Isaya 49:1-26
49 Amundiswiilile nonsumbu,Amubikkile maano, nomisyobo iili kulamfwu.+
Jehova wakandiita kanditanazyalwa.*+
Kandicili mwida lyabaama, wakandibanda zina.
2 Wakapa mulomo wangu kuba mbuli panga libosya;Wakandisisa mucimvwule cajanza lyakwe.+
Wakandipa kuba muvwi uuŋaima;Wakandisisa munkomo yakwe yamivwi.
3 Wakandaambila kuti: “Yebo uli mubelesi wangu, O Israyeli,+Kwiinda mulinduwe ndiyootondezya bulemu bwangu.”+
4 Pele mebo ndakaamba kuti: “Ndalikubelekela buyo maliminya.Ndalikubelesya nguzu zyangu kucintu citako alimwi cabuyo.Pele masimpe Jehova nguundibeteka,*Alimwi zyakuvwola zyangu* zizwa kuli Leza wangu.”+
5 Lino Jehova, Ooyo wakandibumba mwida kuba mubelesi wakwe,Wandituma kuti ndimujolele Jakobo,Kutegwa Israyeli abungane kulinguwe.+
Ndiyoolemekwa mumeso aa Jehova,Alimwi Leza wangu uyooba nguzu zyangu.
6 Walo wakaamba kuti: “Taali makani masyoonto pe kuti yebo uli mubelesi wanguOoyo uuyakwiimikizya misyobo ya JakoboAkujola baabo bakakwabililwa akati kabana Israyeli.
Ndakupa kuti ube mumuni kumasi,+Kutegwa lufwutuko lwangu lukasike kumagolelo aanyika.”+
7 Mboobu mbwaamba Jehova, Munununi wa Israyeli, Uusalala wakwe,+ kuli yooyo uunyansyigwa,+ kuli yooyo uusulidwe acisi, kumubelesi wabaleli:
“Bami bayoobona akwiimikila,Abalo basilutwe bayoovwuntama ansiAkaambo ka Jehova, ooyo uusyomeka,+Uusalala wa Israyeli, ooyo iwakusala.”+
8 Mboobu mbwaamba Jehova:
“Kuciindi cakufwidwa luzyalo* ndakakuvwiila,+Alimwi mubuzuba bwalufwutuko ndakakugwasya;+Ndakazumanana kukukwabilila kutegwa ndikupe kuba cizuminano cabantu,+Kuti ubukulusye nyika,Kuti bantu bangu ukabape kukona lukono lwabo lunyonyookede,+
9 Kuti ukaambile baange kuti, ‘Amuzwe oomo!’+
Abaabo bali mumudima+ kuti, ‘Amulibonye!’Bayoocelela mumbali aanzila,Macelelo aabo ayooba mumabali aanzila zyoonse zidibukide.*
10 Tabakafwi nzala nokuba kufwa nyota,+Alimwi lumwi lupya noliba zuba libalisya talikabaumpi pe.+
Nkaambo Ooyo uubafwida luse uyoobasololela,+Alimwi uyoobasololela kutusensa twamaanzi.+
11 Malundu aangu oonse ndiyakwaapanga kuba nzila,Ayalo migwagwa yangu iyoosumpulwa.+
12 Amubone! Aaba bazwa kulamfwu,+Alimwi amubone aaba bamwi bazwa kunyika akumbo,Alimwi aaba bambi bazwa kucisi ca Sinimu.”+
13 Amoompolole akaambo kakukondwa, nywebo nomajulu, ayebo onyika kokondwa.+
Malundu aasekelele akoongolola cakukondwa.+
Nkaambo Jehova waumbulizya bantu bakwe,+Alimwi wabafwida luse bantu bakwe bapengede.+
14 Pele Ziyoni wakaluujisi kwaamba kuti:
“Jehova wandilekelezya,+ Jehova wandiluba.”+
15 Sena mutumbu inga waluba mwanaakwe uucinyonkaNaa kutamufwida lubomba mwanaakwe wakulizyalila?
Nokuba kuti bamatumbu aaba inga baluba, mebo tandikonzyi kukuluba yebo pe.+
16 Bona! Ndakusimba mumaanza aangu.
Malambo aako ali kumbele lyangu lyoonse.
17 Bana bako bajokela cakufwambaana.
Aabo bakakupwaya akukunyonyoona bayookuleka.
18 Lanzya meso aako koonse-koonse ubone.
Boonse balabungana antoomwe.+
Baboola kulinduwe.
“Ncobeni mbondili muumi,” mbwaamba Jehova,“Boonse uyoobasama mbuli zyakulisakatizya,Alimwi uyoolyaanga mbabo mbuli mbwacita nabwiinga.
19 Nokuba kuti masena aako akanyonyoonwa akuba matongo, acalo cisi cako cakalinyonyookede,+Lino ciyoobaceela kapati aabo bakkala mumo,+Alimwi aabo ibakakumenede+ banooli kulamfwu.+
20 Bana ibakazyalwa ciindi nowakafwidwa bana bayakwaamba komvwide ategwa,‘Busena oobu bwandiceela kapati.
Kondijanina cibaka kuti ndikkale muno.’+
21 Mumoyo wako yebo uyakwaamba kuti,‘Ino nguni usyi bana aaba mbondapegwa,Mbwaanga mebo ndimukaintu wakafwidwa bana alimwi uutazyali,Wakatoledwe mubuzike akwaangwa?
Aboobo ino nguni wabakomezya aaba?+
Amubone! Mebo ndakasyeede buyo endikke,+Aboobo ino aaba bazwa kuli?’”+
22 Mboobu mbwaamba Mwami Singuzuzyoonse Jehova:
“Bona! Ndiyoonyamuna janza lyangu kumasi,Akwalo kubantu ndiyoonyamuna cikwankwani* cangu.+
Bayooleta bana bako basankwa kabali mumaanza* aaboAlimwi bayoonyamuna bana bako basimbi amagwezyo aabo.+
23 Bami bayooba basikukulanganya,+Alimwi banamalelo babo bayooba basikukulela.
Amasyu aalangide ansi bayookuvwuntamina+Alimwi bayoomyankuta lusuko luli kumaulu aako,+Eelyo uyoozyiba kuti ndime Jehova;Aabo bandilangila tabakafwi nsoni.”+
24 Sena aabo bakajatwa kale inga bafwutulwa kumuntu singuzu,Alimwi sena baange bamuntu silunya balakonzya kuvwunwa?
25 Pele mboobu mbwaamba Jehova:
“Nobaba baange bamuntu singuzu bayoofwutulwa,+Alimwi aabo bakajatwa amuntu silunya bayoovwunwa.+
Aabo bakulwana ndiyoobalwana,+Abalo bana bako ndiyoobafwutula.
26 Aabo bakupenzya ndiyoobapa kulya nyama yamibili yabo beni,Alimwi bulowa bwabo buyoobakola mbubonya mbuli waini uulweela.
Eelyo bantu boonse bayoozyiba kuti mebo ndime Jehova,+Ndendime Mufwutuli+ wako a Munununi wako,+Singuzu wa Jakobo.”+
Bupanduluzi buyungizyidwe
^ Mu Chihebrayo, “kuzwa mwida.”
^ Naa “Jehova uyoondicitila cabululami.”
^ Naa “bulumbu bwangu.”
^ Naa “cakukkomaninwa.”
^ Naa ambweni, “aatulundu tutakwe cintu.”
^ Naa “citondezyo.”
^ Mu Chihebrayo, “azyamba.”
