Joshua 17:1-18
17 Mpoonya musyobo wa Manase+ wakapegwa caabilo,+ nkaambo wakali mwana mutaanzi wa Josefa.+ Mbwaanga Makiri+ imwana mutaanzi wa Manase alimwi usyi Gileadi, wakali sikalumamba, wakapegwa nyika ya Gileadi a Basani.+
2 Alimwi kwakaba caabilo cabana ba Manase ibakasyaala kweelana amikwasyi yabo, caabilo cabana ba Abiezeri,+ bana ba Heleki, bana ba Asirieli, bana ba Sekemu, bana ba Heferi abana ba Semida. Aaba mbabakali bana basankwa ba Manase imwana wa Josefa, kweelana amikwasyi yabo.+
3 Pele Zelofehadi+ imwana wa Heferi, imwana wa Gileadi, imwana wa Makiri, imwana wa Manase tanaakazyala bana basankwa, pele wakazyala buyo basimbi. Mazina aabo ngaaya: Mala, Nowa, Hogila, Milika a Tiriza.
4 Aboobo bakaboola kuli Eleazara+ mupaizi, a Joshua mwana wa Nuni alimwi abasilutwe, akwaamba kuti: “Jehova nguwakalailila Musa kuti atupe lukono akati kabanabokwesu.”+ Eelyo wakabapa lukono akati kabanabokwabo abausyi+ kweelana ambwaakalailila Jehova.
5 Kwakali zyaabilo azimbi zili kkumi nzyaakapegwa Manase kunze lyanyika ya Gileadi a Basani, iyakali mutala* lya Jordano kujwe,+
6 nkaambo bana basimbi ba Manase bakapegwa lukono antoomwe abana bakwe basankwa, alimwi nyika ya Gileadi yakaba lukono lwabana ba Manase bakasyaala.
7 Munyinza wa Manase wakali kutalikila ku Aseri kusikila ku Mikimetatu,+ uulangene a Sekemu,+ alimwi wakali kwiindilila kugama kumusanza kunyika yabantu bakali kukkala ku Eni-tapua.
8 Nyika ya Tapua+ yakaba ya Manase, pele Tapua iwakali mumunyinza wa Manase wakali wabana ba Efraimu.
9 Alimwi munyinza wakaselemuka kusika ku Kalonga ka Kana, mpoonya wakaya kulubazu lwakumusanza kukalonga. Kwakali minzi ya Efraimu akati kaminzi ya Manase,+ alimwi munyinza wa Manase wakali kulubazu kalonga nkokali kunyika, alimwi wakali kugolela kulwizi.+
10 Kulubazu lwakumusanza nyika yakali ya Efraimu, eelyo kulubazu lwakunyika yakali ya Manase, eelyo lwizi lwakaba munyinza wakwe,+ kulubazu lwakunyika bakali* kusika kuli Aseri, alimwi kujwe bakali kusika kuli Isakara.
11 Lino muzilawo zya Isakara a Aseri, Manase wakapegwa minzi eeyi: Beti-seani aminzi misyoonto yanguwo,* Ibleamu+ aminzi misyoonto yanguwo, Dori+ aminzi misyoonto yanguwo, Eni-dori+ aminzi misyoonto yanguwo, Taanaki+ aminzi misyoonto yanguwo a Megido aminzi misyoonto yanguwo, zilawo zyotatwe zyamalundu.
12 Pele bana ba Manase bakaalilwa kwiibweza minzi eeyi; bana Kanana bakazumanana kukkala munyika eeyi.+
13 Eelyo bana Israyeli nobakaba anguzu bakacita bana Kanana kuba bazike babo,+ pele tiibakabaatula cakumaninina.+
14 Kumane bana ba Josefa bakaambila Joshua kuti: “Ino nkaambo nzi ncootupa* buyo caabilo comwe?+ Tuli banji akaambo kakuti Jehova watulongezya kusikila sunu.”+
15 Mpoonya Joshua wakabaingula kuti: “Ikuti naa muli banji alimwi nyika yamalundu ya Efraimu+ yamuceela, kamuya mukateme cisaka munyika yaba Perizi+ aba Refaimu+ kutegwa ayalo ibe yanu.”
16 Eelyo bana ba Josefa bakati: “Tatukonzyi kukkwana munyika yamalundu alimwi bana Kanana boonse ibakkala munyika yacibanda, boonse aabo bali mu Beti-seani+ aminzi misyoonto* abaabo bali mu Kkuti* lya Jezreeli+ balijisi nkalaki zyankondo+ zijisi zibulo zibosya zyabutale mumavwili.”
17 Aboobo Joshua wakaambila bana ba Josefa, nkokuti Efraimu a Manase, kuti: “Muli banji alimwi mulaanguzu kapati. Tamukapegwi buyo caabilo comwe pe,+
18 pele ayalo nyika yamalundu yeelede kuba yanu.+ Nokuba kuti ncisaka, muyoocitema alimwi ciyooba magolelo aanyika yanu. Nkaambo muyoobatanda bana Kanana nokuba kuti balaanguzu alimwi balijisi nkalaki zyankondo zijisi zibulo zibosya zyabutale mumavwili.”+
Bupanduluzi buyungizyidwe
^ Nkokuti, kulubazu lwakujwe.
^ Nkokuti, bantu ba Manase naa cilawo ca Manase.
^ Naa “yeengelede.”
^ Mu Chihebrayo, “ncoondipa.”
^ Naa “yeengelede.”
^ Naa “Cibanda.”
