Luka 24:1-53
24 Pele mubuzuba bwakusaanguna bwansondo eeyo, bakafwuma kusika kucuumbwe, ikuleta tununkilizyo ntobakabambide.+
2 Nokuba boobo, bakajana bbwe lyakunkulisyigwa kuzwa kucuumbwe,+
3 alimwi nobakanjila mukati, tiibakaujana mubili wa Mwami Jesu.+
4 Kabacigambidwe amakani aaya, amubone! Akati kabo kwakalibonya baalumi bobilo basamide zisani zimweka-mweka.
5 Bamakaintu aaba bakayoowa alimwi bakazumanana kusintama ansi, aboobo ibaalumi aabo bakabaambila kuti: “Nkaambo nzi ncomulangaula muntu uupona akati kabafwu?+
6 Tako muno pe, pele wabusyigwa. Amuyeeye mbwaakamwaambila naakacili ku Galilaya,
7 naakaamba kuti Mwanaamuntu weelede kwaabwa kubantu basizibi akujaigwa aacisamu, pele mubuzuba bwatatu uyoobuka.”+
8 Aboobo bakaayeeya majwi aakwe,+
9 eelyo bakapiluka kuzwa kucuumbwe akuyoolwiida bali Kkumi Aumwi abamwi boonse zintu eezyi zyoonse.+
10 Aaba bakali ba Mariya Magadalene, Joana alimwi a Mariya banyina Jakobo. Abalo bamakaintu bamwi boonse mbobakali limwi bakali kwaambila baapostolo zintu eezyi.
11 Pele makani aaya akalibonya kuba aabufwubafwuba kulimbabo, eelyo tiibakabasyoma bamakaintu aabo.
12 Pele Petro wakanyamuka akubalikila kucuumbwe, eelyo naakasondela wakabona buyo zisani zyamulembo muuba-uba. Aboobo wakazwa ooko kagambidwe kujatikizya cakacitika.
13 Pele amubone! Ibuzuba mbubonya oobo, basikwiiya bobilo bakali kuya kumunzi uutegwa Emau uulampa makkilomita aatandila ku 11 kuzwa ku Jerusalemu,
14 alimwi bakali kubandika akati kabo kujatikizya zintu eezyi zyoonse zyakacitikide.
15 Lino nobakali kwaambaula akubandika makani aaya, Jesu lwakwe kumugama wakasika akutalika kweenda ambabo,
16 pele nokuba kuti bakalimubwene, tiibakamuzyiba pe.+
17 Wakababuzya kuti: “Ino makani nzi aaya ngomwaambaula nomuyaabweenda?” Mpoonya bakaima kabauside.
18 Mukwiingula ooyo uutegwa Kileopa wakati kulinguwe: “Sena uli mweenzu uukkede alikke mu Jerusalemu aboobo tozyi* zintu zyalikucitika mulinguwo mazuba aaya?”
19 Wakababuzya kuti: “Izintu nzi?” Bakamwaambila kuti: “Izintu zijatikizya Jesu waku Nazareta,+ ooyo iwakali musinsimi singuzu mumilimo amumajwi kuli Leza akubantu boonse;+
20 alimwi basilutwe babapaizi abaleli besu mbobakamupa mulandu wakuti ajaigwe,+ eelyo bakamugagaila aacisamu.
21 Pele twakali kulangila kuti ooyu muntu ngonguwe ooyo iwakali kuyoofwutula Israyeli.+ Inzya, alimwi kunze lyazintu zyoonse eezyi, obuno mbuzuba bwatatu kuzwa nozyakacitika zintu eezyi.
22 Kunze lyaboobo, bamakaintu bamwi akati kesu batugambya abalo nkaambo balifwumide kuunka kucuumbwe,+
23 eelyo nibataujana mubili wakwe, baboola kabaamba kuti babona acilengaano cabangelo, ibaamba kuti muumi.
24 Mpoonya ibamwi mbotwali limwi baluunkide kucuumbwe,+ alimwi baakucijana mbubonya oobo mbuli bwali kwaamba bamakaintu, pele walo mwini tiibamubona pe.”
25 Aboobo wakabaambila kuti: “Nywebo nobafwubafwuba abasimyoyo iimuka kusyoma zintu zyoonse nzyobakaamba basinsimi!
26 Sena tiicakali kuyandika kuti Kristo apenge zintu eezyi+ akunjila mubulemu bwakwe?”+
27 Eelyo kutalikila kuli Musa alimwi a Basinsimi+ boonse, wakabapandulwida zintu zyaamba nguwe mu Magwalo oonse.
28 Muciindi bakasika afwaafwi amunzi nkobakali kuunka, pele walo wakacita mbuli kuti ulaindilila.
29 Pele bakamukombelezya kuti ataunki, balaamba: “Kokkala buyo andiswe nkaambo kuyanda kuba kumangolezya alimwi buzuba buyanda kumana.” Aboobo wakanjila akukkala ambabo.
30 Lino naakali kulya* ambabo, wakabweza cinkwa, wakacileleka amane wakacikomauna akutalika kubapa.+
31 Naakacita boobo meso aabo akajalulwa eelyo bakamuzyiba; pele wakazimaana.+
32 Alimwi bakaambauzyanya balaamba: “Sena myoyo yesu tiiyali kupya muzyamba zyesu ciindi naali kwaambaula andiswe munzila, anaali kutupandulwida Magwalo?”
33 Eelyo aciindi nciconya eeco, bakanyamuka akupiluka ku Jerusalemu, okuya bakajana bali Kkumi Aumwi alimwi abaabo bamwi mbobakabungene limwi,
34 ibakaamba kuti: “Masimpe Mwami wabusyigwa alimwi walibonya kuli Simoni!”+
35 Lino abalo bakaluula zyakacitika munzila ambobakamuzyiba naakakomauna cinkwa.+
36 Nobakali kwaamba zintu eezyi walo mwini wakalibonya akati kabo akubaambila kuti: “Amube aluumuno.”+
37 Pele bakaankamana alimwi bakayoowa, kabayeeya kuti babona muuya.
38 Aboobo wakabaambila kuti: “Nkaambo nzi ncomupenga kapati mumizeezo alimwi nkaambo nzi ncomudonaika mumyoyo yanu?
39 Amubone maanza amaulu aangu, musinizye kuti ndendime ncobeni; amundijate-jate mubone, nkaambo muuya tuujisi nyama azifwuwa mbuli zyeezyi nzyomubwene nzyondijisi mebo.”
40 Eelyo naakali kwaamba boobu wakabatondezya maanza amaulu aakwe.
41 Pele kabatanasyoma akaambo kakukondwa kapati akugambwa, wakababuzya kuti: “Sena kuli cakulya ncomujisi aano?”
42 Mpoonya bakamupa cibeela canswi iiyokedwe,
43 eelyo wakacitambula akucilya kabalangilila.
44 Mpoonya wakabaambila kuti: “Aaya ngamajwi ngendakamwaambila nindakacili andinywe,+ kuti zintu zyoonse zilembedwe mu Mulawo wa Musa amu Basinsimi amu Intembauzyo kujatikizya ndime zileelede kuzuzikizyigwa.”+
45 Mpoonya wakajalula mizeezo yabo kutegwa bamvwisye ncaamba Magwalo,+
46 alimwi wakabaambila kuti: “Kulilembedwe kuti: Kristo wakali kuyoopenga alimwi akubuka kubafwu mubuzuba bwatatu,+
47 alimwi kwiinda muzina lyakwe, mulumbe wakuti bantu beempwe kutegwa zibi zilekelelwe+ wakali kuyookambaukwa muzisi+ zyoonse—kutalikila mu Jerusalemu.+
48 Muyooba bakamboni bazintu eezyi.+
49 Alimwi amubone! Ndilamutumina eeco ncaakasyomezya Taata. Pele nywebo amukkale mumunzi kusikila mukatambule nguzu zizwa kujulu.”+
50 Mpoonya wakabasoloda kusikila munsi-munsi aku Betaniya, alimwi ooko wakatambika maanza aakwe akubaleleka.
51 Naakali kubaleleka wakaandaanizyigwa ambabo alimwi wakatolwa kujulu.+
52 Eelyo bakamufwugamina* bamane bakapiluka ku Jerusalemu kabakkomene kapati.+
53 Alimwi lyoonse bakali mutempele kabatembaula Leza.+
Bupanduluzi buyungizyidwe
^ Naa ambweni, “Sena ndonduwe mweenzu olikke mu Jerusalemu uutazyi?”
^ Naa “naakakkede kutebulu.”
^ Naa “bakamukotamina.”
