2 Makani 5:1-14
5 Aboobo Solomoni wakamanizya mulimo woonse ngwaakeelede kucita kujatikizya ŋanda ya Jehova.+ Mpoonya Solomoni wakaleta zintu nzyaakasalazya Davida usyi,+ kumane wakabikka nsiliva, ngolida azibelesyo zyoonse muziyobwedo zyaŋanda ya Leza mwini-mwini.+
2 Lino aciindi eeco Solomoni wakabunganya baalu bamu Israyeli, basilutwe bamisyobo boonse abasilutwe baziinga zyabamausyi zyabana Israyeli. Bakaboola ku Jerusalemu kuti balete bbokesi lyacizuminano ca Jehova kuzwa ku Munzi wa Davida,+ nkokuti ku Ziyoni.+
3 Baalumi bana Israyeli boonse bakabungana kumbele lyamwami kupobwe* ilicitwa mumwezi waciloba.+
4 Aboobo baalu bamu Israyeli boonse bakaboola eelyo ba Levi bakalinyamuna Bbokesi.+
5 Bakaleta Bbokesi, tente lyakuswaanganina+ alimwi azibelesyo zyoonse zisalala izyakali mutente. Bapaizi aba Levi* mbabakazileta.
6 Mwami Solomoni antoomwe ambungano yoonse yabana Israyeli ibakaitidwe kuti baswaangane anguwe bakali kumbele lya Bbokesi. Aboobo mbelele aŋombe zinji kapati zyakatuulwa+ cakuti tiizyakali kubalika pe.
7 Kumane bapaizi bakanjizya bbokesi lyacizuminano ca Jehova mubusena bwalyo, ibusena bwaŋanda bwamukati, nkokuti mu Busena Busalalisya akulibikka munsi lyamababa aabakerubi.+
8 Aboobo mababa aabakerubi akalitandabede atala aabusena bwa Bbokesi, cakuti bakerubi bakalivwumba Bbokesi aminkulwa yandilyo yakulinyamuzya.+
9 Minkulwa yandilyo yakali milamfwu kapati cakuti mpela zyanjiyo zyakali kulibonya mu Busena Busalala kumbele lya Busena Busalalisya, pele anze tiizyakali kulibonya pe. Minkulwa eeyo moicili mweena oomo kusikila sunu.
10 Kunyina cakali mu Bbokesi pele buyo mabwe obilo aapapalete aayo Musa ngaakabikka ku Horebu+ ciindi Jehova naakapanga cizuminano+ abana Israyeli nobakazwa mu Egepita.+
11 Lino bapaizi nobakazwa mubusena busalala (nkaambo bapaizi boonse ibakaliko bakalisalazya,+ kunyina makani naa bakali munkamu iili),+
12 ba Levi boonse baimbi+ ibakali kulubazu lwa Asafu,+ Hemani,+ Jedutuni+ abana babo alimwi abanabokwabo bakasamide zisani zibotu alimwi kabajisi miyuwa, tuntimbwa azibelesyo zimbi zyakwiimbya; bakaliimvwi kujwe lyacipaililo antoomwe abapaizi bali 120 ibakali kulizya myeembo.+
13 Aciindi eeco basikulizya myeembo abasikwiimba nobakaimbila caantoomwe mukutembaula akulumba Jehova, alimwi nokwakamvwugwa kulila kwamyeembo, miyuwa, azibelesyo zimbi zyakwiimbya nobakali kutembaula Jehova, “nkaambo mubotu; luyando lwakwe lutamani nkoluli lyoonse mane kukabe kutamani,”+ mpoonya ŋanda ya Jehova yakazula kkumbi.+
14 Bapaizi tiibakacili kukonzya kuzumanana kubeleka milimo yabo akaambo kakkumbi, nkaambo bulemu bwa Jehova bwakazuzya ŋanda ya Leza mwini-mwini.+
