Zekariya 14:1-21
14 “Amubone! Buzuba bulaboola, ibuzuba bwa Jehova, eelyo zintu zyako iziyoosaalwa kuzwa kulinduwe* noziyakwaabanwa kazicili mulinduwe.
2 Ndiyoobunganya masi oonse kuti alwane Jerusalemu; eelyo munzi uyoozundwa, aalo maanda ayoosaalwa, alimwi bamakaintu bayoojatwa akoonwa. Cisela cabantu bamumunzi bayootolwa mubuzike, pele aabo bayoosyaala akati kabantu aabo tabakajaigwi pe mumunzi.
3 “Jehova uyakuunka kuyoolwana masi aayo,+ mbubonya mbwalwana mubuzuba bwankondo.+
4 Mubuzuba oobo imaulu aakwe ayoolyata a Cilundu ca Maolifa,+ icilangene amunzi wa Jerusalemu kujwe; eelyo Cilundu ca Maolifa ciyakwaandulwa akati, kuzwa kujwe* kusikila kumbo,* eelyo kuyooba kkuti lipati kapati; kumane cisela cacilundu ciyooswenzyegwa kunyika, mpoonya cisela cimwi ciyooswenzyegwa kumusanza.
5 Lino nywebo muyootijila kukkuti lyamalundu aangu, nkaambo kkuti lyamalundu liyoosika mane ku Azeli. Muyootija, mbubonya mbomwakatija akaambo kakuzungaana kwanyika mumazuba aa Mwami Uziya wa Juda.+ Eelyo Jehova Leza wangu uyooboola, alimwi basalali boonse bayooba anguwe.+
6 “Mubuzuba oobo takukabi mumuni uumwekesya+—izintu ziyakwaangana akaambo kakutontola kapati.
7 Ibuzuba oobo buyooba buzuba butanabwenwe ibuzyibidwe kuti mbuzuba bwa Jehova.+ Takukabi syikati naa masiku pe; alimwi ciindi camangolezya kuyooba mumuni.
8 Mubuzuba oobo maanzi aabuumi+ ayookunka kuzwa ku Jerusalemu,+ cisela cangawo ciyookunkila kulwizi lwakujwe*+ mpoonya cisela cangawo cimbi ciyookunkila kulwizi lwakumbo.*+ Eeci ciyoocitika ciindi cacilimo aciindi camupeyo.
9 Jehova uyooba Mwami wanyika yoonse.+ Mubuzuba oobo Jehova uyooba buyo omwe,+ alyalo zina lyakwe liyooba buyo lyomwe.+
10 “Cisi coonse ciyoosanduka akuba mbuli cooko ca Araba,+ kuzwa ku Geba+ kuyoosika ku Rimoni+ kumusanza kwamunzi wa Jerusalemu; eelyo uyoobuka akukkalwa bantu mubusena bwanguwo,+ kuzwa ku Mulyango wa Benjamini+ mane kuyoosika kubusena ikuli Mulyango Mutaanzi, akuyoosika ku Mulyango Waku Kkona, akuzwa ku Ngazi ya Hananeli+ mane kuyoosika kuzikandilo zyamisaansa zyamwami.
11 Eelyo bantu bayookkala mulinguwo; kunyina limbi nuuyoosinganizyigwa kuti unyonyoonwe,+ alimwi mu Jerusalemu bantu bayookkala cakuliiba.+
12 “Nceeci cisubulo Jehova ncayoobelesya kusubula bantu bamisyobo yoonse ibayoolwana Jerusalemu:+ Nyama yamibili yabo iyoobola kabaimvwi amaulu aabo, meso aabo ayoobola muzikomba zyangawo, ayalo milaka yabo iyoobola mukanwa lyabo.
13 “Mubuzuba oobo Jehova uyoobanyonganya kapati mulicabo; aboobo umwi aumwi wabo uyoojata janza lyamweenzinyina, alimwi janza lyakwe liyakuuma janza lyamweenzinyina. +
14 Cisi ca Juda acalo ciyoojatikizyigwa munkondo ku Jerusalemu; aboobo lubono lwamasi oonse aazingulukide luyooyobololwa, ilubono lunji kapati, nkokuti ngolida, nsiliva alimwi azisani.+
15 “Alimwi cisubulo cili boobo ciyoosikila mabbiza, mamyuulu,* inkamela, mbongolo, alimwi abanyama boonse bavwubwa ibali munkambi eezyo.
16 “Bantu boonse basyeede mumasi oonse aaboola kuzoolwana Jerusalemu bayakuunka mwaka amwaka+ kuyookotamina* Mwami, Jehova wamakamu,+ alimwi akuyoosekelela Pobwe lya Zivwuka.+
17 Pele kufwumbwa musyobo akati kamisyobo yabantu bamunyika uutakaunki ku Jerusalemu kuyookotamina Mwami, Jehova wamakamu, imvwula taikabawidi pe.+
18 Lino ikuti musyobo wabana Egepita utakabooli akunjila, imvwula taikabawidi pe. Pele bayoosubulwa acisubulo eeco Jehova ncabelesya kusubula masi aayo aatabooli kuzoosekelela Pobwe lya Zivwuka.
19 Eeci nceciyooba cisubulo cacibi cabana Egepita acacibi camasi oonse aatabooli kuzoosekelela Pobwe lya Zivwuka.
20 “Mubuzuba oobo, imajwi aakuti ‘Kusalala nkukwa Jehova!’+ ayoolembwa amilangu yamabbiza. Alimwi mpoto zyakujikila+ zyamuŋanda ya Jehova ziyooba mbuli mitiba+ iili kumbele lyacipaililo.
21 Mpoto zyakujikila zyoonse mu Jerusalemu amu Juda ziyoosalala alimwi ziyooba zya Jehova wamakamu, eelyo boonse aabo ibapa zipaizyo bayoonjila akubelesya mpoto zimwi kujikila. Mubuzuba oobo takukabi limbi muna Kanana* muŋanda ya Jehova wamakamu.”+
Bupanduluzi buyungizyidwe
^ Nkokuti, munzi waambwa mukapango 2.
^ Naa “kumapaswido aazuba.”
^ Mu Chihebrayo, “kulwizi.”
^ Nkokuti, Lwizi lwa Mediterranean.
^ Nkokuti, Lwizi Lutajisi Buumi.
^ Aaba mbanyama bazyalwa ikuti mbongolo yaswaangana abbiza.
^ Naa “kuyookomba.”
^ Naa ambweni, “simakwebo.”
