Johane 17:1-26
17 Jesu naakamana kwaamba zintu eezyi, wakalanga kujulu akwaamba kuti: “Taata, ciindi casika lino. Kopa kuti mwanaako alemekwe kutegwa awalo akulemeke,+
2 mbubonya walo mboomupa nguzu zyakweendelezya bantu boonse,+ ikutegwa akonzye kubapa buumi butamani+ boonse aabo mbomupede.+
3 Eeci caamba buumi butamani,+ ikuti bakuzyiba yebo* O Leza mwini-mwini ooli olikke,+ ayooyo ngookatuma, Jesu Kristo.+
4 Ndakulemeka anyika,+ kwiinda mukumanizya mulimo ngookandipa kuti ndicite.+
5 Aboobo Taata kopa kuti ndilemekwe kumbali lyako abulemu mbondakajisi nendakacili anduwe inyika kaitanaba.+
6 “Ndabazyibya zina lyako bantu mbookandipa munyika.+ Bakali bako, pele wakabapa kulindime alimwi balibamba* jwi lyako.
7 Lino bazyiba kuti zintu zyoonse nzyookandipa zyakazwa kulinduwe;
8 nkaambo ndabaambila majwi ngookandipa,+ eelyo baatambula akusinizya kuti ndakaboola kandili mwiiminizi+ wako alimwi basyoma kuti nduwe wakandituma.+
9 Ndilombela mbabo; tandilombeli nyika pe, pele buyo baabo mbondipede, nkaambo mbibako;
10 zintu zyangu zyoonse nzizyako azyalo zintu zyako nzizyangu,+ alimwi ndalemekwa akati kabo.
11 “Tandicili munyika, pele balo bali munyika,+ mebo ndiboola kulinduwe. Taata Oosalala, kobakwabilila+ akaambo kazina lyako eelyo ndyookandipa, ikutegwa babe bamwi* mbubonya mbotubede andiswe.*+
12 Nendakali ambabo ndakali kubakwabilila+ akaambo kazina lyako ndyookandipa; alimwi ndabakwabilila eelyo kunyina umwi wabo wasweeka+ ccita buyo mwana walunyonyooko,+ ikutegwa lugwalo luzuzikizyigwe.+
13 Pele lino ndiboola kulinduwe, alimwi ndaamba zintu eezyi munyika, kutegwa lukkomano lwangu luzulile mulimbabo.+
14 Ndabapa jwi lyako, pele nyika yabasulaika, nkaambo tabali banyika mbubonya andime mbonditali wanyika.+
15 “Tandikulombi kuti ubagusye munyika, pele kuti ubakwabilile akaambo kamubi.+
16 Tabali banyika+ mbubonya andime mbonditali wanyika.+
17 Kobasalazya* akasimpe;+ ijwi lyako nkasimpe.+
18 Mbubonya yebo mbowakandituma munyika, andime ndakabatuma munyika.+
19 Alimwi ndazumanana kusalala akaambo kambabo, ikutegwa abalo basalazyigwe akasimpe.
20 “Tandilombeli baaba balikke pe, pele ndilabalombela abaabo bandisyoma kwiinda mumajwi aabo,
21 ikutegwa boonse babe bamwi+ mbubonya yebo Taata andime mbotukamantene,+ ikuti abalo kabakamantene andiswe, ikutegwa nyika isyome kuti nduwe wakandituma.
22 Ndabapa bulemu mbondipede, ikutegwa babe bamwi mbubonya swebo mbotuli bamwi.+
23 Mebo ambabo tukamantane alimwi ayebo ukamantane andime, ikutegwa babe bamwi cakulondola,* ikuti nyika izyibe kuti nduwe wakandituma akuti ulabayanda balo mbubonya mbowali kundiyanda mebo.
24 Taata, ndiyanda kuti aabo mboondipa abalo bakabe andime ooko nkweyooba,+ ikutegwa bakabone bulemu mbondipede, nkaambo wakandiyanda kaitanaba nyika.+
25 Taata ooluleme, inyika ncobeni taikuzyi pe,+ pele mebo ndilikuzyi+ alimwi bantu aaba balizyi kuti nduwe wakandituma.
26 Ndabazyibya zina lyako alimwi ndiyoolizyibya+ ikutegwa luyando ndookali kundiyanda andulo lube mulimbabo alimwi mebo ambabo tukamantane.”+
Bupanduluzi buyungizyidwe
^ Naa “ikuti bazumanana kwiiya akukuzyiba yebo.”
^ Naa “balitobela.”
^ Naa “bakamantane.”
^ Naa “mbotukamantene.”
^ Naa “Kobazandula.”
^ Naa “bakamantane boonse.”
