Amosi 5:1-27
5 “Amumvwe jwi eeli ndendimwaambila kalili lwiimbo lwabuumba,* nywebo nobamuŋanda ya Israyeli:
2 ‘Israyeli nakalindu wawa;Takonzyi kunyamuka alimwi.
Wasiigwa munyika yakwe mwini;Kunyina uumubusya.’
3 “Nkaambo mboobu mbwaamba Mwami Singuzuzyoonse Jehova:
‘Imunzi uunka kunkondo abantu bali 1,000 uyoosyaalilwa buyo bali 100 ;Awalo ooyo uunka kunkondo abantu bali 100 uyoosyaalilwa buyo bali 10, ibamuŋanda ya Israyeli.’+
4 “Nkaambo mboobu Jehova mbwaambila bamuŋanda ya Israyeli:
‘Amundiyandaule kutegwa muzumanane kupona.+
5 Mutayandauli Beteli+ pe,Mutaunki ku Giligala+ naa kwiinda ku Beere-seba,+Nkaambo ncobeni bantu bamu Giligala bayootolwa mubuzike,+Awalo Beteli uyoonyonyoonwa.*
6 Amuyandaule Jehova, kutegwa muzumanane kupona,+Kutegwa atamubukili mbubonya mbuli mulilo, nywebo nobamuŋanda ya Josefa,Akuumpa Beteli, kakunyina muntu uunga wauzima.
7 Nywebo musandula lubeta luli kabotu kuba mululwe,Alimwi bululami mubusowela ansi.+
8 Mulengi wacibunga canyenyeezi zya Kima* acibunga canyenyeezi zya Kesili,*+Ooyo uusandula mudima uusiya mbi kuba mafwumofwumo,Ooyo uupa kuti masyikati asiye mbi mbuli masiku,+Ooyo wiita maanzi manji aamulwiziKuti aapoomwede atala aanyika+—izina lyakwe ngu Jehova.
9 Uyoopa kuti lunyonyooko lubasikile cakufwambaana bantu basinguzu,Akunyonyoona masena aakwabilidwe.
10 Balabasulaika bantu basinsa kumulyango wamunzi,Alimwi balabasesemwa bantu baamba masimpe.+
11 Akaambo kakuti mubbadelesya mucete mutelo wamuunda,*Alimwi mubweza maila kulinguwe kauli mutelo,+Tamukazumanani pe kukkala mumaanda aamabwe aacezudwe ngomwayaka+Nokuba kunywa waini uuzwa mumyuunda yamisaansa mibotu njomwasyanga.+
12 Nkaambo ndilizyi mbobuli bunji buzangi bwanu*Ambozili zipati zibi zyanu—Nywebo mulapenzya bantu balulami,Mulatambula cisinkamulomo,Alimwi tamubacitili nzyobeelede bantu bacete kumulyango wamunzi.+
13 Aboobo bantu bacenjede bayakuumuna buyo ciindi eeco,Nkaambo cinooli ciindi camapenzi.+
14 Amuyandaule bubotu, ikutali bubi pe,+Kutegwa muzumanane kupona.+
Eelyo ambweni Jehova Leza wamakamu ulaba andinywe,Mbubonya mbomwaamba kuti ulaandinywe.+
15 Amusulaike bubi, muyande bubotu,+Bululami abuzwidilile kumulyango wamunzi.+
Ambweni Jehova Leza wamakamuUlabafwida luzyalo basyeede ba Josefa.’+
16 “Aboobo mboobu mbwaamba Jehova, inzya Jehova Leza wamakamu:
‘Mumabuwa oonse aabuleya munooli koomoka,Amwalo mumigwagwa yoonse bantu bayoolila kabati, “Maawe! Maawe!”
Bayakwiita balimi kuti bazoolileAbaabo bacibwene kulila kuti bazikoomoke.’
17 ‘Mumyuunda yoonse yamisaansa munooli koomoka;+Nkaambo ndiyakwiinda akati kanduwe,’ mbwaamba Jehova.
18 ‘Maawe kuli baabo bayandisya kuti busike buzuba bwa Jehova!+
Aboobo, ino buzuba bwa Jehova buyakwaamba nzi kulindinywe?+
Bunooli bwamudima uusiya mbi, tabukabi bwamumuni pe.+
19 Bunooli mbuli leelyo muntu natija syuumbwa, mpoonya waswaanganya munyama uutegwa bbeya,Alimwi ambuli leelyo nanjila muŋanda yakwe akujatilila kubwaanda ajanza lyakwe, kumane nzoka yamuluma.
20 Sena buzuba bwa Jehova tabukabi bwamudima, ikutali bwamumuni?Sena tabukabi bwamusinze, ikutali bwakumweka?
21 Tandaayandi mapobwe+ aanu pe, andicima,Alimwi tandikukkomanini kununkilila ikuzwa kumiswaangano yanu iisetekene.
22 Nokuba kuti mukandituulile zituuzyo zyuumpwa buumbulu azituuzyo zyanu zyacipego,Tandikazikkomanini pe;+Alimwi tandikazilangi akuzitambula zipaizyo zyanu zyalumvwano zyabanyama baneneede.+
23 Amuleke kundisabila anyimbo zyanu;Alimwi nditamvwi limbi kulila kwatuntimbwa twanu.+
24 Lubeta luli kabotu alukunke mbubonya mbuli maanzi manji,+Abwalo bululami mbubonya mbuli kalonga kakunka ciindi coonse.
25 Sena mwakali kundiletela zipaizyo alimwi azituuzyo zyacipegoKwamyaka iilya iili 40 munkanda, nywebo nobaŋanda ya Israyeli?+
26 Ncobeni lino mulamuyumuna Sakuti mwami wanu a Kaiwani,*Izikozyanyo zyanu, inyenyeezi yaleza wanu, ooyo ngomwakalipangila nobeni,
27 Mpoonya ndiyoomupa kutolwa mubuzike kwiindilila ku Damasiko,’+ mbwaamba ooyo uujisi zina lyakuti Jehova Leza wamakamu.”+
Bupanduluzi buyungizyidwe
^ Naa “lwiimbo lwamalila.”
^ Naa ambweni, “uyooba cintu camasalamuzi.”
^ Ambweni cibunga canyenyeezi zya Orion.
^ Ambweni nyenyeezi zya Pleiades izili mucibunga canyenyeezi zya Taurus.
^ Naa “mutelo wanyika.”
^ Naa “mboili minji milandu yanu.”
^ Ambweni baleza baambwa waawa nipulaneti iitegwa Saturn, yalo yakali kukombwa mbuli leza.
