2 Makani 17:1-19
17 Lino Jehosafati+ mwanaakwe wakaba mwami mubusena bwakwe, eelyo wakayumya bwami bwakwe kukulwana bana Israyeli.
2 Wakabikka mpi zyabasikalumamba muminzi yoonse ya Juda iyakakwabilidwe alimwi wakabikka nkambi zyabasikalumamba munyika ya Juda amuminzi ya Efraimu eeyo Asa usyi njaakabwezede.+
3 Jehova wakazumanana kuba a Jehosafati nkaambo wakali kweenda munzila zya Davida sikale wakwe+ alimwi tanaakali kukomba ba Baala pe.
4 Walo wakayandaula Leza wabamausyi+ akutobela* mulawo wakwe, ikutali zilengwa zyabana Israyeli.+
5 Jehova wakakkazikizya bwami mumaanza aakwe;+ alimwi ba Juda boonse bakali kumupa zipego Jehosafati, eelyo wakavwuba kapati akulemekwa kapati.+
6 Wakaba sicamba mukutobela nzila zya Jehova alimwi wakagwisya masena aakukombela+ alimwi amisemu yazisamu yakukomba*+ mu Juda.
7 Lino mumwaka watatu wabulelo bwakwe wakaita basilutwe bakwe, nkokuti Beni-haili, Obadiya, Zekariya, Netaneli alimwi a Mikaya kuti kabayiisya muminzi ya Juda.
8 Iba Levi aaba bakali antoomwe ambabo: Semaya, Netaniya, Zebadiya, Asaheli, Semiramoti, Jehonatani, Adonija, Tobija a Tobi-adoniya, antoomwe ambabo kwakali Elisama a Jehoramu bapaizi.+
9 Bakatalika kuyiisya mu Juda kabajisi bbuku lya Mulawo wa Jehova,+ alimwi bakaunka muminzi yoonse ya Juda kabayaabuyiisya akati kabantu.
10 Lino buyoofwu buzwa kuli Jehova bwakasikila bami boonse bamasi bakazingulukide Juda, aboobo tiibakamulwana Jehosafati.
11 Ba Filisiti bakaletela Jehosafati zipego amali aamutelo. Abalo bana Arabiya bakamuletela matanga aambelele ampongo, nkokuti bagutu bali 7,700 abajembwe bali 7,700.
12 Jehosafati wakali kuyaabuyuma kapati,+ alimwi wakazumanana kuyaka masena aakulikwabilila+ aminzi yaziyobwedo+ mu Juda.
13 Wakacita milimo mipati muminzi ya Juda alimwi wakalijisi abasikalumamba basinguzu mu Jerusalemu.
14 Aaba bakalipedwe milimo kweelana aziinga zyabamausyi: kuzwa kuli Juda kwakali basilutwe bazyuulu, Adina silutwe, wakajisi basikalumamba basinguzu ibali 300,000.+
15 Adina ngowakali kulanganya Jehohanana silutwe iwakali abasikalumamba bali 280,000.
16 Alimwi ngowakali kulanganya Amasiya mwana wa Zikiri iwakalyaaba kubelekela Jehova, ooyo iwakali abasikalumamba basinguzu ibali 200,000.
17 Kuzwa kuli Benjamini+ kwakali sikalumamba singuzu wazina lya Eliyada, iwakali abaalumi ibali 200,000 ibakajisi mata antobo.+
18 Eliyada ngowakali kulanganya Jehozabadi iwakali abaalumi bali 180,000 ibakalibambilide kulwana nkondo.
19 Aaba mbabakali kubelekela mwami kunze lyabaabo imwami mbaakabikka muminzi iikwabilidwe munyika yoonse ya Juda.+
