2 Bami 1:1-18
-
Elija wasinsima lufwu lwa Ahaziya (1-18)
1 Lino naakafwa Ahabu, bana Moabu+ bakazangila Israyeli.
2 Aciindi eeco Ahaziya wakawida ansi mucipulo naakali mukaanda kakwe kamujulu ikakali mu Samariya, eelyo wakalicisa. Aboobo wakatuma batumwa akubaambila kuti: “Kamuya mukabuzye makani kuli Baala-zebubi, leza wa Ekroni+ kutegwa ndizyibe naa ndilapona.”+
3 Pele mungelo wa Jehova wakaambila Elija*+ muna Tisibe kuti: “Nyamuka uunke kuyooswaangana abatumwa bamwami wa Samariya akubaambila kuti, ‘Sena taakwe Leza mu Israyeli ncomuunkila kuyoobuzya makani kuli Baala-zebubi, leza wa Ekroni?+
4 Aboobo mboobu mbwaamba Jehova: “Tokabuki pe abulo aawo mpolede, nkaambo ncobeni uyoofwa.”’” Mpoonya Elija wakaunka.
5 Lino batumwa bakwe nibakapiluka kulinguwe, mpoonya aawo wakati kulimbabo: “Ino mwapilukila nzi?”
6 Bakamwiingula kuti: “Kuli muntu umwi waboolede kuzooswaangana andiswe, eelyo watwaambila kuti, ‘Amupiluke kumwami iwamutuma mukamwaambile kuti, “Mboobu mbwaamba Jehova: ‘Sena taakwe Leza mu Israyeli notuma bantu kuyoobuzya makani kuli Baala-zebubi, leza wa Ekroni? Aboobo tokabuki pe abulo aawo mpolede, nkaambo ncobeni uyoofwa.’”’”+
7 Mpoonya wakababuzya kuti: “Ino wali kulibonya buti muntu ooyo iwaboolede kuzooswaangana andinywe akumwaambila majwi aaya?”
8 Aboobo bakati: “Muntu ooyo wasamide cisani caboya+ alimwi walyaangide lutambo lwacikutu mucibuno cakwe.”+ Mpoonya aawo mwami wakati: “Ngu Elija muna Tisibe.”
9 Mpoonya mwami wakatuma silutwe wabasikalumamba bali 50 antoomwe abasikalumamba bakwe bali 50. Eelyo naakaunka kuli Elija, wakajana ulikkede atala aacilundu. Wakati kulinguwe: “Omuntu wa Leza mwini-mwini,+ mwami waamba kuti, ‘Koseluka.’”
10 Pele Elija wakavwiila silutwe wabasikalumamba bali 50 kuti: “Ikuti naa ndili muntu wa Leza, akuboole mulilo kuzwa kujulu+ akukuumpa cakumaninina yebo abasikalumamba bako bali 50.” Eelyo mulilo wakaboola kuzwa kujulu akumuumpa cakumaninina antoomwe abasikalumamba bakwe bali 50.
11 Aboobo mwami wakatuma silutwe uumbi wabasikalumamba bali 50 antoomwe abasikalumamba bakwe bali 50. Wakaunka akuyakwaambila Elija kuti: “Omuntu wa Leza mwini-mwini, mwami waamba kuti, ‘Koseluka cakufwambaana.’”
12 Pele Elija wakabavwiila kuti: “Ikuti naa ndili muntu wa Leza mwini-mwini, akuboole mulilo kuzwa kujulu akukuumpa cakumaninina yebo abasikalumamba bako bali 50.” Eelyo mulilo wa Leza wakaboola kuzwa kujulu akumuumpa cakumaninina antoomwe abasikalumamba bakwe bali 50.
13 Mpoonya mwami wakatuma silutwe wabasikalumamba bali 50 watatu antoomwe abasikalumamba bakwe bali 50. Pele silutwe wabasikalumamba ooyo wakaboola akufwugama kumbele lya Elija akutalika kumukombelezya kuti: “Omuntu wa Leza mwini-mwini, akaka utandijayi mebo ababelesi bako aaba bali 50.
14 Mulilo uuzwa kujulu wanyonyoona kale basilutwe bobilo bataanzi bankamu zyabasikalumamba bali 50 antoomwe ankamu zyabasikalumamba babo, pele akaka mebo utandijayi.”
15 Eelyo mungelo wa Jehova wakaambila Elija kuti: “Koseluka uunke anguwe. Utamuyoowi pe.” Aboobo wakanyamuka akuunka anguwe kumwami.
16 Mpoonya Elija wakati kumwami, “Mboobu mbwaamba Jehova: ‘Yebo wakatuma batumwa kuyoobuzya makani kuli Baala-zebubi leza wabana Ekroni.+ Sena taakwe Leza mu Israyeli?+ Ino wakalekela nzi kubuzya makani kulinguwe? Aboobo tokabuki pe abulo aawo mpolede, nkaambo ncobeni uyoofwa.’”
17 Aboobo mwami wakafwa kweelana amajwi aa Jehova ngaakaamba Elija; alimwi akaambo kakuti tanaakajisi mwana musankwa, Jehoramu*+ wakaba mwami mubusena bwakwe, mumwaka wabili wabulelo bwa Jehoramu+ mwana wa Jehosafati imwami wa Juda.
18 Makani oonse aakaindi aamba zya Ahaziya+ azintu zyoonse nzyaakacita alilembedwe mubbuku lyamakani aakaindi aamba zyamazuba aabami ba Israyeli.
Bupanduluzi buyungizyidwe
^ Nkokwaamba kuti “Leza Wangu Ngu Jehova.”
^ Nkokuti, mwanookwabo a Ahaziya.
