Milimo 19:1-41
19 Lino Apolo+ naakacili ku Korinto, Paulo wakainda muzyooko zyamalundu akuselemukila ku Efeso.+ Ooko wakajana basikwiiya bamwi
2 akubabuzya kuti: “Sena mwakatambula muuya uusalala nomwakaba basyomi?”+ Bakamuvwiila kuti: “Swebo tatunamvwide akuti kuli muuya uusalala.”
3 Aboobo wakabuzya kuti: “Ino mwakabbapatizyigwa alubbapatizyo luli?” Bakati: “Alubbapatizyo lwa Johane.”+
4 Mpoonya Paulo wakati: “Johane wakabbapatizya alubbapatizyo lwacitondezyo cakweempwa,+ kaambila bantu kuti basyome yooyo iwakali kuboola musyule lyakwe,+ nkokuti muli Jesu.”
5 Nobakamvwa boobo, bakabbapatizyigwa muzina lya Mwami Jesu.
6 Eelyo Paulo naakabikka maanza aakwe aalimbabo, bakatambula muuya uusalala,+ aboobo bakatalika kwaambaula mumyaambo imbi akusinsima.+
7 Boonse antoomwe, bakali baalumi babalilwa ku 12.
8 Kwamyezi yotatwe wakali kuboola kucikombelo+ akwaambaula cabusicamba. Wakali kupa makani akupandulula cakusalazya munzila iikwelelezya kujatikizya Bwami bwa Leza.+
9 Pele bamwi nobakayumya myoyo yabo akutasyoma, alimwi nobakasampaula Nzila Eeyi+ kumbele lyankamu yabantu, wakabasiya+ akutolelezya basikwiiya. Buzuba abuzuba wakali kupa makani muŋanda mpati yakuswaanganina iyakali aacikolo ku Turano.
10 Wakacita oobo kwamyaka yobilo, cakuti aabo boonse ibakali kukkala mucooko ca Asiya bakalimvwa jwi lya Mwami, iba Juda alimwi aba Giriki.
11 Alimwi Leza wakazumanana kucita milimo mipati iigambya kwiinda muli Paulo,+
12 cakuti notuba tutambala atusani twakulikwabilizya kutombe itwakali kumuguma twakali kutolwa kubantu baciswa,+ eelyo bantu bakali kupona kumalwazi aabo alimwi myuuya mibi yakali kuzwa.+
13 Pele bamwi akati kaba Juda ibakali kweendeenda kabayaabutanda madaimona abalo bakasoleka kubelesya zina lya Mwami Jesu kuli baabo bakajisi myuuya mibi; bakali kwaamba kuti: “Ndamulailila muli Jesu ooyo Paulo ngwakambauka kuti muzwe.”+
14 Lino ibakali kucita boobo bakali bana basankwa basilutwe wabapaizi mu Juda umwi uutegwa Sikeva ibali ciloba.
15 Pele mukwiingula muuya mubi umwi wakati kulimbabo: “Ndilimuzyi kabotu Jesu+ alimwi awalo Paulo+ ndilimuzyi; pele ino nywebo ndinywe bani?”
16 Mpoonya mwaalumi ooyo iwakanjidwe muuya mubi wakamusotokela umwi aumwi wambabo akubazunda boonse, cakuti bakatija amantanda kabaliciside kuzwa muŋanda eeyo.
17 Makani aaya akazyibwa abantu boonse, iba Juda aba Giriki ibakali kukkala mu Efeso; alimwi boonse bakayoowa kapati, eelyo izina lya Mwami Jesu lyakazumanana kulemekwa.
18 Alimwi banji akati kabaabo ibakaba basyomi bakali kuboola kulyaambilila zibi akwaamba micito yabo caantangalala.
19 Kunze lyaboobo, bantu banji akati kabasimasalamuzi bakabungika mabbuku aabo akwaaumpa bantu boonse kabalangilila.+ Alimwi bakasanganya muulo woonse wamabbuku aayo, eelyo bakajana kuti akali kuulwa mali aansiliva aali 50,000.
20 Aboobo ijwi lya Jehova* lyakazumanana kuyaambele akuzunda canguzu kapati.+
21 Lino zintu eezyi nozyakamana kucitika, Paulo wakakanza mumoyo wakwe kuti aakumana kwiinda ku Makedoniya+ aku Akaya, wakali kuyakuunka ku Jerusalemu.+ Wakati: “Ndaakuzwa kooko ndeelede kuyookubona aku Roma.”+
22 Aboobo wakatuma bobilo akati kabaabo bakali kumukutaukila kuya ku Makedoniya, nkokuti Timoteyo+ a Erasito,+ pele walo wakacilikkede kwaciindi cili mbocibede mucooko ca Asiya.
23 Aciindi eeco nciconya kwakaba lupyopyongano+ lupati kujatikizya Nzila Eeyi.+
24 Nkaambo mwaalumi umwi uutegwa Demetriyo, imufwuzi wansiliva, kwiinda mukupanga tukombelo twansiliva twa Atemi wakali kubapa kujana mpindu mpati basyaabupampu mukupanga zintu.+
25 Wakababunganya antoomwe abamwi ibakali kupanga zintu zili boobo akubaambila kuti: “Nobaalumi, mulizyi kabotu kuti buvwubi bwesu buzwa kumulimo ooyu.
26 Lino mulibwene akumvwa ooyu Paulo mbwaaongelezya nkamu yabantu mpati akubapa lusyomo lumbi ikutali buyo muno mu Efeso,+ pele alimwi ulaafwaafwi kucita boobo amucooko coonse ca Asiya, kaamba kuti aaba baleza ibapangwa amaanza aabantu tabali baleza beni-beni pe.+
27 Kunze lyaboobo, cintu cimbi cibi ncakuti taali buyo makwebo eesu aaya aatiisampaulwe, pele alyalo tempele lyaleza mukaintu mupati Atemi lilabonwa kuti ndyabuyo, alimwi bulemu bwayooyo uukombwa mucooko coonse ca Asiya amunyika yoonse bulamana.”
28 Nobakamvwa boobu bakanyema kapati, mpoonya baalumi aaba bakatalika koompolola kuti: “Atemi waba Efeso mupati!”
29 Aboobo kwakaba lupyopyongano mumunzi woonse alimwi caantoomwe bantu boonse bakaguumukila mubbuwa lyazisobano kabayaabukwelaanya Gayo a Arisitarko,+ ibana Makedoniya bakali kweenda a Paulo.
30 Paulo walo wakalilisungwide kunjila mukati mwakali bantu, pele basikwiiya bakamukasya.
31 Nobaba beendelezi bamapobwe alimwi azisobano bamwi ibakali beenzinyina bakamutumina mulomo ikumukombelezya kuti atalibikki muntenda kwiinda mukunjila mubbuwa lyazisobano.
32 Mubwini, bamwi bakali koompolola cintu cimwi kakuli bambi bakali kwaamba cimbi; nkaambo nkamu yabantu yakalinyongene alimwi bunji bwabo tiibakakazyi kaambo ncobakabunganina antoomwe.
33 Aboobo bakagusya Alekizanda munkamu, ba Juda bakamutonkela kumbele, mpoonya Alekizanda wakatambika ajanza lyakwe alimwi wakali kuyanda kulyaambilila kubantu kuti unyina mulandu.
34 Pele nobakazyiba kuti wakali mu Juda, boonse bakatalika koongolola ajwi lyomwe kwamawoola aatandila kuli obilo kuti: “Atemi waba Efeso mupati!”
35 Lino kumamanino mupati wamunzi naakaumuzya nkamu yabantu wakati: “Nobaalumi bamu Efeso, nguni mubwini akati kabantu uutazyi kuti munzi wabana Efeso nguulanganya tempele lya Atemi mupati acikozyanyo cakawa kuzwa kujulu?
36 Mbwaanga makani aaya taakonzyi kukazyigwa, nywebo mweelede kukkalikana ikutali kucita zintu cakubinda.
37 Nkaambo mwaleta baalumi aaba kuno ibatali bafwumpi bamatempele naa basikusampaula leza wesu mukaintu.
38 Aboobo ikuti Demetriyo+ abasyaabupampu mukupanga zintu mbocili limwi bali akaambo amuntu umwi, imazuba aakubeteka milandu nkwaali, abeendelezi bacooko nkobali; abatolane kunkuta.
39 Pele ikuti kamuyandaula cimwi ciinda waawo, ceelede kukosolwa ambungano yabantu iizumizyidwe amulawo.
40 Nkaambo mubwini tuli muntenda yakupegwa mulandu wakutalisya manyongwe akaambo kaceeci cacitika sunu, mbwaanga tunyina kaambo kabotu kali koonse kakulitamizya kujatikizya nkamu yabantu aaba baide kunyongana.”
41 Naakamana kwaamba zintu eezyi, wakaambila bantu bakabungene kuti bamwaike.
Bupanduluzi buyungizyidwe
^ Amubone Makani Aayungizyidwe A5.
