Ciibalusyo citupa coolwe cibotu cakuyeeya zilongezyo zili kumbele iziyooboola akaambo kacinunuzyo, zilongezyo mbuli bubuke. Tanaakali makanze aa Jehova kuti bantu kabafwa. Nkakaambo kaako cilatucisa kapati ciindi muyandwa wesu nafwa. (1Kor. 15:26) Jesu cakamucisa kubona basikwiiya bakwe kabalila akaambo kakusweekelwa Lazaro. (Joh. 11:33-35) Mbwaanga Jesu ncikozyanyo cilondokede ca Bausyi, tuli masimpe kuti Jehova awalo cilamucisa notuli mubuumba akaambo kakufwidwa muyandwa wesu. (Joh. 14:7) Jehova ulayandisya kuyoobabusya babelesi bakwe bafwide, andiswe tweelede kucilangila ciindi eeco.—Job. 14:14, 15.

Mbwaanga Jehova ngu Leza uucita zintu kabotu-kabotu, ncamaano kusyoma kuti bubuke buyoocitwa munzila iili kabotu. (1Kor. 14:33, 40) Muciindi camalila, ambweni kuyooba kuvwoomana kutegwa tutambule bafwide. Sena mulazinzibala kuyeeya bubuke, kwaambisya ciindi nomwafwidwa? (2Kor. 4:17, 18) Sena mulamulumba Jehova akaambo kakutupa cinunuzyo akutuyubunwida mu Magwalo kuti bafwide bayoobuka?—Kol. 3:15.

• Mbaani beenzinyoko naa bacibbululu mbomuyandisya kwaakubona alimwi?

• Ino mbantu bali baambidwe mu Bbaibbele mbomuyandisya kwaakubona akubandika ambabo?