1 Makani 5:1-26
5 Aaba mbabakali bana ba Rubeni,+ mwana mutaanzi wa Israyeli. Nguwakali mutaanzi pele akaambo kakusofwaazya* bulo bwausyi,+ coolwe cakwe cakuba mutaanzi kuzyalwa cakapegwa kubana ba Josefa+ imwana wa Israyeli, aboobo Rubeni tanaakalembwa mbuli mutaanzi kuzyalwa mumulongo wamazyalani.
2 Nokuba kuti Juda+ wakali anguzu kapati akati kabanabokwabo, alimwi mulinguwe momwakazwa iwakazooba musololi,+ coolwe cakuba mutaanzi kuzyalwa cakaba ca Josefa.
3 Bana ba Rubeni imwana mutaanzi wa Israyeli bakali ba Hanoki, Palu, Hezironi a Karimi.+
4 Bana ba Joeli bakali ba Semaya, Semaya wakazyala Gogo, Gogo wakazyala Simeyi,
5 Simeyi wakazyala Mika, Mika wakazyala Reaya, Reaya wakazyala Baala,
6 alimwi Baala wakazyala Beera ooyo Mwami Tiligati-pilineseri+ wa Asuri ngwaakatola kucisi cimbi kali mwaange; wakali silutwe wabana Rubeni.
7 Banabokwabo kweelana amikwasyi yabo mumulongo wamazyalani mbaaba, silutwe Jeieli alimwi a Zekariya,
8 Bela mwana wa Azazi imwana wa Sema imwana wa Joeli iwakali kukkala ku Aroeri+ akusikila ku Nebo aku Baala-meoni.+
9 Kulubazu lwakujwe wakalikkede kuyoosika kooko kutalikila nkanda ku Mulonga wa Firate,+ nkaambo banyama babo bavwubwa bakavwula munyika ya Gileadi.+
10 Mumazuba aa Saulo, bakalwana abana Hagiri aabo mbobakazunda, aboobo bakakkala mumatente aabo mucilawo coonse kujwe lya Gileadi.
11 Lino balunyungu lwa Gadi ibakabambene ambabo bakakkala mucisi ca Basani kuyoosikila ku Saleka.+
12 Joeli ngowakali silutwe, Safamu ngowakali kumutobela, mpoonya kwakali Janai a Safati mu Basani.
13 Banabokwabo bamuziinga zyabamausyi bakali ba Mikayeli, Mesulamu, Sheba, Jorai, Jakani, Ziya alimwi a Eberi, antoomwe bakali ciloba.
14 Aaba mbabakali bana ba Abihaili mwana wa Huri, imwana wa Jarowa, mwana wa Gileadi, mwana wa Mikayeli, mwana wa Jesisai, mwana wa Jado, mwana wa Buzi.
15 Ahi mwana wa Abidieli, mwana wa Guni ngowakali silutwe waŋanda yabamausyi.
16 Bakali kukkala mu Gileadi,+ mu Basani+ aminzi misyoonto* yanguwo alimwi amumacelelo aaku Saroni oonse kusikila nkwaagolela.
17 Bakalembwa boonse mumulongo wamazyalani mumazuba aa Mwami Jotamu+ wa Juda amumazuba aa Mwami Jeroboamu*+ wa Israyeli.
18 Bana Rubeni, bana Gadi acisela camusyobo wa Manase bakajisi basikalumamba basinguzu ibali 44,760 mumpi yabo ibakali kunyamuna ntobo amapanga alimwi bakajisi mata* alimwi bakaliyiide kulwana nkondo.
19 Bakalwana bana Hagiri,+ Jeturi, Nafisi+ a Nodabu.
20 Bakagwasyigwa mukubalwana, aboobo bana Hagiri abaabo boonse mbubakali limwi bakaabwa mumaanza aabo, nkaambo bakakwiilila Leza kuti abagwasye munkondo, eelyo wakakuswiilila kulomba kwabo akaambo kakuti bakali kumusyoma.+
21 Bakatola banyama babo bavwubwa—nkamela zili 50,000, mbelele zili 250,000, ambongolo zili 2,000—kubikkilizya abantu bali 100,000.
22 Banji bakajaigwa akaambo kakuti nkondo yakali ya Leza mwini-mwini.+ Eelyo bakakkala mumasena aabo kusikila ciindi nibakatolwa kucisi cimbi kabali baange.+
23 Balunyungu lwacisela camusyobo wa Manase+ bakakkala munyika kuzwa ku Basani kusikila ku Baala-herimoni aku Seniri aku Cilundu ca Herimoni.+ Bakali banji kapati.
24 Aaba mbabakali basilutwe baziinga zyabamausyi: Eferi, Isi, Elieli, Azirieli, Jeremiya, Hodaviya a Jadieli; bakali basikalumamba basinguzu, baalumi ibalaampuwo alimwi bakali basilutwe baziinga zyabamausyi.
25 Pele bakaleka kusyomeka kuli Leza wabamausyi alimwi bakavwuula abaleza babantu bamunyika,+ aabo Leza mbaakanyonyoona kubusyu bwabo.
26 Aboobo Leza wa Israyeli wakabusya moyo wa Mwami Puli wa Asuri+ (nkokuti Mwami Tiligati-pilineseri+ wa Asuri) aboobo wakatola bana Rubeni, bana Gadi acisela camusyobo wa Manase kucisi cimbi kabali baange. Wakabatola ku Hala, ku Habori, ku Hara akumulonga wa Gozani,+ eelyo bakakkala ooko kusikila sunu.
Bupanduluzi buyungizyidwe
^ Naa “kakubisya.”
^ Naa “yeengelede.”
^ Nkokuti, Jeroboamu Wabili.
^ Mu Chihebrayo, “alimwi bakali kulyata buta.”
