Milimo 2:1-47
2 Lino mubuzuba bwa Pobwe lya Pentekoste+ boonse bakalibungene mubusena bomwe.
2 Ndilyonya kujulu kwakamvwugwa muzuzumo uuli mbuli waguwo lyuungisya iwakazuzya ŋanda yoonse oomo mobakakkede.+
3 Mpoonya bakabona milaka iili mbuli mulilo yakamwaigwa akati kabo, alimwi muntu umwi aumwi wakakkalwa mulaka wamulilo,
4 eelyo boonse bakazula muuya uusalala+ alimwi bakatalika kwaambaula mumyaambo* yiindene-indene mbubonya muuya mbowakali kubapa kwaambaula.+
5 Aciindi eeco ba Juda ibankutwe kukomba ibazwa muzisi zyoonse zyaanyika bakali mu Jerusalemu.+
6 Aboobo muzuzumo ooyu nowakamvwugwa, bantu banji kapati bakabungana alimwi bakazyingwa, nkaambo umwi aumwi wabo wakabamvwa kabaambaula mumwaambo wakwe mwini.
7 Masimpe bakagambwa akumaninwa maano eelyo bakabuzya kuti: “Amubone, sena aaba baambaula tabali bana Galilaya+ boonse?
8 Aboobo ino caba buti kuti umwi aumwi wesu umvwa mwaambo ngotwakazyalwa anguwo?
9 Tobana Patiya, toba Medi,+ tobana Elamu;+ notukkala ku Mesopotamiya, ku Judaya, ku Kapadokiya, ku Ponto akucooko ca Asiya,+
10 notuzwa ku Fuligiya, ku Pamfiliya, ku Egepita akuzyooko zya Libya kufwaafwi aku Kurene; tobeenzu ba Juda antoomwe aba Juda basandule notuzwa ku Roma;+
11 tobana Krete; abana Arabiya, toonse twabamvwa kabaambaula mumyaambo yesu kujatikizya milimo mipati ya Leza.”
12 Inzya, boonse bakagambwa alimwi akuzyingwa kababuzyanya kuti: “Ino eeci caamba nzi?”
13 Pele bamwi bakabaseka akwaamba kuti: “Bakkuta waini uulweela.”*
14 Pele Petro wakaima antoomwe abali Kkumi Aumwi+ akoompolola kuti: “Nobaalumi bamu Judaya anyoonse nomukkala mu Jerusalemu, amuswiililisye akumvwisya majwi aangu aaya.
15 Mubwini bantu aaba tabakoledwe mbuli mbomuyeeya, nkaambo lino ndiwoola lyatatu* lyabuzuba.
16 Pele eeci ncencico cakaambwa kwiinda mumusinsimi Joeli kuti:
17 Leza waamba kuti, ‘“Kumazuba aakumamanino, ndiyootila muuya wangu amuntu uuli woonse, eelyo bana banu basankwa abasimbi bayoosinsima abalombwana banu bayoobona zilengaano abalo bamadaala akati kanu bayoolota ziloto,+
18 alimwi naaba abazike bangu basankwa abasimbi ndiyootila muuya wangu mumazuba aayo, eelyo bayoosinsima.+
19 Alimwi ndiyoocita zintu zigambya kujulu azitondezyo anyika, bulowa, mulilo alimwi amakumbi aabusi.
20 Izuba liyoosandulwa kuba mudima awalo mwezi uyoosalala pyu mbuli bulowa kabutanasika buzuba bwa Jehova* oobo bupati alimwi bulibedelede.
21 Lino muntu woonse wiita zina lya Jehova* uyoofwutulwa.”’+
22 “Nobaalumi bamu Israyeli, amumvwe majwi aaya: Ooyu Jesu muna Nazareta, wakali muntu Leza ngwaakamutondezya caantangalala kwiinda mumilimo mipati, zintu zigambya, azitondezyo Leza nzyaakacita mulinguwe akati kanu,+ mbubonya mbomuzyi nywebo nobeni.
23 Ooyu muntu iwakaabwa kulindinywe kweelana ambwaakakanzide akuzyibila limwi Leza,+ mwakamugagaila acisamu akumujaya kwiinda mumaanza aabantu basizibi.+
24 Pele Leza wakamubusya+ kwiinda mukumugusya mumapenzi aalufwu,* nkaambo tiicakali kukonzyeka kuti azumanane kwaangwa andulo.+
25 Nkaambo Davida waamba boobu kujatikizya nguwe: ‘Ciindi coonse ndibona Jehova* kumbele lyangu, nkaambo uli kujanza lyangu lyalulyo kutegwa nditazungaanizyigwi.
26 Akaambo kaceeci moyo wangu wakakkomana awalo mulaka wangu wakakondwa kapati. Alimwi ndinookkede kandilangila;*
27 nkaambo tokandisiyi* mu Cuumbwe* nokuba kulekela uusyomeka wako kuti abole.+
28 Wandizyibya nzila zyabuumi; uyoondipa kukondwa kapati kumbele lyako.’*+
29 “Nobaalumi, bakwesu, amundizumizye ndimwaambile cakutayoowa izyasikale Davida, kuti wakafwa akuzikkwa,+ alimwi cuumbwe cakwe nkocili akati kesu kusikila sunu.
30 Akaambo kakuti wakali musinsimi alimwi wakalizyi kuti Leza wakakonka kulinguwe acikonke cakuti wakali kuyoobikka umwi walunyungu lwakwe* acuuno cakwe cabwami,+
31 wakazibonena limwi zyakumbele eelyo wakaamba zyabubuke bwa Kristo kuti kunyina naakasiigwa mu Cuumbwe,* alimwi mubili wakwe tiiwakabola pe.+
32 Leza wakamubusya Jesu ooyu, alimwi kujatikizya makani aaya toonse tuli bakamboni.+
33 Aboobo akaambo kakuti wakasumpulwa kuyookkala kujanza lyalulyo lya Leza+ akutambula muuya uusalala wakasyomezyegwa kuzwa kuli Bausyi,+ watila ceeci ncomubona akumvwa.
34 Nkaambo Davida kunyina naakaunka kujulu, pele walo mwini waamba kuti, ‘Jehova* wakaambila Mwami wangu kuti: “Kkala kujanza lyangu lyalulyo
35 kusikila mane ndikabikke basinkondonyoko kuba cilyatilo camaulu aako.”’+
36 Aboobo, bamuŋanda ya Israyeli boonse abazyibe kuti masimpe Leza wakamucita kuba Mwami+ a Kristo, ooyu Jesu ngomwakajaya aacisamu.”+
37 Lino nobakamvwa majwi aaya, bakayaswa kumoyo, alimwi bakati kuli Petro akubaapostolo bambi: “Nobaalumi, bakwesu, ino tucite buti?”
38 Petro wakabaambila kuti: “Amweempwe,+ alimwi umwi aumwi wanu abbapatizyigwe+ muzina lya Jesu Kristo kutegwa mulekelelwe zibi zyanu,+ eelyo mulatambula cipego citabbadelwi camuuya uusalala.
39 Nkaambo cisyomezyo eeci+ cijatikizya ndinywe abana banu, alimwi abaabo boonse bali kule, boonse aabo Jehova* Leza wesu mbatiite kulinguwe.”+
40 Alimwi amajwi aambi manji wakabapa bumboni cakulomya akuzumanana kubakombelezya, kati: “Amubatantamuke bantu bazyalani eeli babyaabi kutegwa mutanyonyookeli antoomwe ambabo.”+
41 Aboobo aabo ibakatambula majwi aakwe camoyo woonse bakabbapatizyigwa,+ alimwi ibuzuba oobo kwakayungizyigwa bantu babalilwa ku 3,000.+
42 Eelyo bakazumanana kubikkila maano kukuyiisya kwabaapostolo, ikuyanzana antoomwe,* ikulida antoomwe+ alimwi akupaila.+
43 Masimpe bantu boonse bakatalika kuyoowa, alimwi zintu zigambya azitondezyo zyakatalika kucitwa abaapostolo.+
44 Boonse aabo ibakaba basyomi bakali antoomwe alimwi bakabikka antoomwe zintu zyoonse nzyobakajisi kuti kababelesya boonse,
45 alimwi bakali kusambala lubono lwabo+ anyika akwaabanya boonse mali aakajanwa, kweelana akubula kwaumwi aumwi.+
46 Alimwi buzuba abuzuba bakalisungweede kuswaangana mutempele amuzeezo omwe, alimwi bakali kulya zyakulya zyabo mumaanda aaindene-indene akwaabana zyakulya zyabo cakukondwa kapati alimwi kumoyo kakutuba,
47 kabatembaula Leza akukkomaninwa abantu boonse. Alimwi buzuba abuzuba Jehova* wakazumanana kubayungizyila baabo ibakali kufwutulwa.+
Bupanduluzi buyungizyidwe
^ Naa “mumilaka.”
^ Naa “waini mupya.”
^ Nkokuti, cakuma 9 koloko yamafwumofwumo.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa ambweni, “mukumwaangununa kuzyaanzyo zyalufwu.”
^ Amubone Makani Aayungizyidwe A5.
^ Mu Chigiriki, “mubili wangu unookkede kaulangila.”
^ Mu Chigiriki, “tokasiyi buumi bwangu.”
^ Naa “Cikkalilo Cabafwu.” Amubone Bupanduluzi Bwamabala.
^ Naa “kubusyu bwako.”
^ Mu Chigiriki, “umwi wamicelo yamucibuno cakwe.”
^ Naa “Cikkalilo Cabafwu.” Amubone Bupanduluzi Bwamabala.
^ Amubone Makani Aayungizyidwe A5.
^ Amubone Makani Aayungizyidwe A5.
^ Naa “ikwaabana zintu.”
^ Amubone Makani Aayungizyidwe A5.
