Jeremiya 19:1-15
19 Mboobu mbwaakaamba Jehova: “Koya, ukaule nongo yabulongo kumubumbi.+ Kobweza bapati bamwi akati kabantu antoomwe abapati bamwi akati kabapaizi,
2 mpoonya wuunke ku Kkuti lya Mwana wa Hinomu,+ eelyo lili kumanjililo aa Mulyango wa Zikaye. Ookuya ukaambilizye majwi ngenditiikwaambile.
3 Ukaambe kuti, ‘Amumvwe jwi lya Jehova, nywebo nobami ba Juda anywebo nomukkala mu Jerusalemu. Mboobu mbwaamba Jehova wamakamu, Leza wa Israyeli:
“‘“Amubone, ndilaleta mapenzi kubusena oobu, eelyo kufwumbwa muntu waamvwa uyoogambwa.
4 Cili boobo akaambo kakuti bakandisiya mebo+ alimwi bapa kuti busena oobu kabutacizyibwi.+ Mulimbubo baumpa zipaizyo kuli baleza bambi mbobatakazyi, balo abamausyi alimwi abami ba Juda, alimwi bazuzya busena oobu abulowa bwabantu batakwe mulandu.+
5 Bakayaka masena aakukombela aa Baala kutegwa kabaumpa bana babo mumulilo kazili zituuzyo zyuumpwa buumbulu kuli Baala,+ icintu ncindatakabalailila nokuba kucaamba alimwi catakaboolede mumizeezo yangu nokuceya.”’*+
6 “‘“Aboobo amubone! Mazuba ayoosika,” mbwaamba Jehova, “eelyo busena oobu nobutakaitwi limbi kuti Tofeti akuti Kkuti lya Mwana wa Hinomu, pele kuti Kkuti Lyakujaila.+
7 Ndiyoojaya makanze aa Juda alimwi aa Jerusalemu mubusena oobu, alimwi ndiyoobapa kuti bajaigwe apanga kuli basinkondonyina akujanza lyabaabo bayandaula buumi bwabo. Mitunta yabo ndiyakwiipa kuti ibe cakulya cabayuni bauluka mujulu alimwi acabanyama baanyika.+
8 Alimwi ndiyoopa kuti munzi ooyu ube cintu cigambya alimwi cisibilwa mulosi. Bantu boonse bainda kumbali lyanguwo bayakuulanga kabagambidwe alimwi bayoosiba mulosi akaambo kamapenzi oonse aayakuusikila.+
9 Ndiyoobapa kulya nyama yamibili yabana babo basankwa abasimbi, alimwi umwi aumwi wabo uyoolya nyama yamubili wamweenzinyina, akaambo kakusinkilwa alimwi akaambo kakukopana mumizeezo ciindi basinkondonyina alimwi abaabo bayandaula buumi bwabo baakubazinga koonse-koonse.”’+
10 “Mpoonya ukaipwaye nongo eeyo kabalangilila baalumi aabo mbounka limwi,
11 eelyo ukabaambile kuti, ‘Mboobu mbwaamba Jehova wamakamu: “Oobu mbondiyoobapwaya bantu aaba alimwi amunzi ooyu, mbubonya muntu umwi mbwapwaya cilongo camubumbi cakuti tacikonzyeki limbi kubambulula; aboobo mu Tofeti bayoozikka bafwu kusikila limwi kukabule abusena bwakubazikkila.”’+
12 “‘Oobo mbondiyoocitila busena oobu,’ mbwaamba Jehova, ‘alimwi abantu bakkala mumo, kutegwa munzi ooyu ukabe mbuli Tofeti.
13 Maanda aamu Jerusalemu alimwi amaanda aabami ba Juda ayakusofwaala mbubonya mbuli busena oobu bwa Tofeti,+ inzya, maanda oonse aayo aajisi ziluli mpobakali kuumpila zipaizyo kumakamu oonse aakujulu+ alimwi mpobakali kutilila baleza bambi+ zituuzyo zinyugwa.’”
14 Lino Jeremiya naakajoka kuzwa ku Tofeti, ooko Jehova nkwaakamutumide kuyoosinsima, wakaima mulubuwa lwaŋanda ya Jehova akwaambila bantu boonse kuti:
15 “Mboobu mbwaamba Jehova wamakamu, Leza wa Israyeli, ‘Amubone ndilaletela munzi ooyu alimwi aminzi yanguwo yoonse imapenzi oonse ngondaamba kuti ndilauletela, akaambo kakuti cankazi bakaka kuswiilila* majwi aangu.’”+
Bupanduluzi buyungizyidwe
^ Naa “catakaboolede mumoyo wangu nokuceya.”
^ Mu Chihebrayo, “bayumya nsingo zyabo kuti bataswiilili.”
