Jobu 16:1-22
16 Mpoonya Jobu wakaamba kuti:
2 “Ndakazimvwa kale zintu zinji zili boobu.
Nywebo nyoonse muli basikuumbulizya bakatazya!+
3 Sena majwi aabuyo taamani?
Ino yebo ncinzi cakucisa kuti wiingule boobu?
4 Andime ndilakonzya kwaambaula mbuli mbomwaambaula nywebo.
Ikuti nomwali kulimvwa mbondilimvwide mebo,*Ndilakonzya kubelesya majwi aayasa aamucisizya moyoAkumupukunyila mutwe wangu.+
5 Pele muciindi caboobo, nindamuyumya amajwi aazwa kumulomo wangu,Alimwi nindamukatalusya amajwi aaumbulizya aazwa kumilomo yangu.+
6 Kuti naa ndaambaula, tacileki pe kucisa,+Alimwi kuti naa ndaleka kwaambaula, sena cilayozya-yozya kucisa?
7 Pele lino Leza wandilemya;+Wanyonyoona mukwasyi wangu woonse.*
8 Alimwi yebo wandijata, eelyo eeci caba bumboni,Cakuti kukoka kwangu kwandibukila akupa bumboni kubusyu bwangu.
9 Bukali bwakwe bwandizazaula, alimwi wandibikkilila.+
Undilumina ntwino.
Sinkondoma wandilanga cabukali.+
10 Bandaasamwida mulomo kuti bandimene,+Banduuma kumasaya cakasampusampu;Balibunga-bunga mubunji kuti bandilwane.+
11 Leza wandaaba kubalombe,Alimwi wandiwaala mumaanza aababi.+
12 Ndakaliliibide, pele wakandivwinyauna;+Wakandijata kumakosi akundipwayaula;Mpoonya wandibikka kuba mbaakani yakwe.
13 Basimata bakwe bandizinguluka;+Wayasa nsa zyangu+ alimwi tandifwidi lubomba pe;Utila ndulwe yangu ansi.
14 Uluujisi kundibbwalaula koonse-koonse;Ulandivwuumukila mbuli sikalumamba.
15 Ndasuma cisani camasaka kuti ndivwumbe lukanda lwangu,+Alimwi ndavwukkila bulemu* bwangu mumavwu.+
16 Busyu bwangu bwasubila akaambo kakulila,+Alimwi zikoye zyangu zyavwumbwa mudima uusiya mbi,*
17 Nokuba kuti kunyina bubi mbwaacita maanza aanguAlimwi mupailo wangu ulasalala.
18 Onyika, utavwumbi bulowa bwangu!+
Alimwi kutabi busena bundilesya kulila!
19 Noliba lino kamboni wangu uli kujulu;Ooyo uukonzya kundipeda bumboni uli kujulu.
20 Beenzuma balandifwubaazya+Kumwi meso aangu kaayenda misozi* kulilila Leza.+
21 Akube muntu uukosola makani akati kamuntu a Leza,Mbubonya mbociba akati kamuntu amweenzinyina.+
22 Nkaambo kwasyaala buyo myaka misyoonto,Eelyo ndiyakuunka kutozya nzila iitapilukwi.+
Bupanduluzi buyungizyidwe
^ Naa “Ikuti nywebo nomwali muciimo cangu.”
^ Naa “boonse aabo babungana andime.”
^ Naa “nguzu.” Mu Chihebrayo, “lwija.”
^ Naa “zyavwumbwa cimvwule calufwu.”
^ Naa ambweni, “kaalibonya kubula ŋonzi.”
