Jobu 29:1-25
29 Jobu wakazumanana kwaambaula* kati:
2 “Nicali kabotu nindali mumyezi yainda,Mumazuba aalya Leza naakali kundilanganya,
3 Ciindi naakali kumwesya lambe lyakwe atala aamutwe wangu,Nindakali kweenda mumudima kwiinda mukumunikilwa amumuni wakwe,+
4 Ciindi nindakacili mulombwana,*Leza naakali kumvwana kapati andime alimwi naakali mutente lyangu,+
5 Singuzuzyoonse naakacili andime,Bana* bangu nibakandizingulukide koonse-koonse,
6 Ciindi nindakali kulyatauka mafwuta aazwa kumukupa,*Alimwi mandomba naakali kundipoomweda milonga yamafwuta.+
7 Ciindi nindakali kuunka kumulyango wamunzi+Akukkala mulubuwa lwabuleya,+
8 Balombe bakali kundibona akusosoloka munzila,*Alimwi nibaba bapati bakali kunyamuka akwiimikila.+
9 Basilutwe bakali kulilesya kwaambaula;Bakali kulisinka kumulomo amaanza.
10 Ijwi lyabantu balemekwa tiilyakali kumvwugwa pe;Milaka yabo yakali kunamatila kuzilakula zyabo.
11 Kufwumbwa muntu iwakali kumvwa kandaambaula wakali kundilumbaizya,Abalo aabo ibakali kundibona bakali kuzumina kuti ndimuntu uuli kabotu.
12 Nkaambo ndakali kubavwuna bacete ibakali kukwiilila kugwasyigwa,+Kubikkilizya amucaala amuntu uuli woonse watakajisi mugwasyi.+
13 Muntu uulaafwaafwi kufwa wakali kundileleka,+Alimwi ndakali kukkomanisya moyo wamukamufwu.+
14 Ndakali kusama cisani cabululami;Bululami bwangu bwakali mbuli jansi* ambuli citambala.
15 Ndakali meso kuboofwuAmaulu kubantu balemene.
16 Ndakali usyi wabacete;+Ndakali kulanga-langa twaambo twabantu mbondatakazyi.+
17 Ndakali kutyola myeebo yasimucita zibi+Akukwempa yooyo wakali kumeno aakwe.
18 Ndakali kwaamba kuti, ‘Ndiyoofwida muŋanda yangu,*+Aalo mazuba aangu ayoovwula mbuli musenga.
19 Miyanda yangu iyooyandalala kusikila kumaanzi,Awalo mume unooli amitabi yangu busiku boonse.
20 Bulemu bwangu bunoobukulusyigwa ciindi coonse,Alimwi ndinakuujisi kulebula buta buli mujanza lyangu.’
21 Bantu bakali kundiswiilila caluyandisisyo,Bakali kulindila lulayo lwangu kabaumwine.+
22 Ndamana kwaambaula tiibakali kwaambaula limbi pe;Matwi aabo akali kumvwa majwi mabotu ngindakali kwaamba.
23 Bakali kundilindila mbubonya mbobalindila mvwula;Bakaasamuna milomo yabo mbubonya mbobaasamwida mvwula yakumamanino aamainza.+
24 Nindakali kubamwetela, tiibakali kusyoma pe;Lumwemwe lwangu lwakali kubakkazika myoyo.*
25 Ndakali kubalailila mbuli silutwe wabo,Alimwi ndakali mbuli mwami akati kabasikalumamba bakwe,+Inzya, mbuli muntu iwuumbulizya baabo balila.+
Bupanduluzi buyungizyidwe
^ Mu Chihebrayo, “akasimpi kakwe.”
^ Mu Chihebrayo, “Mumazuba aabulombwana bwangu.”
^ Naa “Babelesi.”
^ Bamwi baamba kuti “maumba.”
^ Mu Chihebrayo, “akuyuba.”
^ Naa “jansi linyina maanza.”
^ Mu Chihebrayo, “muciteente cangu.”
^ Naa ambweni, “Tiibakalumana lumwemwe ilwakali kubusyu bwangu.”
