Johane 6:1-71
6 Nozyakainda zintu eezyi Jesu wakazabuka kuya mutala lya Lwizi lwa Galilaya, naa Tiberiya.+
2 Eelyo nkamu mpati yabantu yakali kumutobela,+ nkaambo bakali kubona maleele ngaakali kucita naakali kuponya balwazi.+
3 Aboobo Jesu wakatanta acilundu, eelyo wakakkala ooko abasikwiiya bakwe.
4 Lino Pobwe Lyakwiindilila,+ nkokuti ipobwe lyaba Juda lyakali afwaafwi.
5 Lino Jesu naakalanga akubona kuti kwakali kuboola nkamu mpati yabantu kulinguwe, wakabuzya Filipo kuti: “Nkuukuli nkotuya kuula zinkwa zyakuti bantu aaba balye?”+
6 Pele wakali kubuzya boobu kutegwa amusunke, nkaambo walo wakalizyi ncaakali kuyanda kucita.
7 Filipo wakamwiingula kuti: “Zinkwa zyuulwa madinari* aali 200 tazikonzyi kukkwana, nokuba kuti muntu umwi aumwi wakomwedwa buyo kasyoonto.”
8 Umwi wabasikwiiya bakwe, Andreya imunyina Simoni Petro wakati kulinguwe:
9 “Ngooyu musankwa uujisi zinkwa zyabbaale zyosanwe atuswi tobilo. Pele ino eezyi inga zyacita nzi kubantu banji boobu?”+
10 Jesu wakati: “Amubakkazike bantu ansi.” Lino kwakali bwizu bunji abusena oobo, aboobo bakakkala aawo, ibaalumi batandila ku 5,000.+
11 Mpoonya Jesu wakabweza zinkwa eezyo, eelyo naakamana kulumba, wakabaabanya aabo bakakkede waawo; wakacita mbubonya akutuswi eelyo bakalya akukkuta.
12 Pele bantu nobakalya akukkuta, wakaambila basikwiiya bakwe kuti: “Amubwezelele bufwefwelenga boonse bwasyaala, kutegwa kutabi cinyonyooka.”
13 Aboobo bakabubwezelela boonse, eelyo bakazuzya zisuwo zili 12 zyabufwefwelenga ibwakasiigwa abaabo ibakalya zinkwa zyabbaale zyosanwe.
14 Aboobo bantu nobakabona maleele ngaakacita, bakatalika kwaamba kuti: “Ooyu ncobeni ngo Musinsimi wakasinsimwa kuti uyooboola munyika.”+
15 Mpoonya Jesu mbwaanga wakalizyi kuti bakali kuyanda kuboola akumujata kutegwa bamubikke kuba mwami, wakazwa+ alimwi akuunka kucilundu alikke.+
16 Nokwakaba kumangolezya, basikwiiya bakwe bakaselemuka kuunka kulwizi,+
17 nobakatanta bwato bakatalika lweendo lwakuya mutala lyalwizi ku Kapernauma. Lino kwakalisiide alimwi Jesu tanaakaningaboola kulimbabo.+
18 Alimwi kwakatalika kuba mayuwe mulwizi nkaambo kwakali kuunga guwo pati.+
19 Pele nobakakwasula musinzo wamakkilomita aatandila kuli osanwe naa cisambomwe, bakabona Jesu keenda atala aalwizi kazyaabuswena kufwaafwi abwato, aboobo bakayoowa.
20 Pele wakati kulimbabo: “Ndime; mutayoowi pe!”+
21 Aboobo bakaanguluka kumunjizya mubwato, ndilyonya bwato bwakasika kunkomwe yabusena nkobakali kuunka.+
22 Ibuzuba bwakatobela inkamu yabantu ibakacaala mutala limwi lyalwizi bakabona kuti kwakanyina bwato ooko ccita buyo bwato busyoonto, alimwi bakazyiba kuti Jesu tanaakatanta mubwato antoomwe abasikwiiya bakwe pele basikwiiya bakaunka balikke.
23 Pele mato aazwa ku Tiberiya akasika kufwaafwi abusena nkobakalida cinkwa eelyo Mwami naakamana kulumba.
24 Aboobo nkamu yabantu noyakabona kuti Jesu abasikwiiya bakwe tabako, bakatanta mato aabo akuboola ku Kapernauma kuti bamuyandaule Jesu.
25 Eelyo nobakamujana mutala lyalwizi, bakamubuzya kuti: “Rabbi,+ ino wasika lili kuno?”
26 Jesu wakabaingula kuti: “Ncobeni ndimwaambila masimpe kuti, mulandiyandaula ikutali akaambo kakuti mwakabona maleele, pele akaambo kakuti mwakalya zinkwa akukkuta.+
27 Mutabelekeli cakulya cinyonyooka, pele amubelekele cakulya cikkalilila akupa buumi butamani,+ eeco ncayoomupa Mwanaamuntu; nkaambo Taata, nkokuti Leza wabikka cisinizyo cakwe alinguwe kutondezya kuti ulamukkomanina.”+
28 Aboobo bakamubuzya kuti: “Ino ncinzi ncotweelede kucita kutegwa katubeleka milimo ya Leza?”
29 Mukwiingula Jesu wakabaambila kuti: “Ngooyu mulimo wa Leza, kuti mumusyome ooyo ngwaakatuma.”+
30 Mpoonya bakati kulinguwe: “Ino ncinzi ncotiicite kuti cibe citondezyo+ kutegwa tucibone akukusyoma? Mulimo nzi ngotiicite?
31 Bamatata bakalya mana munkanda,+ mbubonya mbokulembedwe kuti: ‘Wakabapa cinkwa cizwa kujulu kuti balye.’”+
32 Aboobo Jesu wakabaambila kuti: “Ncobeni ndimwaambila masimpe kuti, Musa tanaakamupa cinkwa cizwa kujulu, pele Taata umupa cinkwa cini-cini cizwa kujulu.
33 Nkaambo cinkwa ca Leza ngooyo uuboola kuzwa kujulu akwiipa buumi nyika.”
34 Aboobo bakati kulinguwe: “Mwami, lyoonse kotupa cinkwa eeci.”
35 Jesu wakabaambila kuti: “Mebo ndendime cinkwa cabuumi. Kufwumbwa uuboola kulindime takafwi nzala pe, alimwi kufwumbwa uundisyoma takafwi nyota pe.+
36 Pele mbubonya mbondakamwaambila, nokuba kuti mwandibona tamusyomi.+
37 Boonse aabo mbandipa Taata bayooboola kulindime, alimwi ooyo uuboola kulindime tandikamutandi pe;+
38 nkaambo ndakaboola kuzwa kujulu+ kuti nditaciti kuyanda kwangu, pele ndicite kuyanda kwayooyo wakandituma.+
39 Ooku nkokuyanda kwayooyo wakandituma, kuti nditasweekelwi naba omwe akati kabaabo boonse mbaakandipa, pele kuti nkababusye+ mubuzuba bwamamanino.
40 Nkaambo ooku nkokuyanda kwa Taata, kuti woonse uumuzyi Mwana akumusyoma abe abuumi butamani,+ alimwi ndiyoomubusya+ mubuzuba bwamamanino.”
41 Mpoonya ba Juda bakatalika kuŋuŋuna kujatikizya nguwe akaambo kakuti wakati: “Mebo ndendime cinkwa cakazwa kujulu.”+
42 Alimwi bakatalika kwaamba kuti: “Sena ooyu tali Jesu mwana wa Josefa, ooyo bausyi abanyina mbotuzyi?+ Ino caba buti kuti lino waamba kuti, ‘Ndakazwa kujulu’?”
43 Mukwiingula Jesu wakabaambila kuti: “Amuleke kuŋuŋuna akati kanu.
44 Kunyina muntu uukonzya kuboola kulindime ccita kuti wakwelwa+ a Taata wakandituma, alimwi ndiyoomubusya mubuzuba bwamamanino.+
45 Kulilembedwe mu Basinsimi kuti: ‘Boonse bayooyiisyigwa a Jehova.’*+ Woonse uumuswiilila Taata alimwi akwiiya kulinguwe ulaboola kulindime.
46 Kunyina muntu wakamubona Taata,+ ccita buyo yooyo wakazwa kuli Leza; ooyu ngonguwe wakamubona Taata.+
47 Ncobeni ndimwaambila masimpe kuti, kufwumbwa ooyo uusyoma ulaabuumi butamani.+
48 “Mebo ndendime cinkwa cabuumi.+
49 Bamauso bakalya mana munkanda pele bakafwa.+
50 Eeci ncecinkwa cizwa kujulu, kutegwa uuli woonse acilye kuti atafwi.
51 Mebo ndendime cinkwa cipona cakazwa kujulu. Ikuti muntu uuli woonse wacilya cinkwa eeci, unoopona kukabe kutamani; alimwi mubwini, icinkwa ncendiyoopa mubili wangu kutegwa nyika ibe abuumi.”+
52 Aboobo ba Juda bakatalika kukazyanya mulicabo, balaamba: “Mbuti muntu ooyu mbwanga watupa mubili wakwe kuti tulye?”
53 Eelyo Jesu wakabaambila kuti: “Ncobeni ndimwaambila masimpe kuti, ccita kuti mwalya mubili wa Mwanaamuntu akunywa bulowa bwakwe, munyina buumi mulindinywe.+
54 Kufwumbwa ooyo uulya mubili wangu akunywa bulowa bwangu ulaabuumi butamani, alimwi ndiyoomubusya+ mubuzuba bwamamanino;
55 nkaambo mubili wangu ncakulya cini-cini, alimwi bulowa bwangu ncakunywa cini-cini.
56 Kufwumbwa ooyo uulya mubili wangu akunywa bulowa bwangu ulikamantene andime lyoonse, andime ndilikamantene anguwe.+
57 Mbubonya Taata muumi mbwaakandituma alimwi mebo ndili muumi akaambo ka Taata, awalo ooyo uundilya, unooli muumi akaambo kandime.+
58 Eeci ncecinkwa cakazwa kujulu. Tacili mbuli leelyo bamauso nobakalya pele kumbele bakafwa. Kufwumbwa ooyo uulya cinkwa eeci unooli muumi kukabe kutamani.”+
59 Zintu eezyi wakazyaamba naakali kuyiisya mucikombelo* ku Kapernauma.
60 Nobakamvwa makani aaya, basikwiiya bakwe banji bakati: “Makani aaya ayumya mate; nguni uunga waaswiilila?”
61 Pele Jesu, mbwaanga wakalizyi kuti basikwiiya bakaŋuŋuna akaambo kaceeci, wakati kulimbabo: “Sena makani aaya amutyompya?
62 Aboobo ino cilaba buti, ikuti mwabona Mwanaamuntu katanta kuya kooko nkwaakabede kusaanguna?+
63 Imuuya nguupa buumi;+ mubili unyina mpindu iili yoonse. Imajwi ngendamwaambila muuya alimwi mbuumi.+
64 Pele nkobali bamwi akati kanu ibatasyomi.” Nkaambo Jesu wakalibazyi kuzwa kumatalikilo aabo batasyomi alimwi ayooyo wakali kuyoomwaaba.+
65 Aboobo wakazumanana kwaamba kuti: “Nkakaambo kaako ndamwaambila kuti, kunyina muntu uukonzya kuboola kulindime ccita kuti wazumizyigwa a Taata.”+
66 Akaambo kaceeci, basikwiiya bakwe banji bakapilukila kuzintu zyamunyika+ nzyobakasiide alimwi tiibakacili kweenda limbi anguwe.
67 Aboobo Jesu wakabuzya bali Kkumi Ababili kuti: “Sena andinywe muyanda kuunka?”
68 Simoni Petro wakamwiingula kuti: “Mwami, ino inga twaunka kuli ni?+ Yebo ujisi majwi aapa buumi butamani.+
69 Twasyoma alimwi twazyiba kuti yebo ndonduwe Musalali wa Leza.”+
70 Jesu wakabaingula kuti: “Sena tiindakamusala kamuli kkumi ababili?+ Pele umwi akati kanu ngusikubejelezya.”*+
71 Mubwini wakali kwaamba Judasi mwana wa Simoni Isikariote, nkaambo ooyu wakali kuyoomwaaba, nokuba kuti wakali umwi wabali Kkumi Ababili.+
Bupanduluzi buyungizyidwe
^ Amubone Makani Aayungizyidwe B14.
^ Amubone Makani Aayungizyidwe A5.
^ Naa “banamaleya.”
^ Naa “ngudiabolosi.”
