Matayo 26:1-75
-
Bapaizi bapangana kuti bamujaye Jesu (1-5)
-
Jesu watilwa mafwuta aanunkilila (6-13)
-
Pobwe Lyakwiindilila lyamamanino alimwi akwaabwa (14-25)
-
Kutalisya Mulalilo wa Mwami (26-30)
-
Businsimi bwakuti Petro ulamukaka Jesu (31-35)
-
Jesu wapaila mumuunda wa Getesemane (36-46)
-
Jesu waangwa (47-56)
-
Wabetekwa kumbele lya Nkuta Mpati Yaba Juda (57-68)
-
Petro wamukaka Jesu (69-75)
26 Lino Jesu naakamanizya kwaamba zintu zyoonse eezyi, wakaambila basikwiiya bakwe kuti:
2 “Mulizyi kuti kwainda buyo mazuba obilo kuzwa sunu kuyooba Pobwe Lyakwiindilila,+ eelyo Mwanaamuntu uyakwaabwa kutegwa akajaigwe acisamu.”+
3 Mpoonya basilutwe babapaizi abaalu babantu bakabungana mulubuwa lwamupaizi mupati iwakali kwiitwa kuti Kayafa,+
4 alimwi boonse bakamvwana+ kuti bamujate* Jesu cabucenjezu akumujaya.
5 Pele bakali kwaamba kuti: “Ikutali ciindi capobwe, kutegwa kutakabi manyongwe akati kabantu.”
6 Lino Jesu naakali ku Betaniya muŋanda ya Simoni sicinsenda,+
7 imukaintu umwi wakajisi nsazi yamafwuta aanunkilila alimwi aadula, wakaboola kulinguwe akutalika kumutila mafwuta aayo amutwe naakali kulya.*
8 Lino nobakabona boobu, basikwiiya bakanyema akwaamba kuti: “Ino nkaambo nzi ncaanyonyoonwa mafwuta aaya?
9 Nkaambo mafwuta aaya naasambalwa mali manji eelyo mali aayo naapegwa kubacete.”
10 Kazyi nzyobakali kwaamba, Jesu wakati kulimbabo: “Ino mumupenzyela nzi mukaintu ooyu? Wandicitila cintu cibotu.
11 Nkaambo bacete munooli limwi lyoonse,+ pele mebo tamunooli andime lyoonse pe.+
12 Imukaintu ooyu naatila mafwuta aaya amubili wangu, wacita oobo kutegwa ndilibambile kuzikkwa.+
13 Ncobeni ndimwaambila kuti, kufwumbwa makani mabotu aaya nkwaayookambaukwa munyika yoonse, ncaacita mukaintu ooyu acalo ciyakwaambwa mukwiibaluka nguwe.”+
14 Mpoonya umwi wabali Kkumi Ababili, uutegwa Judasi Isikariote,+ wakaunka kuli basilutwe babapaizi+
15 akwaamba kuti: “Ino mulandipa nzi ndamwaaba kulindinywe?”+ Bakamusyomezya kumupa mali aansiliva aali 30.+
16 Aboobo kuzwa leelyo, wakatalika kuyandaula ciindi cibotu cakumwaaba.
17 Mubuzuba bwakusaanguna bwa Zinkwa Zitajisi Bumena,+ basikwiiya bakaboola kuli Jesu akumwaambila kuti: “Ino nkuli nkoyanda kuti tukubambile kutegwa ukalide nkuko Pobwe Lyakwiindilila?”+
18 Wakati: “Kamuya mumunzi kuli Ndaba mukamwaambile kuti, ‘Mwiiyi waamba kuti: “Ciindi cangu cibikkidwe cilaafwaafwi; ndilacita Pobwe Lyakwiindilila abasikwiiya bangu muŋanda yako.”’”
19 Aboobo basikwiiya bakacita mbubonya mbwaakabalailila Jesu akulibambila Pobwe Lyakwiindilila.
20 Lino nikwakaba kumangolezya,+ wakalikkede kutebulu abasikwiiya bakwe bali 12.+
21 Nobakali kulya, wakati: “Ncobeni ndimwaambila kuti, umwi akati kanu ulandaaba.”+
22 Mbwaanga makani aaya akabapa kuusa, aumwi wabo wakatalika kumubuzya kuti: “Mwami, sena ndime?”
23 Lino mukwiingula wakati: “Ooyo ngotusunsa limwi mumutiba omwe ngonguwe utiindaabe.+
24 Masimpe, Mwanaamuntu ulamusiya nyoonse, mbubonya mbokulembedwe kujatikizya nguwe, pele maawe+ kumuntu ooyo iwaaba Mwanaamuntu!+ Nocakainda kubota ikuti muntu ooyo naatakazyalwa buyo.”+
25 Lino Judasi ooyo iwakali kuyanda kumwaaba wakaingula kuti: “Rabbi, sena ndime?” Jesu wakati kulinguwe: “Yebo omwini waamba.”
26 Lino nobakacili kulya, Jesu wakabweza mukamu, eelyo naakamana kulumba wakaukomauna+ akupa basikwiiya bakwe kati: “Amubweze mulye. Eeci ciiminina mubili wangu.”+
27 Kumane wakabweza nkapu, wakalumba amane wakabapa kati: “Amunywe mulinjiyo nyoonse,+
28 nkaambo eeci ciiminina ‘bulowa bwangu+ bwacizuminano,’+ ibuyootilwa kutegwa zibi zyabantu banji+ zilekelelwe.+
29 Pele ndimwaambila kuti: Tandikanywi kabili cakunywa cili coonse eeci cizwa kumusaansa kuzwa lino kusikila buzuba oobo mbondiyoonywa waini mupya antoomwe andinywe mu Bwami bwa Taata.”+
30 Mpoonya nobakamana kwiimba nyimbo zyakutembaula* Leza, bakaunka ku Cilundu ca Maolifa.+
31 Mpoonya Jesu wakati kulimbabo: “Nywebo nyoonse mulalebwa masiku aano akaambo kandime, nkaambo kulilembedwe kuti: ‘Ndiyoomuuma mweembezi, eelyo mbelele mutanga ziyoomwaika.’+
32 Pele ndaakubusyigwa, ndiyoosika ku Galilaya nywebo kamutanasika.”+
33 Pele mukwiingula Petro wakati kulinguwe: “Nokuba kuti boonse aaba balebwa akaambo kanduwe, mebo tandikoolebwa pe!”+
34 Jesu wakati kulinguwe: “Ncobeni ndikwaambila kuti, sunu masiku, mukombwe katanalila, ulandikaka ziindi zyotatwe.”+
35 Petro wakati kulinguwe: “Nokuba kuti caamba kufwida antoomwe anduwe, kunyina nenditiikukake pe.”+ Basikwiiya boonse abalo bakaamba mbubonya.
36 Mpoonya Jesu wakasika abasikwiiya bakwe kubusena butegwa Getesemane,+ eelyo wakabaambila kuti: “Amukkale aano nonduunka waalya kuyoopaila.”+
37 Lino wakatolelezya Petro abana ba Zebedayo bobilo, eelyo wakausa akupenga kapati mumoyo.+
38 Mpoonya wakabaambila kuti: “Ndapenga kapati mumoyo cakuti inga ndafwa. Amukkale aano, mulinde antoomwe andime.”+
39 Kumane naakeenda aniini kuyaambele, wakavwuntama ansi akupaila kati:+ “Taata, ikuti naa cilakonzyeka, nkapu+ eeyi aizwe kulindime. Pele ikutali kweelana akuyanda kwangu pe, pele kweelana akuyanda kwako.”+
40 Wakajokela kuli basikwiiya akubajana baloona, mpoonya wakabuzya Petro kuti: “Sena nywebo tiimwali kukonzya kulinda kwawoola lyomwe antoomwe andime?+
41 Amulinde+ akuzumanana kupaila+ kutegwa mutanjili mumasunko.+ Moyo ncobeni ulapya* pele mubili unyina nguzu.”+
42 Alimwi ciindi cabili wakaunka kuyoopaila kati: “Taata, ikuti kacitakonzyeki kuti eeci ciinde ccita kuti mane ndicinywe, akucitike kuyanda kwako.”+
43 Wakaboola alimwi akubajana baloona, nkaambo meso aabo akalilemede.
44 Aboobo wakabasiya, wakaunka alimwi kuyoopaila ciindi catatu, akwaamba kaambo nkamunya.
45 Mpoonya wakajokela kuli basikwiiya akubaambila kuti: “Aciindi mbuli ceeci, muloona akulyookezya! Amulange! Ciindi caswena cakuti Mwanaamuntu aabwe mumaanza aabasizibi.
46 Amunyamuke, atweende. Amubone! Sikundaaba wasika afwaafwi.”
47 Lino naakacili kwaambaula, amubone! Judasi umwi wabali Kkumi Ababili wakaboola ankamu mpati yabantu kabajisi mapanga ankoli, ibakatumwa kuzwa kuli basilutwe babapaizi abaalu babantu.+
48 Lino sikumwaaba wakabapede citondezyo cakuti: “Kufwumbwa ngondiyoomyonta, ngonguwe ooyo; amukamujate akumutola.”
49 Aboobo wakamugama Jesu akwaamba kuti: “Kwaamba, Rabbi!” Mpoonya wakamumyonta.
50 Pele Jesu wakati kulinguwe: “Ino musa walonda nzi?”+ Mpoonya bakaboola bamujata Jesu akumwaanga.
51 Pele umwi wabaabo mbaakali limwi Jesu wakasomona panga lyakwe akuuma muzike wamupaizi mupati akumukosola kutwi.+
52 Mpoonya Jesu wakamwaambila kuti: “Pilusya panga lyako muciyobwedo candilyo,+ nkaambo boonse aabo babweza panga bayoojaigwa apanga.+
53 Sena uyeeya kuti tandikonzyi kumulomba Taata kuti anditumine ndilyonya lino makamu-makamu* aali 12 aabangelo?+
54 Aboobo, ino Magwalo alazuzikizyigwa buti aayo aamba kuti ceelede kucitika munzila eeyi?”
55 Aciindi eeco Jesu wakati kumakamu aabantu: “Nkaambo nzi ncomwaboola kuti mundijate amapanga alimwi ankoli mbuli kuti muboola kuzoojata mubbi? Buzuba abuzuba ndakali kukkala mutempele kandiyiisya,+ pele tiimwakandijata pe.+
56 Pele zintu zyoonse eezyi zyacitika kutegwa malembe* aabasinsimi azuzikizyigwe.”+ Mpoonya basikwiiya boonse bakamusiya akutija.+
57 Aabo ibakamujata Jesu bakamutola kuli Kayafa+ mupaizi mupati, ooko balembi abaalu nkobakabungene antoomwe.+
58 Pele Petro wakazumanana kumutobela alaale kusikila mulubuwa lwamupaizi mupati, mpoonya naakanjila mukati wakakkala ababelesi bamuŋanda kuti abone citiicitike.+
59 Lino basilutwe babapaizi a Nkuta Mpati Yaba Juda yoonse bakali kuyandaula kaambo kakumubejekezya Jesu kutegwa bamujaye.+
60 Pele kunyina nkobakajana nokuba kuti kwakali bakamboni bakubeja banji.+ Mukuya kwaciindi bobilo bakaboola
61 akwaamba kuti: “Muntu ooyu wakati, ‘Ndilakonzya kulimwaya tempele lya Leza akuliyakulula mumazuba otatwe.’”+
62 Mpoonya mupaizi mupati wakanyamuka akumwaambila kuti: “Sena tovwiili noliba jwi lyomwe buyo? Ino ncinzi bantu aaba ncobakutamikizya?”+
63 Pele Jesu wakaumwine buyo.+ Aboobo mupaizi mupati wakati kulinguwe: “Ndikwaambila kuti ukonke kuli Leza uupona kuti ulaamba masimpe akutwaambila naa nduwe Kristo Mwana wa Leza!”+
64 Jesu wakati kulinguwe: “Yebo omwini waamba. Pele nywebo ndimwaambila kuti: Kuzwa sunu muyoobona Mwanaamuntu+ kakkede kujanza lyalulyo lyanguzu+ alimwi kaboola mumakumbi aakujulu.”+
65 Mpoonya mupaizi mupati wakazapula zisani zyakwe zyaatala akwaamba kuti: “Wasampaula Leza! Sena tuciyandika bakamboni abambi? Amulange! Tee mwalimvwida kasampaula Leza.
66 Ino muyeeya buti?” Bakamwiingula kuti: “Weelede kujaigwa.”+
67 Mpoonya bakamuswida mate kumeso+ akumuuma mfwaindi.+ Bamwi bakamuuma mbayi kumeso,+
68 kabati: “Yebo Kristo, ikuti koli musinsimi kotwaambila. Ino nguni wakuuma?”
69 Lino Petro wakalikkede anze mulubuwa, eelyo mubelesi umwi musimbi wakaboola kulinguwe akwaamba kuti: “Ayebo mwakali limwi a Jesu waku Galilaya!”+
70 Pele wakakaka boonse kabamvwide kati: “Tandicizyi ncoamba.”
71 Naakazwa akuya kukaanda kali kumulyango, aumwi musimbi wakamuzyiba akwaambila baabo bakali kooko kuti: “Muntu ooyu wakali limwi a Jesu muna Nazareta.”+
72 Alimwi ciindi cabili wakakazya cakukonka buya kuti: “Tandimuzyi muntu ooyu!”
73 Nokwakainda kaindi kaniini, aabo bakaimvwi mumbali bakaboola akwaambila Petro kuti: “Masimpe ayebo uli umwi wabo, nkaambo mwaambo* wako ulakuyubununa.”
74 Pele wakatalika kulisinganya akukonka kati: “Tandimuzyi pe muntu ooyu!” Mpoonya aawo mukombwe wakalila.
75 Aboobo Petro wakaayeeya majwi ngaakaamba Jesu aakuti: “Mukombwe katanalila, ulandikaka ziindi zyotatwe.”+ Eelyo wakaunka anze akulila kapati.
Bupanduluzi buyungizyidwe
^ Naa “bamwaange.”
^ Naa “naakakkede kutebulu.”
^ Naa “ntembauzyo kuli.”
^ Naa “uliyandide.”
^ Mu Chigiriki, “malegioni.” Mumpi yabasikalumamba bana Roma, legioni yomwe yakajisi basikalumamba bali 4,000 kusikila ku 6,000.
^ Naa “magwalo.”
^ Naa “ŋambawido.”
