mulawo wa Musa. Ibana ba Aroni bakali kucita milimo yabupaizi kutente lyakukombela alimwi akutempele.—1Mk 23:28.

• Bana Samariya.

  Kumatalikilo ibbala eeli lyakali kubelesyegwa kwaamba bana Israyeli bamubwami bwakunyika bwamisyobo iili kkumi, pele kuzwa ciindi Samariya naakazundwa abana Asuri mumwaka wa 740 B.C.E., ibbala eeli lyakali kubikkilizya abamuzwakule ibakaletwa abana Asuri kuzookkala mumo. Mumazuba aa Jesu, muciindi cakwaamba bantu bamusyobo umbi naa kujatikizya twaambo twacisi, bunji bwaziindi lyakali kwaamba baabo ibakali mukakamu kabukombi ikakali afwaafwi amunzi wansiku wa Sekemu alimwi a Samariya. Zintu zimwi nzyobakali kusyoma basicikombelo eeci zyakaliindene kapati azyamubukombi bwaba Juda.—Joh 8:48.

• Bangelo.

  Eeli ndibbala lizwa kubbala lya Chihebrayo lyakuti mal·ʼakhʹ alimwi alya Chigiriki lyakuti agʹge·los. Aaya mabala oonse obilo aamba “mutumwa” pele asandululwa kuti “mungelo” ciindi naamba batumwa bamuuya. (Mtl 16:7; 32:3; Jak 2:25; Ciy 22:8) Bangelo nzilenge zyamuuya zilaanguzu Leza nzyaakalenga kaindi katanalenga bantu. Mu Bbaibbele alimwi baambwa kuti “zyuulu-zyuulu zyabasalali,” “bana ba Leza,” akuti “nyenyeezi zyakubucedo.” (Dt 33:2; Job 1:6; 38:7) Tiibakalengwa kuti kabacikonzya kuzyalana pele bakalengwa umwi aumwi alikke. Balainda kumamiliyoni aali 100. (Da 7:10) Ibbaibbele litondezya kuti umwi aumwi ulijisi zina lyakwe abube bumugeme, alimwi akaambo kakulicesya balakaka kukombwa, mane bunji bwabo tabaambi mazina aabo. (Mtl 32:29; Lk 1:26; Ciy 22:8, 9) Balijisi zyuuno ziindene-indene alimwi balipedwe milimo iindene-indene mbuli kubelekela kucuuno cabwami ca Jehova, kwaamba milumbe yakwe, kugwasya babelesi ba Jehova baanyika, kuleta lubeta lwa Leza, alimwi akugwasyilizya mukukambauka makani mabotu. (2Ba 19:35; In 34:7; Lk 1:30, 31; Ciy 5:11; 14:6) Kumbele bayoogwasyilizya Jesu mukulwana nkondo ya Amagedoni.—Ciy 19:14, 15.

• Baserafi.

  Nzilenge zyamuuya izizingulukide cuuno ca Jehova cabwami kujulu. Ibbala lya  Chihebrayo lyakuti sera·phimʹ lyaamba “bayaka mulilo.”—Is 6:2, 6.

• Basyaabusongo ba Epikureya.

  Mbaasikutobela syaabusongo muna Giriki Epicurus (341-270 B.C.E.). Busongo bwabo bwakayeeme amuzeezo wakuti cintu cipati mubuumi bwamuntu nkulikondelezya.—Mil 17:18.

• Basyaabusongo ba Stoiki.

  Ncikolo cabasyaabusongo ba Giriki ibakali kusyoma kuti lukkomano lujatikizya kupona kweelana abusongo alimwi abube bwazintu. Kweelana akuyeeya kwabo, muntu musongo ncobeni ngooyo uutabikkili maano kukucisa naa kulikondelezya—Mil 17:18.

• Bbibi lyamulilo.

  Ncintu cakunyengulwida mabwe naa kunyengulula lubulo; alimwi cakali kubelesyegwa kuumpa bulongo alimwi azintu zimwi zyabulongo. Kaindi, Bbaibbele nolyakali kulembwa, mabbibi aamulilo akali kupangwa aazitina naa mabwe. Bbibi lyamulilo lyakuumpila bulongo azintu zimwi zyabulongo alimwi alyakuumpila mulambo uutuba alimwi lyakali kwiitwa kuti wondo.—Mtl 15:17; Da 3:17; Ciy 9:2.

• Bbokesi lyacizuminano.

  Eeli ndibbokesi lyakapangidwe aazisamu zyamuunga alimwi lyakazilulwidwe angolida, lyalo ilyakali kuyobwedwa mu Busena Busalalisya bwatente lyakukombela mpoonya kumbele ilyakazooyobwedwa mu Busena Busalalisya bwatempele ndyaakayaka Solomoni. Lyakajisi civwunisyo cangolida yalo-yalo aakali bakerubi bobilo balangene. Mukati lyakajisi mabwe obilo aapapalete aakajisi Milawo Iili Kkumi. (Dt 31:26; 1Ba 6:19; Heb 9:4)—Amubone Makani Aayungizyidwe B5 a B8.

• Bbuku lyakuvwunga.

  Ndipepa lilamfwu lyakapangwa acipaya naa ntumbu, ililembedwe kulubazu lomwe buyo, ilyakali kuzambailwa kukasamu. Magwalo akali kulembwa alimwi akulembululwa amabbuku aakuvwunga, aaya ngamabbuku aakadumide kapati ciindi Bbaibbele nolyakali kulembwa.—Je 36:4, 18, 23; Lk 4:17-20; 2Ti 4:13.

• Belezebule.

  Ndizina libelesyegwa kwaamba Saatani, silutwe, naa mweendelezi wamadaimona. Kulangilwa kuti nkucinca kwazina lya Baala-zebubi, Baala ngobakali kukomba bana Filisiti ku Ekroni.—2Ba 1:3; Mt 12:24.

• Bubuke.

  Nkubuka kuzwa kulufwu. Ibbala lya Chigiriki lyakuti a·naʹsta·sis lyaamba “kubuka; kunyamuka.” Mu Bbaibbele kuli bubuke buli fwuka ibulembedwe, kubikkilizya akubuka kwa Jesu walo iwakabusyigwa a Jehova Leza. Nokuba kuti bubuke bumwi bwakacitwa a Elija, Elisha, Jesu, Petro alimwi a Paulo, cilisalede kuti maleele oonse aaya akacitwa kwiinda munguzu zya Leza. Bubuke bwaanyika bwabantu “baluleme abataluleme,” bulayandika kapati mukuzuzikizya makanze aa Leza. (Mil 24:15) Bbaibbele alimwi lyaamba bubuke bwakujulu, ibwaambwa kuti bubuke “ibwakusaanguna” naa “ibwamatalikilo,” ibujatikizya banabokwabo Jesu bananikidwe.—Flp 3:11; Ciy 20:5, 6; Joh 5:28, 29; 11:25.

• Bukkale busesemya.

  Mabala aakasandululwa kuti bukkale busesemya azwa kubbala lya Chigiriki lyakuti a·selʹgei·a, ilyaamba micito mibi kapati iijatikizya kutyola milawo ya Leza acaali alimwi iitondezya mizeezo mibi yakuzanga akunyansya; imuuya uutondezya kutalemeka naa kunyansya beendelezi, milawo alimwi azyeelelo. Mabala aaya taambi kulubizya kusyoonto.—Ga 5:19; 2Pe 2:7.

• Bulozi.

  Ikubelesya nguzu zizwa kumyuuya mibyaabi.—2Mk 33:6.

• Bulu.

  Eeli ndizina lyamwezi walusele mukkalenda njaakabapa Leza ba Juda alimwi mwezi wabili mukkalenda yakunyika. Lizwa kubbala lyaamba “kubbala; kuzyala” alimwi ooyu mwezi wakali kutalikila akati ka October kusikila akati ka November. (1Ba 6:38)—Amubone Makani Aayungizyidwe B15

• Bululami.

  Mu Magwalo, caamba cintu ciluzi kweelana azyeelelo zya Leza zyacintu ciluzi acitaluzi.—Mtl 15:6; Dt 6:25; Tu 11:4; Zef. 2:3; Mt 6:33.

• Bumambe.

  Bumambe ndeelyo mwaalumi uukwete naa mukaintu uukwetwe cakuliyandila naonana amuntu umbi ngobatakwetene limwi.—Ku 20:14; Mt 5:27; 19:9.

• Bumboni.

  “Ibumboni” kanji-kanji bwaamba Milawo iili Kkumi yakalembedwe amabwe obilo ngaakapegwa Musa.—Ku 31:18.

• Bumena.

  Ncintu cisanganizyigwa afulaulu kutegwa ufwufwumuke naa mucintu cinyugwa kutegwa cisase naa kubila, ikapati cibeela cafulaulu uukandidwe cisaside icakasyaala kuli cakaindi. Kanji-kanji bbala eeli lilibelesyedwe mu Bbaibbele kwiiminina cibi akusofwaala, alimwi lilibelesyedwe ikwaamba cintu cisisidwe, kukomena kutalibonyi.—Ku 12:20; Mt 13:33; Ga 5:9.

• Busena Busalala..

  Oobu bwakali busena bupati bwakusaanguna mutente lyakukombela naa mutempele, ikutali Busena Busalalisya buli mukati. Mutente lyakukombela, Busena Busalala bwakajisi cibikkilo camalambe, cipaililo cangolida catununkilizyo, tebulu lyazinkwa zyacitondezyo alimwi azibelesyo zyangolida; mpoonya mutempele, mwakali cipaililo cangolida,  zibikkilo zyamalambe izili kkumi izyangolida, alimwi amatebulu aali kkumi aazinkwa zyacitondezyo. (Ku 26:33; Heb 9:2)—Amubone Makani Aayungizyidwe B5 a B8.

• Busena Busalalisya.

  Nkaanda kamukati mwini mwatente lyakukombela naa kamutempele, oomo molyakali kuyobwedwa bbokesi lyacizuminano. Kunze lya Musa, mupaizi mupati alikke ngowakazumizyidwe kunjila mu Busena Busalalisya, alimwi wakali kukonzya buyo kunjila ciindi comwe amwaka mu Buzuba Bwakumanya Milandu.—Ku 26:33; Le 16:2, 17; 1Ba 6:16; Heb 9:3.

• Businsimi.

  Imulumbe wakasololelwa amuuya wa Leza, kufwumbwa naa uyubununa kuyanda kwa Leza naa waambilizya kuyanda kwa Leza. Businsimi bulakonzya kuba njiisyo yakasololelwa amuuya wa Leza, naa kwaamba mulawo naa lubeta luzwa kuli Leza, naa kwaambilizya cintu iciyooboola kumbele.—Ezk 37:9, 10; Da 9:24; Mt 13:14; 2Pe 1:20, 21.

• Buungu.

  Makwa aagwisyigwa kumaila ciindi cakuuma akupupulula. Ibbala lyakuti buungu lilabelesyegwa mumaambilambali kwaamba cintu cinyina mulimo alimwi citayandiki.—In 1:4; Mt 3:12.

• Buzuba Bwakumanya Milandu.

  Mbuzuba busalala buyandika kapati kubana Israyeli, alimwi bwiitwa kuti Yom Kippur (kuzwa kubbala lya Chihebrayo lyakuti yohm hak·kip·pu·rimʹ, “buzuba bwakuvwumba”), ibwakali kucitwa mu 10 mumwezi wa Etanimu. Oobu mbobuzuba bulikke mumwaka imupaizi mupati mbwaakali kunjila mu Busena Busalalisya bwatente lyakukombela. Omuya wakali kutuula bulowa bwazipaizyo kutegwa amanye zibi zyakwe, zibi zyaba Levi, alimwi azibi zyabantu. Bwakali buzuba bwamuswaangano uusetekene akuliimya kulya, alimwi yakali sabata, iciindi cakulyookezya kumilimo yabuzuba abuzuba.—Le 23:27, 28.

• Buzuba Bwalubeta.

  Buzuba naa ciindi cigaminide inkamu, masi, naa bantu boonse nobabetekwa a Leza. Cilakonzya kuba ciindi aabo bakabetekwa kale kuti beelede kufwa nobajaigwa, naa lubeta lulakonzya kupa coolwe kuli bamwi kuti bafwutulwe akupona kukabe kutamani. Jesu Kristo abaapostolo bakwe bakaamba zya “Buzuba Bwalubeta” buli kumbele kuti tabubikkilizyi buyo bantu bapona pele abaabo bakafwa kaindi.—Mt 12:36.

• Bwaamu.​—

  Amubone KOONANA IKUTALI KWAMUMULAWO.

• Bwami bwa Leza.

  Mabala aabelesyegwa kwaamba bweendelezi bwa Leza bwiimininwa amfwulumende yabwami bwa Mwanaakwe, Kristo Jesu.—Mt 12:28; Lk 4:43; 1Ko 15:50.

• Bweende bwazintu.

  Bupanduluzi bwabbala lya Chigiriki lyakuti ai·onʹ nolyaamba zintu zicitika ciindi eecino naa zintu ziindanya bukkale bwaciindi cimwi kuli boobo bwakuciindi cimwi. Ibbaibbele lyaamba kujatikizya “bweende bwazintu obuno,” ikwaamba bukkale buli munyika mboizulwa alimwi abuumi bwabantu bamunyika. (2Ti 4:10) Kwiinda mucizuminano ca Mulawo, Leza wakatalisya bweende bwazintu bamwi mbobanga baita kuti, bweende bwabana Israyeli naa bwaba Juda. Alimwi kwiinda mucipaizyo cacinunuzyo cakwe, Jesu Kristo wakabelesyegwa a Leza kutalisya bweende bwazintu ibwiindene, oobo kapati ibujatikizya mbungano ya Banakristo bananikidwe. Aaya ngaakali matalikilo aabweende bwazintu bupya, ibwakali kwiimininwa azintu izyakali mucizuminano ca Mulawo. Lilakonzya kwaamba bweende bwazintu bwiindene-indene, naa zintu zicitika kuciindi eeco, izyakacitika kale naa iziyoocitika kumbele.—Mt 24:3; Mk 4:19; Ro 12:2; 1Ko 10:11.

C

• Cakkumi.

  Ncibeela cakkumi, naa 10 pesenti, icakali kupegwa naa kubbadelwa kauli mutelo ikapati mubukombi. Alimwi ciitwa kuti “cimanyakkumi,” eelyo kubbadela kwiitwa kuti “kupa cakkumi.” (Mlk 3:10; Dt 26:12; Mt 23:23) Mu Mulawo wa Musa, cibeela cakkumi cabutebuzi alimwi amunyama wakkumi kweelana ambobakali kuyaabuvwula banyama, zyakali kupegwa ba Levi amwaka ikubagwasyilizya. Mpoonya ba Levi bakali kubweza cakkumi cazintu eezyo nzyobapegwa akupa bapaizi baluzubo lwa Aroni ikubagwasyilizya. Kwakali azimbi izyakupa zyakkumi. Tacili ceelelo ku Banakristo kupa cakkumi.

• Chiaramu.

  Mwaambo uukozyenye kapati amwaambo wa Chihebrayo, alimwi ubelesya alufabbeti iikozyenye. Kumatalikilo wakali kwaambaulwa abana Aramu pele mukuya kwaciindi wakaba mwaambo uubelesyegwa mumakwebo alimwi amukwaambaula mubulelo bwa Asuri alimwi abwa Babuloni. Alimwi ngomwaambo mupati iwakali kubelesyegwa mubulelo bwa Persia. (Ezr 4:7) Zibeela zimwi zyamabbuku aa Ezara, Jeremiya, alimwi a Daniele zyakalembedwe mu Chiaramu.—Ezr 4:8–6:18; 7:12-26; Je 10:11; Da 2:4b–7:28.

• Ciganto.

  Ncibelesyo cakali kubelesyegwa kudinta (bunji bwaziindi kusimba cilongo naa bunzuka) icakali kutondezya mukamwini cintu eeco, kuti ncamasimpe, naa bumboni bwacizuminano. Ziganto zyansiku zyakajisi kabeela  kayumu (bbwe, lwija lwamuzovwu, naa cisamu) ikakalembedwe mabala naa zifwanikiso kusyule. Ciganto cilabelesyegwa munzila yacikozyanyo kujatikizya cintu camasimpe, naa bumboni butondezya kuti cilijisi mukamwini, naa kuti ncintu cisisidwe naa maseseke.—Ku 28:11; Ne 9:38; Ciy 5:1; 9:4.

• Cikandilo camisaansa.

  Kanji-kanji caamba zilindi zyobilo zyakasyigwa kuzwa mubbwe lyamutuba, cilindi cimwi cakali kuba mujulu kwiinda ceenzinyina, alimwi kagelo nkikakali kuziswaanganya. Misaansa yakandwa mucikandilo cili mujulu, musinza wakali kukunkila mucilindi cili ansi. Cikandilo camisaansa cilabelesyegwa munzila yacikozyanyo ikwaamba lubeta lwa Leza.—Is 5:2; Ciy 19:15.

• Cikombelo 1.

  Ibbala ilyaamba “kuleta aantoomwe; kubunganya,” pele mumagwalo manji, lyaamba ŋanda naa busena ba Juda mobakali kubunganina kuti babale Magwalo, malailile, kukambauka, alimwi akupaila. Mumazuba aa Jesu, munzi umwi aumwi mucisi ca Israyeli wakalijisi cikombelo, eelyo muminzi mipati zyakali kwiinda aali comwe.—Lk 4:16; Mil 13:14, 15.

• Cikombelo 2.

  Oobu mbusena bwakabambilidwe kuti mbwakukombela, ibusena busalala. Kanji-kanji, bbala eeli lyakali kwaamba tente lyakukombela naa tempele mu Jerusalemu. Ibbala eeli alimwi lilabelesyegwa kwaamba busena nkwabede Leza kujulu.—Ku 25:8, 9; 2Ba 10:25; 1Mk 28:10; Ciy 11:19.

• Cikonke 1.

  Majwi aakusinizya kuti cintu ncamasimpe, naa kuti ncisyomezyo cakuti muntu uyoocita naa takaciti cintu cimwi. Kanji-kanji ncikonke muntu ncakonka kumuntu uujisi cuuno caatala, kwaambisya kuli Leza. Jehova wakasinizya cizuminano ncaakapangana a Abrahamu kwiinda mukukonka.—Mtl 14:22; Heb 6:16, 17.

• Cikonke 2.

  Ncisyomezyo cipati muntu ncapa Leza kuti ulacita mulimo umwi, kupa cituuzyo naa cipego, kutalika mulimo umwi, naa kulilesya zintu zimwi nokuba kuti zilizumizyidwe. Cakajisi nguzu zyacisyomezyo.—My 6:2; Mu 5:4; Mt 5:33.

• Cikwikwi.

  Ninsozi zisiyene-siyene izyeenda mubunji. Kweelana a Mulawo wa Musa, zyakali kubonwa kuti zileelela kuligwa. Insozi zilya zintu zyoonse munzila mozyainda alimwi akunyonyoona kapati, zyakali kubonwa kuti ncipenzyo.—Ku 10:14; Mt 3:4.

• Cilusyo.

  Ncibelesyo cakali kubelesyegwa kuluka ntali naa butonje kuti cibe cisani.—Ku 39:27.

• Cilwazi cazisyango.

  Kufwumbwa cilwazi cazisyango iciletwa angubi. Kuyeeyelwa kuti cilwazi caambwa mu Bbaibbele, ninkalaye yacisiko iisiya (Puccinia graminis).—1Ba 8:37.

• Cilwazi.

  Kufwumbwa bulwazi butambukila alimwi bumwaika cakufwambaana kuya kumasena aambi, ibukonzya kujatikizya bantu banji kapati mukaindi kasyoonto alimwi ibujaya. Kanji-kanji cijatikizya cisubulo cizwa kuli Leza.—My 14:12; Ezk 38:22, 23; Am 4:10.

• Cinsenda; Sicinsenda.

  Mbulwazi bupati bwalukanda. Mu Magwalo, cinsenda tacaambi buyo bulwazi buzyibidwe azina eeli mazuba aano, nkaambo tiibwakali kutambukila buyo bantu pele bwakali kutambukila azisani alimwi amaanda. Muntu uuciswa bulwazi bwacinsenda wiitwa kuti sicinsenda.—Le 14:54, 55; Lk 5:12.

• Cinunuzyo.

  Ncintu cibbadelwa kuti muntu aangununwe mubuzike, kucisubulo, kukupenzyegwa, kucibi naa kumukuli umwi ngwajisi. Talili lyoonse nikwakali kupegwa mali. (Is 43:3) Cinunuzyo cakali kuyandika mubukkale bwiindene-indene. Mucikozyanyo, bana bakusaanguna basankwa alimwi abeenze mucisi ca Israyeli bakali ba Jehova, eelyo cinunuzyo naa muulo wakufwutusya, wakali kuyandika kutegwa ciindi coonse batakabelesyegwi mumulimo wa Jehova. (My 3:45, 46; 18:15, 16) Ikuti naa mupoho imukali uuteembelwi, wajaya muntu, mukamwini wakeelede kubbadela cinunuzyo kuti amununune kutegwa atajaigwi kweelana ambokwakali kuyandika. (Ku 21:29, 30) Nokuba boobo, cinunuzyo tiicakali kuzumizyigwa kunununa sikujaya iwacita caali. (My 35:31) Ikaambo kayandika kapati nkakuti, Ibbaibbele lyaamba cinunuzyo Jesu ncaakapa kwiinda mukufwa kali cipaizyo kuti anunune bantu bamvwida kucibi alimwi alufwu.—In 49:7, 8; Mt 20:28; Ef 1:7.

• Cipaililo.

  Ncintu cili mbuli tebulu naa cibumbili cipangidwe aabulongo, mabwe, naa mapulanga aazilulwidwe lubulo aawo mpobakali kutuulila zipaizyo naa kuumpila tununkilizyo mubukombi. Mukaanda kakusaanguna kamutente lyakukombela alimwi amutempele, mwakali “cipaililo cangolida” cisyoonto aakali kuumpilwa tununkilizyo. Cakapangidwe aamapulanga aakazilulwidwe angolida. Mpoonya “cipaililo camukuba” cipati aakali kuumpilwa zipaizyo cakali anze mulubuwa. (Ku 27:1; 39:38, 39; Mtl 8:20; 1Ba 6:20; 2Mk 4:1; Lk 1:11)—Amubone Makani Aayungizyidwe B5 a B8.

• Cipaizyo calumvwano.

  Eeci ncipaizyo cakali kupegwa kuli Jehova kulomba kuba muluumuno  anguwe. Mukombi abamuŋanda yakwe, antoomwe amupaizi iwakali kutuula alimwi abapaizi ibakali amulimo boonse bakali kucilya. Munzila yacikozyanyo, Jehova wakali kutambula busi bununkilila bwamafwuta aacipaizyo. Bulowa ibwakali kwiiminina buumi, abwalo bwakali kupegwa kulinguwe. Cakali mbuli kuti bapaizi abakombi bakali kukkala akulya cakulya antoomwe a Jehova, ikutondezya kuba muluumuno anguwe.—Le 7:29, 32; Dt 27:7.

• Cipaizyo.

  Ncituuzyo cituulwa kuli Leza kutondezya kulumba, naa kuzumina mulandu, alimwi akuti kube lumvwano anguwe alimwi. Kutalikila kuli Abelo, bantu bakali kutuula zipaizyo cakulisungula, eezyi zyakali kubikkilizya abanyama, kusikila mane cizuminano ca Mulawo wa Musa nocakapa kuti kaziyandika. Zipaizyo zyabanyama zyakaleka kuyandika kuzwa ciindi Jesu naakapa buumi bwakwe kuti bube cipaizyo cilondokede, nokuba boobo, Banakristo balazumanana kutuula zipaizyo zyakumuuya kuli Leza.—Mtl 4:4; Heb 13:15, 16; 1Jo 4:10.

• Cipani cabasikutobela Heroda.​—

  Amubone HERODA; CIPANI CABASIKUTOBELA.

• Cipaya.

  Ncikutu cambelele, mpongo, naa koombe icakabambwa kuti cibe cakulembela. Cakali ciyumu kapati kwiinda ntumbu alimwi cakali kubelesyegwa kupanga mabbuku aakuvwunga aa Bbaibbele. Kuboneka kuti zipaya Paulo nzyaakalomba Timoteyo kuti aletelezye zyakali zibeela zya Magwalo aa Chihebrayo. Mabbuku amwi aategwa Mabbuku Aakuvwunga Aaku Lwizi lwa Munyo akalembwa acipaya.—2Ti 4:13.

• Cisamu.

  Musemu wacisamu ciimvwi mpobakali kugagaila muntu. Cakali kubelesyegwa azisi zimwi kujaila naa kubikka mitunta kutegwa ibe citondezyo cakucenjezya bantu, naa kuti aabo bajaigwa basampuke kubuleya. Bana Asuri, ibakajisi mpuwo yakuba basilunya munkondo, bakali kuleleenzya mitunta yabaange atala aazisamu zibosya ziimikizyidwe kwiinda mukubayasa mwida akupolela mucamba cayooyo wajaigwa. Mumulawo waba Juda, aabo ibakali kucita zintu zibyaabi kapati mbuli kutukila Leza, naa kukomba mituni bakali kusaanguna kujaigwa kwiinda mukupwaigwa mabwe naa kwiinda mukubelesya nzila imbi, mpoonya mitunta yabo yakali kwaanzikwa aazisamu kuti ibe citondezyo cakucenjezya bamwi. (Dt 21:22, 23; 2Sa 21:6, 9) Bana Roma, balo bakali kwaangilila muntu kucisamu, aboobo wakali kuzumanana kupona kwamazuba manji katanafwa akaambo kakucisa, nyota, nzala, alimwi akubalwa zuba. Ziindi zimwi, mbuli ciindi naakajaigwa Jesu, bakali kugagaila maanza alimwi amaulu aamuntu uuyanda kujaigwa kucisamu. (Lk 24:20; Joh 19:14-16; 20:25; Mil 2:23, 36)—Amubone CISAMU CAKUPENZYEZYA.

• Cisamu cabuumi.

  Ncisamu cakali mumuunda wa Edeni. Ibbaibbele talyaambi kuti micelo yacisamu eeci yakajisi nguzu zyakupa buumi; muciindi caboobo, cakali kusinizya kuti Leza wakali kuyoobapa buumi butamani aabo mbaakali kuyoozumizya kulya micelo yancico.—Mtl 2:9; 3:22.

• Cisamu cakupenzyezya.

  Ibbala lya Chigiriki lyakuti stau·rosʹ, lyaamba cisamu ciimikidwe, mbuli ceeco mpaakajailwa Jesu. Kunyina bumboni bwakuti bbala lya Chigiriki eeli lyaamba ciingano, mbuli zyeezyo zyakali kubelesyegwa abantu batakombi Leza mubukombi bwabo myaka minji katanasika Kristo. Mabala aakuti “Cisamu cakupenzyezya” lilalipandulula cakumaninina bbala lini-lini, mbokunga walo Jesu wakalibelesya bbala lyakuti stau·rosʹ ikwaamba kupenzyegwa, kupenga alimwi amasampu ngobakali kuyoojana basikumutobela. (Mt 16:24; Heb 12:2)—Amubone CISAMU.

• Cisamu cakuzyiba bubotu abubi.

  Ncisamu cakali mumuunda wa Edeni eeco Leza ncaakali kubelesya kuba citondezyo canguzu nzyajisi zyakubikkila bantu zyeelelo zyacintu “cibotu” alimwi acintu “cibi.”—Mtl 2:9, 17.

• Cisani camasaka.

  Mulembo uuyasayasa uubelesyegwa kupanga masaka, naa zibbeeke, mbuli zyeezyo zibikkilwa maila. Kanji-kanji cakali kusumwa kubelesya boya bwampongo alimwi ncecisani cakali kusamwa bantu nobalila.—Mtl 37:34; Lk 10:13.

• Cisela cakakokola.

  Ncakupimya bulamfwu bwacintu ibweelene amasentimita aajanza livwungulwidwe, nkokuti kuzwa kukantegezya kusika kucaala. Kweelana abulamfwu bwakakokola kalampa masentimita aali 44.5, icisela cakakokola cijisi masentimita aali 22.2 mubulamfwu. (Ku 28:16; 1Sa 17:4)—Amubone Makani Aayungizyidwe B14.

• Cisitilizyo.

  Mulembo uulukidwe kabotu iwakajisi zifwanikiso zyabakerubi, iwakali kwaandaanya Busena Busalala ku Busena Busalalisya mutente lyakukombela alimwi amutempele. (Ku 26:31; 2Mk 3:14; Mt 27:51; Heb 9:3)—Amubone Makani Aayungizyidwe B5.

• Cisolo.

  Ntubwe naa tusamu tusyoonto-syoonto itwakali kubelesyegwa mukusala cakucita. Ootu twakali kubikkwa antoomwe munkomo  yacisani naa mucibikkilo cimwi mpoonya akucukwa. Cisolo icazwa naa icagwisyigwa ncicakali kusalwa. Bunji bwaziindi eeci cakali kucitwa kwiinda mukupaila. Ibbala lyakuti “cisolo” lilabelesyegwa amunzila yacikozyanyo ikwaamba “caabilo” naa “cibeela.”—Jos 14:2; In 16:5; Tu 16:33; Mt 27:35.

• Cisubulo.

  Mu Magwalo aa Chihebrayo, ibbala eeli livwula kwaamba cipenzyo, bulwazi, naa mapenzi aatumwa kuzwa kuli Jehova kacili cisubulo. Mu Magwalo aa Banakristo aa Chigiriki lyaamba kuuma naa kukwibbaula muntu amuluso wakajisi tukoto-koto naa mamvwa kumamanino.—My 16:49; Joh 19:1.

• Cisuwo.

  Ncipimyo cakupimya zintu ziyumu. Ikubelesya cipimyo ncoceelene limwi icakupimya zintu zyamaanzaanzi, cilakonzya kuba malita aali 7.33 (tupamela tuli 6.66). (2Ba 7:1)—Amubone Makani Aayungizyidwe B14.

• Cisyomezyo.

  Ncintu casikukweleta ncapa sikumukweletesya kusinizya kuti uyoobbadela ncobeni. Alimwi cakali kwiitwa kuti cisinizyo. Mulawo wa Musa wakajisi malailile aajatikizya zisyomezyo kutegwa ukwabilile bantu bapengede alimwi abaabo banyina mugwasyi.—Ku 22:26; Ezk 18:7.

• Citakwe bumena.

  Caamba cinkwa cakapangwa kakunyina kubikka bumena.—Dt 16:3; Mk 14:12; 1Ko 5:8.

• Citambala.

  Mulembo wakulyaanga kumutwe alimwi uusamwa mbuli ntaulu. Mupaizi mupati wakali kusama citambala camulembo muuba-uba, icakajisi kabulo kangolida kumbele ikakaangilidwe ntambo yamubala wacikambwe. Mwami wakali kusama citambala kunsi aamusini. Jobu wakabelesya bbala eeli munzila yacikozyanyo ciindi naakakozyanisya bululami bwakwe kucitambala.—Ku 28:36, 37; Job 29:14; Ezk 21:26.

• Citantaala.

  Bwakali busena naa cintu cakayakidwe mu Munzi wa Davida. Ambweni bwakali bwaanda bwakukwabilila naa cintu cimwi buyo cakali kubelesyegwaa kukwabilila.—2Sa 5:9; 1Ba 11:27.

• Citondezyo cisetekene cakulyaaba.

  Nimpande iiŋaima yangolida iisalalisya iyakalembedwe majwi aamu Chihebrayo aakuti, “Kusalala nkukwa Jehova.” Yakabikkidwe kumbele aacitambala camupaizi mupati. (Ku 39:30)—Amubone Makani Aayungizyidwe B5.

• Citondezyo.

  Ncintu, micito, bukkale naa cintu citalibonyi-bonyi buyo pele iciyandika kacili citondezyo cacintu cimwi, iciliko lino naa iciyooba kumbele.—Mtl 9:12, 13; 2Ba 20:9; Mt 24:3; Ciy 1:1.

• Cituuzyo cacikonke.

  Ncituuzyo cakuliyandila cakali kweenda azikonke zimwi.—Le 23:38; 1Sa 1:21.

• Cituuzyo cakulumba.

  Ncituuzyo calumvwano cakali kutuulwa kutembaula Leza akaambo kazintu nzyaakali kubapa alimwi aluyando lwakwe lutamani. Nyama yacituuzyo camunyama acinkwa cilaabumena alimwi acitakwe bumena zyakali kuligwa. Nyama yakeelede kuligwa mbubonya buzuba oobo.—2Mk 29:31.

• Cituuzyo cakuyumba.

  Ncituuzyo mupaizi ncaakali kubikka mumaanza aakwe kunsi lyamaanza aamukombi iwakajisi cipaizyo cakali kuyootuulwa akwaayumba ooku akooku; naa mupaizi mwini ngookali kuciyumba cituuzyo. Kucita boobu kwakali kwiiminina kupa zituuzyo zyacipaizyo kuli Jehova.—Le 7:30.

• Cituuzyo camilandu..

  Ncipaizyo cazibi zyamuntu aumwi kumugama. Ciliindene asyoonto azituuzyo zimbi zyacibi mukuti calo cakali kuzuzikizya naa kubukulusya zyoolwe zimwi zyacizuminano nzyaakasweekeledwe sizibi weempwa akaambo kacibi alimwi akumupa lwaanguluko.—Le 7:37; 19:22; Is 53:10.

• Cituuzyo cazibi.

  Eeci ncipaizyo cakali kutuulwa akaambo kazibi zyakali kucitwa cakutazyiba akaambo kakutalondoka. Zipaizyo zyabanyama baindene-indene, nkokuti kuzwa kumupoho kusika kunziba, zyakali kubelesyegwa kweelana aciimo naa bukkale bwayooyo iwakali aacibi icakali kuyandika kumanizyigwa.—Le 4:27, 29; Heb 10:8.

• Cituuzyo cinyugwa.

  Ncituuzyo cawaini icakali kutilwa acipaililo alimwi akutuulwa antoomwe azituuzyo zimbi. Paulo wakabelesya mabala aaya munzila yacikozyanyo ikwaamba busungu mbwaakajisi bwakubelekela Banakristonyina.—My 15:5, 7; Flp 2:17.

• Cituuzyo cuumpwa.

  Ncipaizyo cabanyama icakali kuumpwa buumbulu acipaililo ikutuula kuli Leza; kunyina cibeela camunyama (mupoho, mugutu, mujembwe, nkwilimba, naa mwana wanziba) ncaakali kusyaala aancico mukombi.—Ku 29:18; Le 6:9.

• Civwunisyo cabbokesi cakumanya zibi.

  Ncivwunisyo cabbokesi lyacizuminano, mu Buzuba Bwakumanya Milandu, mupaizi wakali kusansaila bulowa ansi kumbele lyancico. Ibbala lya Chihebrayo lizwa kubbala lyaamba “kuvwumba (zibi)” naa ambweni “kumwaya (zibi).” Cakapangidwe aangolida, alimwi cakajisi bakerubi bobilo, omwe kumamanino aacivwunisyo kulubazu lumwi mpoonya umwi kulubazu lumbi. Zimwi ziindi caambwa buyo kuti “civwumbyo.” (Ku 25:17-22; 1Mk  28:11; Heb 9:5)—Amubone Makani Aayungizyidwe B5.

• Cizuminano.

  Ncizuminano, naa ncipangano akati ka Leza abantu naa akati kabantu bobilo kuti bacite naa kuti bataciti cintu cimwi. Zimwi ziindi muntu omwe buyo nguwakeelede kucita zyakali kuyandika kuzuzikizya cizuminano (nkokuti eeci cakali cisyomezyo). Ziindi zimwi bantu boonse bobilo bakaleelede kucita ziyandika kuzuzikizya cizuminano. Kunze lyazizuminano Leza nzyaakapangana abantu, Bbaibbele lyaamba zizuminano akati kabantu balikke-likke, misyobo, zisi, naa tubunga twabantu. Akati kazizuminano zyakabajatikizya bantu banji nzyeezyo Leza nzyaakapangana a Abrahamu, Davida, cisi cabana Israyeli (cizuminano ca Mulawo), alimwi ba Israyeli ba Leza (cizuminano cipya).—Mtl 9:11; 15:18; 21:27; Ku 24:7; 2Mk 21:7.

• Cuumbwe caciibalusyo.

  Mbusena bwakuzikkila muntu uufwide. Ibbala eeli lipandulula bbala lya Chigiriki lyakuti mne·meiʹon, ilizwa kubbala ilyaamba “kuyeekezya,” icipa muzeezo wakuti imuntu wafwa ulayeeyegwa.—Joh 5:28, 29.

• Cuumbwe.

  Ciindi bbala eeli nolili mumabala masyoonto-syoonto, lyaamba cuumbwe camuntu; ciindi nolitalika abbala lipati, lyaamba cuumbwe muzikkilwa bantu boonse, lyeelene abbala lya Chihebrayo lyakuti “Sheol” alimwi alya Chigiriki lyakuti “Hades” aasandulwidwe kuti “Cikkalilo Cabafwu.” Mu Bbaibbele lipandulwidwe kuti mbusena naa bukkale bwakutakonzya kucita cintu alimwi akutazyiba cintu cili coonse.—Mtl 47:30; Mu 9:10; Mil 2:31.

• Cuuno calubeta.

  Bunji bwaziindi eeci cakali cuuno cili mbuli cibumbili cilamfwu, icakajisi matantilo, aawo mpobakali kukkala balupati-pati nobakali kubandika amakamu aabantu alimwi akwaambilizya ncobasala kucita. Majwi aakuti “cuuno calubeta ca Leza” alimwi aakuti “cuuno calubeta ca Kristo” atondezya bubambe bwa Jehova bwakubeteka bantu.—Ro 14:10; 2Ko 5:10; Joh 19:13.

D

• Dagoni.

  Ngu leza waba Filisiti. Matalikilo aabbala eeli taazyibidwe kabotu, pele basyaazibwene bamwi baamba kuti liswaangene aabbala lya Chihebrayo lyakuti dagh (inswi).—Bab 16:23; 1Sa 5:4.

• Dariki.

  Mali aangolida aabana Persia aalema magilamu aali 8.4. (1Mk 29:7)—Amubone Makani Aayungizyidwe B14.

• Dekapole.

  Eeyi minzi yaba Giriki iili kkumi (kuzwa kubbala lya Chigiriki lyakuti deʹka, ilyaamba “kkumi,” alimwi a poʹlis, ilyaamba “munzi”). Alimwi lyakali zina lyacooko cakujwe kwa Lwizi lwa Galilaya alimwi a Mulonga wa Jordano, kwalo minzi minji eeyi nkoyakabede. Njiyakali minzi iyakali kucitilwa zilengwa zyaba Giriki alimwi amakwebo. Jesu wakainda mucooko eeci, pele kunyina aalembedwe kuti kuli munzi uuli woonse Jesu ngwaakaswaya akati kaminzi eeyi. (Mt 4:25; Mk 5:20)—Amubone Makani Aayungizyidwe A7 a B10.

• Diabolosi.

  Eeli ndizina lipandulula Saatani kweelana a Magwalo aa Banakristo aa Chigiriki, ilyaamba “Sikubejelezya.” Saatani wakapegwa zina eeli akaambo kakuti nguuyinda kubejelezya akutamikizya Jehova, ijwi lyakwe libotu alimwi azina lyakwe lisalala.—Mt 4:1; Joh 8:44; Ciy 12:9.

• Dilamu.

  Eeci ncipimyo cazintu ziyumu alimwi azintu zyamaanzaanzi. Cakaleelene amalita aali 220 (tupamela tuli 200) kubelesya malita aayeeyelwa kuti ngamalita aanongo. (1Ba 5:11)—Amubone Makani Aayungizyidwe B14.

• Dinari.

  Mali aansiliva aaba Roma aakali kulema magilamu aatandila ku 3.85, alimwi akajisi cikozyanyo camutwe wa Kaisara kulubazu lumwi. Ngamali ngaakali kuvwola mubelesi buzuba abuzuba alimwi ngamali bana Roma ngobakali ‘kutelesya’ ba Juda. (Mt 22:17; Lk 20:24)—Amubone Makani Aayungizyidwe B14.

• Dirakima.

  Mu Magwalo aa Banakristo aa Chigiriki, ibbala eeli lyaamba mali aansiliva aa Chigiriki, alo ciindi eeco aakali kulema magilamu aali 3.4. Mu Magwalo aa Chihebrayo, kuli mpobaamba mali aangolida aabana Persia aayelene adariki. (Ne 7:70; Mt 17:24)—Amubone Makani Aayungizyidwe B14.

E

• Edomu.

  Eeli ndizina limbi ndyaakapegwa Esau, imwana wa Izaka. Baluzubo lwa Esau (Edomu) bakabweza busena bwa Seiri, icooko camalundu icakali akati ka Lwizi lwa Munyo a Zyiba lya Akaba. Bwakazikwiitwa kuti Edomu. (Mtl 25:30; 36:8)—Amubone Makani Aayungizyidwe B3 a B4.

• Efa.

  Ncipimyo cakupimya zintu ziyumu, icakali kubelesyegwa kupima maila. Cakaleelene anongo yakupimya zintu zyamaanzaanzi, aboobo cakali kusika kumalita aali 22 (tupamela tuli 20). (Ku 16:36; Ezk 45:10)—Amubone Makani Aayungizyidwe B14.

• Efraimu.

  Eeli ndizina lyamwana wa Josefa wabili; zina eeli lyakazoobelesyegwa kwaamba musyobo umwi akati kamisyobo yabana Israyeli. Misyobo ya Israyeli noyakaandaana, Efraimu, mbwaanga wakali musyobo  ulaampuwo, wakaiminina bwami boonse bwamisyobo iili kkumi.—Mtl 41:52; Je 7:15.

• Eluli.

  Ciindi nobakazwa mubuzike ku Babuloni, eeli ndizina lyamwezi wacisambomwe mukkalenda njaakabapa Leza ba Juda alimwi mwezi wa 12 mukkalenda yakunyika. Wakali kutalikila akati kamwezi wa August kusikila akati kamwezi wa September. (Ne 6:15)—Amubone Makani Aayungizyidwe B15

• Etanimu.

  Eeli ndizina lyamwezi waciloba mukkalenda njaakabapa Leza ba Juda alimwi mwezi wakusaanguna mukkalenda yakunyika. Wakali kutalikila akati kamwezi wa September kusikila akati kamwezi wa October. Ciindi ba Juda nobakazwa mubuzike ku Babuloni, wakali kwiitwa kuti Tishiri. (1Ba 8:2)—Amubone Makani Aayungizyidwe B15

• Etiopiya.

  Eeci ncisi cansiku icakali kumusanza kwa Egepita. Cakali kubikkilizya abusena buli kumusanza kwini kwacisi ca Egepita camazuba aano alimwi acisela cabusena buli kunyika kwacisi ca Sudan camazuba aano. Ibbala eeli zimwi ziindi lilabelesyegwa kwaamba “Kusi” mu Chihebrayo.—Es 1:1.

F

• Farao.

  Ndizina lyabulemu ilyakali kupegwa bami baku Egepita. Ba Farao bosanwe balilembedwe mu Bbaibbele (Sisaki, So, Tirihaka, Neko, Hofra), pele bamwi mazina aabo taalembedwe pe, kubikkilizya abaabo ibakacita zintu izyakajatikizya Abrahamu, Musa, a Josefa.—Ku 15:4; Ro 9:17.

• Filisitiya; Ba Filisiti.

  Ncisi cili kunkomwe yakumusanza kwa Israyeli icakali kwiitwa kuti Filisitiya. Ibantu baku Krete ibakazookkala nkuko bakali kwiitwa kuti ba Filisiti. Davida wakabazunda, pele bakazumanana kulilela alimwi akuba basinkondonyina abana Israyeli. (Ku 13:17; 1Sa 17:4; Am 9:7)—Amubone Makani Aayungizyidwe B4.

• Firate.

  Ooyu ngomulonga wiinda kulampa alimwi uuyandika kapati waku Asiya nkoili kumusanza lwaambo, alimwi ngumwi wamilonga mipati yobilo yaku Mesopotamiya. Kusaanguna ulaambidwe mulugwalo lwa Matalikilo 2:14 kauli mulonga umwi akati kamilonga yone yamu Edeni. Kanji-kanji wiitwa kuti “Mulonga.” (Mtl 31:21) Wakali munyinza wakunyika wacilawo ncobakapedwe bana Israyeli. (Mtl 15:18; Ciy 16:12)—Amubone Makani Aayungizyidwe B2.

G

• Gehena.

  Ndibbala lya Chigiriki ilyaamba Kkuti lya Hinomu, kumusanza akumusanza lwaambo lwa Jerusalemu wansiku. (Je 7:31) Mubusinsimi lyakaambwa kuti mbusena kwalo mitunta yabantu nkoyakali kulundikwa. (Je 7:32; 19:6) Kunyina bumboni butondezya kuti banyama naa bantu bakali kusowelwa mu Gehena kutegwa baumpwe bulanga naa kusubulwa. Aboobo, busena oobu tabukonzyi kwiiminina busena butalibonyi ooko bantu nkobasubulwa ciindi coonse mumulilo wini. Muciindi caboobo, ibbala lyakuti Gehena lyakabelesyegwa a Jesu alimwi abasikwiiya bakwe ikwaamba mapenzi aatamani aa “lufwu lwabili,” nkokuti, kunyonyooka cakumaninina.—Ciy 20:14; Mt 5:22; 10:28.

• Gera.

  Nkulema kwacintu ikweelene amagilamu aali 0.57. Kulikozyenye a 1/20 yasyekeli. (Le 27:25)—Amubone Makani Aayungizyidwe B14.

• Gileadi.

  Munzila iigaminide, mbusena bulaabusani ibuli kujwe aa Mulonga wa Jordano ibusika kunyika akumusanza kwa Kkuti lya Jaboki. Zimwi ziindi lilabelesyegwa kwaamba cilawo cabana Israyeli coonse cili kujwe aa Jordano, ikwakali kukkala musyobo wa Rubeni, Gadi, acisela camusyobo wa Manase. (My 32:1; Jos 12:2; 2Ba 10:33)—Amubone Makani Aayungizyidwe B4.

• Giriki.

  Mwaambo waambaulwa abantu baku Girisi; alimwi abantu bakazyalilwa ku Girisi naa muntu ulaamukwasyi uuzwa nkuko. Mu Magwalo aa Banakristo aa Chigiriki, ibbala eeli lilabelesyegwa mumbazu zinji, ikwaamba bantu boonse batali ba Juda naa aabo bakaiya mwaambo wa Chigiriki azilengwa zyabo.—Joe 3:6; Joh 12:20.

• Gititi.

  Ndibbala lyamunyimbo litazyibidwe kabotu bupanduluzi, pele kulibonya kuti lyakazwa kubbala lya Chihebrayo lyakuti gath. Bamwi bayeeya kuti ninyimbo zijatikizya kupanga waini, mbwaanga gath caamba cikandilo camisaansa.—In 81:Kat.

H

• Hebrayo.

  Ndizina lyakasaanguna kubelesyegwa kupandulula Abramu (Abrahamu), ikumwiindanya kuli basimukobonyina bana Amori. Kumane lyakabelesyegwa ikupandulula baluzubo lwa Abrahamu kwiinda mumuzyukulu wakwe Jakobo alimwi amwaambo wabo. Mumazuba aa Jesu, imwaambo wa Chihebrayo wakatalika kubikkilizya amabala manji aamu Chiaramu alimwi ngomwaambo ngwaakali kwaambaula Kristo abasikwiiya bakwe.—Mtl 14:13; Ku 5:3; Mil 26:14.

• Herme.

  Ngu leza waba Giriki, imwana wa Zusi. Mu Lustro, Paulo wakali kuyeeyelwa kuti ngu Herme ikwaamba mukuli ngwaakajisi ooyo leza wakuba mutumwa wabaleza alimwi leza uucibwene mukwaambaula.—Mil 14:12.

•  Heroda.

  Ndizina lyamukwasyi wabami bakalela ba Juda kwiinda mukusalwa a Roma. Wakusaanguna wakali Heroda Mupati, uuzyibidwe kapati akaambo kakuyakulula tempele mu Jerusalemu alimwi akulailila kuti bana bajaigwe mukusola kujaya Jesu. (Mt 2:16; Lk 1:5) Heroda Akelawo alimwi a Heroda Antipa, ibana ba Heroda Mupati, bakasalwa kulanganya zibeela zyamubwami bwabausyi. (Mt 2:22) Antipa wakali mweendelezi, kanji-kanji iwakali kwaambwa kuti “mwami,” wakali kulela ciindi camulimo wa Kristo wamyaka yotatwe acisela mane kusikila ciindi cabbuku lya Milimo caandaano 12. (Mk 6:14-17; Lk 3:1, 19, 20; 13:31, 32; 23:6-15; Mil 4:27; 13:1) Kuzwa ciindi eeco, Heroda Agripa Wakusaanguna, muzyukulu wa Heroda Mupati, wakajaigwa kumungelo wa Leza naakamana kulela kwakaindi kasyoonto buyo. (Mil 12:1-6, 18-23) Mwanaakwe, Heroda Agripa Wabili, wakaba mweendelezi alimwi wakalela kusikila ciindi ba Juda nobakazangila Roma.—Mil 23:35; 25:13, 22-27; 26:1, 2, 19-32.

• Heroda, cipani cabasikutobela.

  Alimwi ciitwa kuti ba Heroda. Cakali cipani icakali kugwasyilizya beendelezi bana Heroda mumakanze aabo aatwaambo twacisi mubulelo bwabana Roma. Kulangilwa kuti ba Saduki bamwi bakali mucipani eeci. Ba Heroda bakabasangana ba Farisi mukukazya Jesu.—Mk 3:6.

• Higaiyoni.

  Ndibbala litondezya mbokweelede kwiimbwa. Kweelana ambolibelesyedwe ku Intembauzyo 9:16, ibbala eeli lilakonzya kwaamba buumba, kaimbyo kalilila aansaansi, naa kwiima kwakaindi kaniini ciindi lwiimbo nolulila kutegwa muntu azinzibale kuyeeya.

• Hisopo.

  Ncivwuna cijisi tutabi amatewo mabotu aakali kubelesyegwa kusansaila bulowa naa maanzi mumapobwe aakusalazya. Kulangilwa kuti wakali musamu wa marjoram (Origanum maru; Origanum syriacum). Kweelana ambolibelesyedwe kuli Johane 19:29, ambweni wakalamatide kukatabi naa durra, musyobo wamaila uuzyibidwe kapati (Sorghum vulgare), nkaambo musyobo ooyu wacivwuna wakali kukonzya kuba atusamu tulamfwu mbuli kaako nkobakabelesya kubikka nsinsa iinyikidwe muwaini uupapide wakabikkwa kumulomo wa Jesu.—Ku 12:22; In 51:7.

• Homeri.

  Ncipimyo cazintu ziyumu ceelene adilamu. Kweelana amalita aayeeyelwa kuti nganongo, cileelene amalita aali 220 (tupamela tuli 200). (Le 27:16)—Amubone Makani Aayungizyidwe B14.

• Horebu;

  Cilundu ca Horebu.

  Ncooko camalundu cizingulukide Cilundu ca Sinai. Ndizina limbi lya Cilundu ca Sinai. (Ku 3:1; Dt 5:2)—Amubone Makani Aayungizyidwe B3.

I

• Ibbwe lyakukkona.

  Ndibbwe lyakukkona lyaŋanda aaswaanganina bwaanda, ilyakali kuyandika kapati mukubuswaanganya antoomwe. Ibbwe lyakukkona liyandika kapati lyakali bbwe lyantalisyo lyakukkona; kanji-kanji bbwe liyumu kapati ndilyakali kusalwa mukuyaka mayake aabanamaleya alimwi abwaanda bwamunzi. Ibbala eeli libelesyedwe munzila yacikozyanyo ikwaamba ntalisyo yanyika, alimwi Jesu waambwa kuti “ndebbwe lyantalisyo lyakukkona” lyambungano ya Banakristo, yalo iikozyanisyigwa kuŋanda yakumuuya.—Ef 2:20; Job 38:6.

• Iliriko.

  Ncooko ca Roma icili kunyika lwaambo lya Girisi. Paulo wakasika ooku naakali kucita mulimo wakwe wakukambauka, pele takwaambidwe naa wakakambauka mu Iliriko naa wakasika buyo. (Ro 15:19)—Amubone Makani Aayungizyidwe B13.

• Inkoli yabwami.

  Musako uunyamunwa amuleli kauli citondezyo canguzu zyakweendelezya.—Mtl 49:10; Heb 1:8.

• Israyeli.

  Ndizina Leza ndyaakapa Jakobo. Lyakazooba zina lyakali kwaamba luzubo lwakwe loonse antoomwe. Baluzubo lwabana ba Jakobo bali 12, kanji-kanji bakali kwiitwa kuti Israyeli, bamuŋanda ya Israyeli, bantu (baalumi) ba Israyeli, naa bana Israyeli. Izina lyakuti Israyeli alimwi lyakali kubelesyegwa kwaamba bwami bwakunyika bwamisyobo iili kkumi ibwakazwa kubwami bwakumusanza, alimwi mukuya kwaciindi lyakaba zina liitwa Banakristo bananike, “ba Israyeli ba Leza.”—Ga 6:16; Mtl 32:28; 2Sa 7:23; Ro 9:6.

J

• Jakobo.

  Mwana wa Izaka a Rebeka. Kumbele Leza wakazoomupa zina lyakuti Israyeli, eelyo wakaba syaanyinakulu wabantu bamu Israyeli (alimwi baitwa kuti bana Israyeli, mukuya kwaciindi bakazikwiitwa kuti ba Juda). Wakali usyi wabana bali 12, balo antoomwe abaluzubo lwabo bakapanga misyobo iili 12 yacisi ca Israyeli. Izina lyakuti Jakobo lyakazumanana kubelesyegwa kwaamba cisi naa bantu ba Israyeli.—Mtl 32:28; Mt 22:32.

• Jedutuni.

  Ndibbala litazyibidwe kabotu ncolyaamba ilijanika mututwe twamakani twa Intembauzyo 39, 62, a 77. Tutwe ootu tulibonya kuti malailile aatondezya mboyeelede kwiimbwa intembauzyo naa cibelesyo  cakwiimbya. Kwakali mwiimbi muna Levi iwakali kwiitwa kuti Jedutuni, aboobo kulangilwa kuti malailile aatondezya mboyakeelede kwiimbwa naa ciimbyo icakeelede kubelesyegwa cilamujatikizya walo naa bana bakwe.

• Jehova.

  Ndibbala lyamu Chitonga lyakasandululwa kuzwa ku Tetragrammaton (mabala one aamu Chihebrayo aamba izina lya Leza limugeme), ilijanika ziindi ziinda ku 7,000 mubusanduluzi oobu.—Amubone Makani Aayungizyidwe A4 a A5.

• Joko.

  Ncipulanga cakali kubelesyegwa kunyamuna mikuli agwezyo, mikuli yakali kwaangililwa akuleleenzyegwa kulubazu oolu aloolu, naa cisamu icakali kubelesyegwa kubopa banyama bobilo (kanji-kanji ŋombe) kuti zikwele cibelesyo cakulimya naa cikkocci. Akaambo kakuti bazike bakali kuvwula kubelesya majoko kunyamuna mikuli iilema, joko lyakali kubelesyegwa munzila yacikozyanyo kwaamba buzike naa kubombesyegwa kumuntu umwi, kubikkilizya akudyaamininwa alimwi akupenga. Kugwisya naa kutyola joko kwakali kupandulula kwaangununwa kuzwa mubuzike, kukudyaamininwa, alimwi akukupenzyegwa.—Le 26:13; Mt 11:29, 30.

• Juda.

  Mwana wa Jakobo wane ngwaakazyala a Leya, imukaintu wakwe. Mubusinsimi bwakwe kalaafwaafwi kufwa, Jakobo wakasinsima kuti muleli mupati alimwi uuyoolela lyoonse uyoozwa mumukwasyi wa Juda. Jesu, naakali muntunsi, wakazwa kumusyobo wa Juda. Alimwi zina lyakuti Juda lyaamba musyobo, mpoonya mukuya kwaciindi lyakazikwaamba bwami bwiitwa kuti Juda. Bwaambwa kuti bwami bwakumusanza, Juda wakajisi misyobo yabana Israyeli ba Juda a Benjamini kubikkilizya abapaizi alimwi aba Levi. Ba Juda bakali kukkala kucibeela cakumusanza kwacisi kubikkilizya amunzi wa Jerusalemu alimwi atempele.—Mtl 29:35; 49:10; 1Ba 4:20; Heb 7:14.

K

• Kabaki kabupaizi.

  Aaka nkabaki kali mbuli apuloni nkobakali kusama bapaizi. Mupaizi mupati wakali kusama kabaki kaalubazu, ikakali kubikkwa kasani kabupaizi kaacamba ikakajisi mabwe mayandisi aali 12. (Ku 28:4, 6)—Amubone Makani Aayungizyidwe B5.

• Kagabba.

  Ncipimyo cazintu zitali zyamaanzaanzi icijisi malita aali 1.22 (kapamela komwe), kweelana ansaizi iiyeeyelwa kuba nsaizi yanongo. (2Ba 6:25)—Amubone Makani Aayungizyidwe B14.

• Kaisara.

  Eeli ndizina lyamukwasyi wabana Roma ilyakazooba zina lyabulemu lyabaleli bana Roma. Augusito, Tiberiyo, alimwi a Kilaudiyo balaambidwe mazina aabo mu Bbaibbele, pele nokuba kuti walo Nero taambidwe zina lyakwe, awalo ulaitwa azina eeli. Ibbala lyakuti “Kaisara” alimwi lilabelesyegwa mu Magwalo aa Banakristo aa Chigiriki kwiiminina beendelezi bacisi, naa cisi.—Mk 12:17; Mil 25:12.

• Kakokola.

  Ncipimyo cilampa kuzwa kukakokola kusikila kumpela aamunwe waakati. Kanji-kanji bana Israyeli bakali kubelesya kakokola kalampa masentimita aabalilwa ku 44.5, pele alimwi bakali kubelesya kakokola kapati ikakayungizyidwe bulamfwu busika kubwamba bwajanza, nkokuti masentimita aabalilwa ku 51.8. (Mtl 6:15; Lk 12:25)—Amubone Makani Aayungizyidwe B14.

• Kalonga.

  Caamba kkuti naa ansi aakalonga ikaba buyo amaanzi ciindi camainza; ibbala eeli lilakonzya kwaamba kalonga kukagama. Maanzi aamutulonga tumwi akali kuzwa kutusensa, aboobo twakali kukunka maanzi lyoonse. Zimwi ziindi kalonga kakukkuti kaambwa kuti “kkuti.”—Mtl 26:19; My 34:5; Dt 8:7; 1Ba 18:5; Job 6:15.

• Kanana.

  Muzyukulu wa Nowa, alimwi mwana wane wa Hamu. Mukuya kwaciindi, misyobo iili 11 iyakazwa muli Kanana yakazookkala mucooko cili kujwe aa Mediterranean akati ka Egepita a Siriya. Busena oobu bwakali kwiitwa kuti “nyika ya Kanana.” (Le 18:3; Mtl 9:18; Mil 13:19)—Amubone Makani Aayungizyidwe B4.

• Kasani kabupaizi kaacamba.

  Kakomo kasumidwe kabotu mupaizi mupati wamu Israyeli nkaakali kusama acamba kufwumbwa ciindi naakali kunjila mu Busena Busalala. Kakali kwiitwa kuti “kasani kabupaizi kaacamba kalubeta” nkaambo kakajisi Urimu a Tumimu, zyalo izyakali kubelesyegwa kuzyiba mbeta zya Jehova. (Ku 28:15-30)—Amubone Makani Aayungizyidwe B5.

• Kasidi; Ba Kasidi.

  Kumatalikilo eeyi yakali nyika alimwi abantu bakali kukkala kubusena bwaandaanina mulonga wa Tigrisi awa Firate; mukuya kwaciindi mabala aaya akali kubelesyegwa kwaamba cisi coonse ca Babuloni abantu bakkala mumo. Ibbala lyakuti “Ba Kasidi” alimwi lyakali kwaamba bantu bayiide kapati mumakani aasayaansi, makani aakaindi, myaambo, alimwi alwiiyo lwanyenyeezi azimwi zyakujulu pele ibakali kucita masalamuzi alimwi akupandulula bweende bwanyenyeezi.—Ezr 5:12; Da 4:7; Mil 7:4.

• Kasimpi.

  Nkaambyo kabusongo naa kaano kafwaafwi ikajisi njiisyo naa ikaamba makani mapati aakasimpe kwiinda mukubelesya majwi  masyoonto. Kasimpi kamu Bbaibbele kalakonzya kuba kaambyo kakatazya kumvwisya naa kalabi. Ikaambyo kabikkilizya kasimpe ikaambwa cakusalazya naa munzila yacikozyanyo. Twaambyo tumwi twakaba maambilambali aakufwubaazya naa kunyansya bantu bamwi.—Mu 12:9; 2Pe 2:22.

• Katwe kamakani.

  Aaka nkatwe kamakani kumatalikilo aantembauzyo ikapa makani aajatikizya mulembi wantembauzyo, bukkale bwakaliko, malailile aajatikizya lwiimbo, naa mboyeelede kubelesyegwa ntembauzyo naa mulimo wanjiyo.—Amubone tutwe twamakani twa Intembauzyo 3, 4, 5, 6, 7, 30, 38, 60, 92, 102.

• Kemosi.

  Ngu leza mupati wabana Moabu.—1Ba 11:33.

• Kisilevi.

  Ciindi ba Juda nobakapiluka kuzwa ku Babuloni, eeli ndizina lyamwezi wafwuka mukkalenda njaakabapa Leza ba Juda alimwi mwezi watatu mukkalenda yakunyika. Wakali kutalikila akati kamwezi wa November kusikila akati kamwezi wa December. (Ne 1:1; Zek 7:1)—Amubone Makani Aayungizyidwe B15

• Kkasiya.

  Ncikwa cizwa kucisamu citegwa kkasiya (Cinnamomum cassia), calo cikozyanya acisamu casinamoni. Cisamu cakkasiya cakali kubelesyegwa kupanga mafwuta aanunkilila alimwi amafwuta aasalala aakunanika.—Ku 30:24; In 45:8; Ezk 27:19.

• Kkoce lya Solomoni.

  Mutempele lyakuciindi ca Jesu, oobu bwakali busena bwakwiinda bwakavwumbidwe ibwakali kujwe kwalubuwa lwaanze, ibwakali kuyeeyelwa abantu banji kuti ncibeela cakasyeede catempele lya Solomoni. Jesu wakainda ‘mumo ciindi camupeyo’ alimwi Banakristo bakusaanguna bakali kubunganina mumo kuti bakombe. (Joh 10:22, 23; Mil 5:12)—Amubone Makani Aayungizyidwe B11.

• Koonana ikutali kwamumulawo.

  Mu Chigiriki nkokuti, por·neiʹa, mu Magwalo ndibbala libelesyegwa kwaamba micito imwi yakoonana njakasya Leza. Kulabikkilizya abumambe, buvwuule, koonana kwabantu batakwetene, koonana kwabantu bakozyenye zizo, alimwi akoonana abanyama. Munzila yacikozyanyo, ibbala eeli lilabelesyegwa mubbuku lya Ciyubunuzyo kujatikizya muvwuule mumakani aabukombi uutegwa “Babuloni Mupati” ikupandulula muvwuule uuyanzana abaleli banyika eeyi kutegwa apegwe nguzu zyakweendelezya alimwi amali. (Ciy 14:8; 17:2; 18:3; Mt 5:32; Mil 15:29; Ga 5:19)—Amubone MUVWUULE.

• Kristo.

  Eeli ndizina lyabulemu lya Jesu, ilizwa kubbala lya Chigiriki lyakuti Khri·stosʹ, lyalo ilyaamba cintu comwe abbala lya Chihebrayo lisandulwidwe kuti “Mesiya,” naa “Munanike.”—Mt 1:16; Joh 1:41.

• Kubako.

  Ziindi zimwi mu Magwalo aa Banakristo aa Chigiriki, ibbala eeli lyaamba kubako kwa Jesu Kristo kali mwami kuzwa ciindi ncaakabikkwa aacuuno cabwami kali Mwami Mesiya kuyakumbele mumazuba aamamanino aabweende bwazintu oobu. Kubako kwa Kristo takwaambi kuboola kwaciindi cisyoonto buyo mpoonya akupiluka cakufwambaana; muciindi caboobo, kujatikizya ciindi cigaminide cili mbocibede.—Mt 24:3.

• Kubelekela Leza cakulyaaba.

  Kumuyoowa, kumukomba, alimwi akumubelekela Jehova Leza, akusyomeka kubweendelezi bwakwe bwabubumbo boonse.—1Ti 4:8; 2Ti 3:12.

• Kubikka maanza.

  Maanza akali kubikkwa amuntu ikumusala kuti abeleke mulimo waalubazu naa kuti alongezyegwe, aponesyegwe, naa kupegwa cipego camuuya uusalala. Zimwi ziindi maanza akali kubikkwa abanyama kabatanapaizyigwa.—Ku 29:15; My 27:18; Mil 19:6; 1Ti 5:22.

• Kucita cinyonyoono; Cinyonyoono.

  Nkusotoka mulawo uubikkidwe; kucita cintu citeendelani amulawo. Cilikozyene kapati a “cibi” caambwa mu Bbaibbele.—In 51:3; Ro 5:14.

• Kukwata mulamwe mukamufwu.

  Eeci ncilengwa, kumbele icakazikubikkilizyigwa mu Mulawo wa Musa, calo cakali kwaamba kuti mwaalumi akwate mulamwaakwe mukamufwu uutajisi mwana musankwa kutegwa amuzyalile bana kucitila kuti izina lyamunyina litafwi.—Mtl 38:8; Dt 25:5.

• Kulibambila.

  Ndizina lyabuzuba ibwakali kutobelwa abuzuba bwa Sabata ba Juda mbobakali kulibambila. Buzuba oobu bwakali kumana kumangolezya mubuzuba ibwiitwa kuti Bwasanu mazuba aano, iciindi Sabata noyakali kutalika. Buzuba bwaba Juda bwakali kutalika kumangolezya kusika kumangolezya aatobela.—Mk 15:42; Lk 23:54.

• Kuliimya kulya.

  Eeci caamba kutalya cakulya cili coonse kwaciindi cili mbocibede. Bana Israyeli bakali kuliimya kulya mu Buzuba Bwakumanya Milandu, muziindi zyakuusa, alimwi aciindi nobakali kuyandika busolozi bwa Leza. Ba Juda bakabikka ziindi zyone zyakuliimya kulya mumwaka kuyeeya mazuba aakupenzyegwa kwabo. Kuliimya kulya tacili ceelelo ku Banakristo.—Ezr 8:21; Is 58:6; Lk 18:12.

• Kulila.

  Ncitondezyo cakuusa akaambo kalufwu naa mapenzi amwi buyo. Kaindi, nolyakali kulembwa Bbaibbele, cakali cilengwa buya  cakulila kwaciindi cilimbocibede. Kunze lyakukwiila buya kulila, basikulila bakali kusama zisani zyamalila, kulitila mulota kumutwe, kuzapaula zisani zyabo, alimwi akulyuuma acamba. Ibacibwene kulila zimwi ziindi bakali kutambwa kumalila.—Mtl 23:2; Es 4:3; Ciy 21:4.

• Kumanya milandu.

  Mu Magwalo aa Chihebrayo, muzeezo uuli mumabala aaya wakaliswaangene azipaizyo izyakali kupegwa kutegwa bantu bazumizyigwe kumusikila Leza akumukomba. Kweelana a Mulawo wa Musa, izipaizyo zyakali kutuulwa ciindi comwe amwaka mu Buzuba Bwakumanya Milandu kutegwa bayanzanisyigwe a Leza nokuba kuti bantu alimwi acisi coonse bakajisi zibi. Eezyi zipaizyo zyakali kwiiminina cipaizyo ca Jesu, calo icakamanya cibi cabantu ciindi comwe mane kukabe kutamani, ikupa bantu coolwe cakuyanzana a Jehova.—Le 5:10; 23:28; Kol 1:20; Heb 9:12.

• Kumanya zibi.​—

  Amubone KUMANYA MILANDU

• Kunanika.

  Ibbala lya Chihebrayo ilyaamba “kunana mafwuta.” Mafwuta akali kutilwa amuntu naa acintu ikutondezya kwaabwa kucita mulimo waalubazu. Mu Magwalo aa Banakristo aa Chigiriki, ibbala eeli alimwi lilabelesyegwa kwaamba kutila muuya uusalala kuli baabo basalwa kuba abulangizi bwakujulu.—Ku 28:41; 1Sa 16:13; 2Ko 1:21.

• Kupalulwa.

  Eeci caamba kugwisya lulomo lwakubwaalumi. Leza wakapa Abrahamu aluzubo lwakwe mulawo wakupalulwa, pele ku Banakristo tacili ceelelo buya kupalulwa pe. Alimwi ziindi zimwi lilabelesyegwa munzila yacikozyanyo.—Mtl 17:10; 1Ko 7:19; Flp 3:3.

• Kusalala 1.

  Kweelana ambolibesyegwa mu Bbaibbele, ibbala eeli talyaambi buyo kusalala kwakumubili, pele alimwi lyaamba kulibamba naa kuzumanana kuba muciimo cakubula kampenda, kabala, alimwi acintu cili coonse cilaatombe, cibisya, naa cisofwaazya mukulilemeka naa munzila yakumuuya. Mu Mulawo wa Musa, ibbala eeli lyaamba kusalala muzilengwa.—Le 10:10; In 51:7; Mt 8:2; 1Ko 6:11.

• Kusalala 2.

  Mbube mbwajisi Jehova; ciimo cakusalala mukulilemeka alimwi akusetekana. (Ku 28:36; 1Sa 2:2; Tu 9:10; Is 6:3) Ciindi nolyaamba bantu (Ku 19:6; 2Ba 4:9), banyama (My 18:17), zintu (Ku 28:38; 30:25; Le 27:14), masena (Ku 3:5; Is. 27:13), ciindi (Ku 16:23; Le 25:12), alimwi amilimo (Ku 36:4), ibbala lyakusaanguna lya Chihebrayo lipa muzeezo wakwaandaana, cintu cizandukide, naa cisalede kuli Leza uusalala; iciimo cacintu cibikkidwe ambali kutegwa cibelesyegwe mumulimo wa Jehova. Amwalo mu Magwalo aa Banakristo aa Chigiriki, ibbala lyaamba “kusalala” litondezya kuzandulwa kuba wa Leza. Bbala eeli alimwi lilabelesyegwa kwaamba kusalala kwabukkale bwamuntu.—Mk 6:20; 2Ko 7:1; 1Pe 1:15, 16.

• Kusinganya.

  Nkukonga naa kwaamba kuti muntu naa cintu cicitikilwe zintu zibi. Kusinganya tacaambi kutukila naa bukali bwakuzwa munzila. Kusinganya kanji-kanji caamba lubeta naa ikwaamba zintu zibi ziyoocitika kumbele, alimwi kuti kwacitwa aa Leza naa muntu umwi uupedwe nguzu, kulabeleka alimwi kulaanguzu mbuli businsimi.—Mtl 12:3; My 22:12; Ga 3:10.

• Kusofwaala.

  Kulakonzya kwaamba kuba atombe kumubili naa kutyola milawo iijatikizya kulilemeka. Mu Bbaibbele, ibbala eeli kanji-kanji lyaamba cintu citazumizyidwe, naa cintu citasalali, kweelana a Mulawo wa Musa. (Le 5:2; 13:45; Mt 10:1; Mil 10:14; Ef 5:5)—Amubone KUSALALA.

• Kutolwa mubuzike.

  Nkutandwa kuzwa mucisi cokwanu naa aŋanda, kanji-kanji abasikuzunda munkondo. Ibbala lya Chihebrayo lyaamba “kusiya.” Bana Israyeli bakatolwa mubuzike ziindi zyobilo. Bwami bwakunyika bwamisyobo iili kkumi bwakatolwa mubuzike abana Asuri, mpoonya kumbele bwami bwakumusanza bwamisyobo yobilo bwakatolwa mubuzike abana Babuloni. Ibantu ibakasyeede ibakazwa mumisyobo eeyo yobilo bakapilusyigwa kucisi cokwabo kwiinda mukusololelwa a Koresi, muleli wa Persia.—2Ba 17:6; 24:16; Ezr 6:21.

• Kuuma maila.​—Lubuwa lwakuumina maila.

  Eeyi ninzila yakali kubelesyegwa kugwisya maila kuzwa kumakuba amakwa; ibusena mulimo ooyu nkowakali kucitilwa. Kuuma kwakali kucitwa amaanza kubelesya nkoli, naa ikuti kaali manji maila bakali kubelesya zibelesyo zilibedelede, mbuli cileyi icikwelwa abanyama. Cibelesyo cakali kulyatauka maila aakayalidwe ansi mulubuwa lwakuumina maila, ibusena bunji bwaziindi bwakali atala aainda muwo.—Le 26:5; Is 41:15; Mt 3:12.

• Kuvwulula.

  Nkubwezelela zyakulya nzyobakasiya basikutebula acaali naa cakutazyiba. Mulawo wa Musa wakalailila bantu kuti tiibakeelede kumanizyila limwi kutebula naa kubwezelela misaansa naa maolifa aakali kulokela ansi. Bantu bacete, bapengede, bamuzwakule, bamucaala, alimwi abamukabafwu bakalipedwe nguzu kuli Leza zyakuvwulula zilyo zyasyaala kutebula kwamana.—Ru 2:7.

•  Kweempwa.

  Kweelana ambolibelesyegwa mu Bbaibbele, lyaamba kucinca maano ikweendelana akuusa kuzwa ansi aamoyo akaambo kabuumi mbwaakali kupona muntu musyule, micito mibi, naa akaambo kakwaalilwa kucita cintu cimwi. Muntu weempwa ncobeni ulatondezya micelo yeendelana akweempwa, kucinca naa kuleka kucita zintu zibi.—Mt 3:8; Mil 3:19; 2Pe 3:9.

L

• Lepita.

  Mu Magwalo aa Banakristo aa Chigiriki, nkakkobili kasyoonto kaba Juda kamukuba naa mukuba uuvwelene alubulo. Muma Bbaibbele amwi lyakasandululwa kuti “tuli tuniini.” (Mk 12:42; Lk 21:2; bupanduluzi buyungizyidwe.)—Amubone Makani Aayungizyidwe B14.

• Levi; Mu Levi.

  Mwana wa Jakobo watatu ngwaakazyala a Leya, mukaintu wakwe; alimwi amusyobo wakaulikwa zina lyakwe. Bana bakwe botatwe mbabakatalisya nkamu zipati zyotatwe ziitwa kuti bupaizi bwabana Levi. Zimwi ziindi, mabala aakuti “bana Levi” alabelesyegwa kwaamba musyobo woonse, pele kutabikkilizya mukwasyi wa Aroni wabapaizi. Musyobo waba Levi kunyina nowakapegwa cibeela canyika mu Nyika Yakasyomezyedwe pele bakapegwa minzi iili 48 yakali munyika eeyo yakapegwa misyobo imbi.—Dt 10:8; 1Mk 6:1; Heb 7:11.

• Leviyatani.

  Munyama bunji bwaziindi uuyandisya kukkala mumaanzi, ambweni cilenge camumaanzi. Kuli Jobu 3:8 a 41:1, kulibonya kuti lyaamba ciwena naa cilenge cimbi camumaanzi cipati alimwi cijisi nguzu. Ku Intembauzyo 104:26, kulibonya kuti musyobo umwi wamuswi mupati kapati. Mumagwalo aambi lilabelesyegwa munzila yacikozyanyo alimwi talikonzyi kwaambwa kuba munyama uuli woonse.—In 74:14; Is 27:1.

• Leza mwini-mwini.

  Mabala aabelesyegwa kwaamba “Leza” mu Chihebrayo. Bunji bwaziindi mabala aaya alabelesyegwa kwiindanya Jehova, Leza mwini-mwini alikke abaleza bakubeja. Mabala aakuti “Leza mwini-mwini” atondezya cini ncolyaamba bbala lya Chihebrayo mumasena aayo.—Mtl 5:22, 24; 46:3; Dt 4:39.

• Lubbapatizyo; Kubbapatizya.

  Caamba “kubbizya,” naa kunyika mumaanzi. Jesu wakaamba kuti basikumutobela beelede kubbapatizyigwa. Magwalo alimwi aamba zyalubbapatizyo lwa Johane, kubbapatizyigwa amuuya uusalala, kubbapatizyigwa amulilo alimwi alubbapatizyo lumbi.—Mt 3:11, 16; 28:19; Joh 3:23; 1Pe 3:21.

• Lubuwa.

  Oobu mbusena bwakayakilidwe lukwakwa ibwakazingulukide tente lyakukombela, alimwi kumbele ibwakayakilidwe bwaanda ibuzinguluka tempele. Cipaililo cazituuzyo zyuumpwa cakali mulubuwa lwatente lyakukombela alimwi amulubuwa lwamukati lwatempele. (Amubone Makani Aayungizyidwe B5, B8, B11.) Ibbaibbele alimwi lyaamba mabuwa nolyaamba kujatikizya maanda buyo alimwi amaanda aabami.—Ku 8:13; 27:9; 1Ba 7:12; Es 4:11; Mt 26:3.

• Lufwulu.

  Ncipimyo cisyoonto kapati cakupimya zintu zyamaanzaanzi icaambidwe mu Bbaibbele. Mu Talmud yaci Juda, cipandululwa kuti ngu 1/12 yansazi, aboobo kweelede kuti lufwulu lujisi malita aali 0.31. (Le 14:10)—Amubone Makani Aayungizyidwe B14.

• Lugwalo (Magwalo).

  Malembe aasalala aa Jwi lya Leza. Ibbala eeli lijanika buyo mu Magwalo aa Banakristo aa Chigiriki.—Lk 24:27; 2Ti 3:16.

• Luleyo.

  Ibbala eeli mu Chigiriki (a·po·sta·siʹa) lizwa kubbala ilyaamba “kuzanduka.” Ibbala eeli lijisi muzeezo wa “kusiya, kuleya, naa kuzanga.” Mu Magwalo aa Banakristo aa Chigiriki, ibbala lyakuti “luleyo” lilabelesyegwa kwaamba baabo ibasiya bukombi bwakasimpe.—Tu 11:9; Mil 21:21; 2Te 2:3.

• Lumano.

  Ncibelesyo cakapangidwe angolida, icakali kubelesyegwa kuzima malampi mutente lyakukombela alimwi amutempele.—Ku 37:23.

• Luyando lutamani.

  Bunji bwaziindi lizwa kubbala lya Chihebrayo lyakuti cheʹsedh, ikwaamba luyando luboola akaambo kakulyaaba, kusyomeka alimwi akukakatila. Kanji-kanji lilabelesyegwa kwaamba luyando Leza ndwajisi kubantu, alimwi aluyando ndobatondezyanya bantu.—Ku 34:6; Ru 3:10.

• Luzyalo lwa Leza.

  Ibbala lya Chigiriki lijisi muzeezo mupati wacintu cikondelezya alimwi cibotu kapati. Ibbala eeli livwula kubelesyegwa kwaamba cipego capegwa akaambo kalubomba naa ikupa calubomba. Ikuti naa lyabelesyegwa kujatikizya luzyalo lwa Leza, ibbala eeli lyaamba cipego Leza ncapa cabuuya, kakunyina kulangila kuti abbadelwe. Aboobo, ncitondezyo citondezya Leza mbwali mwaabi munzila zinji kapati alimwi aluyando lupati alubomba ndwajisi kubantu. Ibbala lya Chigiriki alimwi lilaambwa kubelesya mabala mbuli “kukkomanina” alimwi “acipego cipegwa akaambo kalubomba.” Taluvwolwi alimwi talutondezyegwi kumuntu akaambo kakuti uleelela, pele lulaboola akaambo kabuuya bwasikupa.—2Ko 6:1; Ef 1:7.

•  Lwiimbo lwa Basikutanta.

  Nkatwe kamakani ikali ku Intembauzyo 120 kusikila ku 134. Nokuba kuti kuli mizeezo iiliko kujatikizya ncaamba mabala aaya, banji basyoma kuti ntembauzyo eezyi zili 15 zyakaimbwa abakombi bana Israyeli bakkomene, ciindi nobakali “kukkwezyeka” kuya kumunzi wa Jerusalemu, walo wakali atala mumalundu aa Juda, ikutegwa bakajanike kumapobwe mapati otatwe aakali kucitwa amwaka.

• Lwiimbo lwabuumba.

  Ndwiimbo lutondezya kuusa kwamuntu mbuli kuusa ikutondezyegwa akaambo kakufwidwa mulongwe naa muyandwa; lwiimbo lwamalila.—2Sa 1:17; In 7:Kat.

• Lwija.

  Caamba meja aabanyama, aakali kubelesyegwa kunywida, kubikkila mafwuta, kubikkila inki amafwuta aakulibotya, alimwi mbuli ciimbyo naa cizyibyo. (1Sa 16:1, 13; 1Ba 1:39; Ezk 9:2) “Lwija” kanji-kanji lulabelesyegwa kwiiminina nguzu, alimwi akuzunda.—Dt 33:17; Mik 4:13; Zek 1:19.

M

• Maboko obilo aalandabulwidwe.

  Ncipimyo cakupimya bulamfwu bwamaanzi, ceelene amita lyomwe amasentimita aali 80. (Mil 27:28)—Amubone Makani Aayungizyidwe B14.

• Mabwe mayandisi aamulwizi.

  Ncintu ciyumu icipangwa kuzwa kutufwuwa twabanyama basyoonto-syoonto bamulwizi. Alajanika mulwaanje mumibala iisiyene-siyene mbuli mubala uusubila, uutuba, alimwi ausiya. Mabwe mayandisi aamulwizi akali kujanika kapati mu Lwizi Lusalala. Ciindi Bbaibbele nolyakali kulembwa, mabwe mayandisi aamulwizi aasubila akali kuyandika kapati alimwi akali kubelesyegwa kupanga bulungu azilisakatizyo zimwi.—Tu 8:11.

• Madaimona.

  Nzilenge zyamuuya zibi izijisi nguzu zinji kwiinda bantu. Ziitwa kuti “bana ba Leza mwini-mwini” mulugwalo lwa Matalikilo 6:2 alimwi akuti “bangelo” mulugwalo lwa Juda 6, tiibakalengwa kabali babi; muciindi caboobo, mbangelo bakalipanga kuba basinkondonyina a Leza kwiinda mukutamumvwida mumazuba aa Nowa alimwi akusangana Saatani mukuzangila Jehova.—Dt 32:17; Lk 8:30; Mil 16:16; Jak 2:19.

• Mahalati.

  Ibbala lijatikizya kwiimba ilijanika mututwe twamakani twa Intembauzyo 53 alimwi a 88. Ambweni liliswaangene amusemu wabbala lya Chihebrayo ilyaamba “kutebela; kuciswa,” aboobo lileta muzeezo wakweetezya naa wakuusa, iweendelana amajwi aayetezya aamunyimbo zyobilo.

• Maina.

  Ncakupimya kulema kwacintu alimwi akubala mali. Kuzwa mubumboni bwazintu zyansiku zyakasyigwa, maina yakeelene amasyekeli aali 50 alimwi yakali kulema magilamu aali 11.4, maina yamu Magwalo aa Chihebrayo yakali kulema magilamu aali 570. Alimwi kuboneka kuti kwakali maina yakali kubelesyegwa amwami, mbubonya mbocibede kukakokola. Mu Magwalo aa Banakristo aa Chigiriki, maina yakeelene amadirakima aali 100. Yakali kulema magilamu aali 340. Mamaina aali 60 akaleelene atalenta lyomwe. (Ezr 2:69; Lk 19:13)—Amubone Makani Aayungizyidwe B14.

• Makani mabotu.

  Mu Magwalo aa Banakristo aa Chigiriki, aamba makani mabotu aa Bwami bwa Leza alimwi aalufwutuko kwiinda mukuba alusyomo muli Jesu Kristo.—Lk 4:18, 43; Mil 5:42; Ciy 14:6.

• Makedoniya.

  Ncooko cili kunyika kwacisi ca Girisi icakaba ampuwo mubulelo bwa Alekizanda Mupati alimwi cakazumanana kulilela kusikila ciindi nocakazundwa aba Roma. Makedoniya cakali cooko ca Roma ciindi mwaapostolo Paulo naakaunka ku Europe ciindi cakusaanguna. Paulo wakaswaya kubusena oobu ziindi zyotatwe. (Mil 16:9)—Amubone Makani Aayungizyidwe B13.

• Maleele; Milimo mipati.

  Milimo naa zintu zitakonzyi kucitika munguzu zyabantu aboobo zyaambwa kuti zyacitwa munguzu zitali zyabantu. Mabala mbuli aakuti “citondezyo,” “citondezyo cazintu ziyoocitika kumbele,” alimwi a “cintu cigambya” ziindi zimwi alabelesyegwa kwaamba cintu comwe mu Bbaibbele.—Ku 4:21; Mil 4:22; Heb 2:4.

• Malikamu

  Ambweni ngo Moleki, leza mupati wabana Amoni. (Zef 1:5)—Amubone MOLEKI.

• Malundu aa Lebano.

  Ngamwi aamalundu obilo aakunyika lya Lebano. Mulundu umwi wa Lebano uli kumbo mpoonya umwi uli kujwe lya Lebano. Kuli kkuti lilamfwu lijisi mbolezi ilyaandaanya malundu aaya obilo. Malundu aa Lebano atalikila kunkomwe ya lwizi lwa Mediterranean, alimwi kusika ansonje yamalundu aaya kuli musinzo uulampa mamita aali 1,800 alimwi a 2,100. Kaindi, Lebano wakajisi masamu aakkedari manji alo ngobakali kuyandisya kapati bantu ibakali kukkala muzisi zyakazingulukide busena oobu. (Dt 1:7; In 29:6; 92:12)—Amubone Makani Aayungizyidwe B7.

• Mamanino aabweende bwazintu.

  Nciindi cisololela kumamanino eeni aabweende bwazintu, naa bukkale buliko, ibweendelezyegwa a Saatani. Ceendelaamwi akubako kwa Kristo.  Kwiinda mukusololelwa a Jesu, bangelo ‘bayakwaandaanya babi kuzwa kubaluleme’ akubanyonyoona. (Mt 13:40-42, 49) Basikwiiya ba Jesu bakaliyandide kuzyiba ciindi eeco “camamanino.” (Mt 24:3) Katanajokela kujulu, wakasyomezya basikumutobela kuti unooli ambabo kusikila kuciindi eeco.—Mt 28:20.

• Mana.

  Cakali cakulya ncobakali kulya bana Israyeli ciindi nobakali munkanda kwamyaka iili 40. Jehova ngowakali kubapa. Munzila yamaleele, cakali kujanika ansi lyoonse mafwumofwumo kutali buyo mubuzuba bwa Sabata. Ciindi bana Israyeli nobakacibona cakulya eeci ciindi cakusaanguna bakati, “Ino ncinzi eeci?” naa, mu Chihebrayo, “man huʼ?” (Ku 16:13-15, 35) Mumagwalo aambi, caambwa kuti “maila aakujulu” (In 78:24), “cinkwa cizwa kujulu” (In 105:40), “cinkwa cabasinguzu” (In 78:25). Awalo Jesu wakaamba mana munzila yacikozyanyo.—Joh 6:49, 50.

• Mapenzi mapati.

  Ibbala lya Chigiriki ilyakasandululwa kuti “mapenzi” lipa muzeezo wamakatazyo naa kupenga kuboola akaambo kabukkale bukatazya. Jesu wakaamba zya “mapenzi mapati” aatanacitikide aakali kuyooboola mu Jerusalemu alimwi kwaambisya mapenzi aakali kuyoosikila bantu ciindi walo aakuboola “abulemu.” (Mt 24:21, 29-31) Paulo wakapandulula mapenzi aaya kuti mulimo wa Leza uululeme wakusubula “baabo batamuzyi Leza abaabo bataswiilili makani mabotu” aajatikizya Jesu Kristo. Lugwalo lwa Ciyubunuzyo caandaano 19 lutondezya Jesu kasololela impi zyabasikalumamba bakujulu kuyoolwana “munyama abami bamunyika ampi zyabo zyabasikalumamba.” (2Te 1:6-8; Ciy 19:11-21) “Nkamu mpati yabantu” ilitondezyedwe kaifwutuka mapenzi mapati aayo. (Ciy 7:9, 14)—Amubone AMAGEDONI.

• Masena aakukombela.

  Mbusena bwakukombela kanji-kanji buli atala aakalundu, cilundu, naa cibumbili cakulipangila. Nokuba kuti zimwi ziindi masena aakukombela akali kubelesyegwa kukomba Leza, kanji-kanji aliswaangene abukombi bwabaleza bakubeja.—My 33:52; 1Ba 3:2; Je 19:5.

• Maseseke aa Leza.

  Ncibeela camakanze aa Leza, aasisidwe kusikila ciindi ncabikkide, eelyo ulabayubunwida aabo mbasala kuyubunwida.—Mk 4:11; Kol 1:26.

• Masikili.

  Ndibbala lya Chihebrayo ilitazyibidwe kabotu ncolyaamba mututwe twamakani twa ntembauzyo zili 13. Ambweni lyaamba “kweema cakuzinzibala kuyeeya.” Bamwi bayeeya kuti ibbala likozyene andilyo ilyakasandululwa kuti, ‘kubeleka cakucenjela,’ lilakonzya kuti lileendelana ancolyaamba.—2Mk 30:22; In 32:Kat.

• Mazuba aakumamanino.

  Aaya majwi alimwi aamwi aakozyenye ayaaya, mbuli aakuti “kumamanino aamazuba,” alibelesyedwe mubusinsimi bwamu Bbaibbele ikwaamba ciindi zintu zipati-pati noziyoosika kumamanino. (Ezk 38:16; Da 10:14; Mil 2:17) Ciya buyo abusinsimi mbobubede, eeci cilakonzya kuba ciindi citola buyo myaka misyoonto naa minji. Ibbaibbele lilabelesya majwi aaya ikwaamba “mazuba aakumamanino” aabweende bwazintu oobu, ciindi cakubako kwa Jesu kutalibonyi.—2Ti 3:1; Jak 5:3; 2Pe 3:3.

• Mbungano 1.

  Ninkamu yabantu babungana antoomwe akaambo kamakanze amwi naa kuti bacite cintu cimwi. Mu Magwalo aa Chihebrayo, kanji-kanji lyaamba cisi cabana Israyeli. Mu Magwalo aa Banakristo aa Chigiriki, lyaamba mbungano imwi aimwi ya Banakristo pele kanji-kanji mbungano ya Bunakristo.—1Ba 8:22; Mil 9:31; Ro 16:5.

• Mbungano 2.

  Ninkamu yabantu ibabungana antoomwe kwiinda mukuzuminana. Mu Magwalo aa Chihebrayo, ibbala eeli kanji-kanji lyaamba miswaangano yabana Israyeli ciindi camapobwe aabukombi naa miswaangano imwi mipati iijatikizya cisi coonse.—Dt 16:8; 1Ba 8:5.

• Mediya; Ba Medi.

  Mbantu ibakazwa muli Madai, imwana wa Jafeti; bakali kukkala mucooko camalundu ca Iran icakaba cisi ca Mediya. Ba Medi bakasangana abana Babuloni kuzunda Asuri. Kuciindi eeco, cisi ca Persia cakali cooko cakali kweendelezyegwa a Mediya, pele Koresi wakazanga aboobo cisi ca Mediya cakasangana acisi ca Persia akupanga bwami bwa Mediya a Persia ibwakazunda bwami bwa Babuloni mu 539 B.C.E. Ba Medi bakaliko ku Jerusalemu ciindi ca Pentekoste mu 33 C.E. (Da 5:28, 31; Mil 2:9)—Amubone Makani Aayungizyidwe B9.

• Meja aacipaililo.

  Ncintu cili mbuli lwija icilangide anze kuzwa mumakkona one aazipaililo zimwi. (Le 8:15; 1Ba 2:28)—Amubone Makani Aayungizyidwe B5 a B8.

• Merodaki.

  Nguleza mupati wamumunzi wa Babuloni. Mwami wa Babuloni alimwi asikupanga mulawo Hammurabi naakamana kupanga Babuloni kuba munzi mupati wacisi ca Babuloni, Merodaki (naa, Marduki) wakaba aampuwo, wakalya busena bwabaleza banji ibakali kumbele lyakwe eelyo wakaba ngoleza mupati wabaleza banji baku Babuloni. Mukuya kwaciindi, izina lya Merodaki (naa, Marduki) lyakacincigwa akuba zina lyabulemu  lyakuti “Belu” (nkokuti “Mukamwini”), alimwi Merodaki wakali kuvwula kwiitwa kuti Beli.—Je 50:2.

• Mesiya.

  Ndibbala lyakazwa kubbala lya Chihebrayo ilyaamba “munanike” naa “muntu uunanikidwe.” “Kristo” ndibbala lya Chigiriki ilyaamba Mesiya.—Da 9:25; Joh 1:41.

• Micelo mitaanzi.

  Micelo yakusaanguna ciindi cakutebula; zintu zyakusaanguna zyacintu cili coonse. Jehova wakali kuyanda kuti bana Israyeli kabapa micelo yabo mitaanzi kulinguwe, kufwumbwa naa muntu, munyama, naa micelo yaansi. Mbuli cisi, bana Israyeli bakali kupa micelo mitaanzi kuli Leza ciindi ca Pobwe lya Zinkwa Zitajisi Bumena alimwi alya Pentekoste. Ibbala lyakuti “micelo mitaanzi” alimwi lyakabelesyegwa munzila yacikozyanyo kwaamba Kristo abasikumutobela bananike.—1Ko 15:23; My 15:21; Tu 3:9; Ciy 14:4.

• Mikitamu.

  Ndibbala lya Chihebrayo ilyakabelesyegwa mututwe twamakani twantembauzyo zili cisambomwe (In 16, 56-60). Ndibbala litazyibidwe cini ncolyaamba, nokuba boobo kulangilwa kuti lilikozyenye abbala lyaamba “cintu cizekawidwe.”

• Milikomu.

  Nguleza iwakali kukombwa abana Amoni, ambweni ngomunya ngo Moleki. (1Ba 11:5, 7) Kaalaafwaafwi mamanino aakulela kwakwe, Solomoni wakayakila leza ooyu wakubeja masena aakukombela.—Amubone MOLEKI.

• Minzi yamayubilo.

  Eeyi minzi yaba Levi ooko muntu iwajaya mweenzinyina ikutali acaali, nkwaakali kukonzya kutijila kuti akwabililwe kuli sikupilusya mulandu wabulowa. Minzi iili cisambomwe iili boobu iyakaliko mu Nyika Yakasyomezyedwe, yakasalwa a Musa alimwi kumbele yakazoosalwa a Joshua kwiinda mukulaililwa a Jehova. Sikutija mbwaasikila buyo kumunzi wamayubilo, wakali kubaambila mulandu wakwe bapati bamunzi kacili kumulyango alimwi wakali kutambulwa kabotu. Ikutegwa basikujaya beenzinyina acaali batabubelesyi bubambe oobu, sikutija wakeelede kubetekwa mumunzi mwaakajaila mweenzinyina kutegwa basinizye kuti taakacitila caali. Ikuti wajanwa kuti unyina mulandu, wakali kupilusyigwa kumunzi wamayubilo ooko nkwaakeelede kukkala buumi bwakwe boonse naa kusikila akafwe mupaizi mupati.—My 35:6, 11-15, 22-29; Jos 20:2-8.

• Mituni; Kukomba mituni.

  Mutuni ncikozyanyo ciiminina cintu cimwi, iciliko ncobeni naa cakuyeeyela buyo ibantu ncobakonzya kubelesya mukukomba. Kukomba mituni caamba kulemeka, kuyanda, kukomba, naa kutembaula cibumbwa.—In 115:4; Mil 17:16; 1Ko 10:14.

• Mizimo.

  Ikusyoma kuti myuuya yabantu bafwide ilazumanana kupona alimwi akuti ilakonzya kubandika abantu baumi, kwaambisya kwiinda mumuntu (naa cintu cakusondya) weendelezyegwa anjiyo. Ibbala lya Chigiriki lisandululwa kuti “kusyoma mizimo” ndyakuti phar·ma·kiʹa, ilyaamba “kubelesya misamu iikola.” Eeli bbala lyakajatikizyigwa amizimo nkaambo kaindi, misamu iikola yakali kubelesyegwa ciindi nobakali kulomba nguzu zyamadaimona kuti balowe.—Ga 5:20; Ciy 21:8.

• Moleki.

  Nguleza wabana Amoni; kulangilwa kuti ngonguwe Malikamu, Milikomu alimwi a Moloki. Ambweni ndizina lyabulemu ikutali zina ligaminide lyaleza umwi. Mulawo wa Musa wakabikkide cisubulo calufwu kumuntu uuli woonse wakali kupaizya banabakwe kuli Moleki.—Le 20:2; Je 32:35; Mil 7:43.

• Moloki.​—

  —Amubone MOLEKI.

• Mpumpu.

  Ooyu mutwe iwakali kubotezya musemu. Misemu iikozyenye eeyo iyakali kwiitwa kuti Jakini a Boazi, yakali kumbele lyatempele lya Solomoni. (1Ba 7:16)—Amubone Makani Aayungizyidwe B8.

• Mu Juda.

  Ndibbala lyakali kubelesyegwa kwaamba muntu wamusyobo wa Juda ciindi misyobo iili kkumi yabwami bwa Israyeli noyakazundwa. (2Ba 16:6) Nobwakamana buzike ku Babuloni, lyakali kubelesyegwa kwaamba bana Israyeli bazwa mumisyobo iisiyene-siyene ibakapilukila ku Israyeli. (Ezr 4:12) Mukuya kwaciindi, lyakali kubelesyegwa munyika yoonse kwaandaanya bana Israyeli kuzisi zya Bamasi. (Es 3:6) Bbala eeli lyakabelesyegwa alimwi amwaapostolo Paulo munzila yacikozyanyo ciindi naakali kutondezya kuti musyobo wamuntu taukwe makani mumbungano ya Bunakristo.—Ro 2:28, 29; Ga 3:28.

• Mu Naziri.

  Ibbala eeli ndya Chihebrayo ilyaamba muntu ‘Uusalidwe,’ “Waabidwe,” “Waandaanizyidwe.” Kwakali misyobo yobilo yaba Naziri: kwakali baabo bakalisalila alimwi abaabo bakali kusalwa a Leza kuti babe boobo. Musankwa naa mukaintu wakali kukonzya kukonka kuli Jehova kuti unoopona mbuli mu Naziri kwaciindi cili mbocibede. Aabo ibakali kulisalila kukonka, kuli zintu zyotatwe nzyobatakali kuzumizyigwa kucita: tiibakeelede kunywa bukoko naa kulya cintu cili coonse cizwa kumusaansa, tiibakeelede kugela masusu aabo, alimwi tiibakeelede kujata mutunta. Aabo bakasalwa aa Leza kuba ba Naziri bakazumanana kuba boobo mazuba aabo  oonse aabuumi, alimwi Jehova wakababikkilide malailile ngobakeelede kutobela.—My 6:2-7; Bab 13:5.

• Mubi.

  Ndibbala libelesyegwa kwaamba Saatani Diabolosi, sikukazya Leza alimwi azyeelelo zyakwe ziluleme.—Mt 6:13; 1Jo 5:19.

• Mubumbi.

  Ngusikupanga zibiya, mitiba yabulongo alimwi azilongo zimwi. Mu Chihebrayo ibbala lyakuti mubumbi lyaamba “sikupanga.” Nguzu nzyajisi mubumbi zyakucita kufwumbwa ncayanda kubulongo kanji-kanji zilakozyanisyigwa anguzu Jehova nzyajisi zyakweendelezya bantu naa zisi.—Is 64:8; Ro 9:21.

• Mukutausi.

  Ibbala eeli lipandulula bbala lya Chigiriki lyakuti di·aʹko·nos, kanji-kanji ilisandululwa kuti “sikubeleka” naa “mubelesi.” “Mukutausi” caamba muntu uubeleka kali sikugwasyilizya kabunga kabaalu mumbungano. Weelede kusika azyeelelo zyamu Bbaibbele kutegwa ayelele kubeleka mulimo ooyu.—1Ti 3:8-10, 12.

• Mulalilo wa Mwami.

  Ncakulya cini cibikkilizya cinkwa citakwe bumena awaini iziiminina mubili abulowa bwa Kristo; ciibalusyo calufwu lwa Jesu. Mbwaanga eeli ndipobwe Banakristo ndyobeelede kucita kweelana a Magwalo, cileelela alimwi kulyaamba kuti “Ciibalusyo.”—1Ko 11:20, 23-26.

• Mulangizi.

  Mwaalumi uujisi mukuli mupati wakulanganya alimwi akweembela mbungano. Ikaambo kapati kali mubbala lya Chigiriki lyakuti e·piʹsko·pos nkakukwabilila akweendelezya. Mabala aakuti “mulangizi” alimwi a “mwaalu” (pre·sbyʹte·ros) aamba cintu comwe mumbungano ya Bunakristo. Bbala lyakuti “mwaalu” lyaamba bube bwakusima bwayooyo wasalwa kuba mwaalu, eelyo bbala lyakuti “mulangizi” likankaizya milimo iijatikizyidwe mumulimo ooyu.—Mil 20:28; 1Ti 3:2-7; 1Pe 5:2.

• Mulawo.

  Ikuti bbala eeli kalijisi bbala pati kumatalikilo, kanji-kanji inga lyaamba Mulawo wa Musa naa mabbuku aakusaanguna osanwe aamu Bbaibbele. Ikuti kalili mumabala masyoonto-syoonto, lilakonzya kwaamba mulawo umwi aumwi wamu Mulawo wa Musa naa njiisyo yamulawo.—My 15:16; Dt 4:8; Mt 7:12; Ga 3:24.

• Mulawo wa Musa.

  Mulawo Jehova ngwaakapede bana Israyeli kwiinda muli Musa munkanda ya Sinai mumwaka wa 1513 B.C.E. Mabbuku osanwe aakusaanguna aamu Bbaibbele kanji-kanji aambwa kuti Mulawo.—Jos 23:6; Lk 24:44.

• Muleli wacisi.

  Ooyu wakali muleli wacisi naa cooko mubulelo bwa Babuloni alimwi a Persia. Muleli wacisi wakali kusalwa buya amwami kuti abe muleli mupati.—Ezr 8:36; Da 6:1.

• Mulembi.

  Ngusikukkopolola wa Magwalo aa Chihebrayo. Kusikila ciindi Jesu naakasika anyika, bbala eeli lyakali kwaamba kakamu kabaalumi ibakauzyi kapati mulawo. Bakali kumukazya Jesu.—Ezr 7:6, bupanduluzi buyungizyidwe; Mk 12:38, 39; 14:1.

• Mulimo uusetekene.

  Mulimo uusetekene, nkokuti mulimo uucitwa naa weendelana akukomba Leza.—Ro 12:1; Ciy 7:15.

• Mulindi uutagoli.

  Ibbala lyakasandululwa kuti mulindi uutagoli lizwa kubbala lya Chigiriki lyakuti aʹbys·sos, ilyaamba cintu “cilamfwu kapati” naa “citaambiki, cinyina magolelo.” Lilibelesyedwe mu Magwalo aa Banakristo aa Chigiriki ikwaamba ntolongo naa ciimo cakwaangwa. Lilabikkilizya acuumbwe pele taligoleli buyo waawo.—Lk 8:31; Ro 10:7; Ciy 20:3.

• Mulindizi.

  Muntu uulinda bantu naa lubono, kanji-kanji masiku, alimwi uunga walizya mweembo ikuti kakuli ntenda. Balindizi bunji bwaziindi bakali kwiimikila atala abwaanda bwamunzi alimwi aangazi kuti kabalangilila baabo ibaboola kabatanasika afwaafwi. Mulindizi wamunkondo kanji-kanji wakali kwiitwa kuti sikugatela. Munzila yacikozyanyo, basinsimi bakali mbuli balindizi bacisi ca Israyeli, kubacenjezya kulunyonyooko ilwakali kuboola.—2Ba 9:20; Ezk 3:17.

• Mululwe.

  Misyobo minji yazisamu izilula kapati alimwi iinunka kapati. Mululwe ulabelesyegwa munzila yacikozyanyo mu Bbaibbele ikwaamba mapenzi aaboola akaambo kabukkale bwakutalilemeka, buzike, kutalulama alimwi abusiluleyo. Ku Ciyubunuzyo 8:11, “mululwe” waamba cintu cilula alimwi cikola, naa bukoko bukali kapati bwamusyobo wanyanzabili alimwi ibulula kapati.—Dt 29:18; Tu 5:4; Je 9:15; Am 5:7.

• Muna Nazareta.

  Ndizina lya Jesu, akaambo kakuti wakali kuzwa kumunzi wa Nazareta. Ambweni liliswaangene abbala lya Chihebrayo ilyakabelesyegwa mulugwalo lwa Isaya 11:1 ilyakuti “cisyuukila.” Lyakazoobelesyegwa akuli basikutobela Jesu.—Mt 2:23; Mil 24:5.

• Munakristo.​—

  Eeli ndizina Leza ndyaakapa basikutobela ba Jesu Kristo.—Mil 11:26; 26:28.

• Muntu waangulukide; Muntu wakaangululwa.

  Ciindi cabulelo bwa Roma ‘muntu waangulukide’ wakali muntu wakazyalwa kaangulukide, kajisi nguzu zyakuba sicisi. Mukwiimpana, ‘muntu wakaangululwa’ ngooyo muntu wakaangululwa kubuzike. Muntu wakaangululwa kweelana amulawo wakali  kukonzya kuba sicisi muna Roma, pele taakali kukonzya kweelela kupegwa cuuno cabweendelezi mutwaambo twacisi. Ikuti muntu wakaanguluka kutali kweelana amulawo, wakali kwaangululwa kubuzike pele tanaakajisi lwaanguluko cakumaninina mbuli sicisi.—1Ko 7:22.

• Munzi wa Davida.

  Eeli ndizina lyakapegwa munzi wa Jebusi naakamana kuuzunda Davida akuyaka ŋanda yakwe yabwami mulinguwo. Alimwi wiitwa kuti munzi wa Ziyoni. Uli kumusanza lwaajwe alimwi mbobusena bwakaindi bwamunzi wa Jerusalemu.—2Sa 5:7; 1Mk 11:4, 5.

• Muŋanga.

  Muntu uulyaamba kuti ulijisi nguzu zyakwaamba zintu iziyoocitika kumbele. Basimasalamuzi, basondi, basikupandulula bweende bwanyenyeezi, alimwi abamwi balaambidwe mu Bbaibbele kuti mbaŋanga.—Le 19:31; Dt 18:11; Mil 16:16.

• Mupaizi.

  Mwaalumi iwakali kwiiminina Leza kubantu mbaakali kubelekela, ikubayiisya kujatikizya Leza alimwi amilawo yakwe. Bapaizi alimwi bakali kwiiminina bantu kuli Leza, kutuula zipaizyo, kubalombela alimwi akubakombelezyela. Mulawo wa Musa kautanaba, silutwe wamukwasyi nguwakali mupaizi wamukwasyi wakwe. Ciindi ca Mulawo wa Musa, baalumi baluzubo lwa Aroni ibamusyobo wa Levi mbabakali ciinga cabapaizi. Bana Levi bambi bakali basikubagwasyilizya. Ciindi cizuminano cipya nocakabambwa, bana Israyeli bakumuuya bakaba cisi cabapaizi, eelyo Jesu Kristo ngo Mupaizi Mupati.—Ku 28:41; Heb 9:24; Ciy 5:10.

• Mupaizi mupati.

  Mu Mulawo wa Musa, mupaizi mupati wakali kwiiminina bantu kuli Leza alimwi akulanganya bapaizi bambi. Alimwi wakali kwiitwa kuti “silutwe wabapaizi.” (2Mk 26:20; Ezr 7:5) Alikke nguwakazumizyidwe kunjila mu Busena Busalalisya, busena bwakali mukati katente lyakukombela alimwi amutempele. Wakali kunjila buyo amwaka mu Buzuba Bwakumanya Milandu. Ibbala lyakuti “mupaizi mupati” lilabelesyegwa alimwi kwaamba Jesu Kristo.—Le 16:2, 17; 21:10; Mt 26:3; Heb 4:14.

• Muro.

  Mamina aacisamu aanunkilila aajanika kuzisamu zyamamvwa ziindene-indene naa tusamu tusyoonto-syoonto twamusyobo uutegwa genus Commiphora. Mamina aacisamu aamuro akali kusanganizyigwa azintu zimwi kupanga mafwuta aakunanika aasalala. Akali kubelesyegwa kununkilizya zintu mbuli zisani naa malo, alimwi akali kubikkwa mumafwuta aakubelesya kutyanka bantu alimwi amafwuta aakunana amubili. Mamina aamuro alimwi akali kubelesyegwa mukubamba mubili uunka kuyoozikkwa.—Ku 30:23; Tu 7:17; Joh 19:39.

• Musako wakubinzya.

  Musako mulamfwu iwakajisi lubulo kumpela, ngobakali kubelesya balimi kubinzya banyama. Cibinzyo ceezyanisyigwa kumajwi aamuntu musongo aapa kuti sikuswiilila alutobele lulayo lwabusongo. Majwi aakuti “kuzibbakela zibinzyo” azwa kumicito yamusune uutamvwi uutayandi kubingwa amusako wakubinzya kwiinda mukubbakela musako calo cikonzya kupa kuti alicise nguwenya.—Mil 26:14; Bab 3:31.

• Musandule.

  Muntu iwakacinca. Mu Magwalo, ibbala eeli lyaamba muntu wakasanduka kuba mu Juda, ikuti kali musankwa, wakali kupalulwa.—Mt 23:15; Mil 13:43.

• Musemu.

  Ncintu ciimvwi cikwabilila cimwi naa cintu cimwi cikozyenye ancico. Imwi yakali kubikkwa ciindi nobakali kwiibaluka milimo naa zintu zyakacitika kaindi. Misemu yakali kubelesyegwa mutempele alimwi amumayake ngaakayaka Solomoni. Bantu ibakali kukomba baleza bakubeja bakali kubikka misemu iijatikizya bukombi bwakubeja, alimwi zimwi ziindi bana Israyeli bakali kuciccilizya cilengwa eeci. (Bab 16:29; 1Ba 7:21; 14:23)—Amubone MPUMPU.

• Musemu wacisamu wakukomba.

  Ibbala lya Chihebrayo (ʼashe·rahʹ) lyaamba (1) musemu wakukomba wiiminina Asherah, leza mukaintu wabuzyazi wabana Kanana, (2) cikozyanyo caleza mukaintu Asherah kumugama. Misemu yakaliimvwi alimwi cibeela cimwi cakali cacisamu. Zilakonzya kuti zyakali zisamu zitabezedwe naa zisamu zini buya kuzigama.—Dt 16:21; Bab 6:26; 1Ba 15:13.

• Musemu wamabwe wakukomba.

  Musemu iwiimvwi, kanji-kanji wakali kupangwa kubelesya bbwe, iwakali cikozyanyo cacinswe ca Baala iciimvwi naa icabaleza bakubeja bambi.—Ku 23:24.

• Musinsimi.

  Muntu ooyo wakali kuzyibya bantu makanze aa Leza. Basinsimi bakali baambilizi ba Leza, tiibakali kwaamba buyo zintu ziyoocitika kumbele, pele bakali kwaamba anjiisyo, milawo, alimwi ambeta zya Jehova.—Am 3:7; 2Pe 1:21.

• Musololi Mupati.

  Ibbala lya Chigiriki ilyakasandululwa kuti Musololi Mupati lyaamba mulimo uuyandika kapati ngwaakacita Jesu Kristo wakwaangulula bantu basyomeka kumapenzi aaboola akaambo kacibi alimwi akubasololela kubuumi butamani.—Mil 3:15; 5:31; Heb 2:10; 12:2.

•  Musondi.​—

  Muntu uulyaamba kuti ulaambaula abantu bafwide.—Le 20:27; Dt 18:10-12; 2Ba 21:6.

• Mutaanzi kuzyalwa.

  Mwana mutaanzi kuzyalwa kuli bausyi (kutali mutaanzi kuzyalwa kulibanyina). Kaindi, nolyakali kulembwa Bbaibbele, mwana musankwa mutaanzi kuzyalwa wakajisi cuuno cilemekwa mumukwasyi alimwi wakalijisi nguzu zyakweendelezya mukwasyi ikuti bausyi bafwa. Ibbala eeli alimwi lilabeleka kwaamba mupoho mutaanzi wamunyama, zimwi ziindi wiitwa kuti “mutaanzi wamunyama.”—Ku 11:5; 13:12; Mtl 25:33; Kol 1:15.

• Mutelo.

  Ncintu cisi cimwi ncocipa cisi cimbi naa muleli ncapa muleli uumbi kacili citondezyo cakulibombya, kutegwa kube luumuno naa kuti amukwabilile. (2Ba 3:4; 18:14-16; 2Mk 17:11) Eeli bbala lilabelesyegwa alimwi kwaamba mutelo bantu ngobabbadela.—Ne 5:4; Ro 13:7.

• Muti-labeni.

  Ndibbala lili mukatwe kamakani ka Intembauzyo 9. Kaindi lyakali kwaamba “kujatikizya lufwu lwamwana musankwa.” Bamwi baamba kuti lyakali zina naa majwi aakwaanguzya nyimbo iizyibidwe aakali kubelesyegwa nobakali kwiimba ntembauzyo eeyi.

• Mutuni.

  Baleza bamukwasyi, ziindi zimwi bakali kubuzyigwa kuti baambe iciyoocitika kumbele. (Ezk 21:21) Mituni imwi yakalaaciimo camuntu, eelyo imbi yakali misyoonto. (Mtl 31:34; 1Sa 19:13, 16) Zintu zyakajanika ku Mesopotamiya abasikusya zintu zyansiku zitondezya kuti ooyo wakajisi mituni eeyi nguwakali kukonzya kukona lubono lwamukwasyi. (Ambweni eeci cilakonzya kutondezya kaambo Rakele ncaakabwezela mituni yabausyi.) Kuboneka kuti tabusyi mbocakabede oobu mu Israyeli, nokuba kuti mituni yakali kukombwa mumazuba aababetesi antoomwe abami, alimwi yakali akati kazintu zyakanyonyoonwa a Mwami Josiya uusyomeka.—Bab 17:5; 2Ba 23:24; Ho 3:4.

• Muuya.

  Ibbala lya Chihebrayo lyakuti ruʹach alimwi alya Chigiriki lyakuti pneuʹma, aavwula kusandululwa kuti “muuya” aamba zintu ziindene-indene. Oonse obilo aamba zintu zitalibonyi mumeso aabantu pele izipa bumboni bwakuti kuli nguzu zyeenda. Ibbala lya Chihebrayo alimwi alya Chigiriki lilabelesyegwa kwaamba (1) muwo, (2) inguzu zipa kuti zilenge zyaanyika kazipona, (3) imuuya uuzwa mumoyo wamuntu uumupa kwaambaula naa kucita zintu munzila imwi, (4) majwi aasololelwa amuuya, (5) zilenge zyamuuya, alimwi (6) nguzu zya Leza izibeleka, naa muuya uusalala.—Ku 35:21; In 104:29; Mt 12:43; Lk 11:13.

• Muuya uusalala.

  Ninguzu zya Leza zitalibonyi eezyo nzyabelesya kucita kuyanda kwakwe. Ulasalala akaambo kakuti uzwa kuli Jehova, walo uusalala alimwi uululeme kapati, alimwi nkaambo ngomuuya ngwabelesya Leza kucita zintu zisalala.—Lk 1:35; Mil 1:8.

• Muvwuule.

  Muntu woonana amuntu ngobatakwetene limwi, ikapati kuti ajane mali. (Ibbala lya Chigiriki ilya “muvwuule,” porʹne, lizwa kubbala lyaamba “kusambala.”) Ibbala eeli kanji-kanji lyaamba mukaintu, nokuba kuti abalo basankwa bavwuule balaambwa mu Bbaibbele. Buvwuule bwakalikasyidwe mu Mulawo wa Musa, aalo mali aazwa mubuvwuule tanaakali kuzumizyigwa kusangwa kutempele lya Jehova, kwiindana acilengwa cabantu ibatakali kukomba Leza ibakali kubelesya bavwuule bakutempele kuti babajanine mali. (Dt 23:17, 18; 1Ba 14:24) Ibbaibbele alimwi libelesya bbala eeli mumaambilambali ikwaamba bantu, zisi, naa mbunga izikomba mituni kumwi kazilitaminina kukomba Leza. Mucikozyanyo, mbunga yabukombi iyiitwa kuti “Babuloni Mupati” mu Ciyubunuzyo yaambwa kuti muvwuule akaambo kakuti ilayanzana abaleli banyika eeyi kutegwa ipegwe nguzu zyakweendelezya alimwi amali.—Ciy 17:1-5; 18:3; 1Mk 5:25.

• Muzibe.

  Mwaalumi uuzibidwe. Bamaalumi bali boobu kanji-kanji bakali kusalwa kubelekela muŋanda yamwami kabali basikugwasyilizya naa basikulanganya namalelo alimwi abamwanakasuwa. Ibbala eeli alimwi lyaamba muntu watakazibwa, pele muntu uupedwe milimo imwi muŋanda yamwami. Lilibelesyedwe munzila yacikozyanyo ikwaamba muntu ‘iwalilesya kukwata akaambo ka Bwami,’ kutegwa alyaabe cakumaninina mumulimo wa Leza.—Mt 19:12; Es 2:15; Mil 8:27.

• Mwaalu; Mupati.

  Muntu mupati kumyaka yakuzyalwa, pele mu Magwalo, muntu uujisi cuuno cabweendelezi alimwi amukuli mucilawo naa mucisi. Ibbala eeli alimwi lilabelesyegwa kwaamba zilenge zyakujulu mubbuku lya Ciyubunuzyo. Ibbala lya Chigiriki lyakuti pre·sbyʹte·ros lisandululwa kuti “mwaalu” ciindi nolyaamba baabo bajisi mukuli wakusololela mumbungano.—Ku 4:29; Tu 31:23; 1Ti 5:17; Ciy 4:4.

• Mwaapostolo.

  Ibbala eeli lyaamba “ooyo wakatumwa,” alimwi lilabelesyegwa kwaamba Jesu alimwi abantu bamwi ibakatumwa kuyoobelekela bamwi. Kanji-kanji, lilabelesyegwa kwaamba basikwiiya aabo Jesu lwakwe  mbaakasala kuti babe kabunga kabantu bali 12 basalidwe kuba baiminizi bakwe.—Mk 3:14; Mil 14:14.

• Mwaka Walwaanguluko.

  Wakali kuba lyoonse kwainda myaka iili 50, kutalika kubala kuzwa ciindi bana Israyeli nobakanjila mu Nyika Yakasyomezyedwe. Nyika tiiyakeelede kulimwa mu Mwaka Walwaanguluko, abalo bazike bana Hebrayo bakeelede kwaangululwa. Nyika yakukona iyakasambalidwe yakali kupilusyigwa. Mubwini Mwaka Walwaanguluko wakali mwaka buya uukkwene wakucita pobwe, imwaka wakwaangununwa mwalo cisi mocakali kujokela muciimo mocakabede ciindi Leza naakacipanga.—Le 25:10.

• Mwana wa Davida.

  Majwi aaya kanji-kanji akali kubelesyegwa kwaamba Jesu, ikukankaizya kuti ngowakali kuyookona cizuminano ca Bwami icakeelede kuzuzikizyigwa amuntu waluzubo lwa Davida.—Mt 12:23; 21:9.

• Mwanaamuntu.

  Ndibbala lijanika ziindi zili 80 mumabbuku aa Makani Mabotu. Lilabelesyegwa kwaamba Jesu Kristo alimwi litondezya kuti kwiinda mukuzyalwa kali muntu, tanaakali buyo cilenge camuuya cakasama mubili wabuntu. Kuyungizya waawo, bbala eeli litondezya kuti Jesu nguwakali kuyoozuzikizya businsimi bulembedwe kuli Daniele 7:13, 14. Mu Magwalo aa Chihebrayo, bbala eeli lyakali kubelesyegwa kwaamba Ezekiele alimwi a Daniele, kutondezya lwiindano luliko akati kabantu aaba ibakonzya kufwa alimwi a Leza Sikutalisya mulumbe wabo.—Ezk 3:17; Da 8:17; Mt 19:28; 20:28.

• Mwanakasuwa.

  Mukaintu uumbi ikanji-kanji iwakali muzike.—Ku 21:8; 2Sa 5:13; 1Ba 11:3.

• Mweembo.

  Ncibelesyo calubulo cifwulidwa buya, icibelesyegwa mukupa citondezyo naa mukwiimba. Kweelana a Myeelwe 10:2, Jehova wakapede malailile aakupanga myeembo yobilo yansiliva yakeelede kulizyigwa kupa citondezya cakwiita mbungano, cakumwaya nkambi, acakwaambilizya nkondo. Kulibonya kuti myeembo eeyi yakaloolokede, ikutali mbuli “meja” aakali kuzwa kubanyama. Myeembo iyakapangidwe munzila zimbi buyo ayalo yakali akati kaziimbyo zyakali kubelesyegwa kutempele. Munzila yacikozyanyo, kulila kwamyeembo kanji-kanji kutobela kwaambilizya mbeta zya Jehova naa zintu zimwi ziyandika izizwa kuli Leza.—2Mk 29:26; Ezr 3:10; 1Ko 15:52; Ciy 8:7–11:15.

• Mweendelezi wacooko.

  Mweendelezi wacooko icakali kweendelezyegwa a Nkumekume Zyamuŋanda Yamilawo Yaba Roma. Wakajisi nguzu zyakubeteka alimwi akulanganya basikalumamba, nokuba kuti zyoonse nzyaakali kucita zyakali kukonzya kulingulwa aba Muŋanda Yamilawo, nguwakajisi cuuno caatala kapati mucooko.—Mil 13:7; 18:12.

• Mweendelezi wanyimbo.

  Kweelana ambolibelesyedwe mu Intembauzyo, ibbala lya Chihebrayo kulibonya kuti lyakali kwaamba muntu iwakali kupanga nyimbo, kweendelezya mboziimbwa, kugwasya ba Levi kuti baziiye akuziinduluka, alimwi akubasololela nobakali kwiimba muziindi zibikkidwe. Muma Bbaibbele amwi ibbala eeli lisandulwidwe kuti “mupati wabasikwiimba.”—In 4:Kat; 5:Kat.

• Mwezi mupya.

  Mbuzuba bwakusaanguna bwamwezi amwezi mukkalenda yaba Juda, ibwakali kubonwa kuti mbuzuba bwakuswaangana antoomwe, bwakucita pobwe, alimwi abwakutuula zipaizyo zilibedelede. Mukuya kwaciindi, buzuba oobu bwakaba buzuba bwakucita pobwe liyandika kapati lijatikizya cisi coonse, alimwi bantu tiibakeelede kubeleka.—My 10:10; 2Mk 8:13; Kol 2:16.

N

• Namalelo Wajulu.

  Ndizina lyabulemu lyaleza mukaintu ngobakali kukomba bana Israyeli basiluleyo mumazuba aa Jeremiya. Bamwi baamba kuti lyaamba Ishtar (Astarte) leza mukaintu wabana Babuloni. Izina lyalezanyina wakaliko katanaba walo wakali, Inanna, ilyaamba kuti “Namalelo Wajulu.” Kunze aakujatikizyigwa ajulu, wakali leza mukaintu wabuzyazi. Astarte awalo waambwa kuti “Namalelo Wajulu” mumalembe aakuzekaula aabana Egepita.—Je 44:19.

• Nardo.

  Mafwuta aasubila-subila, aanunkilila kapati alimwi aadula aazwa kucisyango citegwa nardo (Nardostachys jatamansi). Akaambo kakuti akali kudula, kanji-kanji mafwuta aanardo akali kusanganizyigwa amafwuta ambi aataduli, alimwi zimwi ziindi akali kuba aakubeja. Mucikozyanyo, boonse bobilo Marko a Johane bakaamba kuti “nardo iini-ini” yakabelesyegwa amubili wa Jesu.—Mk 14:3; Joh 12:3.

• Nefilimu.

  Mbana ibakazyalwa ciindi bangelo nobakalicinca kuba bantu mpoonya akukwata bamakaintu anyika kalitanasika Zambangulwe.—Mtl 6:4.

• Nehiloti.

  Eeli ndibbala litazyibidwe kabotu ncolipandulula, ilijanika mukatwe kamakani ka Intembauzyo 5. Bamwi bayeeya kuti lyaamba ciimbyo cakufwulida muya, baliswaanganya kubbala lya Chihebrayo lyeendelana a bbala lyakuti cha·lilʹ (muntolilo). Nokuba boobo, lilakonzya kwaamba lwiimbo.

•  Netinimu.

  Mbabelesi naa bakutausi bamutempele ibatali bana Israyeli. Ibbala lya Chihebrayo ilyaamba “Ibaabidwe,” ikupandulula kuti bakapegwa kuti kabacita milimo yamutempele. Kulangilwa kuti bunji bwaba Netinimu bakali bana babana Gibeoni, aabo Joshua mbaakabikka kuti babe “basikutebba nkuni abasikuteka maanzi aambungano amaanzi aacipaililo ca Jehova.”—Jos 9:23, 27; 1Mk 9:2; Ezr 8:17.

• Nisani.

  Ndizina lipya ilyakaba lyamwezi wa Abibi nobakazwa mubuzike ku Babuloni, imwezi wakusaanguna mukkalenda njaakabapa Leza ba Juda alimwi mwezi waciloba mukkalenda yakunyika. Wakalikutalikila akati kamwezi wa March kusikila akati kamwezi wa April. (Ne 2:1)—Amubone Makani Aayungizyidwe B15.

• Nkalaki.

  Nkakkocci kakwelwa amahacci ikajisi mavwili obilo ikakali kubelesyegwa munkondo.—Ku 14:23; Bab 4:13; Mil 8:28.

• Nkamu yabukombi yabuzangi.

  Ninkamu yabantu ibatobela njiisyo imwi naa musololi umwi alimwi balijisi nzyobasyoma beni. Mabala aaya alabelesyegwa kwaamba tukamu tobilo tujisi nguzu kapati itwakazanduka kubukombi bwaci Juda, nkokuti, kakamu kaba Farisi alimwi aba Saduki. Ibantu batali Banakristo bakali kwaamba Bunakristo kuti “ninkamu yabukombi yabuzangi” naa kuti “ninkamu yabukombi yabana Nazareta,” ambweni bakali kwiibona kuti yakazanga kuzwa kubukombi bwaci Juda. Mukuya kwaciindi, tukamu twabukombi twabuzangi twakatalika mumbungano ya Banakristo; mbuli “kakamu ka Nikolayi” kaambidwe ku Ciyubunuzyo.—Mil 5:17; 15:5; 24:5; 28:22; Ciy 2:6; 2Pe 2:1.

• Nkomo yawaini.

  Eeyi ninkomo yakapangidwe aacipaya camunyama, mbuli mpongo naa mbelele, alimwi cakali kubelesyegwa kubikkila waini. Waini wakali kubikkwa munkomo zyawaini zipya, nkaambo ciindi nuusasa, ugwisya muya uutegwa carbon dioxide mu Chingisi walo uupa kuti nkomo zyacipaya zifwute. Aboobo, zipaya zipya zilafwutumuka; izyakaindi zilabbosyoka.—Jos 9:4; Mt 9:17.

• Nkuta Mpati Yaba Juda.

  Ninkuta mpati yaba Juda iyakali mu Jerusalemu. Mumazuba aa Jesu, nkuta eeyi yakajisi bantu bali 71, kubikkilizya amupaizi mupati alimwi abamwi ibakajisi zyuuno zyabupaizi, abaabo ibakali kuzwa mumikwasyi imwakali kuzwa bapaizi bapati, baalu, basilutwe bamisyobo abamikwasyi, alimwi abalembi.—Mk 15:1; Mil 5:34; 23:1, 6.

• Nkwisyo.

  Ikatambo kakapangisyidwe acipaya naa kwiinda mukoosa mulambi wamunyama, bwizu naa masusu. Akati akali apati mpocakali kubikkwa eeco cakali kufwuswa, kanji-kanji ibbwe. Cibeela cimwi cankwisyo cakali kwaangililwa kujanza, eelyo cibeela cimwi cakali kujatwa mujanza akulekezyegwa ciindi nkwisyo noyakali kufwuswa. Zisi zyansiku zyakali kuba abasikufwusa nkwisyo mumpi zyabo zyabasikalumamba.—Bab 20:16; 1Sa 17:50.

• Nongo.

  Ncipimyo cazintu zyamaanzaanzi calo ciyeeyelwa kuti cijisi malita aabalilwa ku 22, kweelana acintu cakavwukkulwa kaindi icakajisi zina eeli. Bunji bwazipimyo zimbi izyakupimya zintu zitali zyamaanzaanzi alimwi azyamaanzaanzi izyaambidwe mu Bbaibbele, zilabalwa kweelana ansaizi iiyeeyelwa kuti njensaizi yanongo. (1Ba 7:38; Ezk 45:14)—Amubone Makani Aayungizyidwe B14.

• Nsazi 1.

  Ncipimyo cazintu zyamaanzaanzi. Cileelene amalita aali 3.67, kweelana ancaakaamba syaazibwene mumakani aakaindi Josephus kuti ninsazi yeelene a choes zyobilo zyaku Atene. (Ku 29:40)—Amubone Makani Aayungizyidwe B14.

• Nsazi 2.

  Eeli ndizina lyakabikkilo kamafwuta aanunkilila ikakali kupangwa amabwe aajanika munsi-munsi aku Alabastron, ku Egepita. Nsazi eezyi kanji-kanji zyakajisi kansingo kaniini ikakali kukonzya kusinkwa kutegwa mafwuta atanoozwi. Aalo mabwe kwaagama akatalika kwiitwa azina ndilyona eeli.—Mk 14:3.

• Ntali.

  Mumakani aakupanga milembo, caamba tutambo tutozya mubulamfwu bwamulembo. Intambo izisumwa cakwiindanya atala alimwi aansi antali zyamubulamfwu ziitwa kuti ntali zyamubwamba.—Bab 16:13.

• Ntali yamubwamba.

  Mumakani aakupanga milembo, caamba tutambo tutozya mubwamba bwamulembo. Intambo zyakali kusumwa cakwiindanya atala alimwi aansi aazyeezyo ziingene iziitwa kuti ntali zyamubulamfwu.—Le 13:59.

• Ntanda.

  Eeyi ninyenyeezi yakubucedo. Ninyenyeezi iisyaalizya kuzwa kujwe izuba kalitanapasula, aboobo itondezya kuti kuyanda kuca.—Ciy 22:16; 2Pe 1:19.

• Ntembauzyo.

  Oolu ndwiimbo lwakutembaula Leza. Ntembauzyo zyakali kulizyigwa alimwi akwiimbwa abakombi, kubikkilizya amubukombi bwakubuleya bwa Jehova Leza kutempele lyakwe ku Jerusalemu.—Lk 20:42; Mil 13:33; Jak 5:13.

• Ntumbu.

  Mbwizu buli mbuli matete ibujanika mumaanzi ibwakali kubelesyegwa kupanga  mitaanga, zibikkilo, alimwi amato. Alimwi bwakali kubelesyegwa kupanga zyakulembela zikozyenye amapepa alimwi akupanga mabbuku aakuvwunga manji.—Ku 2:3.

• Nweenwe yakusimbya.

  Musyobo waciganto icakali kusamwa kumunwe naa kwaangililwa kukantambo, ambweni akusamwa munsingo. Alimwi yiitwa kuti nweenwe yakusimbya, yakali citondezyo canguzu zyamuleli naa nkumekume. (Mtl 41:42)—Amubone CIGANTO.

• Nyenyeezi yakubucedo.​—

  Amubone NTANDA.

• Nzila.

  Ibbala eeli lyakali kubelesyegwa munzila yacikozyanyo mu Magwalo ikwaamba mbobakali kucita zintu naa kulilemeka nkwakkomanina naa nkwatakkomanini Jehova. Aabo ibakaba basikutobela Jesu Kristo bakali kwaambwa kuti mba “Nzila,” ikupandulula kuti bakali kutobela nzila iiyeeme akusyoma Jesu Kristo, ikutobela cikozyanyo cakwe.—Mil 19:9.

O

• Omeri.

  Ncipimyo cakupimya zintu ziyumu ceelene amalita aali 2.2 (tupamela tobilo), naa cinjila ziindi zili 10 mucipimyo caefa. (Ku 16:16, 18)—Amubone Makani Aayungizyidwe B14.

• Onikisi.

  Ndibbwe litaduli kapati, musyobo wabbwe muyumu, ilikozyenye abbwe lya agate, naa lya chalcedony. Ibbwe lyaonikisi lilijisi zibeela zituba zivwelengene amibala iisiya, iisubila-subila, iisubila, naa iisiya-siya, naa yanyanzabili. Lyakali kubelesyegwa kuzisani zyaalubazu zyamupaizi mupati.—Ku 28:9, 12; 1Mk 29:2; Job 28:16.

P

• Paradaiso.

  Muunda mubotu kapati, naa muunda weebeka. Busena bwakusaanguna buli boobu wakali muunda wa Edeni, ooyo Jehova ngwaakapangila banabukwetene bakusaanguna. Ciindi naakali kwaambaula aumwi wazigwebenga iwakali afwaafwi anguwe kabali acisamu cakupenzyezya, Jesu wakapandulula kuti nyika iyakuba paradaiso. Kuboneka kuti mulugwalo lwa 2 Bakorinto 12:4, ibbala eeli lyaamba paradaiso yakumbele, alimwi amulugwalo lwa Ciyubunuzyo 2:7, lyaamba paradaiso wakujulu.—Lw 4:13; Lk 23:43

• Pentekoste.

  Pobwe lyabili akati kamapobwe mapati otatwe aayo ba Juda boonse baalumi ngobakeelede kusekelela ku Jerusalemu. Bbala lyakuti Pentekoste ilyaamba “(Buzuba bwa) Makumi Aali Musanu,” ndibbala libelesyegwa mu Magwalo aa Banakristo aa Chigiriki kwaamba pobwe lyakali kwiitwa kuti Pobwe lya Butebuzi naa Pobwe lya Mvwiki mu Magwalo aa Chihebrayo. Lyakali kusekelelwa mubuzuba bwa 50 kutalika kubala kuzwa mubuzuba bwa Nisani 16.—Ku 23:16; 34:22; Mil 2:1.

• Persia; Bana Persia.

  Ncisi alimwi abantu ibavwula kwaambwa antoomwe aba Medi, alimwi mbasazinyina. Mumazuba aabo aakumatalikilo, bana Persia bakajisi buyo cibeela cakumusanza lwaambo kwacibanda cacisi ca Iran. Ciindi cabulelo bwa Koresi Mupati (kweelana ambobaamba basikulemba zintu zyakaindi, bausyi bakali bana Persia mpoonya banyina bakali bana Medi) bana Persia mbobakajisi nguzu zinji zyakweendelezya ba Medi, nokuba boobo bwami bwakazumanana kweendelezyegwa ambabo boonse. Koresi wakazunda Bulelo bwa Babuloni mumwaka wa 539 B.C.E. alimwi wakazumizya ba Juda ibakali mubuzike kuti bapiluke kucisi cabo. Bulelo bwa Persia bwakali kutalikila ku Mulonga wa Indus kujwe kuyakusika ku Lwizi lwa Aegean kumbo. Ba Juda bakali kulelwa abana Persia kusikila ciindi Alekizanda Mupati naakazunda bana Persia mumwaka wa 331 B.C.E. Bulelo bwa Persia wakabubona Daniele mucilengaano cakwe, alimwi bulaambwa mumabbuku aamu Bbaibbele aa Ezara, Nehemiya, alimwi a Esita. (Ezr 1:1; Da 5:28; 8:20)—Amubone Makani Aayungizyidwe B9.

• Pimu.

  Ncipimyo alimwi amuulo ba Filisiti ngobakali kubbadelesya kukwenga zibelesyo ziindene-indene zyalubulo. Zipimyo zinji zyamabwe izyakajanika muzintu zyakavwukkulwa mucisi ca Israyeli zijisi mabala aa Chihebrayo aakuti, “pim”; izyakali kulema magilamu aali 7.8, zikonzya kwiinda kucisela casyekeli.—1Sa 13:20, 21.

• Pobwe lya Butebuzi; Pobwe lya Mvwiki.​—

  Amubone PENTEKOSTE.

• Pobwe lya Zinkwa Zitajisi Bumena.

  Ndipobwe lyakusaanguna akati kamapobwe otatwe mapati ngobakali kucita amwaka bana Israyeli. Lyakali kutalika mu Nisani 15, bwainda buzuba bwa Pobwe Lyakwiindilila, alimwi lyakali kutola mazuba aali ciloba. Kwakali kuligwa buyo cinkwa citakwe bumena, ikuyeeya ciindi nobakazwa mu Egepita.—Ku 23:15; Mk 14:1.

• Pobwe lya Zivwuka.

  Alimwi lyakali kwiitwa kuti Pobwe lya Kuyobolola. Lyakali kucitwa mu Etanimu 15-21. Lyakali kucitwa kusekelela butebuzi kumamanino aamwaka wabulimi bwabana Israyeli alimwi cakali ciindi cakusekelela akulumba Jehova akaambo kakulongezya zisyango zyabo. Ciindi camazuba aapobwe, bantu bakali kukkala muzivwuka, naa mumayusilo aajisi ciluli, kubayeezya ciindi nobakazwa mu Egepita. Lyakali akati kamapobwe otatwe basankwa ngobakali kuyandika  kuunka ku Jerusalemu kuyoosekelela.—Le 23:34; Ezr 3:4.

• Pobwe Lyakwaaba.

  Mbuzuba bwakwiibaluka kusalazyigwa kwatempele amwaka kuzwa ciindi nolyakasofwaazyidwe a Antiochus Epiphanes. Pobwe eeli lyakali kutalika mu Kisilevi 25 alimwi lyakali kutola mazuba aali lusele.—Joh 10:22.

• Pobwe Lyakwiindilila.

  Ndipobwe lyakali kucitwa mwaka amwaka mubuzuba bwa 14 bwamwezi wa Abibi (kumbele iwakazikwiitwa kuti Nisani) kuyeeya mbobakanununwa bana Israyeli kuzwa mu Egepita. Lyakali kucitwa kwiinda mukujaya alimwi akuyoka kabelele (naa mpongo), ikakali kuligwa antoomwe azisyumani zilula alimwi azinkwa zitakwe bumena.—Ku 12:27; Joh 6:4; 1Ko 5:7.

• Pomegranite.

  Mucelo uulibonya mbuli apele, pele kunsi ulibonya mbuli kuti ujisi musini. Mukati muli tukoto-koto tujisi musinza, kakoto akamwi kajisi nseke zisubila-subila. Tulisakatizyo tuboneka mbuli mapomegranite twakali kubikkwa kumoombe wakabaki kabupaizi alimwi aampumpu zyamisemu ya Jakini a Boazi kumbele lyatempele.—Ku 28:34; My 13:23; 1Ba 7:18.

• Porneia.​—

  Amubone KOONANA IKUTALI KWAMUMULAWO.

• Puri.

  Ipobwe ilyakali kucitwa mubuzuba bwa 14 a 15 mumwezi wa Ada. Lyakali lyakusekelela lufwutuko lwaba Juda mumazuba aa Namalelo Esita. Ibbala litali lya Chihebrayo lyakuti pu·rimʹ lyaamba “zisolo.” Pobwe lya Puri, naa Pobwe lya Cisolo, lyakapegwa zina eeli akaambo kambwaakacita Hamani mukuuma cisolo kuti azyibe buzuba naakeelede kuzuzikizya makanze ngaakajisi aakujaya ba Juda boonse.—Es 3:7; 9:26.

R

• Rahabu.

  Ndibbala libelesyegwa munzila yacikozyanyo mubbuku lya Jobu, Intembauzyo, alimwi a Isaya (ikutali mukaintu Rahabu uuli mubbuku lya Joshua). Mubbuku lya Jobu, tupango tuzingulukide kaambo kaambidwe tulagwasya kumuzyiba Rahabu waambwa kuti ncilenge camulwizi; mumasena mumwi eeci cilenge camulwizi ciiminina Egepita.—Job 9:13; In 87:4; Is 30:7; 51:9, 10.

S

• Saatani.

  Ndibbala lya Chihebrayo ilyaamba “Sikukazya.” Mumyaambo yakusaanguna, ibbala eeli lyaamba Saatani Diabolosi, Sinkondonyina a Leza mupati.—Job 1:6; Mt 4:10; Ciy 12:9.

• Sabata.

  Ndibbala lizwa kubbala lya Chihebrayo ilyaamba “kupumuna; kuleka.” Mbuzuba bwaciloba bwamvwiki zyaba Juda (kuzwa nolyabbila zuba muli Bwasanu kusikila nolyabbila zuba mu Mujibelo). Mazuba amwi aamapobwe mumwaka, antoomwe amwaka waciloba alimwi amwaka wa 50, aalo akali kwiitwa kuti masabata. Mubuzuba bwa Sabata, kunyina mulimo wakeelede kucitwa, ccita buyo milimo yabapaizi mutempele njiyakeelede kucitwa. Mumwaka wa Sabata, nyika tiiyakeelede kulimwa alimwi bana Hebrayo ibakajisi zikwelete tiibakali kuseswa. Mu Mulawo wa Musa, izintu zyakakasyidwe kuti zitanoocitwi izijatikizya Sabata tiizyakali kukatazya kutobela, pele basololi bazikombelo bakayungizya zimwi aali zyeezyi, cakunga mumazuba aa Jesu, cakali kubakatazya bantu kuzitobela.—Ku 20:8; Le 25:4; Lk 13:14-16; Kol 2:16.

• Samariya.

  Eeli ndizina lyamunzi iwakali mupati wabwami bwakunyika bwamisyobo iili kkumi yabana Israyeli kwamyaka iili 200, alimwi lyakali zina lyacilawo coonse. Munzi ooyo wakayakidwe aacilundu cijisi zina ndilyonya eeli. Mumazuba aa Jesu, Samariya lyakali zina lyacooko ca Roma icakali akati ka Galilaya kunyika alimwi a Judaya kumusanza. Kanji-kanji Jesu tanaakali kukambauka mucilawo eeci ciindi naakali kuyabweendeenda, pele zimwi ziindi wakali kwiinda mumo alimwi wakali kubandika abantu bakkala mumo. Petro wakabelesya kkii yabili yacikozyanyo iya Bwami ciindi ba Samariya nobakatambula muuya uusalala. (1Ba 16:24; Joh 4:7; Mil 8:14)—Amubone Makani Aayungizyidwe B10.

• Sebati.

  Nobakazwa mubuzike mu Babuloni, eeli lyakali zina lyamwezi wa 11 mukkalenda njaakabapa Leza ba Juda alimwi imwezi wasanu mukkalenda yakunyika. Wakali kutalikila akati kamwezi wa January kusikila akati kamwezi wa February. (Zek 1:7)—Amubone Makani Aayungizyidwe B15

• Sela.

  Ndibbala lijatikizya mbolweelede kwiimbwa lwiimbo naa kweema ikujanika ku Intembauzyo alimwi akuli Habakuku. Lilakonzya kwaamba kulekezya mukwiimba naa munyimbo naa muli zyoonse zyobilo kutegwa kube ciindi cakuzinzibala kuyeeya naa kuti kaambo ikazwa mukwaambwa kalimvwisye. Ibbala libelesyegwa mubusanduluzi bwa Chigiriki ndyakuti di·aʹpsal·ma, ilipandulula “lwiimbo nolwaleka kulila kwakaindi kasyoonto.”—In 3:4; Ha 3:3.

• Seminiti.

  Ndibbala lyamunyimbo ilyaamba “calusele” ilikonzya kupandulula lwiimbo lwiimbilwa caansaansi. Ikujatikizya zibelesyo zyakwiimbya, ibbala eeli ambweni lyakali kwaamba zyeezyo izyakali kulilila ansaansi.  Kujatikizya nyimbo, kweelede kuti lyakali kwaamba zyeezyo zililila ansaansi alimwi akwiimbilwa ansaansi.—1Mk 15:21; In 6:Kat; 12:Kat.

• Sikubona zyakumbele.

  Muntu wakapegwa nguzu a Leza zyakuzyiba ncayanda Leza, muntu wakajalulwa meso kuti kabona naa kumvwisya zintu zitalibonyi kubantu boonse. Ibbala lya Chihebrayo lyakazwa kubbala ilyaamba “kubona,” kubona bwini naa munzila yacikozyanyo. Sikubona wakali muntu wakali kubuzyigwa abantu bambi kuti abape maano kumapenzi ngobakali kujana.—1Sa 9:9.

• Sikulwana Kristo.

  Ibbala lya Chigiriki ilisandulwidwe kuti sikulwana Kristo lijisi bupanduluzi bobilo. Lyaamba yooyo uulwana, naa uukazya Kristo. Alimwi lilakonzya kwaamba yooyo uulipenda kuti ngu Kristo, ooyo uulibikka acuuno ca Kristo. Bantu boonse, mbunga, naa tubunga tulitaminina kuti twiiminina Kristo naa kulitaminina kuba Mesiya naa aabo bakazya Kristo antoomwe abasikwiiya bakwe balakonzya kwiitwa kuti mbaasikulwana Kristo.—1Jo 2:22.

• Sikupandulula bweende bwanyenyeezi.

  Muntu uulanga bweende bwazuba, mwezi, alimwi anyenyeezi kutegwa azyibe zintu iziyoocitika kumbele.—Da 2:27; Mt 2:1.

• Silutwe.

  Mubelesi uulaacuuno caansi kubaleli mumfwulumende ya Babuloni. Mu Bbaibbele, basilutwe bakalijisi nguzu zyakweendelezya basongo munkuta ya Babuloni. Basilutwe alimwi balaambwa ciindi cakulela kwa Mwami Dariyo mu Medi.—Da 2:48; 6:7.

• Silutwe wabangelo.

  Nkokwaamba kuti “mupati wabangelo.” Bupanduluzi oobu, alimwi amabala aakuti “silutwe wabangelo” mu Bbaibbele waambwa buyo munzila iitondezya kuti uli alikke, icaamba kuti kuli buyo silutwe wabangelo omwe. Ibbaibbele lilamwaamba zina silutwe wabangelo kuti ngu Mikayeli.—Da 12:1; Jud 9; Ciy 12:7.

• Silutwe wabapaizi.

  Eeli ndibbala alimbi libelesyegwa kwaamba “mupaizi mupati” mu Magwalo aa Chihebrayo. Mu Magwalo aa Banakristo aa Chigiriki, imabala aakuti “basilutwe babapaizi” kulangilwa kuti akali kwaamba baalumi balemekwa baciinga cabapaizi, ambweni kubikkilizya amupati wabapaizi uuli woonse iwakagwisyigwa abupaizi alimwi abasilutwe bamalizyi aabupaizi aali 24.—2Mk 26:20; Ezr 7:5; Mt 2:4; Mk 8:31.

• Simwiimaakati.

  Muntu uukombelezya mbazu zyobilo kuti azikamantanye. Mu Magwalo, Musa a Jesu mbaasimwiimaakati, Musa ngwacizuminano ca Mulawo mpoonya Jesu ngwacizuminano cipya.—Ga 3:19; 1Ti 2:5.

• Siriya; Bana Siriya.—

  Amubone ARAMU; BANA ARAMU.

• Siva.

  Ndizina lyamwezi watatu mukkalenda njaakabapa Leza ba Juda kuzwa ciindi nobakazwa mubuzike ku Babuloni, alimwi ooyu mwezi wafwuka mukkalenda yakunyika. Wakali kutalikila akati kamwezi wa May kusikila akati kamwezi wa June. (Es 8:9)—Amubone Makani Aayungizyidwe B15

• Syekeli.

  Eeli ndibbala lya Chihebrayo lyakali kubelesyegwa kwaamba mbocilema cintu naa mweelwe wamali. Lyakaleelene amagilamu aali 11.4. “Syekeli lyamubusena busalala” kweelede kuti akali mabala aakali kubelesyegwa kukankaizya mbocakali kuyandika kuti cintu kacilema kweelana amweelwe uubikkidwe kutente lyakukombela. Kulangilwa kuti kwakali syekeli lyabwami (iliindene aleelyo lyabanamaleya) naa cikkelo cakali kuŋanda yamwami.—Ku 30:13.

T

• Talenta.

  Mali mapati aa Chihebrayo alimwi ngobakali kubelesya kupimya zintu. Lyakali kulema makkilogilamu aali 34.2. Talenta lya Chigiriki lyakali lisyoonto, lyakali kulema makkilogilamu aali 20.4. (1Mk 22:14; Mt 18:24)—Amubone Makani Aayungizyidwe B14.

• Tamuzi.

  (1) Ndizina lyaleza ngobakali kulilila bamakaintu basiluleyo bana Hebrayo mu Jerusalemu. Bamwi bapa muzeezo wakuti Tamuzi wakali mwami ngobakatalika kukomba naakafwa. Mumalembe aaba Sumeriya, Tamuzi wiitwa kuti Dumizi alimwi waambwa kuti ngomuyandwa waleza wabuzyazi imukaintu wiitwa kuti Inanna (wiitwa kuti Ishtar abana Babuloni). (Ezk 8:14) (2) Ndizina lyamwezi wane mukkalenda njaakabapa Leza ba Juda, mpoonya mukkalenda yakunyika ooyu mwezi wakkumi. Mwezi ooyu wakali kutalikila akati kamwezi wa June kusikila akati kamwezi wa July.—Amubone Makani Aayungizyidwe B15

• Tarisi, mato aaku.

  Kumatalikilo ibbala eeli lyakali kubelesyegwa kwaamba mato aakali kuunka ku Tarisi (mazubaano Spain). Kuboneka kuti ibbala eeli lyakazootalika kwaamba mato mapati aakali kukonzya kuunka kumasena aakulamfwu. Solomoni alimwi a Jehosafati bakali kubelesya musyobo ooyu wamato kucita makwebo.—1Ba 9:26; 10:22; 22:48.

• Tartarasi.

  Mu Magwalo aa Banakristo aa Chigiriki, mbusena buli mbuli ntolongo oomo bangelo bakazanga mumazuba aa Nowa mobakasowelwa. Ku 2 Petro 2:4, ikubelesya  bbala lyakuti tar·ta·roʹo (nkokuti “kuwaalila mu Tartarasi”) tacipandululi kuti “ibangelo bakabisya” bakasowelwa mu Tartarasi wamutwaano twabantu batakombi (nkokuti, ntolongo yakunsi kwanyika alimwi busena busiya mbi kuli baleza baniini-niini). Muciindi caboobo, litondezya kuti Leza wakabagwisya mubusena bwabo bwakujulu alimwi akunyangwa mikuli yabo akubaleka kuti babe mumudima naa kuti batanoozyibi cili coonse icijatikizya makanze aa Leza. Mudima alimwi utondezya ciyoobacitikila kumamanino, eeco Magwalo ncaamba kuti nkunyonyoonwa cakumaninina antoomwe amuleli wabo, Saatani Diabolosi. Aboobo, Tartarasi caamba bukkale bwaansi kapati bwabangelo ibakazanga. Tabuli mbobusena butegwa “mulindi uutagoli” ku Ciyubunuzyo 20:1-3.

• Tebeta.

  Nobakazwa mubuzike ku Babuloni, lyakaba zina lyamwezi wakkumi mukkalenda njaakabapa Leza ba Juda alimwi mwezi wane mukkalenda yakunyika. Wakali kutalikila akati kamwezi wa December kusika akati kamwezi wa January. Bunji bwaziindi wakali kwiitwa buyo kuti “mwezi wakkumi.” (Es 2:16)—Amubone Makani Aayungizyidwe B15

• Tempele.

  Niŋanda yakayakwa mu Jerusalemu iyakabweza busena bwatente lyakukombela ilyakali kunyamunwa iyakaba busena bwakukombela bwabana Israyeli. Tempele lyakusaanguna lyakayakwa a Solomoni mpoonya lyakanyonyoonwa abana Babuloni. Lyabili lyakayakwa a Zerubabeli nobakapiluka kuzwa mubuzike ku Babuloni alimwi kumbele lyakazooyakululwa a Heroda Mupati. Mu Magwalo, kanji-kanji itempele lyakali kwiitwa buyo kuti “ŋanda ya Jehova.” (Ezr 1:3; 6:14, 15; 1Mk 29:1; 2Mk 2:4; Mt 24:1)—Amubone Makani Aayungizyidwe B8 a B11.

• Tente lyakukombela.

  Tente likonzya kunyamunwa ndyobakali kubelesya bana Israyeli nobakazwa mu Egepita. Momwakali kukkala bbokesi lyacizuminano ca Jehova, ilyakali kwiiminina kuti Leza nkwali abusena aawo, alimwi mbobwakali busena bwakutuulila zipaizyo alimwi akukombela. Alimwi lyakali kwiitwa kuti “tente lyakuswaanganina.” Lyakajisi misemu yamapulanga iyakali kuvwumbwa milembo yakajisi zifwanikiso zyabakerubi. Lyakalaandaanizyidwe muzibeela zyobilo, icakusaanguna cakali kwiitwa kuti Busena Busalala mpoonya cabili cakali kwiitwa kuti Busena Busalalisya. (Jos 18:1; Ku 25:9)—Amubone Makani Aayungizyidwe B5.

• Tente lyakuswaanganina.

  Ibbala eeli lyaamba tente lya Musa alimwi atente lyakukombela lisetekene ilyakapangwa munkanda.—Ku 33:7; 39:32.

• Tete.

  Ndibbala libelesyegwa kwaamba zisyango ziindene-indene zimena mumasena mukkalila maanzi. Kanji-kanji, nobaamba bbala eeli inga baamba cisyango ciitwa kuti Arundo donax. (Job 8:11; Is 42:3; Mt 27:29; Ciy 11:1)—Amubone TETE LYAKUPIMYA.

• Tete lyakupimya.

  Itete lyakupimya lyakali kulampa tukokola tuli cisambomwe. Kupima kubelesya kakokola, lyakali kulampa mamita aali 2.67; ikuti kwabelesyegwa kakokola kalamfwu, lyakali kulampa mamita aali 3.11. (Ezk 40:3, 5; Ciy 11:1)—Amubone Makani Aayungizyidwe B14.

• Tishri.—

  Amubone ETANIMU alimwi a Makani Aayungizyidwe B15.

• Tugele twakuzimya malambe.

  Tubelesyo itwakali kubelesyegwa mutente lyakukombela alimwi amutempele, itwakapangidwe aangolida naa mukuba. Ambweni twakali mbuli tugele twakugelesya ntambo zyamumalambe.—2Ba 25:14.

• Tununkilizyo.

  Mamina aazisamu aanunkilila aavwelengene amabbona aaumpwa aniini-niini, mpoonya aagwisya bweema bununkilila. Tununkilizyo twaalubazu ootu twakali kupangwa azintu zyone kuti katubelesyegwa mutente lyakukombela alimwi amutempele. Twakali kuumpwa mafwumofwumo amasiku acipaililo catununkilizyo mu Busena Busalala, mpoonya mu Buzuba Bwakumanya Milandu, twakali kuumpilwa mukati mu Busena Busalalisya. Twakali kwiiminina mipailo yababelesi ba Leza iitambulwa. Tiitwakacili kuyandika kubelesyegwa a Banakristo.—Ku 30:34, 35; Le 16:13; Ciy 5:8.

• Tununkilizyo tutuba.

  Mamina aazisamu aakayuma aanunkilila aazwa kuzisamu zimwi zya Boswellia. Kuti aumpwa, akali kugwisya bweema bununkilila kabotu. Twakali kusanganizyigwa atununkilizyo tumbi kupanga tununkilizyo tusetekene itwakali kubelesyegwa mutente lyakukombela alimwi amutempele. Alimwi twakali kweendela antoomwe acituuzyo camaila alimwi twakali kubikkwa muzinkwa zyacitondezyo mukati mu Busena Busalala.—Ku 30:34-36; Le 2:1; 24:7; Mt 2:11.

• Twakunyamwida mulilo.

  Tubelesyo twakapangidwe angolida, nsiliva, naa mukuba, itwakali kubelesyegwa atente lyakukombela alimwi akutempele ikuumpila tununkilizyo alimwi akugwisya makala aamulilo acipaililo cazipaizyo alimwi atutambo twalambe acibikkilo camalambe cangolida. Alimwi twakali kwiitwa kuti tutentelo.—Ku 37:23; 2Mk 26:19; Heb 9:4.

 U

• Urimu a Tumimu.

  Eezyi zyakali zintu izyakali kubelesyegwa amupaizi mupati mbubonya mbuli kuuma cisolo kuti azyibe ncayanda Leza nokwakali kuyandika bwiinguzi buzwa kuli Jehova kumibuzyo iijatikizya cisi coonse. Urimu a Tumimu zyakali kubikkwa mukati mwakabaki kaacamba kamupaizi mupati ciindi naakali kunjila mutente lyakukombela. Mulimo wanzizyo kulibonya kuti wakamana ciindi bana Babuloni nibakanyonyoona Jerusalemu—Ku 28:30; Ne 7:65.

Z

• Ziliba.

  Ncibelesyo ncobakali kubelesya kwaanga muntu kuti asubuke. Ziliba zimwi zyakali zyakwaangilila buyo maulu, eelyo zimwi zyakali koongomanika mubili, ambweni kumanela maulu, maanza alimwi amukosi.—Je 20:2; Mil 16:24.

• Zilwanyo.

  Zyakusama zyakulikwabilizya nzyobakali kusama basikalumamba, nkokuti cimpoompo, cibaki cankondo, lutambo, cakukwabilila miindi, alimwi antobo.—1Sa 31:9; Ef 6:13-17.

• Zinkwa zyacitondezyo.

  Zinkwa zili 12 zyakali kubikkwa mumilwi yobilo aumwi mulwi wakajisi zinkwa zili cisambomwe atebulu mu Busena Busalala bwatente lyakukombela alimwi alyamutempele. Alimwi zyakali kwiitwa kuti “zinkwa zyakwiilika” alimwi akuti, “zinkwa zyacituuzyo.” Lyoonse mubuzuba bwa Sabata cituuzyo eeci ca Leza cakali kugwisyigwa mpoonya kwakali kubikkwa cinkwa cimbi cipya. Icinkwa cakali kugwisyigwa kanji-kanji cakali kuligwa buyo abapaizi balikke. (2Mk 2:4; Mt 12:4; Ku 25:30; Le 24:5-9; Heb 9:2)—Amubone Makani Aayungizyidwe B5.

• Zinkwa zyacituuzyo.

  —Amubone ZINKWA ZYACITONDEZYO.

• Zintu zyakasaalwa.

  Zintu zyamuntu zyakubelesya lwakwe mwini naa zintu zyamuŋanda, naa banyama, naa zintu zimwi iziyandika kapati izyakali kubwezyegwa kuzwa kuli yooyo wazundwa munkondo.—Jos 7:21; 22:8; Heb 7:4.

• Zipego zyaluse.

  Zipego izyakali kupegwa kugwasya muntu uupengede. Eezyi tazyaambidwe cacigaminina mu Magwalo aa Chihebrayo, pele Mulawo wakalipede malailile aagaminide kubana Israyeli kujatikizya mukuli ngobakajisi wakugwasya bacete.—Mt 6:2.

• Zivu.

  Ndizina lyakusaanguna lyamwezi wabili mukkalenda njaakabapa Leza ba Juda alimwi mwezi walusele mukkalenda yakunyika. Wakali kutalikila akati kamwezi wa April kusikila akati kamwezi wa May. Mu Talmud yaci Juda, wiitwa kuti Iyyar amumabbuku aambi aakalembwa nobakazwa mubuzike ku Babuloni. (1Ba 6:37)—Amubone Makani Aayungizyidwe B15

• Ziyo.

  Ndibbwe libulungene ilyakali kubikkwa atala aabbwe limbi likozyene alimwi lyakali kubelesyegwa kuziya maila kupanga fulaulu. Mwiini iwakali kubikkwa akati kabbwe lyaansi wakali kupa kuti bbwe lyaatala kalikonzya kuzinguluka. Kaindi, nolyakali kulembwa Bbaibbele, ziyo lyamaanza ilyakali kubelesyegwa abamakaintu lyakali kubelesyegwa mumikwasyi minji. Mbokunga cakulya camukwasyi cakayeeme aziyo lyamaanza, Mulawo wa Musa wakali kukasya kunyanga muntu ziyo naa mwanaankando (ibbwe lyaatala) kuti cibe cijatilizyo. Ziyo lipati lyakali kuzingulusyigwa amunyama.—Dt 24:6; Mk 9:42.

• Ziyoni; Cilundu ca Ziyoni.

  Ndizina lyamunzi muyumu wa Jebusi wabana Jebusi iwakali kumusanza lwaajwe lwakalundu ka Jerusalemu. Davida naakauzunda munzi ooyu, wakayaka ŋanda yakwe yabwami nkukonya ooko, eelyo wakatalika kwiitwa kuti “Munzi wa Davida.” (2Sa 5:7, 9) Ziyoni cakaba cilundu cisetekene kapati kuli Jehova ciindi Davida naakalonzya Bbokesi lyacizuminano kuti likakkalile nkuko. Kumbele, izina eeli lyakabikkilizya abusena aakali tempele a Cilundu ca Moriya, alimwi zimwi ziindi amunzi woonse wa Jerusalemu. Mu Magwalo aa Banakristo aa Chigiriki izina eeli kanji-kanji lilabelesyegwa munzila yacikozyanyo.—In 2:6; 1Pe 2:6; Ciy 14:1.

• Zusi.

  Nguleza mupati akati kabaleza banji baba Giriki. Naakali mu Lustro, Barnaba bakamuyeeyela kuti ngu Zusi. Mumalembe aansiku aakalembedwe abbwe aakajanika munsi-munsi a Lustro alaamba kujatikizya “bapaizi ba Zusi” alimwi a “Zusi leza wazuba.” Bwato mbwaakatantide Paulo kuzwa kunsumbu ya Mata bwakalembedwe kuti “Bana Basankwa ba Zusi,” nkokuti, bana bamaanga ba Castor a Pollux.—Mil 14:12; 28:11.

• Zyiba lyamulilo.

  Mbusena bwacikozyanyo ‘ibuyaka mulilo asulufa,’ alimwi bwaambwa kuti “lufwu lwabili.” Basizibi bateempwi, Diabolosi, lufwu a Cuumbwe (naa Cikkalilo Cabafwu) zisowelwa mumo. Kubikkilizyigwa kwacilenge camuuya, lufwu alimwi a Cikkalilo Cabafwu, zyalo zitakonzyi kupya amulilo, citondezya kuti zyiba lyamulilo eeli ndyacikozyanyo, kutali kusubulwa kutamani, pele lyaamba kunyonyoonwa cakumaninina.—Ciy 19:20; 20:14, 15; 21:8.