Marko 4:1-41
4 Alimwi wakatalika kuyiisya kumbali aalwizi, eelyo kwakamubunganina nkamu mpati yabantu. Aboobo wakatanta akukkala mubwato akuzwa kunkomwe, pele nkamu yoonse yakali mumbali, kunkomwe yalwizi.+
2 Mpoonya wakatalika kubayiisya zintu zinji kwiinda muzikozyanyo,+ eelyo naakali kubayiisya, wakabaambila kuti:+
3 “Amuswiilile. Amubone! Sikuminza umwi wakaunka kuyoominza.+
4 Naakali kuminza, mbuto zimwi zyakawida mumbali aanzila, mpoonya bayuni bakaboola akuzilya.
5 Zimwi zyakawida anyika yamabwe aawo aatakali bulongo bunji, eelyo zyakamena cakufwambaana akaambo kakuti bulongo tiibwakali bunji.+
6 Pele izuba nolyakabala, zyakaneta alimwi zyakayuma akaambo kakutasimpa miyanda.
7 Mbuto zimbi zyakawida mumamvwa, mpoonya mamvwa akakomena akuzisyaanikizya, aboobo tiizyakazyala micelo.+
8 Pele zimwi zyakawida mubulongo bubotu, eelyo nozyakamena akukomena, zyakatalika kuzyala micelo iiyungizyidwe ziindi izili 30, izili 60 alimwi azili 100.”+
9 Mpoonya wakayungizya kuti: “Ooyo uujisi matwi aamvwa, aamvwe.”+
10 Lino naakaba alikke, aabo mbaakali limwi antoomwe abali Kkumi Ababili bakatalika kumubuzya kujatikizya zikozyanyo.+
11 Eelyo wakabaambila kuti: “Nywebo mulaamvwisya maseseke+ aa Bwami bwa Leza, pele kuli baabo ibali kunze zintu zyoonse zili muzikozyanyo,+
12 kutegwa nokuba kuti kulanga balakonzya kulanga pele tabakonzyi kubona, nokuba kuti kumvwa balakonzya kumvwa, pele tabamvwisyi caambwa; alimwi kunyina nobayoosanduka kutegwa balekelelwe.”+
13 Alimwi wakabaambila kuti: “Tamucizyi cikozyanyo eeci, aboobo ino mbuti mbomukonzya kuzimvwisya zikozyanyo zimwi zyoonse?
14 “Sikuminza uminza jwi.+
15 Aboobo, aaba nembuto zyakaminzigwa mumbali aanzila ooko jwi nkolyakaminzwa; pele mbobalitambwida buyo, Saatani ulaboola+ akulibweza jwi liminzidwe mulimbabo.+
16 Mbubonya buyo aaba nembuto zyakaminzigwa anyika yamabwe; mbobalimvwida buyo jwi, balalitambula calukkomano.+
17 Nokuba boobo, tabajisi miyanda, pele balazumanana kwakaindi kaniini; mpoonya mbwaasikila buyo mapenzi akupenzyegwa akaambo kajwi, balatyompwa.
18 Alimwi nkozili azimwi mbuto zyakaminzigwa mumamvwa. Eezyi mbaabo ibakalimvwa jwi,+
19 pele kulibilika+ kwamubweende bwazintu obuno* akoongelezya kwalubono+ akuyandisya+ zintu zimwi zyoonse kulabweza busena akusyaanikizya jwi, mpoonya talicizyali micelo.
20 Mpoonya mbuto zyakaminzigwa mubulongo bubotu mbaabo ibaswiilila jwi akulitambula camaanza obilo akuzyala micelo iiyungizyidwe ziindi izili 30, izili 60 alimwi azili 100.”+
21 Alimwi wakabaambila kuti: “Sena lambe noliyasyigwa lilavwumbwa cisuwo* naa kubikkwa mujungusi lyabulo? Sena talibikkwi acibikkilo calambe?+
22 Nkaambo kunyina cintu cisisidwe citakayubununwi; kunyina cintu civwumbidwe kabotu-kabotu citakabi antangalala.+
23 Kufwumbwa uujisi matwi aamvwa, aamvwe.”+
24 Kumane wakabaambila kuti: “Amubikkile maano kuli zyeezyo nzyomutiimvwe.+ Cipimyo ncimupimya, andinywe ncomuyoopimizyigwa, inzya muyooyungizyilwa.
25 Nkaambo kufwumbwa muntu uujisi uyoopegwa azimwi,+ pele kufwumbwa muntu uutajisi, noziba zyeezyo nzyajisi uyoonyangwa.”+
26 Aboobo wakazumanana kwaamba kuti: “Munzila eeyi Bwami bwa Leza buli mbuli muntu nasyanga mbuto mubulongo.
27 Uloona masiku akubuka bwaca, azyalo mbuto zilamena akukomena—pele tazyibi bwini mbozikomena.
28 Bulongo kubugama bulazyala micelo buce-buce, kusaanguna busonga mpoonya makunka, kumamanino kulaba nseke kumakunka.
29 Pele mbwaatubila buyo maila, ulatalika kwaacesa asikela, nkaambo ciindi cakutebula casika.”
30 Alimwi wakaamba kuti: “Ino inga twabukozyanisya anzi Bwami bwa Leza, naa ncikozyanyo nzi ncotukonzya kubelesya kubupandulula?
31 Buli mbuli nseke yamusitada, yalo aciindi noyasyangwa mubulongo inga nenseke nsyoonto kunseke zyoonse zili anyika.+
32 Pele yasyangwa, ilamena akukomena kapati kwiinda zisyango zyoonse akuba amitabi mipati cakuti bayuni bauluka mujulu balajana aakukkala mucimvwule canjiyo.”
33 Wakabaambila jwi lya Leza kwiinda muzikozyanyo zinji+ zyamusyobo ooyu, kufwumbwa buyo kuti kabakonzya kumvwa.
34 Masimpe, taakwe naakali kwaambaula ambabo kakunyina kubelesya cikozyanyo, pele kumbali wakali kubapandulwida basikwiiya bakwe zintu zyoonse.+
35 Alimwi mubuzuba oobo, nokwakaba kumangolezya, wakabaambila kuti: “Atuzabukile mutala eliya.”+
36 Eelyo nobakaambila nkamu yabantu kuti baunke, bakamukkwezyeka mubwato alimwi kwakali mato aambi.+
37 Lino kwakaba guwo pati, amayuwe akali kuuma kubwato, aboobo maanzi akatalika kunjila mubwato cakunga bwakatiibbile.+
38 Pele walo wakalilede kusyule lyabwato, kabikkide mutwe acilitulisyo. Aboobo bakamubusya akumubuzya kuti: “Mwiiyi, sena unyina makani kuti tuyanda kufwa?”
39 Eelyo wakanyamuka akukalalila guwo akwaambila lwizi kuti: “Umuna! Batama!”+ Mpoonya guwo lyakaleka, alimwi kwakaumuna wi.
40 Aboobo wakababuzya kuti: “Nkaambo nzi ncomuyoowede boobu? Sena tamunaba alusyomo?”
41 Pele bakayoowa kapati, alimwi bakalibuzya kuti: “Ino mubwini nguni ooyu? Noliba guwo alimwi alwizi zilamumvwida.”+
Bupanduluzi buyungizyidwe
^ Naa “kwamuciindi ecino.” Amubone Bupanduluzi Bwamabala.
^ Naa “cisuwo cakupimina.”
