Zekariya 12:1-14
12 Ngaaya makani mapati:
“Ndeeli jwi lya Jehova kujatikizya Israyeli,” mbwaamba Jehova,Ooyo wakatandabula majulu,+Iwakabikka ntalisyo yanyika,+Alimwi iwakapanga muuya* wamuntu uuli mulinguwe.
2 “Lino ndilapa kuti munzi wa Jerusalemu ube nkapu iipa bantu boonse bauzingulukide kudadalika; alimwi cisi ca Juda amunzi wa Jerusalemu ziyoosinkililwa.+
3 Mubuzuba oobo ndiyoopa kuti munzi wa Jerusalemu ube bbwe lilemu* kubantu bamisyobo yoonse. Boonse aabo ibasoleka kulinyamuna bayoolicisa citaambiki;+ alimwi masi oonse aamunyika ayoobungana kuti aulwane.+
4 Mubuzuba oobo,” mbwaamba Jehova, “ndiyoopa kuti mabbiza oonse ayoowe abasikwaatanta kuti basondoke. Meso aangu ayoolanga bamuŋanda ya Juda, pele ndiyakoofwaazya mabbiza oonse aabantu bamumasi.
5 Aboobo basilutwe ba Juda bayoolyaambauzya mumyoyo yabo kuti, ‘Bantu bakkala mu Jerusalemu mbabatupa kuba anguzu zizwa kuli Jehova wamakamu Leza wabo.’+
6 Mubuzuba oobo ndiyoopa kuti basilutwe ba Juda babe mbuli mbaula iizwide mulilo akati kankuni ambuli munzenge wamulilo mumilwi yamaila ngobatebula,+ eelyo bayakuumpa bantu boonse babazingulukide kulubazu lwakululyo alwakulumwensyi;+ nokuba boobo Jerusalemu uyookkalwa alimwi mubusena bwakwe,* inzya mu Jerusalemu.+
7 “Jehova uyoosaanguna kufwutula matente aa Juda, ikutegwa bulemu* bwabamuŋanda ya Davida alimwi abulemu* bwabantu bakkala mu Jerusalemu butakabi bupati kapati kwiinda bwa Juda.
8 Mubuzuba oobo Jehova uyoobakwabilila koonse-koonse bantu bakkala mu Jerusalemu;+ eelyo ooyo uuyaabudadalika* akati kabo mubuzuba oobo uyooba mbubonya mbuli Davida, abalo bamuŋanda ya Davida bayooba mbubonya mbuli Leza, mbuli mungelo wa Jehova kumbele lyabo.+
9 Ncobeni mubuzuba oobo ndiyakwaanyonyoona masi oonse aaboola kuzoolwana Jerusalemu.+
10 “Ndiyootila muuya waluzyalo awakukombelezya aali bamuŋanda ya Davida alimwi aabantu bakkala mu Jerusalemu, aboobo bayoolanga kuli yooyo ngobakayasa,+ eelyo bayoomulila mbubonya mbobalila mwana simuzyalwaalikke; bayakuusa kapati akaambo kanguwe mbubonya mbobausa akaambo kamwana mutaanzi kuzyalwa.
11 Mubuzuba oobo kulila kwamu Jerusalemu kunooli kupati, mbubonya mbuli kulila kwaku Hadadirimoni mu Cibanda ca Megido.+
12 Cisi ciyoolila, mukwasyi umwi aumwi uyoolila ulikke; mukwasyi wabamuŋanda ya Davida uyoolila ulikke, abalo bamakaintu babo bayoolila balikke; mukwasyi wabamuŋanda ya Natani+ uyoolila ulikke, abalo bamakaintu babo bayoolila balikke;
13 mukwasyi wabamuŋanda ya Levi+ uyoolila ulikke, abalo bamakaintu babo bayoolila balikke; mukwasyi wabamuŋanda ya Simeyi+ uyoolila ulikke, abalo bamakaintu babo bayoolila balikke;
14 amikwasyi yoonse iisyeede iyoolila, mukwasyi umwi aumwi uyoolila ulikke, abalo bamakaintu babo bayoolila balikke.
Bupanduluzi buyungizyidwe
^ Naa “muya.”
^ Naa “cintu ciminya.”
^ Naa “mubusena bumweelede.”
^ Naa “bweebesi.”
^ Naa “abweebesi.”
^ Naa “uuwizukide kapati.”
