2 Makani 23:1-21
23 Mumwaka waciloba, Jehoyada wakaliyumya akupanga cizuminano abasilutwe babasikalumamba bali mwaanda,+ nkokuti Azariya mwana wa Jerohamu, Isimayeli mwana wa Jehohanana, Azariya mwana wa Obedi, Maaseya mwana wa Adaya a Elisafati mwana wa Zikiri.
2 Kumane bakaunka mu Juda moonse akubunganya ba Levi+ kuzwa muminzi yoonse ya Juda alimwi abasilutwe baziinga zyabamausyi babana Israyeli. Lino nibakaboola ku Jerusalemu,
3 mbungano yoonse yakapanga cizuminano+ amwami muŋanda ya Leza mwini-mwini, mpoonya Jehoyada wakabaambila kuti:
“Amubone! Mwana wamwami uyoolela mbubonya Jehova mbwaakasyomezya kujatikizya bana ba Davida.+
4 Mboobu mbomweelede kucita: Nkamu yomwe yabapaizi aba Levi ibayoobeleka+ mu Sabata banooli basikulindilila milyango;+
5 nkamu imbi iyooba kuŋanda yamwami,+ mpoonya yamamanino iyooba ku Mulyango wa Ntalisyo, eelyo bantu bambi boonse bayooba mulubuwa lwaŋanda ya Jehova.+
6 Mutalekeli muntu naba omwe kunjila muŋanda ya Jehova pele buyo bapaizi aba Levi ibabeleka milimo.+ Aaba balakonzya kunjila nkaambo ninkamu iisalala, pele bantu bambi boonse beelede kuzuzikizya mukuli wabo kuli Jehova.
7 Ba Levi beelede kumuzinguluka mwami, umwi aumwi azilwanyo zyakwe mujanza. Kufwumbwa uunjila muŋanda uyoojaigwa. Amube aafwaafwi amwami kufwumbwa nkwaaunka.”*
8 Ba Levi aba Juda boonse bakacita mbubonya mbwaakabalailila Jehoyada mupaizi. Aboobo umwi aumwi wakaletelela baalumi bakwe ibakali kubeleka mu Sabata, antoomwe abaabo ibakali kupumuna mu Sabata+ nkaambo Jehoyada mupaizi tanaakazikotola nkamu eezyi.+
9 Mpoonya Jehoyada mupaizi wakapa basilutwe babasikalumamba bali mwaanda+ imasumo antobo zisyoonto alimwi antobo zyamubalo izyakali zya Mwami Davida,+ eezyo izyakali muŋanda ya Leza mwini-mwini.+
10 Kumane wakabikka bantu boonse, umwi aumwi acilwanyo cakwe* mujanza, kuzwa kululyo lwaŋanda kusikila kulumwensyi lwaŋanda, afwaafwi acipaililo alimwi aafwaafwi aŋanda kabamuzingulukide mwami.
11 Mpoonya bakamuleta mwana wamwami+ anze akumusamika musini akumubikka Bumboni,*+ eelyo bakamubikka kuba mwami. Aboobo Jehoyada abana bakwe bakamunanika. Mpoonya bakati: “Aaongole mwami!”+
12 Lino Ataliya naakamvwa coongo cabantu ibakali kulunduka akutembaula mwami, mpoonya aawo wakaunka kuŋanda ya Jehova ikwakali bantu.+
13 Mpoonya wakabona mwami kaimvwi afwaafwi amusemu wakwe kumbali aamulyango. Basilutwe+ abasikulizya myeembo bakali amwami, alimwi bantu boonse bamucisi bakali kusekelela+ akulizya myeembo, alimwi baimbi ibakajisi zibelesyo zyakwiimbya bakali kusololela* baimbi. Abone boobo, Ataliya wakazapula zisani zyakwe akoongolola kuti: “Mwandizangila! Mwandizangila!”
14 Pele Jehoyada mupaizi wakatuma basilutwe bampi yabasikalumamba bali mwaanda, aabo ibakasalidwe kulanganya mpi yabasikalumamba akubaambila kuti: “Amumugwisye mumilongo yabasikalumamba alimwi kufwumbwa utiimutobele, mumujaye apanga!” Nkaambo mupaizi wakaambide kuti: “Mutamujaili muŋanda ya Jehova.”
15 Aboobo bakamujata, eelyo nobakasika kumanjililo aa Mulyango wa Mabbiza kuŋanda yamwami, mpoonya aawo bakamujaya ooko.
16 Mpoonya Jehoyada wakapanga cizuminano akati kanguwe abantu boonse alimwi amwami, ikuti balazumanana kuba bantu ba Jehova.+
17 Kuzwa waawo bantu boonse bakaboola kuŋanda* ya Baala akwiimwaya,+ eelyo zipaililo zyakwe azikozyanyo zyakwe bakazipwayaula,+ alimwi Matani mupaizi wa Baala bakamujaya+ kumbele lyazipaililo.
18 Mpoonya Jehoyada wakabikka bweendelezi bwamilimo yamuŋanda ya Jehova mumaanza aabapaizi aba Levi aabo Davida mbaakabikkide munkamu zibelekela aŋanda ya Jehova kuti kabatuula zipaizyo zyuumpwa zya Jehova+ kweelana ambokulembedwe mu Mulawo wa Musa,+ cakusekelela akwiimba kweelana ambwaakalailila* Davida.
19 Alimwi wakabikka balindizi mumilyango+ yaŋanda ya Jehova kutegwa kutanjili muntu naba omwe uusofweede munzila iili yoonse.
20 Mpoonya wakabweza basilutwe babasikalumamba bali mwaanda+ abantu balemekwa alimwi abasololi babantu abantu boonse bamucisi, mpoonya bakamusindikila mwami kuzwa kuŋanda ya Jehova. Kumane bakaboola akwiinda kumulyango waatala, baakusika kuŋanda yamwami akukkazika mwami acuuno+ cabwami.+
21 Aboobo bantu boonse bamucisi bakasekelela alimwi munzi wakaba muluumuno nkaambo Ataliya bakamujaya apanga.
Bupanduluzi buyungizyidwe
^ Mu Chihebrayo, “nazwa ananjila.”
^ Naa “acilwanyo cakwe cakufwusa.”
^ Ambweni eeli lyakali bbuku lyakuvwunga imwakalembedwe Mulawo wa Leza.
^ Naa “kupa citondezyo ku.”
^ Naa “kutempele.”
^ Mu Chihebrayo, “kwiinda mumaanza aa.”
