1 Samuele 18:1-30
18 Lino Davida mbwaakamanina buyo kwaambaula a Saulo, Jonatani+ a Davida bakamvwana* kapati, eelyo Jonatani wakatalika kumuyanda Davida mbubonya mbwaliyanda mwini.+
2 Kuzwa buzuba oobo, Saulo wakamubweza Davida alimwi tanaakamuzumizya kuti apiluke kuŋanda yabausyi.+
3 Jonatani a Davida bakapanga cizuminano,+ nkaambo Jonatani wakali kumuyanda Davida mbuli mbwaliyanda mwini.+
4 Jonatani wakasamununa jansi akupa Davida antoomwe azisani zyakwe zimbi, apanga lyakwe, buta alutambo lwamucibuno.
5 Lino Davida wakatalika kuunka kunkondo alimwi wakali kuzwidilila*+ kufwumbwa Saulo nkwaakali kumutuma.+ Aboobo Saulo wakamubikka kulanganya basikalumamba, eelyo eeci cakabakkomanisya bantu boonse ababelesi ba Saulo.
6 Lino Davida abantu bamwi nobakali kupiluka kuzwa kukujaya ba Filisiti, bamakaintu bakali kuboola kuzwa muminzi yoonse ya Israyeli kuzoocinga Mwami Saulo kumwi kabaimba nyimbo+ akuzyana. Bakali kusekelela kabalizya nsakalala atunkobela.+
7 Mpoonya bamakaintu ibakali kusekelela bakali kwiimba kuti:
“Saulo wajaya bantu bali zyuulu,Pele Davida wajaya makumi aazyuulu.”+
8 Lino Saulo wakanyema kapati alimwi lwiimbo oolu lwakamucima,+ nkaambo wakati: “Davida bamupa makumi aazyuulu, pele mebo bandipa zyuulu. Cilikke buyo casyaala, nkumupa bwami!”+
9 Kuzwa buzuba oobo, Saulo lyoonse tanaakacili kumulanga kabotu Davida.
10 Lino buzuba bwakatobela, ciindi Davida naakali kulizya kantimbwa+ mujanza lyakwe mbubonya mbuli lyoonse, muuya mubi wa Leza wakamunjila Saulo,+ aboobo wakatalika kucita zintu zigambya* muŋanda. Saulo wakajisi sumo mujanza lyakwe,+
11 mpoonya wakafwusa sumo+ kaamba kuti: ‘Ndilamuyasilizya Davida kubwaanda!’ Pele Davida wakamutija ziindi zyobilo.
12 Eelyo Saulo wakamuyoowa Davida nkaambo Jehova wakali anguwe+ pele Saulo wakamusiya.+
13 Aboobo Saulo wakamugwisya kulinguwe akumubikka kuba silutwe wakwe wabantu bali zyuulu, eelyo Davida wakali kusololela mpi yabasikalumamba kunkondo.*+
14 Lino Davida wakazumanana kuzwidilila*+ muzintu zyoonse nzyaakali kucita alimwi Jehova wakali anguwe.+
15 Saulo naakabona kuti Davida wakali kuzwidilila kapati, wakatalika kumuyoowa.
16 Pele bana Israyeli boonse abana Juda bakali kumuyanda Davida nkaambo wakali kubasololela kunkondo.
17 Kumane Saulo wakati kuli Davida: “Ndilijisi mwanaangu mupati Merabu.+ Ndilakupa kuti abe mukaintu wako.+ Aboobo weelede kuzumanana kutondezya busicamba kulindime akulwana nkondo zya Jehova.”+ Pele mumoyo Saulo wakali kwaamba kuti: ‘Mebo tandikoomujaya pe. Ba Filisiti mbabatiimujaye.’+
18 Amvwe boobo Davida wakati kuli Saulo: “Ino mebo ndime ni, alimwi ino mukwasyi wangu aluzubo lwataata ncinzi mu Israyeli kuti mebo ndibe mukwe wamwami?”+
19 Lino nocakasika ciindi cakupa Merabu mwana wa Saulo kuli Davida, kwakajanika kuti wakalipedwe kale kuli Adrieli+ muna Meholati kuti abe mukaintu wakwe.
20 Lino Mikala+ imwana wa Saulo wakali kumuyanda Davida, eelyo bantu bakamwaambila Saulo makani aaya alimwi akamukkomanisya.
21 Aboobo Saulo wakati: “Ndilamupa kulinguwe kutegwa amubede kakole akuti janza lyaba Filisiti libe alinguwe.”+ Mpoonya Saulo wakaambila Davida ciindi cabili kuti: “Ulapanga cizuminano calukwatano andime* sunu.”
22 Kuyungizya waawo Saulo wakalailila babelesi bakwe kuti: “Amubandike a Davida kumbali akumwaambila kuti, ‘Bona! Mwami wakukkomanina alimwi ababelesi bakwe boonse balakuyanda. Aboobo komukwata mwana wamwami.’”
23 Lino babelesi ba Saulo nibakamwaambila makani aaya Davida, Davida wakati: “Sena ncuuba-uba kulindinywe kukwata mwana wamwami kakuli mebo ndili muntu mucete alimwi uutajisi ampuwo?”+
24 Mpoonya babelesi ba Saulo bakamulwiida makani balaamba: “Ngaaya majwi ngaamba Davida.”
25 Amvwe boobo Saulo wakati: “Mboobu mbomweelede kumwaambila Davida, ‘Mwami tayandi mali aacikwati aali woonse pe,+ pele uyanda ndomo zyaba Filisiti zili 100 + kuti apilusizye basinkondonyina cibi.’” Nkaambo Saulo wakajisi muzeezo wakuti Davida ajaigwe aba Filisiti.
26 Aboobo babelesi bakwe bakamwaambila majwi aaya Davida alimwi Davida wakakkomana kuti akwate mwana wamwami.+ Kacitanasika ciindi cakutola ndomo,
27 Davida wakaunka abaalumi bakwe, eelyo bakajaya baalumi ba Filisiti bali 200, kumane Davida wakaboola kajisi ndomo zyabo akuzipa kazikkwene kumwami, kutegwa apange cizuminano calukwatano amwami. Aboobo Saulo wakamupa Mikala mwanaakwe kuti abe mukaintu wakwe.+
28 Mpoonya Saulo wakabona akuzyiba kuti Jehova uli a Davida+ akuti Mikala mwanaakwe wakali kumuyanda Davida.+
29 Eeci cakapa kuti Saulo aindile kumuyoowa Davida, eelyo Saulo wakaba sinkondonyina a Davida buumi bwakwe boonse.+
30 Basilutwe baba Filisiti bakali kuboola kuzoolwana nkondo, pele lyoonse baboola kukulwana nkondo, Davida wakali kuzwidilila* kapati kwiinda babelesi boonse ba Saulo;+ aboobo zina lyakwe lyakaba aampuwo kapati.+
Bupanduluzi buyungizyidwe
^ Naa “moyo wa Jonatani wakakamantana amoyo wa Davida.”
^ Naa “kucita zintu camaano.”
^ Naa “kucita zintu mbuli musinsimi.”
^ Mu Chihebrayo, “wakali kuzwa akunjila kumbele lyabantu.”
^ Naa “kucita zintu camaano.”
^ Naa “uyooba mukwe wangu.”
^ Naa “kucita camaano kapati.”
