Joshua 13:1-33
13 Lino Joshua wakacembaala alimwi wakali amyaka minji.+ Aboobo Jehova wakati kulinguwe: “Wacembaala alimwi myaka yako yavwula; pele kucisyeede nyika mpati yeelede kubwezyegwa.*
2 Njeeyi nyika iicisyeede:+ zyooko zyaba Filisiti zyoonse azyaba Gesuri+ boonse
3 (kuzwa kukalonga kazwa kumulonga wa Nile* ikali kujwe* lya Egepita kusikila kumunyinza wa Ekroni kunyika, yakazyibidwe kuti ninyika yabana Kanana)+ kubikkilizya ayabami bosanwe baba Filisiti,+ bana Gaza, bana Asidodi,+ bana Asikeloni,+ bana Gati,+ bana Ekroni;+ alimwi ayaba Avimu+
4 kumusanza; anyika yoonse yabana Kanana; aya Meara, inyika yabana Sidoni,+ kusikila ku Afeki, akusikila kumunyinza wabana Amori;
5 anyika yabana Gebali+ alimwi aya Lebano yoonse nkoili kujwe, kuzwa ku Baala-gadi munselelo aa Cilundu ca Herimoni kusikila ku Lebo-hamati;*+
6 bantu boonse bakkala mumalundu, kuzwa ku Lebano+ kusikila ku Miseripotu-maimu;+ abana Sidoni+ boonse. Ndiyoobaatula kubusyu bwabana Israyeli.+ Yebo ukaabanye buyo nyika kubana Israyeli kuti ibe lukono lwabo, mbubonya mbondakakulailila.+
7 Lino weelede kuyaabanya nyika eeyi kumisyobo iili fwuka akucisela camusyobo wa Manase+ kuti ibe lukono lwabo.”
8 Cisela cimbi camusyobo wa Manase, bana Rubeni abana Gadi bakabweza kale lukono lwabo oolo Musa ndwaakabapa mutala lya Jordano kulubazu lwakujwe, mbubonya Musa mubelesi wa Jehova mbwaakabaabila:+
9 kuzwa kumunzi wa Aroeri+ uuli kunkomwe ya Kkuti lya Arinoni,*+ amunzi uuli akati kakkuti eelyo anyika yoonse iiyalene ya Medeba kusikila ku Diboni;
10 aminzi yoonse ya Mwami Sihoni wabana Amori, iwakali kweendelezya mu Hesiboni, kusikila kumunyinza wabana Amoni;+
11 a Gileadi acilawo cabana Gesuri abana Maakati+ a Cilundu ca Herimoni coonse alimwi anyika ya Basani+ yoonse kusikila ku Saleka;+
12 bwami bwa Ogi boonse munyika ya Basani, iwakali kweendelezya mu Asitaroti amu Edrei. (Walo ngomu Refaimu+ wakasyeede.) Musa wakabazunda akubaatula.+
13 Pele bana Israyeli kunyina nobakaatula+ bana Gesuri abana Maakati, nkaambo bana Gesuri abana Maakati bacikkala akati kabana Israyeli kusikila sunu.
14 Ulikke musyobo wa Levi nguwatakapegwa lukono.+ Zituuzyo zyuumpwa kuli Jehova Leza wabana Israyeli ndolukono lwabo,+ mbubonya mbwaakabasyomezya.+
15 Mpoonya Musa wakapa lukono kumusyobo wabana Rubeni kweelana amikwasyi yabo,
16 eelyo cilawo cabo cakali kutalikila ku Aroeri, uuli kunkomwe ya Kkuti lya Arinoni,* amunzi uuli akati kakkuti eelyo alimwi anyika yoonse iiyalene kumbali aa Medeba;
17 Hesiboni atunzi twawo toonse+ tuli anyika iiyalene, Diboni, Bamoti-baala, Beti-baala-meoni,+
18 Jahazi,+ Kedemoti,+ Mefati,+
19 Kiriyataimu, Sibima,+ Zereti-sahara mucilundu camucibanda,
20 Beti-peori, mingenyu ya Pisiga,+ Beti-jesimoti,+
21 aminzi yoonse iili anyika iiyalene, abwami boonse bwa Mwami Sihoni wabana Amori, iwakali kweendelezya mu Hesiboni.+ Musa wakamuzunda+ antoomwe abasilutwe bana Midiyani, Evi, Rekemu, Zuri, Huri, alimwi a Reba,+ ibasololi* ba Sihoni ibakali kukkala munyika.
22 Balamu+ mwana wa Beori musondi,+ wakali umwi wabaabo mbobakajaya bana Israyeli apanga.
23 Jordano wakaba ngomunyinza wabana Rubeni; alimwi cilawo eeci cakali lukono lwabana Rubeni kweelana amikwasyi yabo, aminzi atunzi twayo.
24 Alimwi Musa wakapa lukono kumusyobo wa Gadi, ibana Gadi kweelana amikwasyi yabo,
25 alimwi cilawo cabo cakali kubikkilizya a Jazeri+ aminzi yoonse ya Gileadi acisela canyika yabana Amoni+ kusikila ku Aroeri, uulangene a Raba;+
26 akuzwa ku Hesiboni+ kusikila ku Ramati-mizipe aku Betonimu, alimwi akuzwa ku Mahanaimu+ kusikila kumunyinza wa Dibiri;
27 aminzi yamukkuti* lya Beti-harani, Beti-nimira,+ Sukoti,+ Zafoni, anyika yasyaala yabwami bwa Mwami Sihoni wa Hesiboni,+ Jordano kuuli munyinza kuzwa kumagolelo aa Lwizi lwa Kinereti*+ kujwe lya Jordano.
28 Oolu ndolwakali lukono lwabana Gadi kweelana amikwasyi yabo, aminzi atunzi twayo.
29 Kuyungizya waawo, Musa wakapa lukono kucisela camusyobo wa Manase, kucisela camusyobo wa Manase kweelana amikwasyi yabo.+
30 Alimwi cilawo cabo cakali kutalikila ku Mahanaimu,+ kubikkilizya anyika ya Basani yoonse, nyika yoonse yabwami bwa Mwami Ogi wa Basani, alimwi atunzi twamatente twa Jairi+ ituli munyika ya Basani, minzi iili 60.
31 Cisela ca Gileadi, Asitaroti a Edrei,+ iminzi yabwami bwa Ogi mu Basani, yakapegwa kubana ba Makiri+ imwana wa Manase, nkokuti kucisela cabana ba Makiri kweelana amikwasyi yabo.
32 Oolu ndolukono Musa ndwaakabapa muzibanda zya Moabu mutala lya Jordano, kujwe lya Jeriko.+
33 Pele kumusyobo waba Levi, Musa tanaakapa lukono pe.+ Jehova Leza wa Israyeli ndolukono lwabo, mbubonya mbwaakabasyomezya.+
Bupanduluzi buyungizyidwe
^ Naa “kuzundwa.”
^ Mu Chihebrayo, “kumbele.”
^ Naa “kuzwa ku Sihori.”
^ Naa “kumanjililo aa Hamati.”
^ Naa “Kalonga ka Arinoni.”
^ Naa “Kalonga ka Arinoni.”
^ Nkokuti, ibami ibakali kweendelezyegwa a Sihoni.
^ Nkokuti, lwizi lwa Genesarete, naa Lwizi lwa Galilaya.
^ Naa “yamucibanda.”
