1 Makani 10:1-14
-
Lufwu lwa Saulo abana bakwe (1-14)
10 Lino ba Filisiti bakali kulwana abana Israyeli. Eelyo baalumi bana Israyeli bakatija kuzwa kuba Filisiti alimwi banji bakajaigwa a Cilundu ca Giliboa.+
2 Ba Filisiti bakali kuyaabuswena afwaafwi kuli Saulo abana bakwe, mpoonya bakajaya Jonatani, Abinadabu a Malikisuwa,+ ibana ba Saulo.
3 Lino nkondo yakamuyumina Saulo, alimwi basimata bakamweenzya akumucisa.+
4 Mpoonya Saulo wakati kuli sikumunyamwida zilwanyo: “Somona panga lyako undiyase kutegwa baalumi aaba batapalwidwe batabooli akundipenzya.”*+ Pele sikumunyamwida zilwanyo wakakaka nkaambo wakaliyoowede kapati. Aboobo Saulo wakabweza panga akuwida alindilyo.+
5 Sikumunyamwida zilwanyo naakabona kuti Saulo wafwa, awalo wakawida apanga lyakwe akufwa.
6 Aboobo Saulo wakafwa abana bakwe botatwe, alimwi abantu boonse bamuŋanda yakwe bakafwida antoomwe.+
7 Lino bana Israyeli boonse ibakali mucibanda nobakabona kuti boonse batija akuti Saulo abana bakwe bafwa, bakatalika kusiya minzi yabo akutija; mpoonya ba Filisiti bakaboola akukkala mulinjiyo.
8 Buzuba bwakatobela, eelyo ba Filisiti nobakaboola kuzoosaala zintu zyabaabo ibakafwa, bakajana Saulo abana bakwe balifwide a Cilundu ca Giliboa.+
9 Aboobo bakamusamununa akumukosola mutwe akubweza zilwanyo zyakwe, alimwi bakatuma mulumbe koonse-koonse mucisi caba Filisiti ikuzyibya mituni yabo+ abantu babo.
10 Kumane bakabikka zilwanyo zyakwe muŋanda* yaleza wabo, eelyo mutwe wakwe bakawaangilila kuŋanda ya Dagoni.+
11 Lino bantu boonse bakkala ku Jabesi+ mu Gileadi nobakamvwa zyoonse kujatikizya mbubakamucita Saulo ba Filisiti,+
12 basikalumamba boonse bakanyamuka akuyakuubweza mutunta wa Saulo amitunta yabana bakwe. Bakaileta ku Jabesi eelyo bakaazikka mafwuwa aabo munsi aacisamu cipati mu Jabesi,+ alimwi bakaliimya kulya mazuba aali ciloba.
13 Aboobo Saulo wakafwa akaambo kakutasyomeka kwakwe kuli Jehova nkaambo tanaakaswiilila jwi lya Jehova,+ alimwi akaambo kakuunka kukusonda+
14 muciindi cakubuzya kuli Jehova. Aboobo wakamujaya akupa bwami kuli Davida mwana wa Jese.+
