Luka 11:1-54
11 Lino wakali kupaila kubusena bumwi, eelyo naakamanizya, umwi wabasikwiiya bakwe wakamwaambila kuti: “Mwami, kotuyiisya kupaila mbubonya Johane awalo mbwaakayiisya basikwiiya bakwe.”
2 Aboobo wakabaambila kuti: “Nomupaila, amwaambe kuti: ‘Taata, alisalazyigwe zina lyako.+ Abuboole Bwami bwako.+
3 Abuzuba kotupa cakulya cesu kweelana anzyotuyandika buzuba abuzuba.+
4 Alimwi kotulekelela zibi zyesu,+ nkaambo andiswe tulabalekelela boonse ibajisi milandu kulindiswe;+ alimwi utatunjizyi mumasunko.’”+
5 Mpoonya wakabaambila kuti: “Atwaambe kuti umwi akati kanu kajisi mweenzinyina eelyo akati kamasiku waunka kulinguwe akumwaambila kuti, ‘Kondigwasya* zinkwa zyotatwe musa,
6 nkaambo lino aawa ndaswaigwa mweenzuma umwi uuli mulweendo, pele ndinyina cakumupa.’
7 Pele ooyo kali muŋanda wamwiingula kuti: ‘Koleka kundikatazya. Mulyango wajalwa kale, alimwi mebo abana bangu basyoonto toona kale. Tandikonzyi kubuka akukupa cintu cili coonse.’
8 Ndimwaambila kuti, masimpe ulabuka natayandi akumupa zyoonse nzyayanda ikutali akaambo kakuti mweenzinyina, pele akaambo kakuti wazumanana kumukombelezya.+
9 Aboobo ndimwaambila kuti, amuzumanane kulomba,+ eelyo muyoopegwa nzyomulomba; amuzumanane kuyandaula, eelyo muyoojana; amuzumanane kukonkomona, eelyo muyoojalwidwa.+
10 Nkaambo muntu uuli woonse uulomba ulatambula,+ ooyo uuyandaula ulajana, ayooyo uukonkomona ulajalwidwa.
11 Nkaambo sena nkwali usyi akati kanu uunga ikuti mwanaakwe wamulomba nswi, ulamupa nzoka muciindi canswi?+
12 Naa ikuti walomba ji, sena ulamupa kabanze?
13 Aboobo ikuti nywebo nokuba kuti muli babi, mulicizyi kubapa zipego zibotu bana banu, nkokuti Taata uuli kujulu uyakwiinda kubapa muuya uusalala aabo ibamulomba!”+
14 Aciindi cimwi wakatanda daimona ilyakali kulesya muntu kwaambaula.+ Nolyakazwa daimona, muntu ooyo syaataambi wakaambaula, eelyo makamu aabantu akagambwa.+
15 Pele bamwi akati kabo bakati: “Utanda madaimona kwiinda munguzu zya Belezebule* imweendelezi wamadaimona.”+
16 Mpoonya bamwi kabayanda kumusunka bakatalika kumwaambila kuti abape citondezyo+ kuzwa kujulu.
17 Mbwaanga wakalizyi ncibakali kuyeeya,+ wakabaambila kuti: “Bwami buli boonse bwaandeene bulanyonyooka, aŋanda yaandeene ilawa.
18 Mbubonya buyo, ikuti awalo Saatani waandaana mwini, ino bwami bwakwe bulaima buti? Nkaambo kayi mwaamba kuti nditanda madaimona munguzu zya Belezebule.
19 Ikuti mebo nditanda madaimona munguzu zya Belezebule, ino bana banu baatanda munguzu zyani? Nkakaambo kaako bayoomubeteka.
20 Pele ikuti munwe wa Leza+ ngonditandya madaimona, nkokuti Bwami bwa Leza ncobeni bwamusikila kamutabuyeeyeli.+
21 Muntu singuzu uujisi zilwanyo zikkwene nalindilila ŋanda yakwe, lubono lwakwe lunookwabilidwe kabotu.
22 Pele ikuti umwi uujisi nguzu kumwiinda wamulwana akumuzunda, nkokuti ulamunyanga zilwanyo zyakwe zyoonse eezyo nzyaakali kusyoma, akwaabanya bamwi zintu nzyaabweza kulinguwe.
23 Kufwumbwa ooyo uutali kulubazu lwangu mulwani wangu, alimwi kufwumbwa ooyo uutabunganyi antoomwe andime ulamwaya.+
24 “Ciindi muuya uusofweede nouzwa mumuntu, ulainda mumasena aatakwe maanzi kuyandaula busena bwakulyookezyela, alimwi watabujana busena waamba kuti, ‘Ndilapiluka kuŋanda yangu nkondakazwa.’+
25 Eelyo wasika ulajana ŋanda eeyo ilikukwidwe akubambwa kabotu.
26 Lino ulainka kuyooleta myuuya iimbi iili ciloba mibi kwiinda nguwo, eelyo yanjila mukati ilakkala mumonya oomo. Aboobo bukkale bwamamanino bwamuntu ooyo bulabija kapati kwiinda bwakusaanguna.”
27 Lino naakacili kwaamba majwi aaya, mukaintu umwi munkamu yabantu wakoompolola akumwaambila kuti: “Ulikkomene mutumbu wakakuyumwide mwida lyakwe akukunyonsya!”+
28 Pele Jesu wakati: “Peepe, ibakkomene mbaabo baswiilila jwi lya Leza akucita ncolyaamba!”+
29 Lino makamu aabantu naakali kubungana antoomwe, wakatalika kwaamba kuti: “Izyalani eeli ndibi; liyanda kupegwa citondezyo, pele kunyina citondezyo ncoliyoopegwa ccita buyo citondezyo ca Jona.+
30 Nkaambo mbubonya Jona+ mbwaakaba citondezyo kubantu bamu Nineve, awalo Mwanaamuntu uyooba citondezyo kuzyalani eeli.
31 Mwami mukaintu wakumusanza+ uyoobusyigwa mubuzuba bwalubeta antoomwe abantu bamuzyalani eeli, eelyo uyoobapa mulandu, nkaambo walo wakaboola kuzwa kumagolelo aanyika kutegwa azoomvwe busongo bwa Solomoni. Pele amubone! Imupati kwiinda Solomoni mpali aano.+
32 Bantu bamu Nineve bayoobusyigwa mubuzuba bwalubeta antoomwe azyalani eeli, eelyo bayoolipa mulandu, nkaambo bakeempwa kumajwi ngaakakambauka Jona.+ Pele amubone! Imupati kwiinda Jona mpali aano.
33 Amana kuyasya lambe, muntu talisisi naa kulivwunika cisuwo,* pele ulalibikka acibikkilo calambe,+ kutegwa aabo banjila bamunikilwe.
34 Liso ndelambe lyamubili. Ikuti liso lyako kalilangide buyo acintu comwe,* mubili wako woonse ulaba mumumuni* awalo; pele ikuti liso lyako kalilaamunyono,* mubili wako ulaba mumudima awalo.+
35 Aboobo, cenjela kutegwa mumuni uuli mulinduwe utabi mudima.
36 Eelyo ikuti mubili wako woonse kaumweka, kautajisi cibeela cili coonse camudima, mubili ooyo woonse unoomweka mbubonya mbuli lambe likumunikila.”
37 Naakamana kwaamba majwi aaya, mu Farisi umwi wakamulomba kuti akalye anguwe. Aboobo wakanjila akukkala kuti balye.
38 Pele mu Farisi ooyo wakagambwa kubona kuti wakaile kulya katasambide kumaanza.*+
39 Pele Mwami wakamwaambila kuti: “Lino nywebo noba Farisi, musanzya buyo kunze aankapu amutiba pele mumyoyo yanu muzwide buyo busyaacivwulemwangu abubi.+
40 Nywebo nobafwubafwuba! Sena ooyo wakapanga anze tali ngonguwe wakapanga amukati?
41 Pele, amupe zintu zili mumyoyo yanu kazili zipego zyaluse,* eelyo zintu zyanu zyoonse ziyoosalala.
42 Pele maawe kulindinywe noba Farisi, nkaambo mulapa cakkumi cazisyu zyaluyuni azisyu zimwi zyoonse,+ pele tamubikkili maano kubululami aluyando lwa Leza! Eezyi zintu mwakaleelede kuzicita, pele eezyo zintu zimwi tiimwakeelede kuzisotoka azyalo.+
43 Maawe kulindinywe noba Farisi, nkaambo muyanda zyuuno zyakumbele* muzikombelo akwaanzyigwa mumisika!+
44 Maawe kulindinywe, nkaambo muli mbuli zyuumbwe eezyo zitalibonyi+ cakuti bantu baleenda alinzizyo kabatazyi!”
45 Mukwiingula, umwi wabaabo bazyi Mulawo wakamwaambila kuti: “Omwiiyi, mukwaamba boobo nkokuti watutukila andiswe.”
46 Mpoonya wakati: “Maawe akulindinywe nomuzyi Mulawo nkaambo mutukka bantu mikuli iiminya kunyamuna, kakuli nywebo nobeni tamusoli kwiiguma mikuli eeyo nokuba akanwe buyo!+
47 “Maawe kulindinywe nkaambo muyaka zyuumbwe zyabasinsimi kakuli bamauso mbabakabajaya!+
48 Ncobeni muliizyi micito yabamauso alimwi mulaizuminizya, nkaambo balo bakajaya basinsimi+ pele nywebo muyaka zyuumbwe zyabo.
49 Nkakaambo kaako busongo bwa Leza abwalo bwakati: ‘Ndiyoobatumina basinsimi abaapostolo, eelyo bamwi bayoobajaya akubapenzya,
50 aboobo zyalani eeli liyooseswa bulowa bwabasinsimi boonse bakajaigwa kuzwa kumalengelo aanyika,*+
51 kuzwa kubulowa bwa Abelo+ kusikila kubulowa bwa Zekariya ooyo iwakajaigwa akati kacipaililo aŋanda.’*+ Inzya, ndimwaambila kuti, izyalani eeli liyooseswa bulowa oobo.
52 “Maawe kulindinywe nomuzyi Mulawo, nkaambo mwakanyanga bantu kkii yaluzyibo. Nywebo nobeni tiimwakanjila alimwi aabo bayanda kunjila mulabalesya!”+
53 Lino naakazwa ooko, balembi aba Farisi bakatalika kumubumba canguzu akumubuzya mibuzyo aimbi minji,
54 kabamuteyede kutegwa bamujanine mulandu mumajwi aakwe.+
Bupanduluzi buyungizyidwe
^ Mu Chigiriki, “Kondikweletesya.”
^ Izina libelesyegwa kwaamba Saatani.
^ Naa “cisuwo cakupimina.”
^ Naa “kalili kabotu.”
^ Naa “unoozwide mumuni.”
^ Mu Chigiriki “kalitali kabotu; ndibi.”
^ Nkokuti, kulisalazya kweelana acilengwa.
^ Naa “zipego zipegwa kubacete.” Amubone Bupanduluzi Bwamabala.
^ Naa “zibotu kapati.”
^ Naa “atempele.”
