Zekariya 7:1-14
7 Mpoonya mumwaka wane wa Mwami Dariyo, ijwi lya Jehova lyakamusikila Zekariya+ mubuzuba bwane bwamwezi wafwuka, nkokuti mwezi wa Kisilevi.*
2 Bantu baku Beteli bakatuma Sarezere a Regemu-meleki antoomwe abantu bakwe kuti bakakombelezye Jehova,
3 kwiinda mukubuzya bapaizi baŋanda* ya Jehova wamakamu alimwi abasinsimi kuti: “Sena ndeelede kulila mumwezi wasanu,+ akuliimya kulya mbubonya mbondali kucita mumyaka minji eeyi yainda?”
4 Ijwi lya Jehova wamakamu lyakandisikila alimwi kaliti:
5 “Kobaambila bantu boonse bamucisi alimwi abapaizi kuti, ‘Ciindi nomwakali kuliimya kulya akulila mumwezi wasanu amumwezi waciloba,+ kwamyaka iili 70,+ sena ncobeni mwakali kuliimya kulya akaambo kandime?
6 Alimwi ciindi nomwakali kulya akunywa, sena tiimwakali kulilida akulinywida nobeni?
7 Sena tamweelede kuswiilila majwi ngaakaambilizya Jehova kwiinda mubasinsimi bakaindi,+ eelyo munzi wa Jerusalemu aminzi yakauzingulukide noyakakkedwe bantu alimwi noyakali muluumuno, aleelyo cooko ca Negebi aca Sepela nozyakakkedwe bantu?’”
8 Ijwi lya Jehova lyakamusikila Zekariya alimwi kaliti:
9 “Mboobu mbwaamba Jehova wamakamu, ‘Amubeteke cabululami bwini-bwini,+ alimwi amube aluyando lutamani+ alimwi aluse kuli umwi amweenzinyina.
10 Mutaunini mukamufwu naa mucaala,+ imuzwakule+ naa mucete;+ alimwi mumyoyo yanu mutakanzi kucitilana zintu zibyaabi.’+
11 Pele bakaluujisi kukaka kubikkila maano,+ bakamufwutatila+ mubusicinguni bwabo, alimwi bakasinka matwi aabo kuti batamvwi.+
12 Bakayumya myoyo yabo mbuli bbwe liyumu nta lya daimondi,+ eelyo tiibakali kutobela mulawo* alimwi amajwi Jehova wamakamu ngaakatuma amuuya wakwe kwiinda mubasinsimi bakaindi.+ Aboobo Jehova wamakamu wakanyema kapati.”+
13 “‘Lino mbubonya balo mbobatakali kuswiilila nindakali kwiita,+ ambebo tiindakali kuswiilila nobakali kwiita,’+ mbwaamba Jehova wamakamu.
14 ‘Eelyo mebo ndakabamwaya mumasi oonse ngobatakazyi+ mbuli kuti bamwaigwa akambizi, aboobo cisi cakaba matongo musyule lyabo, kwakanyina muntu wakali kwiinda naa uujokela mulincico;+ nkaambo bakapa kuti cisi ciyandisi cibe cintu cigambya kapati.’”
