Ezekieli 32:1-32
32 Lino mumwaka wa 12, mumwezi wa 12, mubuzuba bwakusaanguna bwamwezi, ijwi lya Jehova lyakandisikila alimwi kaliti:
2 “Omwanaamuntu, koimba lwiimbo lwabuumba* lwakulila Farao mwami wa Egepita, umwaambile kuti,‘Yebo wakali mbuli syuumbwa mwana-mwana singuzu wamasi,Pele waumuzyigwa.
Wakali mbuli cilenge camulwizi,+ wakali kusotauka mumilonga yako,Kovwundaula maanzi amaulu aako, akubisya milonga.’
3 Mboobu mbwaamba Mwami Singuzuzyoonse Jehova:
‘Kwiinda mumbungano yamasi manji ndiyookuvwumba lunsabwe lwangu,Eelyo bayookukwelaanya mulunsabwe lwangu.
4 Ndiyookusiya ansi;Ndiyookusowela mucibanda.
Ndiyoopa kuti bayuni bamujulu boonse bakkale alinduwe,Alimwi ndiyookkutya banyama bamusyokwe bamunyika yoonse anyama yamubili wako.+
5 Nyama yako ndiyakwiisowela atala aamalunduAkuzuzya makkuti azibeela-beela zyamubili wako.+
6 Ndiyoopa kuti nyika inywe bulowa bwako ibwapasuka kusikila kumalundu,Eelyo buyoozula mutulonga.’
7 ‘Lino yebo waakuzimwa ndiyoovwumba majulu akupa kuti nyenyeezi zili mumo zisiye.
Ndiyoovwumba zuba amakumbi,Awalo mwezi taukamwesyi mumuni wanguwo.+
8 Ndiyoopa kuti mimuni yoonse iimweka kujulu isiye akaambo kanduwe,Alimwi ndiyoovwumba cisi cako amudima,’ mbwaamba Mwami Singuzuzyoonse Jehova.
9 ‘Ndiyoopenzya myoyo yabantu banji ndaakutola baange bako kumasi aambi,Kuzisi eezyo nzyotazyi.+
10 Ndiyoopa kuti bantu banji bagambwe kapati,Abalo bami babo bayookankama kabayoowede akaambo kanduwe, eelyo ndaakuvwukaula panga lyangu kumbele lyabo.
Tabakaleki kuzuzuma, umwi aumwi wabo kayoowede kufwa,Mubuzuba oobo mboyoowa.’
11 Nkaambo mboobu mbwaamba Mwami Singuzuzyoonse Jehova:
‘Ipanga lyamwami wa Babuloni liyookusikila.+
12 Ndiyoopa kuti makamu aako ajaigwe amapanga aabasikalumamba basinguzu,Basilunya kapati akati kamasi, inzya boonse buyo.+Bayoomanizya kulisumpula kwacisi ca Egepita, alimwi makamu aancico oonse ayoonyonyoonwa.+
13 Banyama bancico bavwubwa boonse ndiyoobajaya kumbali aamaanzi aancico manji,+Aboobo kunyina kuulu kwamuntu naa nsumba yabanyama bavwubwa iiyakwaavwundaula kabili.’+
14 ‘Aciindi eeco ndiyoobotya maanzi aabo,Alimwi ndiyoopa kuti milonga yabo ikunke mbuli mafwuta,’ mbwaamba Mwami Singuzuzyoonse Jehova.
15 ‘Ndaakupa kuti cisi ca Egepita cibe matongo, cisi icakasaalwa zintu zyoonse zyakali mumo,+Ndaakujaya bantu bakkala mumo boonse,Bayoozyiba kuti ndime Jehova.+
16 Oolu ndwiimbo lwabuumba, eelyo bantu bayoolwiimba;Bana basimbi bamuzisi bayoolwiimba.Bayoolwiimba kulila cisi ca Egepita amakamu aancico oonse,’ mbwaamba Mwami Singuzuzyoonse Jehova.”
17 Mpoonya mumwaka wa 12, mubuzuba bwa 15 bwamwezi, ijwi lya Jehova lyakandisikila kaliti:
18 “Omwanaamuntu, kolila makamu aacisi ca Egepita akuciselusyila ansi munyika iili kunsi, calo alimwi abana basimbi bamasi aajisi nguzu, antoomwe abaabo baselemukila mucilindi.*
19 “‘Ino nguni ngoinda kubota? Koya ansi, ukoone antoomwe abaabo batapalwidwe!’
20 “‘Bayoowida akati kabaabo bajaigwa apanga.+ Caabwa kupanga; kocikwelaanya antoomwe amakamu aancico oonse.
21 “‘Kuzwa kunsi kwini kwa Cuumbwe,* basikalumamba bainda kunguzu bayoomwaambila walo abaabo bamugwasya. Bayooselemukila ansi akoona mbuli bantu batapalwidwe, aabo ibajaigwa apanga.
22 Ooko nkwabede Asuri ankamu yakwe yoonse. Zyuumbwe zyabo zilimuzingulukide koonse-koonse, boonse bakajaigwa apanga.+
23 Zyuumbwe zyakwe zili kunsi kwini kwacilindi,* alimwi nkamu yakwe izingulukide cuumbwe cakwe koonse-koonse, boonse bakajaigwa apanga, akaambo kakuti bakali kuyoosya munyika yabaumi.
24 “‘Ooko nkwabede Elamu+ amakamu aakwe oonse kaazingulukide cuumbwe cakwe, boonse bakajaigwa apanga. Bakaselemukila ansi munyika iili kunsi kabatapalwidwe, aabo ibakali kuyoosya munyika yabaumi. Lino bayakuunka ansoni zyabo antoomwe abaabo baselemukila mucilindi.*
25 Bamupangila bulo akati kabaabo bakajaigwa antoomwe amakamu aakwe oonse kaazingulukide zyuumbwe zyakwe. Boonse buyo tabapalwidwe, bakajaigwa apanga, akaambo kakuti bakali kuyoosya munyika yabaumi; aboobo bayakuunka ansoni zyabo antoomwe abaabo baselemukila mucilindi.* Walo wabikkwa akati kabaabo bakajaigwa.
26 “‘Ooko nkwabede Meseki a Tubali+ alimwi amakamu aabo oonse. Zyuumbwe zyakwe zilimuzingulukide. Boonse tabapalwidwe, bakayaswa apanga, akaambo kakuti bakali kuyoosya munyika yabaumi.
27 Sena tabakooni ansi antoomwe abasikalumamba basinguzu aabo batapalwidwe ibakafwa, ibakaselemukila ku Cuumbwe* antoomwe azilwanyo zyabo? Aboobo bayoobikka mapanga aabo kunsi aamitwe yabo,* azibi zyabo atala aazifwuwa zyabo, akaambo kakuti basikalumamba aaba basinguzu bakali kuyoosya munyika yabaumi.
28 Pele yebo uyoopwaigwa akati kabaabo batapalwidwe alimwi uyakoona antoomwe abaabo bakajaigwa apanga.
29 “‘Ooko nkwabede Edomu,+ bami bakwe abasilutwe bakwe boonse, aabo bakalazikwa akati kabaabo bakajaigwa apanga nokuba kuti bakali basinguzu; abalo bayakoona ansi antoomwe abaabo batapalwidwe+ alimwi abaabo baselemukila mucilindi.*
30 “‘Ooko nkobabede basilutwe* bakunyika boonse, antoomwe abana Sidoni boonse,+ aabo camasampu ibaselemukila ansi antoomwe abaabo bakajaigwa, nokuba kuti nguzu zyabo zyakali kuyoosya. Bayakoona ansi kabatapalwidwe antoomwe abaabo bakajaigwa apanga alimwi bayakuunka ansoni zyabo antoomwe abaabo baselemukila mucilindi.*
31 “‘Eezyi zyoonse Farao uyoozibona, eelyo uyakuumbulizyigwa akaambo kazintu zyoonse zyakacitikila makamu aakwe;+ Farao ankamu yakwe yoonse bayoojaigwa apanga,’ mbwaamba Mwami Singuzuzyoonse Jehova.
32 “‘Akaambo kakuti wakali kuyoosya munyika yabaumi, Farao amakamu aakwe oonse bayoolazikwa kuti boone antoomwe abantu batapalwidwe, aabo ibajaigwa apanga,’ mbwaamba Mwami Singuzuzyoonse Jehova.”
Bupanduluzi buyungizyidwe
^ Naa “lwiimbo lwamalila.”
^ Naa “mucuumbwe.”
^ Naa “Cikkalilo Cabafwu.” Amubone Bupanduluzi Bwamabala.
^ Naa “kwacuumbwe.”
^ Naa “mucuumbwe.”
^ Naa “mucuumbwe.”
^ Naa “Cikkalilo Cabafwu.” Amubone Bupanduluzi Bwamabala.
^ Ambweni kwaamba basikalumamba ibakazikkwa amapanga aabo, ibulemu bupegwa kuli basikalumamba.
^ Naa “mucuumbwe.”
^ Naa “basololi.”
^ Naa “mucuumbwe.”
